Mazmur 78 - Eipomek

Allah arye Israel nang ati, pia teleb kipdeiamuk bukni, sikda malye-malyeuk ulamika ati, nyabuk yupu

¹ AMazmur yupu sekuknye bira, el si Asaf birye, peteren yupu mot sekuk. Asaf birye nyabuk yupu ara, ani. Se, na yala nang, anggun Israel yala nang nirya ara, na nyapnusin yupu, moubuka kekepnululume! Ara, na si bambol deice nyapnusin yupu ara, moubuka kekepnamnulume!

² Narye, winipmanto yupu atonun bukni, el si ara amsal deice, ayupu nyapnusine. Narye nyapnusin yupu ara, minop talak arye nyalamnikba, kekelamsa ati, minop kanam asa aryuk, kum kekeplume. Moubuka kekepmunyopura, ‘E, deiyok ara ani,’ tenen, biknamlume.

³ Nun apu yapu arye, nyalamsik yupu ara, akunum mince kekelamupa ati, aning ara, akunum bikamupu.

⁴ Ati, nunce deipnamap mapu babye, kekepnamak’ tenen, laka nyabibiba, nun mapu koproba arye, ton kekenamake. Tonda, ‘Nunce deipnamap mapu arye deibikiba, dadeipdanin banamak nang babye, kekenamak’ tenen, ayupu nirya, laka nyanauk unamabe. Ara, nun ni Allah Yahweh arye, pia teleb kibuka, pil dolamuk ning ap, el mikip weik arye pil dolamuk ning ap, tonda, el mikip deice arye, winipman kum pil dolamuk ning ap ara, laka nyanamabe.

⁵ Ton ning ara, ani. Allah arye, nun apu Yakub biti, “Aning wininamlume. Aning ara, pia kum wininamlume,” nyabuka, mem yupu nyapdeiamukba, Yakub birye kekebuk. Kekebuka ati, nun Israel ninye, yuk-yuk nang nirya ara, Allah arye, amem yupu nyapdeiamsukba, “Wininamlume,” nyabuka ati, ayupu tuba aulule. Minop talak ara, Allah arye, nun apu yapu nirya ati, “Aning wininamlume. Aning ara, pia kum wininamlume,” nyapdeiamuk. Tonda, “Amem yupu ara, anggunce deipnin banamlum mapu ati, ayupu laka nyanauk wininamlume,” nyabuk.

⁶ Ara, Allah arye amem yupu nyapdeibuk talak ara, kam ulamik Israel yala nang ara, sikce deipnamak mapu, min kum deiamika ati, Allah arye, “Anggun aminyan talak delinamlum mapu babye, ‘Ayupu biknamak,’ tenen ati, “Amem yupu dobuka, pia peterelbanamlume,” nyapdeibuk. Ara, atalak kam ulamik nang arye, min kum deiamik mapu bukni, ‘Sikce deibikiba, dadeipdanin banamak mapu ton biknamak’ tenen, nyabuk. Tonda, anang arye, aminyan talak delinamak mapu babye, ‘Sikce ton dadeipnin banamak mapu ati, ayupu laka nyabikiba, biknamak’ tenen, nyabuk.

⁷ Ara, talye ati kum bukni, deiyok ara, ani. Ara, ‘Sik aminyan talak kam unamak Israel nang, yuk-yuk nang nirya babye, sik ni Allah ati, ‘Kume, Allah elcuk nunti, melibuka lyepsuturye, teleb kipdeipsutue,’ tenebikirye, elti, diba tenebikirye, sik kanye talima, el deiceuk delinmake. Tonda, ‘Sik aminyan unamak Israel yala nang nirya, Allah arye mambul weik pil dolamuk ning nirya ara, luba kum kinamak’ tenen, ayupu nyabuk. Tonda, ‘Sik aminyan unamak Israel yala nang nirya ara, Allah arye, “Aning wininamlume. Aning ara, pia kum wininamlume,” nyapdeiamsuk yupu, pia luba kum kinamaka ati, ayupu nyapdeipsuke.

⁸ Ton deiyok ning ara, ani. Ara, ‘Aminyan talak kam unamak Israel yala nang ara, sik apu yapu arye, malye weik ulamik touk, kum wininamak’ tenen, ayupu nyapdeipsuke. Ara, minop talak ulamik Israel yala nang ara, pia mandipna kanye bolamikce, Allah arye nyapdeiamuk yupu kum kekepmanto ulamik. Winilamikce, ‘Allah arye nyapdeipsuk yupu ara, nun lik’ tenen, elce nyapdeiamuk yupu nirya, yaniltakanauk ulamikce, sik kanye arye tenelamik ninguk, winilamik. Tonda, sik minop talak ulamik Israel nang, sik talima noutam ara, Allah ati, tuba-tuba diba tenebuka kum ulamik. Sikda, ton talak ara, diba tenyamika ani, aminyan talak doupnin bayikopura, tonap Allah ati, diba tenena kumce, bataknauk ulamik. Sik talima noutam ara, ‘Allah arye, “Aning wininamlume, aning ara pia kum wininamlume,” nyapdeiamsuk yupu ara, pia moubuka talinauk unamabe,’ kum tenelamik. Ati, Allah ati batakamikce, yuk talye ning ati, “Nun ni bira ani,” nyabuka, isa siuk erelamik.

