Mazmur 73 - Eipomek

Kanye talima erelan ninye ati, nyabuk yupu

¹ Allah arye el ‘Naʼ tenen, ninye, Israel yala ninye ati, bico tenelirye, teleb winililule. Dipkoprop malye winina kumce, kanye talima diksukum upliba, telebuk winibuka unyak ninye nirya ati, Allah arye, pia weik kanye delilirye, teleb winililule.

² Bukni, min talak ara, na kanye akunum teniltona upnuka deice, na dib tenelamse ning ara, walwalapmanto upnuk. Winipmanto ara, alap weik uplye bisik, ninye mangkau kanye bobuka bakibuk, alap arye opmanto ulamle touk, winilamse.

³ Winilamsa deiyok ara, ani. Narye, sik kanye talima erebuka, kwalinauk unyak ninye, pil dobuka, dolon ning weika dolokirye, kanye deibuka telebuk unyakba, elinunce, ‘Se, sik anang ara, kanam asa uk unyak bukni, nara yata deiyok ati, ikin asa uk unun do?’ tenelamsa deice arye, yu upnukce, na dib tenepse ning, walwalapmanto upnuke.

⁴ Walwal asa ulamse talak tenelamse ning ara, ani. Se, sik kanye erepdakirye, kwalibuka wininyak nang ara, sik nong ton, uk weika arye kum dilule. Sik nong nirya teleb ubuka mikip asa arye, pia telebuk unyake.

⁵ Tonda, nun yuk talye daunyab ninye nirya ara, weik imun ning nun dam yaliba, ikin kanye bobuka, ulamnyap bukni, nun ikin ulamap touk, sik anang ara, ikin weik asa kum unyake. Sik wininyak ning nirya ara, telebuk ulula ati ara, sik kanam asa uk unyak bukni, nara, pia mambul kirikuka, ikin piluk donuna anya arye, ‘Se, yata deiyok ati, ikin unulul bukni, sikda kanam asa uk unyak do?’ tenen, ulamse.

⁶ Yuk nang ikin ning dololamak touk, sik anang ton kum dolonyake. Ati ara, sik kanye talima erelanyak nang, ikin ning, sik nong deice kum ulula ati, talye diamuk wininyakce, kwalibuka karye onyake. Wininyakce, ikin ning dolonyak ninye ati, tuba-tuba yu yupu nyana ap, ona ap unyake. Sikda, talima erepdakirye, yu wininyak ara, kum duknunyake. ‘Nunda teleb nanguk unyap’ tenen, lak noutam anyuk unyake.

⁷ Sik malye wininyak ninye, sik talima pum tam ara, malye winin ninguk langdipliba, alye una kum diparyuk, sikce, ‘Malye winin ninguk talibuka, talye lukparabuka wininamabe. Nun tenebibye touk, wininamabe,’ tenebikirye, adeice arye, malyeuk wininyake. Sikce, ‘Malye winin ninguk wininamabe,’ tenenyaka ara, pia weik ulula ati ara, kum nukmanto ulule.

⁸ Sik yupu talye-talye nyanyaka deice arye, yuk ninye nirya ati, akutubuka nalibikirye, yep-yep abuka kinyakce, malyeuk wininyake. Kanye talima erena deice arye, kwalinyakce, yuk talye ninye nirya ati ara, ‘Nunce nyanyap yupu kum kekepsumunyopura, nunce anggun deice, ikin ning weika arye, delinamsiabe,’ nyabuka kwalilanyake.

⁹ Sik anang arye, yupu nyanyaka ara, “Im deice ulul ning ap, Allah ap ara, talye ninguk ulule. Aning nirya ara, mambul kum bukni, nunda weik mambul unyabe. Tonda, tukwak mutuku ulul ning nirya ara, nun bidamang ning uka,” nyabikirye, yuk ninye nirya ati, “Sikda malye ninye uk unyake,” nyabuka, malye yupu nyalbanyake.

¹⁰ Nyabicopura, yuk talye-talye daunyak ninye babye, Allah diba tenenyak ninye babye, anang sik yupu kekebikirye, ‘Sik anang ara, dib nyanmasiake’ tenen, sik nyanyak yupu uk kekebuka dobolbanyake.

