Mazmur 76 - Eipomek

“Sion mutuku ati, Allah yupu mot nyanamne,” nyabuk yupu

¹ Allah yupu mot nyana deiyoknye arena ati, ninye si Asaf birye sekuk. Asaf birye, “Amot ara, tapu arye lelim nyan ning, el si ara kecapi deice arye, nyanamlulume,” nyabuk.

² Yehuda mutuku unyak nang nirya ara, Allah ati akunum bikamik. Aning atonun, Israel yala nang nirya ara, Allah ati, “Elda pia telebe,” nyabuka, el siuk erenyake.

³ Allah ara tia talak ati, Yerusalem mutuku ulule. Diba, el tia talak ati ululak ara, Sion mutuku noutamuk unamle.

⁴ Yerusalem mutuku noutam arye, nun mal olan nang arye, mal dobuka uku sekikce, dokwetepsik bukni, Allah arye auku din mok ning nirya, kum kipdeibuk. Tonda, nun olana ati yin talin nang arye, sik nong lelina ati talibik ning, el si perisai ap, tonda sik ninye ona ati parang ap nirya dobuka, ceplobukba, mitik-mitik kibuk.

⁵ Se, nun ni Allah, anda pia telebuk ulyama ati, an dirina ara, pia weik ukulule. Tonda, minop talak bulamuk weik mutuku kon nirya ara, ‘Pia mambule’ tenenyap bukni, dipkoprob aning ara, mitik tonun bukni, anda teleb una ap, mikip una ap, ulyam ning ara, pia nukman kumto ubuka, pia telebuk ulyame.

⁶ Nun ona ati ara, pia ilil una kumce, malye kanye bobuka ulamikce, yanuka olamsik bukni, ance melipsuluma deice arye, anang obuburye, anang nirya, talilamik ning nirya alubuka doprobupu. Anang nirya, akunum obuka sirya dakupu ati, sikda tuba kam kum buknamake. Akunum dibike. Diba, sik ap olanmabu talak ara, sikda an Allah ati, ilil weik ubukba, sikce, ‘Se, yata wiriptibye do?’ tenen, teninauk unmeka ati, sik taruk mikip kum ubukba, ninye on ning talipman kumto unmekce, nun kum opsike.

⁷ Se, nun apu koproba Yakub birye, si erelamuk Allah, ance nun mal olan nang sikti, mikip weik arye wenepluma ati, sik yin talin nang, kuda basam deice bukuka yangalamik ning ap, anang sik kuda basam nirya ara, ance melipsuluma deice arye, onauk winipmupuba, anang nirya ara, obuka sirya dakupu.

⁸ Ati ara, nun ni Allah anda, ninye nirya arye anti, ilil weik unamsile. Ance ninye tukwak nang nirya ati, yupu lipsisikuka bokeipsimince, yu weik deice arye wenepnamsilam talak ara, yatanye birye, tuba tiktu do? Kume, tukwak nang nirya ara, tonoknye babye, kum tiktue.

⁹ Kume, nun ni Allah, anda im deice ulyamak arye, ‘Anggun tukwak nang nirya arye, malye winilulum ning ati, winibuka-winibuka wenepnamsine,” nyabuka, yupu lipsisikuka bokeipsulum talak ara, nun tukwak mutuku noutam unyap nang nirya ara, pia ilil weik upsukba, yupu nyana kumce, tunim abuka unyabe.

¹⁰ Ara, an Allah arye, ‘Sik tukwak nang kan-kan bukni, yuk nang arye, sik nong deice ikin ning weik deibikiba, sik kanye talima pia mitanguk unyak nang ati, narye melibuka lyepropnamsine,’ nyaplum talak ara, tukwak nang nirya kekebikce, ilil pia weik ubukba, tunim abuka upmupu.

¹¹ Diba nun ni Allah, anti pia yu tenebikirye, ‘Allah bira nun like,’ tenekinyak nang babye, ance sikti, wenepmince, opminyopura, sik anang babye, tamubikirye yanuka, anti, ‘Se, dipkoprob Allah ara, pia mikip weiknye, tonda, pia telebnye ulule,’ nyabuka, an siuk erenamake. Diba nun ni Allaho. An ti, ‘Nun like,’ tenekinyak nang babye, aminyan talak tuba kam unamak nang babye, sirya ara, sik babye yanuka, anti, ‘Allah ara pia telebe,’ nyabuka, an siuk erebuka, kinamkiake.

¹² Ati ara, nun Israel nang nirya kintinipnamabe! Nunce si erenyapnye, nun ni koproba Allah Yahweh anti, “Naio, an si erena ati, aning ara wininamkine. Aning ara, ton wininamkine,” nyalin yupu deice arye nyanamabe. Tonda, aning nyanamap touk, kum bataknamaba ati, dipkoprob nong upnamle. Ati, yata mutuku nang do nirya, Allah dam yanganamak nang yala-yala nirya ara, nun ni Allah si erena ati, teleb ning boyanuka, el dam boyanamabe. Ara, ninye winipmanto kum ning, mikip weik pil dolulnye, nun ni Allah ati, teleb ning kintinibibirye boyanuka, anti arelyanganamabe!

¹³ Ara, nun ni Allah arye, ninye tukwak nang, sik ninye deiyok kibuka unyak nang ara, maknya kininyak bukni, Adeiyok nang nirya babye, weneplirye, amu tamuk kililule. Diba, Allah elcuk, ninye deiyok kibuka, tukwak nang mutuku sirya, im sirya nirya talibuka, unyak Raja-Raja nang babye, Allah ati tenebikirye, ilil pia weik upliba, sik nong nirya sirim talilule.