⁹ Winipmanto ara, Israel nang bukni, sik Efraim yala nang ara, ‘Allah melipsilya deice arye, nun mal olan nang ati, mal olalbinamab,’ tenebik. Bukni, sikce amal olan talak ara, ilil ubukba, tamubikce, bikbik abuka bindobik.

¹⁰ Tonda, Allah arye, “Aning wininamlume. Aning ara, pia kum wininamlume,” nyapdeiamsuk mem yupu ap, tonda Allah arye, “Anggunda wininamlume, winipmunyeba, narye pia teleb kilinamsine,” nyabuka, nyalin yupu deice nyapdeiamsuk yupu ara, aning nirya yaniltaknauk ulamik. Ara, Allah arye, “Aning wininamlume. Aning ara, pia kum wininamlume,” nyapdeiamsuk mem yupu ara, moubuka kum taleamika ati, sikda malye-malye weik ulamik.

¹¹ Tonda, Allah arye, sik melina ati, pil weik tonun melibuka, dolamuk ning nirya ara, sikda luba kinauk ulamikce, aning nirya ara, pia kum tenelamik. Atonun, Allah el weik tonun pia ninye dopman kum pil dolamuk ning nirya babye, luba kilamik.

¹² Diba, anang sik apu yapu tuba kam ulamik talak nirya ara, Allah arye, pia mikip weik ninye dopmankum pil dolamukba, atalak kam ulamik nang, sik asing arye elilamik. Ara, Mesir mutuku noutam bukni, amutuku si ara, Zoan mutuku dam arye, mambul weik ninye dopmankum pil domuk ning babye, kum biklamikce, luba kiamik.

¹³ Ara, weik laut mekwen, el si ara Laut Teberau, noutam cobukba, laut mekwen bokuka, bitinye kibuka ura, sik Israel yala nang ara, anoutam arye, mek cepdobuk deice, yanibuka bindobik. Winipmanto ara, ninye arye, pala weik keil weik tonun dobuka, tonok sukumuk weik tonun yangabuka delilamak touk, Allah arye alaut mekwen nirya dobuka, bitinye kibukba, amek ara, tikuka tunimanauk ubukce, sakuka, binmanto kum ubuk.

¹⁴ Tonda, Allah arye, ‘Israel yala nang ara, ‘Otam mutuku bana ati, abisikuk binamap, tenebikirye, kel biknamak’ tenen, wini talak nirya ara, keting noutam talak ara, dua weik arebukba, menekuka banmek bisikuk, sikda aminyan tam melibuka balamik. Atonun, atalak lukunyan noutam nirya ara, weik uku buk arebukba, cang weik yo tiklamle touk, kipdeibuk ning ara, sik Israel yala nang ati, melibuka kaliklamuk.

¹⁵ Tonda, ‘Kanaan mutuku tam binamab’ tenen, pia pata mutuku noutam balamik talak ara, ninye ap, mek ap, pia kum mutuku ati, sikda mek patabuk talak ara, Allah arye weik mutuku bulamle keil pum tam arye dilikuke. Weik keil pum tam arye dilikukura, mek weik tonun abisik kutuka yayukba, sik Israel nang arye, amek kwebuka dilamik. Ara, mitik tonun kume. Mek weik tonun balamuka ati, winipmanto ara, ninye arye, weik mekwen noutam, mek kwelamak touk, ulamik.

¹⁶ Diba, Allah el mikip deice arye, pil dobuka ati, weik mutuku bulamle keil noutam arye, weik mek panabuka balamukba, sikda amek dam yanuka kwepnarye dilamik. Diba, amek ara, mitik mek kume. Akeil noutam arye, weik mek balamuk touk, ubuka arebukba, akeil noutam arye, weik mek kutukukura, amekuk kwebuka dilamik.

¹⁷ Allah arye, ‘Sik Israel yala nang melipnamne’ tenen, ninye arye winipman kum pil weik tonun, dolamuk bukni, sikce tonap, ‘Allah ara nun like. El yupu ara, kum kekepnamap’ tenelamikce, Allah ati malye-malye ulamik. Allah ara, aning-aning nirya talibuka deice tam ulirye, aning nirya talibuka, pia mikip weiknye ulul bukni, sikce, ‘Allah ara, nun lik ati, el yupu kum kekenamabe,’ nyalamikce, malyeuk ulamik. Allah ara, aning-aning nirya, deice tam ulirye, aning nirya talibuka, Pia Mikip Weik Deiyoknye ulul bukni, sikce, ‘Allah ara, nun lik ati, el yupu ara, kum kekenamabe,’ nyalamikce, malyeuk winilamik.

