Mazmur 83 - Eipomek

Nun Israel yala nang ati, ‘Anang nirya opnuyab,’ tenesinyak nang nirya ara, ‘Allah arye wenebuka oplirye, sirya daknamle’ tenen, morobuk yupu

¹ Asap birye, aMazmur mot yupu sekuk. Asap birye nyabuk yupu ara, ani.

² Se nun ni koproba Allah, nun ikin ning talibuka unamap talak ara, ‘Anda talye tunim abuka, kum unamlam’ tenen, moropkiyabe! Se nun ni koproba Allah, yupu nyana kumce, tunim abuka pera una atonun, pia kum unalam bukni, ‘Adibaryuk, yanuka melipnamsilam’ tenen, moropkiyabe.

³ Deiyok ara, wini talak ara, ‘Allah ara, nun pia like,’ tenekinyak nang arye, an mapu koproba, nun Israel yala nang ati, ‘Olbinuyap’ tenen, akunum kintibuka bululamake. Sik anang nirya arye, an Allah ati, ‘Elda nun pia like,’ tenekinyak nang arye, mania kanye bobuka, maknya kintipdakirye, ‘Adiparyuk Israel nang olbinuyabe,’ nyabuka, akunum kintinibuka tikinyake.

⁴ Tonda, sik anang arye, weik kel bikamika arye, ‘Allah el mapu koproba, sik Israel nang opnuyap’ tenen, dungnubuka bulubikceura, yupu akunum talinyake. Allah ance, nun Israel nang ati, melibuka kaliksilyam bukni, ayu nang arye, ‘Israel yala nang nirya, obuka sirya dakdanamabe’ tenen, akunum yupu talinyake.

⁵ Sik ayu nang arye, ayupu nyalanyake. “Nun nirya kintinipnamabe! Ara, sik Israel yala nang nirya ara, obuka sice buklopnamabe. Ayala nang nirya ara, kum kipdeipnamabe!” nyabuka, yupu talilanyake. “Tonda, Israel yala nang nirya obuka, sirya dakikceura, yuk mutuku unyak nang nirya arye, sik si Israel ton, tuba pia kum tenenamake. Israel nang ati, lubakinauk unamake,” nyabuka, yupu talikirye, nyanyake.

⁶ Deiyok ara, sik ayu nang ap, sik dam unyak nang ap arye, “Neika bulubikirye, tonok kanye bobuka, sik Israel yala nang nirya ara, olbinamabe,” nyabuka, nyalin yupu deice arye nyalanyake. Ara, sikce anda Allah ati, malye yupu nyalakirye, “Allah el mapu koproba nirya ara, obuka sirya dakdanamabe,” nyabuka, nyalin yupu deice arye, akunum yupu talinyake.

^7-8 Sik yu nang arye, ninye ona ati, yupu talinyak nang ara, ani. Ara, sik Edom tam unyak nang ap, tonda, Ishmael yala nang ap, daulamik. Tonda, sik Moab tam unyak nang ap, Hagar yala nang ap, tonda, sik Gebal yala nang ap, Amon yala nang ap, Amalek yala nang ap, ‘Neika unamabe,’ nyabuka, nyalin yupu deice arye nyalanmik. Tonda, sik Pilistea mutuku nang ap, weik asik el si ara, Tirus mutuku noutam ulamik nang ap, nyalin yupu deice arye nyalanmik.

⁹ Tonda, aning atonun, sik Asyur mutuku nang ap, sik ayala-yala nang ap, neika bulubikce, nyalin yupu deice arye nyalamik. Sik anang ara, mikip weik ukirye, anggun ap, Lot tam nang nirya opmunyeura, olyanamsiak nang ati, atonun obuka, sirya daknamlum’ tenen, moropkine.

¹⁰ Ati ara, ‘Allah ance, sik Midian tam nang nirya oplum touk, aolyanamsiak nang ati, atonun obuka sirya daknalameʼ tenen, moropkine. Aning atonun, ance ninye si Sisera ap, Yabin ap, weik mek balamuk, el si ara Kison mekin dam, kunum opmumnye atonun, wini talak nunti olyangan nang babye, oplopnalameʼ tenen, moropkine.

