Mazmur 79 - Eipomek

Yuk mutuku nang arye, Israel mutuku nang nirya obikba, ikin kanye bobikce, Allah ati, “Melibuka lyepsilyame!” nyabuka, morobik yupu

¹ Ninye si, Asaf birye, aMazmur mot yupu sekuk. Asaf birye, sekuk ning ara ani. Se, na ni Allaho, yuk pera mutuku nang ara, nun mutuku koproba yanuka, alubuka dopropmasiake. Ara, ance, ‘Israel nang ara, asukumuk pia aunamake,’ tenepsulumce, areamsulum mutuku ati nyapne. Anti diba kum tenenyak nang arye, an si erena ati, pia teleb lek aik ara, akunum weikikce, malye kipdeibik. Tonda, nun weik asik Yerusalem mutuku noutam nirya babye, obuka sirya dakikce, ulubuka sice buklopsikba, pia malye kiplobike.

² Tonda, an amu tam unyakce, an pil donyak nang, sik Israel yala nang weik tonun obike. Oplobikce, tuku lukna kumce, ‘Talya lakuka bace maka nirya arye, adipmek nang, sik nong dipnamak’ tenen, lak sukum tuku deice talye deiplobik. Winibuka deiplobika ati, maka ap, bai tam talye kam ulye ning ap arye, yanuka adipmak nang, sik nong nirya ara, adiparyuk dipnamake.

³ Yuk mutuku yu nang arye, an ‘Naʼ tenen, nang, Israel yala nang weik tonun obik talak ara, Yerusalem weik asik noutam nirya ara, mek talye delilamle mek atonun, obik nang, sik ining ara, dana-dana nirya biyuk. Tonda, amutuku nang yupa pia weik tonun akunum obika ati, tuba kam unmek nang, mitik tonunuk unmeka ati, akunum dibik nang, sik nong dobuka, tuku lukmanto kum ubuka ati, akunum adipmek nang, sik nong nirya ara, talye asukumuk batakmeke.

⁴ Aning nirya ara, nun dana-dana tam unyak nang nirya ara, amutuku eipsikirye, “Se, sik Yerusalem mutuku ulamik nang ara, pia malye unmake,” nyabuka, malye yupu nyasinyake. Sik yuk mutuku nang arye, nunti, nalipsikirye, akutubuka malye yupu weik tonun nyasinyake.

⁵ Ati ara, nun ni Allah Yahweho, yata sum arye ton, nun malye ulamupu ning ati, yu upkiliba, ‘Anang ati, na likʼ tenen, wenepnamsilam do? Anda pia, malye kanye bonamsilam do? Ance, ‘Na tenen ninye, Israel nang arye, yuk talye ning ati, Nun ni,’ nyabuka, si erelamika ati, weik uku buk dilamle touk, an yu weik upkiliba, pia malye kanye uk bobuka, wininamsilam do?

⁶ Aning kum bukni, nunce moropkiap ning ara, ‘An Allah ati, diba tenena kumce, kel kum bikamkik nang, yuk-yuk mutuku nang ara, sik deiceuk an yu teneplum ning ara, weik tonun delinalam’ tenen, moropkiabe na nio. Sik ayuk mutuku nang arye, anti, diba tenebuka, kum bikamkikce, ance nyasilyam yupu, pia kum talinyake. Tonda, ayala yuk-yuk nang ap, sik deiyok-deiyok nang ap arye, ‘Allah Yahweh, elcuk melibuka lyepsutue’ tenen, an si erebuka, anti pia kum morokinyake. Ati, sik yala yuk-yuk nang ati, wenebuka opnalame. Aning ati tenebuka, moropkiabe na nio.

⁷ Sik yuk mutuku nang, wenebuka opnalama deiyok ara ani. Ara, an ‘Naʼ tenen, nang, nun apu koproba Yakub birye deiamukba, dadeipdanin yangalamupu Israel yala nang ati, sik yuk-yuk mutuku nang arye, akunum olyangalamsikce, sice buklopmasiake na nio. Tonda, nun Israel nang ulamupu mutuku-mutuku nirya, akunum malye kipdeipmasiakba, atalak ara, nun mutuku koproba, oldemuk ulule.

⁸ Se, na ni Allaho, nun wini talak unyap nang arye, anti moropkiabe. Ara, ‘Nun apu yapu arye, an yupu yanilamikce, pia malye weik ulamik ning nirya ara, ance tuba tenipmince, nun wini talak unyap nang ati, weik tonun kum wenamsilam’ tenen, moropkiabe na nio. Aning kum bukni, ance weik tonun bico tenepsimince, minop yaminyak arye melibuka lyepnamsilam’ tenen, moropkiabe na nio. Deiyok ara, ani. Sik yuk-yuk mutuku nang arye, yanuka opsikce, nunda dobuka, pia amu tamuk deipsikce, pia malye akunum kipdeipsika ati, imun kanye bobuka ulamupu ati, moropkiabe na nio.