¹⁸ Tonda, sikce, ‘Se, adin ning ap, tonda ayala din ning ap ara, pia patapmasila ati, “Allah ance, adiparyuk nun patapmasil ninguk arenamsilame!” nyabuka, sik talima pum tam arye, Allah ati morolamik. Ara, sikce, ‘Allah ara dipkoprob mikip weiknye ulul do, kum do? El mikip arye, nun patapsilye ning dipkoprob arepsutu do? Kum do?’ tenen, sikce, ‘Tup ninguk arepsilyame!’ nyabuka, Allah ati asilamik.

¹⁹ Ara, sik atalak ulamik Israel nang arye, Allah bira, ‘Nun patapsilye ning nirya ara, dipkoprob Allah arye arepsutu do? Kum do?’ tenen, elti, malye yupu nyalamik. Ara, sikce, “Kume, yuk nang pia kum unyakak, pata weik mutuku noutam unmaba ati, Allah arye nun patasilye touk, teleb din ning weik tonun, arepsutu do? Kum do?’ tenelamik.

²⁰ Sikce nyalamik. “Yo, Allah arye, weik mutuku bulamle keil obukba cobukce, akeil noutam arye, teleb weik mek balamukba, kwebuka dilamupu. Bukni, Allah arye dipkoprob roti kwaning ap, tup ning ap, arepsutuba diptibye do? Nun kanye ara, aning kum winipsutue,’ tenepmabe,” nyalamika deice arye, Allah ati pirilamik.

²¹ Sikce Allah ati malye yupu nyalamika ati, Allah Yahweh arye, sik Israel yala nang nirya ara, malye kanye bobukce, sikti, derelamuk. Diba, atalak ara, Yakub birye deiamukba, sikce dadeipdanin yangalamik nang nirya ati, Allah arye yu weik ubuk. Winipmanto ara, weik uku dilamlirye, buppu weik ulamle touk, Allah arye, Israel nang nirya ati, yu pia weik tonun ulamuk.

²² Allah arye yu weik ubuka ara, ani. Ara, sik Israel nang nirya arye, elti, diba kum tenelamike. Sikce, ‘Allah ara, nun patapsilye ning nirya, el mikip deice arye melibuka arepsutue,’ kum tenelamika ati, Allah arye sikti, yu weik ubuk. Tonda, sikce, ‘Kume, Allah arye dipkoprob lyepsutu do, kum do?’ tenen, teninauk ulamikce, diba kum tenelamika ati, Allah arye yu weik ubuk.

²³ Israel nang arye, Allah ati, diba kum tenelamik bukni, Allah el yupu nyabuka deice arye, im deice bisik bublan ning kukeibukce, din ning weik tonun arebuk.

²⁴ Ara, im deice ulamle din ning, el si ara mana arebukba, im deice arye, mok celamle touk ubuka, im deice din ning, roti kwaning atonun, el si ara mana, sakanauk ulamuk. Diba, ara im deice ulamle din ning, mitik tonun gandum atonun, el si ara mana, Allah arye dobuka, Israel nang, sik dina ati areamukba, dilamik.

²⁵ Dipkoprop amana kwaning ara, im deice unyak malaikat nanguk dinyak bukni, atalak ara, sik tukwak mutuku Israel noutam ulamik nang babye, aning dobuka dilamik. Allah arye sikti, arelamuk din ara, mitik tonun kume. Din ning yupa pia weik tonun arelamukba, dilamik.

²⁶ Tonda, Allah arye, keting panalyangan tam arye, yangalamle kumanya ati, “Pu apnulyame,” nyabuka ati, akumanya mikip arye Israel nang deice dolamukba ulamik. Tonda, Allah arye kumanya ati, “Pu apnulyame,” nyabukba, el mikip deice arye, dabu tam mikip weik kumanya babye, pu alamuk.

²⁷ Allah el mikip deice arye, akumanya bitinye arebukba, akumanya bitinye, im noutam arye dolamuka ati, tup ning ara, pia weik tonun saklamuk. Ara, tuku butbuta pia weik, nukman kumto ulamle touk, tup ning pia weik tonun areamukba, im noutam arye saklamuk. Akumanya arye, boyangalamuk ning ara, yalma urasin atonun maka bobalamukba, sik Israel nang ulamik mutuku noutam saklamuk. Ara mitik tonun kum bukni, laut mekwen kup-kup ak, mek wininga el si ara pasir, pia weik, nukman kumto ulamle touk, maka babye weik tonun saklamuk.

²⁸ Allah arye, ‘Winipnamle,’ tenyamuk touk, maka nirya ara, kumanya arye boyangalamukba, Israel nang ulamik mutuku noutam saklamuk. Ara, tia ati, terpal arye domik aik, el si ara tenda aik dam, saklamukba, sikce maka dobuka, dilamik.

