Mazmur 8 - Eipomek

Raja Daud birye, “Allah el si Yahweh ara, pia telebuk ulule,” nyabuka, mot sebuk yupu

¹ Daud mot senmok deice arye nyabuk.

² Nun ni Allah Yahweh, ninye mutuku-mutuku nirya arye, an siuk erekinyake. Nun ni Allah an si Yahweh, anda nun Ninye Deiyoknye ulyame. An si ap, ance winilyam ning ap, pia teleb ulula anya arye, ninye kekebikirye, laka nyalbalamikiba, ninye im sirya, mutuku sirya nirya unyak ninye arye, kel bikinyake. Ninye arye, ‘Se, im noutamak ulul ning nirya ara, weik mambule,’ tenenyak bukni, dipkoprob aning nirya ara, mitik mambul uk ulule. Ance pia teleb winilyam ning ap, an ap, an dirin ap ara, dipkoprob pia mambul ulule.

³ Ance, ‘Wininamake,’ tenelamlum touk, milo mapu babye, mitik ton akunum nepnin banyak mapu babye, anti, “Se, nun ni Allah elda pia telebuk ulule,” nyabuka, an si erekinyake. An siuk erekinyaka ara, talye ati kume. Ara, malye weik unyak ninye nirya, amitik mapu arye an si erekinyakba, kibicopura, yupu kum nyapmanto unyake. Ara, malye wininyak ninye arye, ‘Allah nun like’ tenen, yanikinyak ninye ap, an olana atonun unyak ninye ap, tonda, ‘Allah arye wenesulula ati ara, nunce kwang dakna ati, el ulul ning ara, malye kilinamabe’ tenen, unyak ninye ap nirya ara, yupu nyapmanto kum unamake.

⁴ Allah ance im kwepdeiplumce, wala ap, kurya ap nirya, kwepdeiplum ning nirya ara, na asing arye elinunce, ‘Se, aning ara pia telebe’ tenen, mambul kanye bonune. An mining taruk arye, im noutamak ulul ning nirya kwepdeiplumce, ‘Asukumuk unamle,’ tenelamlum touk, deiplumba, tuba aulul touk, na asing arye dinye talak ara, narye ‘Se, aning ara pia telebe’ tenen, mambul kanye bonune.

⁵ Im noutamak kwepdeaimlum ning ara, pia mambul ning ati ara, aning nirya eipnyopura, utenenune. ‘Kume, ninye ati ance tenesiminye ning ara, ance yata ning deiyok ati, nun tukwak ninye ati melibuka kalikisilyam do? Tonda, ninye arye deibikcopura, dadeipdanin balamica ani, unyak mapu nirya ara, ance yata deiyok ati, bico tenesimince, melibuka kalikisilyam do?’ tenenune.

⁶ Nun ni Allah, an ap, an im deice melin nang, sik malaikat nirya ap, dipkoprob weik mambul ululumce, aning-aning nirya deice tam ululume. Bukni, ninye tukwak ninye ara, mitik tonun arye, sik malaikat amu tam kwepdeipsulume. Im deice ulul ning nirya deice tam ululba, nunda aning nirya amu tamuk deipsulum bukni, nunda teleb kibuka kwepdeipsuluma ati, ton tam ninye arye, ton tam ninye ati, ‘Sikda telebe,’ nyabuka si erelanyake.

⁷ Tonda, Allah ance ninye tukwak ninye kwepdeipsulumce, ‘Sikda tukwak mutuku ulul ning nirya talibuka deiyok nang unamak’ tenen, aning nirya ara, nun amu tam deipmunyeba, nun tukwak ninye arye, tukwak mutuku noutamak kam ulul ning aning-aning nirya, nuncuk talibuka, weik deiyok nang unyabe. Aning nirya ara, nun yan amu tam ululba, nunda aning nirya deice tam atonun unyabe.

⁸ Ati ara, ninye tukwak ninye amu tam ululba, nunce deiyok talibuka, deice tam unyap ning ara ani. Ara, ninye arye weilamak kam ulul ning aning-aning nirya, talibuka deiyok nang unyabe. Ara, domba basam ap, sapi basam ap, ninye arye weilamak ning ap, tonda bai mutuku kam ulul ning ayala-yala nirya ap ara, ‘Ninye arye talinamake’ tenen, kwepdeiplumce, aning nirya nun amu tam deiamsulumba, talinyabe.

⁹ Tonda, maka im deice laklamle babye, laut mekwen pum tam ulul mekwen pum bal ap, laut mekwen noutamak kam ulul ning aning-aning nirya ap, laut mekwen noutamak balamuk ning nirya babye, ‘Ninye aniryuk talinamak’ tenen, ninye kwepdeipsulumce, aning nirya, nun amu tam deiamsulume.

¹⁰ Aning ati ara, nun ni Allah Yahweh, ninye im sirya, mutuku sirya nirya arye, an siuk erekinyake. Nun ni koproba Allah Yahweh, anda nun Ninye Deiyoknye ulyame. An si ap, ance winilyam ning ap, pia teleb ulula ati ara, ninye kekebikirye, laka nyalbalamikiba, ninye mutuku-mutuku nirya unyak ninye arye, kel kinyake. Raja Daud birye nyabuk.