Mazmur 84 - Eipomek

“Allah el un dam bana ati, tuba patanulule,” nyabuk yupu

¹ Mot nyana ati, deiyok kun nang ara, Korah yala nang arye nyabik mot. Mot si Gitit, nyalamik mot atonun nyabik.

² Na ni Allah an un dam yangana ati tenenun ning ara, yata wiribuka do? Pia weik kanye deilinune. Na ni Allah Yahweh, ance aning-aning nirya talimince, im deice yin talin malaikat nirya, sik weik deiyoknye ulyame.

³ Ati, nara, ‘Allah Yahweh, an si eren aik dam yatinye’ tenen, na kanye arye, pia patanulule. Wininirye, na nong ap, kanye ap dopropnirye, Allah an kam un deiyoknye deice deibuka, ‘Ancuk melipnilyame,’ nyabuka, an siuk erekinirye, morokunune.

⁴ Allah ance kukalima maka, ‘Talye balamle,’ tenenyap maka babye, ance elti, aik kintinilyame. Tonda kukalima maka, ‘Im deice talye lakalul,’ tenenyap maka babye, Allah ance sik manak kintinilyame. Tonda, sik aik donak ara, anti ining ning obuka, uku dongolyangan aik dam, sik mi deilinyake. Na ni Allah Yahweh anda, aning-aning nirya talimince, im deice yin talin malaikat nirya, sik weik deiyoknye ulyame. Tonda, “Allah anda, na weik ninye deiyoknye Raja ulyame,” nyabuka, moropkine.

⁵ Pia dipkoprob na ni Allah, an un dam unamak nang ara, pia telebuk ukirye, asum-asum nirya, an siuk erenyakce, mot uk nyabuka, si erekikirye unamake. Akunum tenena ati, ‘teleb,’ nyapne.

⁶ Na ni Allah ance mikip arepminyeba, pia telebuk wininamak nang ara, weik kanye deibuka, kil-kil asa arye unamake. Wininyaka deice arye, Allah an si erekinyak talak ara, sik urasin ara, ‘An pia tenen mutuku, Yerusalem mutuku tamuk dilbibyak arye, an si erenamkiabe,’ tenebuka, wininyak nang ara, pia telebuk kilinamlyame.

⁷ Allah an si erena ati, sik anang bisik kabul deiyok koubuka, banmakca ani, minop talak Israel nang arye, engelamik mutuku, Baka mutuku bisik bikirye, amutuku noutam bikca babye, ance anang melipminyeba, amutuku urasin tamuplirye, mek pukuka balamle atonun kibuka, deipnamlame. Tonda, amutuku noutam bacebuk, Allah arye mok areplyeba ceplirye, aminyan datalak, amutuku mekwen weik deipnamle.

⁸ Sik anang, Sion mutuku bana ati, bisik banmakce talak ara, nun ni Allah, ance mikip arepminyeba, mikip kibikirye, mikip uplyeura, Sion mutuku dam binamake. Sion mutuku bikce talak ara, Allah el dam wekelbinamake.

⁹ Na ni Allah Yahweh anda, aning-aning nirya talimince, im deice yin talin malaikat nirya, sik weik deiyoknye ulyame. Ati, ‘Narye anti moropkin yupu ara, kekepnamnilam’ tenen, moropkine. Tonda, ‘Yakop birye deibukba, dadeipdanin, yangalamik nang ati, Allah ance kalikuka melilalumnye kekepnilyam’ tenen, moropkine. Akunum tenen ati, teleb nyapne.

¹⁰ Tonda, nun ni Allah, ance nun deiyoknye Raja melibuka talipminyeura, elda pia diksukumuk wininamle. Tonda, ‘Ance akunum wibuka deiplumnye bira, talipminyeura, elda an amu tam ulirye, pia telebuk wininamle’ tenen, moropkine.

¹¹ Teleb weik ning ara, tonok sum Allah an si eren aik dam yanuka eipkitinyeura, telebe teneptinye. Bukni, yupa weik seribu sum ara, talye yukak daunmatinye babye, telebe kume. Tonda, na ara, an si eren aik bublan dam kalikna pil doptinye babye, pia telebe. Bukni, malye wininyak nang, sik teleb aik binuka uptinye babye, aning telebe kume.

¹² Aning ara, talye ati kum nyapne. Allah anda aning-aning deice tam talibuka weiknye umince, kiting dirina ulamle touk, an dirina ara, nun deice deilisilyame. Tonda, ance im deice unyak yin talin malaikat, sik deiyoknye ulyame. Tonda, Allah anda erebuka umince, nunti kaliksiminyeba, nun mal olan nang, nun dam kum yanganyake. An amu tam ubyeba melisilyame. Allah Yahweh arye, tuba-tuba aning-aning yamubuka aresiminyeba, yuk mutuku nang arye, nunti si eresinyake. Yata nang do nirya, malye winina kumce, diksukumuk wininyak nang ati, nun ni Allah Yahweh ance, wininyak nang ati, aning-aning nirya yamubuka aresilyame. Allah ancuk nunti bico tenepsimince, pia weik teleb ning tonok babye, ton kum batakasilyame. Aning nirya, yamubuka aresilyame.

¹³ Na ni Allah Yahweh anda, aning-aning nirya talimince, im deice yin talin malaikat nirya, sik weik deiyoknye ulyame. Yata nang do nirya, antibuk diba tenekinyak nang ara, ance teleb kiliminyeba, weik kanye deibikirye, kil-kil asa arye unamake. Daud birye nyabuk.