Mazmur 80 - Eipomek

Israel ninye lyena ati, Allah morobuk yupu

¹ Mot wibuka sena deiyoknye, Asaf birye kita oulamle ning, el si ara, Bunga Bakung deice libuka nyanmok.

² Diba na ni Allah, anda Israel ninye ati, basam weilamak touk, nun melina ati, pia kalikuka melisilyamnye uminya ati ara, nunce moropkiyap ning, moubuka kekenamlyame. Tonda, Yusup birye deibukba, el yala ninye arye, dadeipdanin banyak ninye nirya ap ara, ‘Ancuk talipmince, melinamlam’ tenen, moropkine. An uminyak ara, an pil don nang, sik malaikat si ara, Kerub dana-dana tam bukikirye, anda anoutamak ulyamnye birye, an nong nirya ara, dirina weik mil dang-dang akululnye, anti moropkine.

³ An mikip ap, dirina ap ara, Manasye yala ninye ap, Benyamin yala ninye ap, Efraim yala ninye ap, deice delinamsilyame. ‘Tonda an mikip ara, nun deice yan deipsimince, ancuk yanuka lyelonamsilam’ tenen, moropkine.

⁴ Diba, nun ni Allah ancuk, nun malye unyap ning nirya, kum kipdeipsimince, an dirina arepsiminyeba, telebuk unamabe. Tonda, ninye ati bico tenesimince, nun talima tamubuka delinamsile. Winipsimince, lyepsiminba, telebuk unamabe.

⁵ Na ni Allah Yahweh ara, aning-aning nirya taliplumce, im deice yin talin malaikat nirya, sik weik deiyoknye ulyamce, an mapu nirya arye anti, “Nun yan melipsilyame,” nyabuka morokinyak ning ati, dan talak arye kekepnamsilam do? Nun malye ulamupu ning ati, Allah ance derepsulum ning ara, yata talak tonap atonun derepnamsilam do?

⁶ Winipmanto ara, ninye arye roti kwaning dobuka, sik mapu arelbalamak touk kibuka, Allah ance, nun an mapu ati, kanye imun ninguk arisiminyeba, pia engena uk unyabe. Nunda, engebuka asing maka deicuk unyabe.

⁷ Na nio ance, nunti ikin weik ning weik arepsimince, bataksulumba, nun unyap mutuku bukni, nun kayapu dana-dana tam, daunyak nang nirya arye, nunti, yep-yep abuka nalisinyake. Nun mal olan ninye arye, ‘Obuka daluptibye,’ tenesinyakce, kanye deibuka, akutusinyake.

⁸ Ati ara, nun ni Allah Yahweh ara, aning-aning nirya taliplumce, im deice yin talin malaikat nirya, sik weik deiyoknye ulyame. Ancuk nun malye wininyap ning nirya, kum kipdeipsimince, an dirina arepsiminyeba, telebuk unamabe. Tonda ninye ati bico tenesimince, nun talima tamulinamsile. Winipsimince, lyepsiminba, telebuk unamabe.

⁹ An ‘Naʼ tenen, ninye, nun Israel yala ninye ara, Mesir mutuku ulamupuba, ance anggur tapu yala dobuka, yukak koulamak touk, an mapu dobuka, yuk mutuku ninye ulamik mutuku noutamak koupnamsilame. Yuk mutuku ninye aning-aning nirya, amutuku ulamik bukni, Allah ance dobuka donoklumce, nunda amutuku noutamak punubuka deipsulume.

¹⁰ Nun ni Allah, ance anggur tapu yala teleb ning, Mesir mutuku arye dobuka boyalumce, tuku palibuka, teleb kipdeiplumce, koupmalumba, pabukce, amutuku nirya akunum langdibuk. Ara, ance tuku kwepdeipsiminba, anggur tapu yating tuku pum tam bilirye, bongobuka weik balamle touk, nun Israel ninye amutuku noutam, weik akunum unyabe.

¹¹ Winibuka deice, atapu taruk aniryuk bokukce, mutuku dup dana-dana nirya ara, siklipdongobuk. Tonda amutuku tiklamuk yo, el si ara, aras yo nirya ara, anggur tapu pabukce, kwatibuka siklipdongobuk.

¹² Atapu el taruk ara, bongobuka binamuka ani, keting yangan tam, weik laut mekwen kup-kup tam biyuk. Tonda, el bok mouse sirya ara, otam keting kumulban tam, weik pera mutuku, Efrat mek biyuka dam biyuk. Ara, nun Israel ninye aniryuk, amutuku noutamak ara, akunum pia weik koubupe.

¹³ Na ni Allah, ance atapu duk ati, keil poka wipdongoplum ning ara, yata deiyok ati, uluploplumba, ninye yuk nang banmakirye, atapu duk talye dakalonyak do?

¹⁴ Apoka ara, bai basam arye yanuka, pirilamuka ani, daklobukba, bai tam ulamle ning, ayala-ayala nirya, talye wekuka yangakirye, yanuka dinyake. Ara, nun Israel ninye ati, yuk mutuku nang arye, wekuka yanuka osinyaka ati, nyapkine.

¹⁵ Ati ara, na ni Allah Yahweh, aning-aning nirya taliplumce, im deice yin talin malaikat nirya, sik weik deiyoknye ulyamnye ati ara, ‘Im deice arye ance nun tam tamubuka, yanuka dipdesimince, melipsutum’ tenen, moropkine. Winipsimince, an mapu nun unyap ning nirya ati, moubuka kel kinamsilyame. Nunda ance, ‘Naʼ tenen, anggur tapu atonun nang unyaba ati, nyapne.

¹⁶ Aning ara, talye ati kum nyapkine. Nun, an mapu nirya ara, anggur tapu atonun ninye unyaba anya arye, adiparyuk lyepnamsilyame. Tonda, an bidamnye, sirik taruk arye talibuka kouamlumnye, anggur tapu yating ara, moubuka kalikinamlyame. Nunda, ninye arye mapu deibikirye, moubuka kwangnalamakba, nelamak atonun, nunda Allah ance moubuka kwaknalamsulumba, nebuba ati, moropkiyabe.

¹⁷ Winyamsulum bukni, wini talak ara, Allah ance bataksulumba, ninye yuk nang arye, an anggur tapu kwinibuka, uku dongolamak touk, winipsiake. Tonda, ance nunti, yu upkukce, bataksulumba, kum danin banmasile.

¹⁸ Ance wibuka, an sirik taruk tam deiamsulum nang ara, ance pia ati melinamsilame. Nunda, Allah ance deibuka, kwaknalamsulumba, nebupu nang ati ara, ‘Ance tonap mikip arepnamsilyame’ tenen, moropkine.

¹⁹ Winipsiminyopura, nun an dam arye leibuka, yukak kum binamabe. An dam anyuk pia unamabe. Tonda, ance nun unamabak, tuba melipsiminyopura, nunce antibuk, kanye deibuka, an siuk erenamkiyabe.

²⁰ Diba, nun na ni Allah Yahweh, aning-aning nirya taliplumce, im deice yin talin malaikat nirya, sik weik deiyoknye ulyamnye, ance nun malye unyap ning nirya, kum kipdeipsimince, an kanye teleb deice aniryuk dinamsilame. An dirina ap, mikip ap arepsimince, lyepdopsiminyopura, nun nirya ara, telebuk unamabe, Daud arye nyabuk.