Mazmur 81 - Eipomek

Allah weik tonun bico tenebuka, Israel nang melilul bukni, Israel nang arye, malye winin ninguk, tuba-tuba winilamika ati, sekuk yupu

¹ Ninye si Asaf birye, aMazmur mot yupu sekukce, Allah yupu mot nyana deiyoknye biti arebuk. Amot ara, yuk mot el si Gitit, lelim nyalamle touk ubuka nyanamlume. Asaf birye nyabuk yupu ara, ani.

² Anggun Israel nang nirya ara, kekepnululume! ‘Nun mal olan nang arye opsikcak’ tenen, kalekuka melisilirye, mikip aresulul Allah ati, nun nirya arye, el si erebuka, ‘Anda pia telebe,’ nyabuka, si erenamkiabe. Ara, nun apu koproba Yakub birye, si erelamuk Allah ati, nun babye, ‘Naio, anda pia telebe,’ nyabuka, kil-kil kanye bobuka, weik yupu deice arye nyanamabe.

³ Allah el si erebuka kina ati, mot nyanamap talak ara, mot lelim nyan ning, el si ara, rebana arye, amot nyanamabe. Tonda, alat musik el si kecapi ap, gambus ap arye, mot nyabipyopura, ninye kekebikirye, kanye delinamake.

⁴ Tonda, wala winiryuk tiklamle talak ara, pong-pong an ning, el si terompet arye ton pong-pong anamlume! Ara, winiryuk wala tiklamle talak, weik kwalya kwalinyap talak ara, terompet dobuka pong-pong anamlume.

⁵ Wininamluma ara, talye ati kume. Deiyok ara, Allah arye, nun Yusuf yala nang ati, ‘Wininamlume,’ nyapdeiamsuk touk wininamaba atia! Atonun, nun apu koproba Yakub birye, si erelamuk Allah, elce, ‘Winiryuk wala tiklye talak ara, terompet arye pong-pong apmunyakarye, weik kwalya kwalipmunce na si erepnamnulume,’ nyapdeipsuka ati, aninguk wininamabe.

⁶ Tonda, nun apu koproba, Yusuf ap, el mapu silip nirya ati, Allah arye, ‘Aning ara, pia wininamlume,’ nyapdeibuk. Ara, Yusuf birye amutuku batakuka, Mesir mutuku ulamik nang ati, olbinamuk talak ara, Allah arye, ‘Aning wininamlume,’ nyapdeiamuk touk, wini talak nun babye atonun wininamabe. Allah arye, ‘Aning winipnamlume,’ nyapdeipsuk talak ara, ayupu min kum kekelamse. Asaf birye nyabuk.

⁷ Bukni, Allah arye ayupu nyapdeipsuke. “Anggunda moubuka teniplulume! Ikin weik ning anggun takunya deice wamsuk ning ara, naryuk aning dobuka kum kipdeipse. Sik Mesir mutuku nang arye, dilamsik pil ati, keil kina ning, el si keranjang, ikin weik ning dobuka, bobalamlum ning ara, na Allah aryuk, aikin ning ara dopromsa deice arye, kanam kipdeipsise.

⁸ Anggun Israel nang ara, imun kanye weik bobuka, ulamlum talak ara, anggunce nati, “Se, nun ni Allah, lobuka melipsilyame!” nyabuka, moropnulumba, naryuk melibuka lyepromsise. Ara, na Allah ara, tia talakuk, weik dua noutam unmasak arye, anggun moropnulum yupu kekepsirye, anggunti lyepromsise. Tonda, anggun Israel nang, mek pia kum uamuk mutuku, Meriba mutuku noutam ulamlum talak ara, na Allah aryuk, mek kintinibuka arepsise.

⁹ Ati, na Allah arye anggunti, ‘Na tenen nang unamak’ tenen, akunum wipdiamsise Israel nango, kekeplulume! Narye anggunti, wenen yupu ton nyapnusine! Se, anggun Israel yala nang nirya ara, narye nyapmasin yupu moubuka kekepnutumopura, teleb uptume!

¹⁰ Anggun Israel nang kan-kan ara, yuk mutuku nang arye, si erenyak isa ati, ‘Nun ni,’ nyabuka, atalye ning ati, pia si kum erenamlume! “Aning ara, pia meme,” nyapmasine! Atonun, yuk mutuku nang arye, isa si erenyak ning ati, tuku deice kutam dipdongobuka, atalye ning ati, pia si kum erenamlume. Na Allah arye nyapmasine.

¹¹ Nara, anggun ni koproba Allah, na si Yahweh unune. Na siuk erenululume. Anggun Mesir mutuku noutam, ikin weik ulamlum talak ara, na Allah aryuk lopdeipsiseura, yuk teleb mutuku bobinamsise. Ati, aminyan talak nirya babye, anggun patapsilye ning ati, din ning do, yuk ning do nirya ara, ‘Melibuka arepsilyame,’ nyabuka, moropnumunyopura, narye anggun patapmasilye ning nirya arenamsine.

¹² Ati, narye, “Anggun Israel yala nang ara, anggun si bambol weik tonun anggunce si akuka moropmunyopura, narye anggun patan ning weik tonun arepsiniba, dinamlume!” Na Allah arye, ayupu nyalamsise bukni, anggunce na yupu kum kekelamnulume. Diba, anggun Israel yala nang ara, narye nyalamsise yupu ati, ‘Se, diba na nio, aninguk kekebibirye, wininamabe’ tenen, na amu tam kibuka kum ulamlume. Ayupu nirya ara, batakalamlume.

¹³ Winibuka mangkau kinauk winilamnuluma ati, anggun maknya kintinibuka winilamlumce, ‘Kume, na kanye aryuk, teninyap ninguk talibuka wininamabe,’ tenebuka winilamlume.

¹⁴ Se, ‘Na mapu’ tenen, wipdeiamsise Israel nang arye, na nyasunum yupu kekepnutumopura, aning ara, pia telebe. Atonun, anggun Israel yala nang ara, na Allah arye, “Aning wininamlume. Diksukum bisikuk binamlume. Teleb winin ning ara, ani,’ nyabuka, peteresunun yupu ara, kekebuka utumopura, teleb uka!

¹⁵ Na nyasinye yupu kekepmunce, dipkoprob winipmunyopura, narye, anggun on nang nirya ara, minop obuka weneptinirye, anggun amu tamuk deiptinye. Ara, na taruk mikip arye, Israel yala nang, anggun mal olan nang ati, wenebuka optinye, nyapsine. Allah arye nyabuk.

¹⁶ Na Allah ati, ‘Nun lik,’ teneninyak nang nirya ara, na Allah dam yakirye, ‘Ilil weik unamtingʼ tenen, patapnile. Tonda, ‘Na Allah arye, anang wenebuka opnamne talak ara, pia awininamne’ tenen, patapnile.

¹⁷ Na Allah ara, na patanulul ning ara, ani. Ara, ‘Narye Israel nang ati, pia teleb din ning arepsitinye,’ tuba tenenune. Tonda, ‘Keil deiya pum tam wamlye mong mek ara, kwebukapnirye, anggunti arepsitinye,’ tuba tenenune.