¹¹ Anang bitinye ara, weik asik el si ara, Endor mutuku noutam arye oplume. Ayala nang bitinye ap, sik yin talin nang ap opmunyeba, sik nirya ara, tukwak kunum kipdobuk.

¹² Na ni Allah, nun Israel nang ati, mal olyangasikce nang, sik ninye deiyok nang nirya ara, obuka sirya dakanamlame. Ara, min talak noutam, sik ninye deiyok nang Oreb ap, Zeep ap ati, oplum atonun ati moropkine. Tonda, anang deiyok nang, sik amu tam deiyok-deiyok pil talibuka unyak nang babye, anda Allah arye, anang nirya obuka, sirya dakalanalume na nio. Ara, Zebah ap, Salmuna ap, oplum atonun ati nyapne.

¹³ Sik anang bitinye ara, ‘Kume, Allah arye kalikilul mutuku, Israel yala nang unyak mutuku nirya ap, sik wa winak ap, nirya ara, alubuka doprobibirye, nun amutuku tuku nirya talipnamabe,’ tenelamikce, periplobike.

¹⁴ Se, na ni Allah, nun Israel nang ati olyangasikce nang nirya ara, ance opmince, sice buklopnamlame. Winipmanto ara, weik kum peiyang nyabuka yalirye, sesal selamle tuku butbuta bobalamle, kum anya ulye touk, anang babye, kum kipdeipnamlyame na nio! Tonda, ninye arye, sik gandum du tekeinmace talak ara, kum arye talye balamle ning, dobuka bolamle touk, an Allah arye, ayu nang nirya ara, kum kupdeipnamlyame na nio!

¹⁵ Winipmanto ning ton, weik uku arye, mutuku dam, yo palpal weik ning, awamlya nirya babye, aning nirya ara, weik uku arye dipliba, amutuku deice palamle ning nirya, kum kipnin balamle atonun, nun olyangasinyak nang nirya opnulyame, na nio.

¹⁶ Aning ati ara, nun olyangasinyak nang ati, weik kum ap, liman ap, bebeya laklamle ning ap arye, anang yakuka dopkwetepnalame. Tonda, Allah ance, weik mikip kum ap, weik mok ap bobuka, ayu nang, sik mutuku noutam dopkwetepminye ura, sik anang nirya, ilil weik upnamle.

¹⁷ Allah ance anang nirya ati, kanye imun ning arepminyeura, sik nirya arye, pia alye weik daknamake. Ance nun mal olan nang wenepmince, opminyeura, sik tam nang arye, an Allah Yahweh ati, ‘Se, wini talak ara, anye Yahweh el tonok, enamabe,’ tenepkitinge, tenepne na nio.

¹⁸ Na ni Allah, narye moropkin ning ara, ani. Ance sik anang ati, wenebuka opminyeura, sik nirya ara, alye weik daknamake. Tonda, ance arepminyeura, ‘Sik kanye boktopyeba, kanye teniltonauk unamake’ tenen, moropkine na nio. Allah ance anang opminyeba, akunum dibikceura, aminyan talak yuk-yuk mutuku nang nirya arye, anang nirya ati, ‘Sikda daupye, sikda malye nang ulamik,’ tenenamake. Utenena ati moropkine na nio.

¹⁹ Bukni, weik mambul ning ara, ani. Ara, yuk Allah ton dipkoprob pia kum ulule. Anda Allah Yahweh, aning-aning nirya taliplumce, pia deice tam erebuka ulyama ati, Pia Mikip Weik Deiyoknye ulyam bira, an tonoka. Tukwak mutuku sirya, im sirya nirya babye, ancuk taliplumce, weik deiyoknye ulyame. Ati, dipkoprob anda Allah tonok ulyame. Aning ati ara, nun Israel yala nang ati, mal pilyangasinyak nang arye, aning nirya kel biktingura, teleb kibuka uptinge. Aning tenepnarye, anti moropkine na nio! Asap birye, aMazmur mot yupu sekuk.