²⁹ Ara, sik Israel nang arye, “Aning-aning patapmasila ati, aninguk arepsutue,” nyabuka, morolamik ning ara, Allah arye akunum areamukba, aroti ap, maka ap, dobuka dipneura sik nirya boulamuk.

³⁰ Tonda sikce, aning pia weik tonun dilamik bukni, kum boupmok ati, tuba patanmokura, din dinmek talak ara, ‘Nun akunum boupmasile,’ kum tenebikce, aning-aning tuba dinmekba, sik si pum tam tuba unmok ati, kanye imun ikin ning, sik dam yayuk.

³¹ Ara, adin ning tuba dinmek talak ara, Allah arye sikti, yu weik ubukba, wenebuk. Allah el yu weik ubukba, sik Israel nang kan-kan, nong weik nemikce, mikip weik ulamik nang ara, pia weik tonun obuka sirya dakuk. Diba, Allah arye, Israel yala nang wenena ati, sik kan-kan bukni, nong mikip weik nang ap, wel nang, sik wisi min kum danamik nang ap nirya ara, obuka sirya dakuk.

³² Allah arye, ‘Anang ati, ikin ning arepnyopura, sik malye wininyak ning bikikirye, bataknamak,’ tenebuk bukni, Allah arye, imun weik un ning arebuk bukni, sik Israel nang ara, tuba-tuba pia malye weik winipnin balamikce, Allah ati yaninauk winilamik. Allah el mikip deice arye, weik ninye dopmankum pil ap, ninye kum winipmanto pil ap, dolamuk ning ara, diba kum tenelamik.

³³ Sikce malyeuk ulamika ati, Allah arye, ‘Keting tamun weik tonun ton, kam kum unamake,’ tenebukba, minop dibinauk ulamikce, sirya daklamik. Winipmanto ara, ninye tonok, isin tunim apliba, adiparyuk dilamak touk, Allah arye, sik kam una deiyok ning dololamukba, minop dibilamik. Tonda, sik kam tuba ulamik talak ara, ilil un ning weik tonun areamukba, sikda, ‘Se, yata upnamsil do?’ tenen, ilil weik uamukba, ulamik.

³⁴ Atalak nirya ara, Allah arye sik Israel nang weik tonun olamuk talak ara, sik tuba kam ulamik nang arye, ‘Se, Allah arye melibuka lyepsutu do?’ tenen, tamubuka Allah ati morolamik. Tonda, sikce, ‘Se, nun malye pia weik ulamupu ning ara, bataknuyap,’ tenen, malye weik nyalamikce, ‘Allah arye lyepsutu’ tenelamikce, ‘Allah el dam tamubibirye unamap’ tenen, elti, morolamikce, ‘Dan sukum arye, Allah ap neika uptibye do?’ tenenauk ulamik.

³⁵ Sik ikinuk ulamik talak ara, ‘Se, dipkoprob Allah ara, nun mikip arisululnye ap, nun melibuka kalikina deiyoknye usulule,’ tenelamik. ‘Winipmanto ara, Allah arye weik mutuku bulamle keil atonun usulula ati, el damuk teleb uptibye,’ tenelamik. Tonda, sikce, ‘Kume, Allah ara, aning-aning deice tam, Pia Mikip Weik Deiyoknye ulule. Ati, Allah elcuk, nunti, lyepsilirye, tamubuka teleb kipdeipsutuba, telebuk uptibye,’ tenelamikce, Allah ati morolamik.

³⁶ Bukni, anang arye, sik si bambol deice aryuk, kekena teleb yupu nyalamik bukni, sik kanye talima noutam ara, aning atonun kum tenelamik, sik si bambol deice arye, tilila yupu nyalamik.

³⁷ Tonda, sik kanye talima noutam ara, ‘Allah arye nyasilye yupu, pia moubuka talibibirye, telebuk unamabe,’ kum tenelamikce, el yupu ati, yaninauk winilamik. Tonda, Allah arye, “Aning wininamlume. Winipmunyopura, narye teleb kilinamsine,” nyabuka, nyalin yupu deice nyapdeiamuk yupu ara, moubuka talina kumce, aning batakuka, malye-malyeuk winilamik.

³⁸ Sikda malyeuk winilamik bukni, Allah arye sikti, weik tonun bico tenelamuka ati, sik malye winilamik ning ara, mangkau kibukce, tuba melinauk winilamuk. Allah arye, sik malye winilamik ning nirya ati, anang wenebuka obukce, sirya kum dakuk. Dipkoprop, sik malye-malye weik winipnin balamik talak ara, Allah ara, yu weik ubuk bukni, el adiparyuk sikti, ‘Kume sikda minopce kum wenebuka opnune,’ tenelamukce, talye tunim anauk ulamuk. Ati ara, el yu weik uamuk bukni, elce anang ati, adiparyuk talye mangkau asa, kum oplobuk.