¹¹ Sik akwalinyak ninye arye nyanyak yupu ara, ani. “Allah el im deice erebuka ulirye, aning nirya talibuka winilulnye bira, nun unyap ning nirya eibuka, bita kel kum kisulule. Im deiceuk ulula ati ara, “Yata wiribuka arye, nun wininyap ning eibuka, kel biksutu do?” nyabuka, malye yupu uk nyanyake.

¹² Sik pia malye ninguk talibuka wininyak ninye arye, wininyak ning ara, akunum laka nyapmasin atia. ‘Yata wiripnamsil do?’ tenena kum diparyuk, sik ur talye kanye bobuka unyake. Kanye imun ning, aning-aning nirya ara, sik dam yalirye, ikin kum ulule. Tonda, sik talinyak ning nirya babye, tabakuka dolokirye, weik upra baliba, bona utotoa weik talin nanguk unyake.

¹³ Aning nirya elilamsa ati, minop talak arye tenelamse ning ara, ani. Se, sik malyeuk wininyak ninye ara, sik kam unyak talak nirya, talye kanye deibikirye, bona utotoa talin nanguk unyake. Bukni, na ikin unulule. Ati ara, ‘Na kanye diksukumuk unirye, malye winipnyak’ tenen, kalikilanun ning ara, urdem ati wininune. ‘Deiyok ton kum ulule,’ tenelamse. Tonda, yuk nang eibikirye, ‘Anye dipkoprob malye kum winilule, tenepnamniyak’ tenen, malye winilamse ning nirya bataksirye, telebuk winilamse. Winipmanto ara, malye ning nun taruk deice dupsiliba, taruk mek iliklamap touk, malye winin ning nirya bataksirye, telebuk winilamse. Bukni, ‘Aning babye, talye ati winipse,’ tenelamse.

¹⁴ Na kanye pum tam tenelamse ning ara, ‘Atalak-atalak nirya, ikin ninguk, na dam yanganulule. Aning atouk, beren tam talak nirya ara, kanye ikin ning, na dam pia weik yanganulule. Wininilya ara, Allah arye weneniliba, ikin unulul do?’ tenen, malye kanye bobuka ulamse. Ati, na kanye ikin deiceuk ulamse.

¹⁵ Aning atouk, winibuka tenelamse bukni, na tenelamse ning ara, yuk ninye kekepmantoak, lak arye kum nyalamse. Na ni Allah, narye an mapu, diba tenekinyak ninye ati, ayupu atouk lak noutam akunum nyamtinyopura, dipkoprob narye an mapu ati, pia malye winililamtinye. Ara, amalye yupu deice arye an ap, anti diba tenekinyak ninye ap ati, yanipmanto kilamse bukni, ayupu lak noutam arye kum nyalamse.

¹⁶ Bukni, ‘Anyapmase yupu nirya ati, aning nirya piribuka kel biknune’ tenen, winilenmase talak ara, na pia kanye ikin uamnuk ati, bita kel kum biklamse. Aning nirya tenilelamsirye, ikin ulamnukba, imun kanye bobuka ulamse.

¹⁷ Winilamsa ani, aminyan talak, Allah Yahweh, el si eren aik binuka, wekse talak ara, sik malye winin ning, wininyak nang aminyan talak winipnamak ning ara, moubuka kel bikse. Ara, aminyan talak Allah arye, amalye wininyak ninye nirya ati, wenebuka oplirye, kum daneipnamle ning ara, moubuka kel bikse.

¹⁸ Na ni Allah, dipkoprob ance, amalye wininyak ninye, sik banamak bisik nirya ara, alapuk kipdeipmince, moul kiplopminba, abisikuk bakirye, sakuka opliba, dibini uk wininamake. Sik wininyak ning ap, sik talinyak ning nirya ap ara, kum danamlarya.

¹⁹ Ance amalye winin ninguk, talibuka wininyak ninye ati, wenepnalam talak ara, adiparyuk aninye obuka, minopce kum daneipnamlyame. Winipmanto ara, mek oplirye, aning-aning nirya bobuka, minop bobalamle touk, sik nong deice adiparyuk, ikin ning deipnamlyame. Winipminba, amalye unyak ninye minopce opminba, dibikirye, sirya daknamlyame.

