Mazmur 77 - Eipomek

Ikin weik ulamupu talak ara, Allah el mikip deice arye melilamsuk ning ati, nyabuk yupu

¹ Ninye si Asaf birye, Mazmur yupu mot sekukce, Allah yupu mot sena deiyoknye biti arebuk. Tonda, Asaf birye nyabuk yupu ara, ani. Amot el leilim ara, yuk mot ara, Yedutun lelim selamlum touk kibuka, amot babye atonun senamlume.

² Ikin weik unulul talak ara, Na ni Allah, ‘Ancuk yanuka melipnutumce, lyepnutume’ weik yupu deice arye moronune. Ara, “Na ni Allaho, ‘Ancuk yanuka melipnutum’ tenen, moropkine,” nyabuka moronune.

³ Diba, na ikin unilye talak nirya ara, nun ni Allah arye, aning-aning nirya talibuka, deice tam erebuka, mikip weiknye ulula ati, ‘Elcuk lyepnutu’ tenen, el tibuk moronune. Lukunyan noutam nirya ara, didik sena kumce, na taruk erepnirye, ‘Na ni Allah arye melipnamnil’ tenen, batakna kumce, el tibuk moronune. Na talima daksaknuka ati, yuk nang arye, ‘Nun ka bira, ikin ulula ati, nunce el kanye kwa dipnamabe,’ tenen, piribuka melipniting bukni, nara kanye deibuka, pia kum uptinye. Tuba imun kanye bobuka unune.

⁴ Atalak noutam ara, nun ni Allah ati, tenipdenirye, tuba engebuka moronune. Allah arye melibuka, pil dosulul ning ati, tuba tenipnirye, na kanye talima noutam ara, pia mitang upnilyopura, pil bita kum wininune.

⁵ Na ni Allah, ance ikin ning arenilyame deice arye, lukunyan babye, kum manune. Tonda, pia imun kanye bobuka ununa ati, yupu tonok ning babye, kum nyaptinye.

⁶ Bukni, minop talak uamuk ning nirya, kanye arye ton ap teninune. Diba, minop talak winyamuk ning ap, ance dopdeiamlum keting tamun arye, ikin pil dolamlum ning ati, tuba teninune.

⁷ Wininye ning ara, lukunyan talak nirya ara, teninauk unune. Ara, ‘Se, Allah ara, dan sukum unmal do?’ tenen, na kanye talima noutam nirya ara, pia asilenauk unune.

⁸ Na ni Allah arye nati, pia biknuk ati, elce winipnilirye, kum melipnamnil do?’ Aning-aning nirya talibuka, deice tam erebuka, mikip weiknye, ‘Allah arye nati, bico tenebuka, kanye kum deilinamnil do?’ tenenune.

⁹ Allah ance nunti, ‘Weik arye, bico tenepsinirye, pia teleb kilinamsine,’ nyabuka, nyalin yupu deice arye, nyadeipyamsuk ning ara, akunum bataksuka ati, aminyan talak babye, pia kum melinamsil do?’ tenenune. Ara, Allah arye nunti, ‘Winibuka-winibuka teleb kilinamsina,’ nyabuka, nyalin yupu deice arye, nyapdeiamsuk ning nirya ara, akunum bataksuka ati, ‘Dolyanamsil talak nirya babye, pia kum melinamsil do?’ tenenune.

¹⁰ Deiyok ara, ‘Allah arye bico tenesilirye, teleb kibuka melisulul ning ara, akunum luba kibuka ati, aning tuba kum tenenamle do? Akumopura, nun malye winin ning ati, yu winibuk deice arye, ‘Narye sikti, tuba bico tenebuka, kum melinamsine,’ tenebuka, ‘Akunum bataksuk do?’ tenenune.

¹¹ Winibuka tenepne ning ara, narye nyanune. “Se, aning-aning talibuka, deice tam erebuka, Pia Mikip Weik Deiyoknye ulinye, Allah bira, el sirik tam taruk ara, mikip weik ulamuk bukni, wini talak akunum mitang unmal do?’ tenepnarye, na imun kanye bonun deice arye, na talima dakalsanulule.

