Mazmur 82 - Eipomek

Allah arye, im deice unyak deiyok-deiyok nang ati, yupu bokeibukce, wenebuk yupu

¹ Ninye si Asaf birye, aMazmur mot yupu sekuk. Asaf birye nyabuk yupu ara, ani. Im deice bukni, ninye yupu bokolinyaka ara, Allah el bulyak arye, tikuka yupu nyapdeibuk. Ara, im deice unyak weik deiyok kibuka, mikip weik unyak nang bulubuka deibukce, sikti, wenen yupu bokuka, arebuk.

² Allah arye nyabuk ara, ani. “Anggun im deice deiyok talibuka ululum ning ara, yata talak arye, talye-talye yupu nyabuka, tukwak ninye yupu bokeipnamlum do? Anggunce malye ululum ning ara, bataknamlume! Ara, sik tukwak nang, pia malye unyak nang ati, ‘E, sikda nun kayapu nang atonun unyake’ tenen, malye winibikce ning aupmalye babye, sik malye ulamik touk, yupu bokuka, kum wenenamlume.

³ Ati, aning bataklumce, sik tukwak nang kwaknamne mapu ap, mitang asa unyak nang ap ati, diksukum kibuka, yupu bokeipmunce, teleb kibuka melinamlume. Aning atonun, aning-aning talina kumce, pia kankan nang ap, mikip kum upmalyeba, yuk nang amu tamuk unyak nang ap ati, melibuka kaleknamlume.

⁴ Tonda, aning atouk, sik yu uplyeba, malye weik wininyak nang arye, sik bona talena kumce, talye kankan nang ap, mitang asa unyak nang ap ati, ‘Malye kipdeibikirye, ikin ning sik nong deice deibikcak’ tenen, melipmunce, lyelonamlume. Aning ara, talye ati kume.

⁵ Sik pia malye weik wininyak nang ara, weik arye kum kel bikamike. Tonda, ‘Teleb winin ning ara, ani’ tenen, dipkoprob moubuka kum tenenyake. Ati ara, talye-talye bakirye, malye winin ninguk talibuka, wininyak deice arye, sikda pia kunuknak noutamuk banyake. Sik adeiyok nang arye, pia malye weik wininyak deice arye, yuk-yuk nang nirya eibikirye, sik babye malye wininyake. Winipmanto ara, tukwak mutuku nirya amu tam bulul keil ara, long-long aplyeba, mutuku kon nirya, tokna pakuka sakalamle atonun, sik malye wininyaka deice arye, yuk-yuk nang nirya babye, eibikirye malye wininyake. Wininyak deice ara, Allah arye, ‘Aning ara, wininamlume. Aning ara, pia kum wininamlume,’ nyana yupu nirya ara, sikce kum kilisinyake.

⁶ Minop talak ara, na Allah arye, sik malye winina deiyok nang ati, nyapse. ‘Narye aning-aning talibuka, deice tam erebuka, Pia Mikip Weik Deiyoknye, Allah ununa ati, anggun babye, mikip weik ululum ati, “Na kanye ara, anggunda na mapu koproba atonun ulume,” nyapse.

⁷ Nyapse bukni, anggunda dipkoprob mikip ululum nang bukni, aminyan talak ara, talye tukwak mutuku nang dibilamak touk, anggun babye, dipnamlume. Talye tukwak nang bukni, ninye deiyok kibuka unyak nang dibilamak touk, anggun im deice deiyok nang ululum bukni, pia malye weik winiluluma ati, anggun babye, talye dipnauk upnamlume.

⁸ Ati, se nun ni Allah, ance nunti, ‘Aning wininamlume. Aning ara, pia kum wininamlume,’ nyabuka, diksukum yupu uk nyasilyam atonun kibuka, nun tukwak mutuku sirya, im sirya nirya noutam unyap nang ati ara, yupu nyapdeipnamsilyame! Deiyok ara, ance tukwak mutuku sirya, im nirya noutam unyak nang yala-yala nirya ara, ancuk nun nirya ati, talisilyame! Anda, nun Deiyoknye ulyama ati, ancuk nunti, yupu bokeipnamsilyame.