³⁹ Deiyok ara, elce sikti, ‘Kume, sikda talye tukwak nang unyaka ati, sik mikip ara, mitik tonun unyaka ati, kam kum unamake. Minop dipnamakca. Winipmanto ara, kumanya yalirye, pu abuka, adiparyuk kum danin balamle touk, sik babye, minop dipnamaka ati, adiparyuk sikti, kum wenebuka opnamane,’ tenelamukce, talye bataklamuk.

⁴⁰ Bukni, sik Israel nang ara, ninye kum sukum, pia pata mutuku noutam balamik talak ara, sikce, ‘Kume Allah arye, ‘Aning ara, wininamlume. Aning ara, pia kum wininamlume,’ nyapdeiamsuk yupu ara, nun lik,’ tenelamikce, ayupu yaninauk winilamik. Pia weik tonun, malye-malye winilamik. Sikda, pia mek kum sukum balamik talak ara, malye weik winilamika deice arye, Allah el kanye ara, ‘Se, yata ati, na bataknikce, malye-malyeuk tuba wininyak do?’ tenelamukce, mambul kanye bobuka, el bouku sukulamuk.

⁴¹ Sikda, pia mek kum sukum balamik talak ara, malye weik winilamika deice arye, Allah el kanye ara, ‘Se, yata ati, na bataknikirye, malye-malyeuk tuba wininyak do?’ tenelamukce, mambul kanye bobuka, el kanye bouku sukulamuk. Israel nang arye amalye weik ulamika deice, Allah arye sikti, malye kanye bobuka, wanauk ulamuk. Allah elda, Pia Teleb Lek dem Ululnye birye, Israel nang ati pia kalekuka meliamuk. Elce sik Israel nang ati, pia melinauk ulamuk bukni, sik malye ulamika deice, Allah arye sikti, malye kanye bomukce, yu ulamuk.

⁴² Sik Israel nang arye, ‘Allah ara, dipkoprob Pia Mikip Weik Ululnye,’ kum tenelamik. Tonda, sikce, ‘Se, Allah arye, nun mal olan nang arye, nunti opmanto ulamsik talak ara, nun ni Allah arye, melibuka lyepropsuk,’ kum tenelamikce, aning babye, luba kinauk ulamik.

⁴³ Aning kum bukni, tonda sikce, ‘Se, Mesir mutuku noutam, ikin weik ulamupu talak ara, Allah aryuk, pia ninye dopmankum pil dolamuka deice arye, lopdeipsukce, lyepdopsuke,’ tuba kum tenelamik. Aning babye, luba kinauk ulamik. Atonun, Mesir mutuku noutam bukni, mutuku si Zoan mutuku dam ara, Allah arye ninye kum winipmanto ning, pil dolamuk deice arye, Israel nang lyelamuk ning ara, sik tuba kum biklamikce, malyeuk winilamik.

⁴⁴ Allah arye, Israel nang lyelona ati, Mesir mutuku noutam arye, weik winipman kum pil dobuk ning ara, ani. Ara, sik Zoan mutuku noutam balamuk weik mek nirya ara, ining kibukba, amek ara, ninye arye kwebuka dipmanto kum ulamik. Allah arye amutuku nirya ining ubuka ati, aning ara, sik amutuku nang nirya arye, amek kwebuka dipmanto kum ulamik.

⁴⁵ Tonda, Allah arye amutuku ninye wenena ati, sik mutuku noutam nirya ara, deibum atonun ning, yupa pia weik tonun dopkwetebukba, amutuku langdibukce, adeibum arye anang, sik nong bol deice amulamik. Tonda, sik wenena ati, yakai pia weik tonun arebukba, amutuku dana-dana tam nirya langdibukba, sik nirya ara, imun kanye bobuka ulamik. Winibuka deice arye, amutuku nang, pia malye kipdongobuk.

⁴⁶ Tonda, sik Mesir nang arye kouamik ning, akunum palamuk bukni, Allah arye weik sul kwising ning arebukba, aning arye, sik wa windam koulamik ning nirya dibik. Mesir mutuku nang arye, pil weik dolamik deice arye, sik wa wiamik noutam, din ning weik uamuk bukni, Allah arye asul kwising ning arebuka deice arye, aning nirya dibik.

⁴⁷ Tonda, sik Mesir mutuku nang arye, anggur wa ton wilamikba, duk weik moulamuk bukni, Allah arye im deice, pia bul mok bukni, el si ara es mok keil duk-duka atonun dopkwetebukba, aning nirya malye kiplobukba, kum dayuk. Tonda, sikce koulamik yo duk moulamuk ning, kwarang yo atonun, el si ara, ara yo koulamik ning buk, es mok sakukba, moul weik ubukba, ayo nirya ara, moul ubukce kolubuke.