²⁰ Winipmanto ara, ninye arye, lengdar mabikirye, aning-aning ayala-ayala nirya elinyak bukni, mapmakca ani, bukikirye, adiparyuk, sik asum lengdar deice arye eipmakce ning, lak noutam kum upliba, kum eipmanto ati ara, luba kilongolamak touk, wininamake. Ara, Allah Yahweh, ance aninye sik wenena ati, yanamlam talak ara, sik malye unyak ninye nirya, adiparyuk kum daneipnamlyame. Lengdar mapmakca ani, bukikirye, luba kilongolamak touk kibuka, an adiparyuk aninye ati wenepmince, kum daneipnamlyame.

²¹ Minop talak arye, amalye un ninye, sik winilamak ning elilamse talak ara, ‘Se, sikda kanam asa aryuk wininyake,’ tenelamsirye, na talima pum tam ara, yo tace ning luksiliba, nong pum tam weksilirye, uk weik dilamsil touk, winilamnuke. Na kanye talima pum tam ara, yu weik upnukbuk, malye kanye bobuka ulamse.

²² Winibuka ulamse talak ara, na ni Allah an dam ara, nara pia walwalnye atonun kibuka ulamse. Tonda, talye bai tam kam ulul ning, moubuka kum tenepmanto ulamak touk kibuka, an dam ulamse. Kanye bona kum unyak ninye atonun, ulamse.

²³ Winibuka pia malye weik ulamse bukni, wini talak ara, na teleb kanye bobuka unune. Nara, na ni Allah, an dam anyuk tuba unye talak ara, ance na taruk sirik tam ning talipnimince, teleb kibuka melinilyame. An dam anyuk, pia aunamne.

²⁴ Ance nati, “Aning ara, wininamlyame. Aning ara, kum wininamlyame. Teleb ning ara ani, malye ning ara ani,” nyabuka, peterelamniminya ani, na sirya talak akunum dipnyopura, an dopropnimince, an weik dirin ap, pia teleb kibuka ulyam ning ap dam ara, im deice deipnamnilame.

²⁵ Se na ni Allah, anda im deice uminyeba, antibuk patanulula anya arye, akunuma. Yatato ning ton patapnutu do, kume. Kume, an ap neika unanam ca. An tonok ati, ‘Seʼ tenenune. Aning atouk, tukwak mutuku unamne talak ara, antibuk pataniliba, ‘Seʼ tenekunune. Tukwak mutuku noutamak aunamne talak ara, yuk ning ton, pia kum ‘Seʼ tenenune. Allah antibuk, pia mambulnye ulyama ati, ‘Seʼ tenekinirye, antibuk pia patanulule.

²⁶ Na nong ap, kanye tenen ning ap nirya ara, mitanguk upra balirye, aminyan talak kum uamnilya babye, na ni Allah ancuk, na talima pum tam mikip kilinilyame. Diba na ni Allah, ancuk kalikuka dinememce, wini talak arye doryanamle talak nirya, pia ati lyelonamnilame. Ati ara, yuk ning kum bukni, an tonok pataniliba, unune.

²⁷ Bukni, yata ninye do nirya, anti, ‘Nun like’ tenen, lik upliba, an dam arye, yukak sakuka, banyak ninye nirya ara, sik bidamnye arye, akunum malye winililanyaka ati ara, ance aninye wenepmince, kum daneipnamlyame. Aninye ara, minop talak, ‘Nun ni Allah, el amu tam unamabe,’ tenelamik bukni, wini talak ara, yuk kanye tenepmakce, ‘Elda nun like’ tenen, an yaniltakinyaka ati ara, sik anang ara, adiparyuk wenepmince, obuka kum daneipnamlyame.

²⁸ Bukni, nara pia dipkoprop, na ni Allah, an dam anyuk unamne. Aninguk tenebuka ununa ara, teleb uka. Na kanye talima pum tam arye, akunum tenepse. Ara, Allah Yahweh arye, aning-aning deice tam talibuka ulirye, Weik Erena Deiyoknye ulirye, ‘Wininamne,’ tenelye touk, aning nirya dipkoprob winilulnye bira, ‘El dam anyuk unamne. El diparyuk melibuka lyelonamnile’ tenen, unamne. Na ni Allah, ancuk tuba kalikuka melinilyamnye winiminya ati ara, ance mambul pil dolyam ning nirya ara, yuk ninye, sik kekena ati, laka nyabuka peterelbanamne.