¹² Winipmanto kum ununa ati, Allah Yahweh arye, ninye kum winipmanto ning, pil dolamsuk ning ara, tuba ton ap tenebuka unamabe. Tonda, minop talak nun Israel nang ati, mikip weik ning melibuka, pil dolamsulum ning ara, tuba tonap apia teninamabe.

¹³ Diba, ance melibuka winilamsulum ning nirya ara, moubuka tenilenamne. Tonda, pia mikip deice arye, ninye kum winipmanto ning melilamsulumce, pil dolamsulum ning nirya babye, pia moubuka tuba teninamne.

¹⁴ Se nun ni Allah, ance winilamlum ning nirya ara, malye winina kumce, pia dipkoprob teleb piluk dosilyame. Yuknye birye, tonok ning babye, ance dipkoprob pil dosiminya atonun, kum doptue! Nunce si erekinyap Allah ara, an tonoka. Yuk Allah ton pia kum ulula ati, an atonunye ton, dipkoprob pia kum ulule. Allah an tonok ulyame.

¹⁵ Ninye pia kum winipmanto ning pil dosilyam Allah ara, an tonoka. Tukwak mutuku sirya, im sirya nirya unyak nang, sik dinyakak kan-kan arye, an mikip weik deice arye, ninye kum winipmanto ning, mikip weik pil akunum dolamlumba, ninye nirya arye, akunum elilamik.

¹⁶ Allah ance, ‘Na tenen nang ani’ tenen, wipsulum Israel nang ati, an mikip weik taruk deice arye, nun ikin ulamupu ning noutam arye, akunum melibuka lyepsulume. Ara, nun apu yapu Yakub ap, Yusuf ap arye deiamdikba, dadeipdanin yangalamupu nang, nun Israel nang ati, melibuka lyepropsuluma ati, nyapkine na nio.

¹⁷ Weik laut mekwen arye, an Allah mikip ati eibukce, ilil weik ubukba, mekwen nirya lulukuk. Winipmanto ara, ninye uk weik talipliba, nong nirya koulukulsaklamle touk ubuk. Diba atalak ara, weik mekwen, el si laut Teberau arye, an Allah ati eibuk talak ara, alaut mekwen karu noutam nirya ara, sekdakuka bindobuk.

¹⁸ Atalak ara, dua noutam ara, mok pia weik arye cebuk. Tonda, liman lelim weik nyabuk. Liman nyabuk talak ara, amutuku dana-dana tam nirya ara, bebeya lakuka ara, weik tonun ton, winibukak eibik.

¹⁹ Mikip weik kum yayukce, kumanya weik dobukba, amutuku palamuk ning nirya, lokuka pounmokce, bebeya lakuka piripna dobuka, amutuku nirya dirina weik ubukce, weik liman lebuka, lelim ton nyabuk. Aning nirya winibuka ati, atalak ara tukwak mutuku sirya, im nirya ara, lulukuka, long-long abukba, lulukunmok.

²⁰ Atalak ara, ance lyepropsulumce, weik laut mekwen noutam arye, teleb bisik kintinip deipsulume. Diba, weik laut mekwen mikip noutam ara, ance nun teleb bisik, tukwak yapdeipsulumce, bobisulume. Bukni, an yupu deice arye, tuku mikdeiplum deice yanibuka binamupu sukumak ara, laka kum ati, ninye arye kum elilamik.

²¹ Atalak ara, ance ‘Naʼ tenen Israel nang ati, menekuka bobalamlumba, nun apu yapu nirya ara, an aminyan tam dobolbalamik. Ara, domba basam weina deiyok nang arye, sik domba basam bobalamak touk, ance nun Israel nang nirya ati, bobinamsulume. Ara, an pil dolamdik nang, Musa ap, Haron ap arye, menekuka bobalamdik bukni, nun apu yapu nirya arye, sik aminyan tam dobolbalamikba, an Allah mikip weik deice arye lyepropsulume.