⁴⁸ Allah arye, es mok bukni, keil duk-duka atonun, sakukba, sik weilamik sapi basam nirya ara bongobuka obukba, nirya dibik. Tonda, sikce weilamik domba basam ap, kambing basam ap ara, Allah arye bebeya dopkwetebukba, aning yuk-yuk ning nirya, obuka sirya dakuk.

⁴⁹ Allah arye, sik Mesir mutuku deiyok nang ati, yu weik ubukba, imun kanye bon ning weik, sik nong deice deiamuk. Ara, el yu weik ubuk ning ap, sikti, ‘Dauaplye,’ tenebuk ning ap, imun weik ning ara, sik nong deice ap, sik mutuku deice ap, deiamukba, ikin pia weik ulamik. Tonda, Allah arye, akanye imun ning weik tonun areamuka ara, ninye ona ati, pil don malaikat, yupa pia weik dopkwetebukba, el yu dobuka, Mesir mutuku nang, sik dam yanuka, ikin ning weik, sik deice delilamik.

⁵⁰ Tonda, Allah el yu weik ubuka ati, ‘Aning kum obuka sirya daknamne,’ kum tenebuk. Elce tenyamuk touk, anang deice, el yu weik arebuk. Tonda, ‘Anang wenebuka kum opnamne,’ tenena kumce, sik atalak ulamik Israel yala nang kan-kan arye, yupa pia weik tonun, obukba dibik. Ara, Nakina yala weik arebuka deice arye, atalak ulamik Israel yala nang ara, yupa pia weik tonun diamik.

⁵¹ Tonda, Mesir mutuku noutam ulamik nang arye, akunum deiamik mapu, sik min yuma mapu nirya ara, atalak aryuk, Allah arye, mambul weik ning, dibina deiyok ning arebukba, sik min yuma mapu nirya, adiparyuk dibik. Amapu ara, sik Mesir mutuku nang arye, ‘Se, nunce min yuma deiamupu mapu ara, akunum nebikcopura, aminyan talak ara, sikce mapu ton deibikiba, dadeipdanin banamak mapu ara, nun mutuku talibikirye, mikip unamake,’ tenelamikce, ‘Nun min yuma mapu nirya ara, pia telebe,’ tenelamik bukni, Allah arye, sik Mesir mutuku min yuma mapu nirya oplobukce, sirya dakuk.

⁵² Allah arye aning nirya akunum winibukce, elce ‘Anang ara, ‘Naʼ tenen nang unamak’ tenen, weiamuk nang ara, dobuka, Mesir mutuku batakuka, yuk pera mutuku bobinamuk. Winipmanto ara, domba basam weina deiyok nang arye, sik domba basam dobuka balamak touk ubuka, Allah arye, sik Israel nang lobuka lyebukce, boyangalamuk. Tonda, Mesir mutuku akunum batakuka, bindobik talak ara, ninye pia kum sukum, pata weik mutuku noutam, Allah arye, sik Israel nang bobinamuk. Domba basam deiyok nang arye, meibuka bakiba, sik domba aminyan yangalamak touk, Allah arye minop menekuka balamukba, Israel nang, el balye tam melibuka dobolbalamik.

⁵³ ‘Israel nang ilil kum unamle’ tenen, Allah arye sikti, melibuka kaliklamukce, ‘Abisik binamlume’ nyapnarye, menekuka balamukba, sikda, el aminyan tam balamik. Sik Israel nang ara, teleb winilamik bukni, sik mal olan nang, Mesir mutuku yin talin nang nirya ara, weik laut mekwen arye obukopura, sik nirya dibik.

⁵⁴ Allah arye, Israel nang dobuka balamukba, sik nirya ara, pia teleb mutuku, lek sukum yanuka ulamik. Ara, Allah arye akunum weiamuk mutuku, pia teleb lek mutuku dam boyangalamukba, aunmek. Ara, Allah el mikip weik taruk arye, doprobuk mutuku deice binuka unmek.

⁵⁵ Allah arye, ‘Israel nang nirya, amutuku noutam unamak’ tenen, akunum tenebuka ati, amutuku noutam ara, minop talak arye, akunum ulamik ninye yuk-yuk nang nirya ara, Allah arye yakuka, dopkwetebukba bindobik. Tonda, Allah arye, ‘Israel nang ara, sik yala yuk-yuk ulamik touk, tapu arye amutuku nirya kiklibukce, amutuku tuku dobuka arebukba, doprobik. Ara, ‘Sik Israel ninye, yala yuk-yuk ulamik touk, amutuku tuku dobuka, unamak’ tenen, Allah arye amutuku bokuka arebukba, sik terpal arye doltakan tenda aik dobuka ulamik.