⁹ Ati ara, nun si erekinyab Allaho, anda nun Lyena Deiyoknye usilyama ati, ‘Ancuk yanuka melipnamsilam’ tenen, moropkiabe. Ara, talye ati kuma. Deiyok ara, ance lyepropsiminyopura, yuk nang nirya eibikirye, anti, ‘Se, Allah Yahweh ara, dipkoprob mikip weik ap, teleb ap ulule,’ nyabikirye, an siuk erenamkiak tenena ati moropkiabe. Tonda, nun Israel nang ara, ‘Nunce malye weik wininyap ning nirya ara, mangkau kipsimince, aning nirya, kum kipdeipsiminyopura, nun ikin usilye ning ara, melibuka lyepnamsilam’ tenen, moropkiabe na nio. Aning babye talye ati kume. Deiyok ara, ance akunum lyepropsiminyopura, yuk nang nirya eibikirye, anti, sikce, ‘Se, Allah Yahweh ara, dipkoprob pia telebnye ulule,’ nyabikirye, an siuk erenamkiake.

¹⁰ Tonda, sik yuk-yuk mutuku yala nang nirya arye, nunti, “Se, sik Israel nang arye, si erenyak Allah ara, dan sukum unmalce, kum melibuka lyesulul do?” nyabuka, ‘Anti malye yupu nyapkicak’ tenen, moropkiabe na nio. Ati, ‘Winibuka malye nyapkicak,’ tenen ati, ‘Naio, sik yuk-yuk mutuku nang arye, an amu tam ulamupu Israel nang, weik tonun oltaklamikba, sik ining weik balamuka ati, aning kwang dakana ati, ‘Ance ayu nang obuka, sice buklopnalam’ tenen, moropkiabe. Sik yala yuk-yuk nang obuka, sirya dakminyopura, nun wini talak kam tuba unamap Israel nang nirya ara, aning nirya eipnamabe. Tonda, sik yuk-yuk mutuku nang nirya arye, aning eibuka biknamkiake.

¹¹ Tonda, sik yuk mutuku nang arye, nun tam nang tomobuka obikce, sik mutuku bobinamikce, wenen aik dongobikba, ‘Malye nyabuka, engenyak yupu ara, an dam yatuba, ance kekepnalam’ tenen, moropkiabe. Na nio, an taruk ara, pia mikip weik ukulul touk, an mikip weik arye, sik yuk mutuku nang ati opnalame. Winipnalama deice arye, sik anang arye, ‘Nun akunum tomobuburye, wenen aik dongobupu Israel nang, adiparyuk opnamabe,’ tenen, tuba tenenyak nang ara, ‘Ance nun kayapu nang lopdeipmince, lyepropnalam’ tenen, moropkiabe na nio.

¹² Tonda, sik yuk-yuk mutuku nang ara, anti, diba tenebuka kum bikikinyak nang ara, nun Israel nang dana-dana tam unyak nang ati, weik tonun wenepnalame. Na nio, anda aning-aning nirya talibuka, nun weik deiyoknye ulyama ati, sik yuk-yuk mutuku nang arye nunti, nalibuka, malye yupu weik nyalamsikce, akutulamsika atonun bukni, ‘Ance tabakuka, like tekbarye tabakuka, pia weik tonun, sik nong deice ikin ning delinalam’ tenen, moropkiabe.

¹³ Nun Israel yala nang nirya, ance ‘Na tenen nang,’ tenepmumce, wipdeiamsulum nang ara, an amu tamuk unyabe. Winipmanto ara, domba basam weina deiyok nang arye, sik domba basam weilamak touk, nunda, an amu tamuk unyabe. Ati, nun ona ati ninye nirya, sikti, obuka wenepminyopura, nunce anti, “Se, na nio, anda pia telebe nyabkiabe,” nyabuka, pia, tuba-tuba si erebuka kinamkiabe. Ara, atalak arye dipdongobuka, doyanamle talak ap, anoutam nirya ara, nun wini talak unamap Israel nang ap, nunce deibibiba, dadeipdanin banamak Israel nang ap arye, anti, “Se, nun ni Allah Yahweh ara, pia telebuk ululnye,” nyabuka, an siuk, pia erenamkiabe na nio.