⁵⁶ Allah arye winibuka meliamuk bukni, sik Israel nang arye, ‘Aning-aning deice tam ulirye, Pia Mikip Weik Deiyoknye Allah ara, teleb kibuka melinamsil do, kum do?’ tenelamika deice, Allah ati piribikce, ‘Allah ara, nun lik ati, el yupu kum kekenamabe,’ tenelamikce, malyeuk winilamik. Tonda, Allah arye, “Aning wininamlume. Aning ara, pia kum wininamlume,” nyapdeiamuk yupu ara, moubuka kum talilamikce, kum dobolbalamik.

⁵⁷ Ara, sik apu yapu arye, malye weik winilamik touk, atalak ulamik Israel nang babye, Allah ati tuba diba kum tenelamikce, elti, batakuka, malyeuk winilamik. Winipmanto ara, ninye on kwatima ara, kwalipmalye mal arye dobikiba, moubuka, kum bikilbitue atonun, sik anang, sik kanye talima nirya ara, akunum kwalibukba, Allah ati, diba kum tenelamikce, el yupu tuba talibuka kum dobolbalamik.

⁵⁸ Tonda, sik Israel yala nang arye, “Nun ni ani,” nyabuka, talye ning ap, isa ap ati, diba tenelamikce, aning atibuk, si erelamikce, mutuku kon deice, isa si eren aik dolamika ati, Allah arye sikti, yu weik ulamuk. Allah arye, ‘Kume, ‘Naʼ tenen nang arye, na siuk erepnitinge. Yuk talye ning ati, si kum erenamake,’ tenebuka ati, sikce talye ning ati, “Nun ni ani,” nyabuka, isa si erelamikba, Allah ara, yu weik ubukba, yu kanye bolamuk.

⁵⁹ Sik Israel nang arye, amalye winin ning weik winipnin balamikba, Allah arye aning nirya eibuka kibukopura, yu weik ubukba, elce sik Israel yala nang ati, ‘Anang na lik ati, sikti, tonap kum melibuka kalikinamne,’ tenelamukce, sikti, bataklamuk.

⁶⁰ Tonda, Allah arye tia ati, Silo mutuku noutam ulamuka ara, amutuku batakuka bindobuk. Ara, Allah el yu weik ubuka ati, tia talak arye, ‘Na ap, Israel nang ap, neika unamap’ tenen, el si eren aik ati, terpal arye, domik aik, el si ara, Ansinilin Tenda Aik, Silo mutuku noutam, tia ati dobik ning babye, Allah arye anyaik batakuka bindobuk.

⁶¹ Tonda, atenda aik pum tam deiamik mambul ning, el si ara Peti Perjanjian ning, Allah el mikip, aning deice deiamuk bukni, yu weik ubuka ati, lo arebukba, sik yuk mutuku ninye asik nang arye, aPeti Perjanjian ubula doprobikce, yuk mutuku bobiyik. Ara, Allah el mikip ap, el dirina ara, amambul marikna el si ara, Peti Perjanjian deice akunum deiamuk bukni, lo arebukba, Israel ninye, sik mal olan nang, Pilistin mutuku nang arye yanuka, aning ubula doprobik.

⁶² Aning kum bukni, Israel nang arye, malye weik winilamika ati, Allah arye lo arebukba, sik mal olan nang arye yanuka, Israel nang yupa pia weik tonun, ninye on parang doyanarye, olamik. Israel yala nang arye, malye weik winilamik ning ati, Allah arye sikti, ‘Na like, sik daupmalye,’ tenebukce, sikti, kum kaliklamukce, mangkau kilamukba, ikin ning weik, sik dam yangalamuk.

⁶³ Winipmanto ara, weik uku buk arye, aning-aning nirya dilamle touk, sik mal olan talak ara, Israel yala wel nang nirya ara, weik tonun, oltaklamikba, dibuka sirya dakik. Sik mal olan talak ara, Israel yala nang ara, yupa pia weik tonun oltakalamika ati, Israel yala wel kilapu ara, weik nelamik buk, ninye dopmanto nang kum ati, akilapu ara, ur talye dem nebuka ulamik.

⁶⁴ Tonda, mal olan talak babye, Allah si eren aik pum tam pil dolamik nang, sik imam-imam nang babye, pia weik tonun olamik. Ara, ninye mal olan ati parang dobuka, sik imam nang weik tonun olamik. Atalak ara, pia olanauk ulamika ati, imam nang arye domik kilapu ara, sik domik ninye olamikba, youwak dakik bukni, lo ton kum ubuka ati, sik domik ninye ati, engena kum upmanto ulamik. Tonda, ninye nong weina ap ara, teleb ubuka weipmanto kum ulamik.

⁶⁵ Ikin ning pia weik, Israel nang deice yangalamukak, imun kanye bobuka ulamik bukni, atalak ara, Allah ara aning-aning nirya talelirye, mikip pia weiknye, tonap bukukce, ‘Israel nang lyepnamne’ tenen, kintinibuka yayuk. Winipmanto ara, ninye arye kanye wangalamak mek weik tonun dibikiba, kanye bona kumce mapmakca ani, aminyan talak tamubuka bukikirye, talye yupu weik arye minop nyalamaka atonun, Allah arye, sik Israel nang dam yanuka minopce lyeprobuk.

⁶⁶ Ara, Allah el ‘Naʼ tenen nang ati, ‘Israel nang nirya obuka sirya daknamap’ tenen, Pilistin nang arye, sik dam olyanamik yu nang ati ara, Allah arye, sik balye tam yanuka, adiparyuk anang ati kanye imun weik ning arebukce, oplobuk. Allah arye, ayu Pilistin nang obuka, sirya dakuk deice arye, alye weik dakdayikba, yuk mutuku nang nirya arye, Israel sik mal olan nang ati, ‘Anang ara, pia malye, sikda daupmalye,’ tenenauk ulamika ani, wini talak babye tuba tenenyake.

⁶⁷ Bukni, Israel nang malye ulamik ning ati, Allah el yu weik ulamuk talak ara, Yusuf birye deiamukba, sikce dadeipdanin yangalamik nang babye, Allah arye anang luba kibuka bataklamuk. ‘Na si eren aik ara, sik mutuku dopnamne,’ kum tenebuka ati, sik mutuku ara, batakuke. Atonun, Allah el yu weik ulamuk talak ara, Efraim birye deiamukba, sikce dadeipdanin yangalamik nang babye, Allah arye anang namin kibuka ati, ‘Na si eren aik ara, sik mutuku dopnamne,’ kum tenebuka ati, sik mutuku ton, wibuka kum tenebuka ati, batakuk.

⁶⁸ Allah arye, Efraim yala nang ulamik mutuku kum wibuk bukni, sik batakuka, Israel mutuku iknapnye tam ulamik nanguk, sik ulamik mutuku wibuk. Ara, Yehuda birye deiamukba, sikce dadeipdanin yangalamik nang arye ulamik mutuku ara, ‘Na si eren aik ara, sik mutuku uk dopnamne,’ tenebuka ati, sik mutuku wibuka erepdeibuk. Allah arye amutuku wibuka deiyok ara, Sion mutuku awamuka ati, Allah arye amutuku ati, kanye deiamuka ani, ‘Na si eren aik ara, asukumuk aunamle’ tenen, amutuku wibuka erepdeibuk.

⁶⁹ Allah arye Sion mutuku wibukopura, elce, ‘Winipnulyame,’ nyabukba, sikce el si eren aik ara, amutuku noutamuk domik. Ara, im deice nirya teleb kipdeiamukba, pia deice tam aunamle touk, el si eren aik babye, Sion mutuku kon deiceuk tuba aunamle. Tonda, tukwak mutuku im sirya, mutuku sirya, nirya kwepdeiamuka ara, min kum kum danamle. Apia aunamle touk, el si eren aik ara, Sion mutuku kon deice, pia aunamle. Aminyan talak ara, aning babye min kum kum datue.

⁷⁰ Aminyan talak ara, Allah el amu tam teleb kibuka ulamuknye, el si ara Daud, anye wibuka erepdeibuk. Ara, ‘Na mapu Israel nang talibuka, sik weik ninye deiyoknye Raja unamle’ tenen, Daud wibuka erepdeibuk. Daud bira, domba basam weina deiyoknye ulamuk bukni, Allah arye Daud biti, wibuka erepdeibuk.

⁷¹ Daud bira, yim domba basam ap, kil domba basam ap, sikce deiamik domba mapu ap, kalekuka weilamuk bukni, Allah arye Daud biti, ‘Na tenen nang, Israel yala nang nirya talibuka, weik ninye deiyoknye Raja unamle tenen, Daud wibuka erepdeibuk. Allah arye, ‘Yakub deiamukba, sikce dadeipdanin yangalamik nang, sik Israel yala nang nirya ara, ‘Naʼ tenen nang pia unamak’ tenen, akunum weiamuka ati, ‘Daud birye, anang nirya taliplirye, sik weik ninye deiyoknye Raja unamle’ tenen, Daud wibuka erepdeibuk. Winipmanto ara, domba basam weina deiyok nang arye, sik domba basam melibuka kaliklamak touk, Daud babye, sik Israel yala nang nirya ati, melibuka kalikinamle,’ tenebuka ati, Daud wibukce, erepdeibuk.

⁷² Allah arye, Daud akunum wipdeibukba, Daud birye, sik Israel yala nang taleamukce, sik weik ninye deiyoknye Raja kibuka ulamuk. Tonda, Daud el talima noutam nirya ara, pia moubuka ulamuka ati, Israel nang ati, teleb kipnarye, melibuka kaliklamuk. Tonda Daud bira, kel weik bikamuknye ulamuka ati, elce pia teleb kibuka, sik Israel yala nang nirya ati, “Wininamlume, aning ara, kum wininamlume. Teleb winin ning ara ani,” nyabuka, yupu peterelamukba, sikda telebuk ulamik.