Mazmur 72 - Eipomek

Ninye deiyoknye, Raja Salomo birye, Israel ninye, sik ninye deiyok kibuka talipnamuka ati, Allah morobuk yupu

¹ Ninye deiyoknye Raja Salomo birye, Allah ati nyabuk. Na ni Allah ance, “Aning wininamlulume. Aning ara, kum wininamlulume,” nyapdeiamsuk atonun kibuka, ance deipnamsilam ninye deiyoknye Raja ara, ‘Elce ninye yuk ninye nirya ati, yupu teleb kibuka bokeipnamle’ tenen, moropkine. Ance elti, aninguk peterepmince, an pia weik kel kina deiyok ning areptumba, ‘Nun talipnamsil Rajanye, teleb kibuka uturye, ninye deiyoknye Raja kibuka, talibuka unamle’ tenen, moropkine. Ance el wibuka deipluma ati ara, ‘Ance Raja biti, diksukum kibuka, pil dona deiyok ning peterepnamlam’ tenen, moropkine.

² Winipminba, ance, ‘Na mapu koproba unamak’ tenen, wipdeiamsulum Israel ninye ati, Raja birye, “Aning ara, wininamlulume. Aning ara, kum wininamlulume,” nyabuka, an mapu ati diksukum kibuka talinamle. Ayupu deiceuk, elce tenebuka, sik aninye wenepmalya ani, lipsisikuka teleb ulinamle. Tonda, ikin weik ning dopdobikirye, imun kanye bobuka unyak ninye, elce melibuka pil dopra banmalyopura, sik nirya teleb kanye bobuka unamake.

³ Pia diksukumuk upra banmalya ani, adeice arye, nun unamap mutuku ap, nun talibuka wininamap ning ap, wa wibuka kounamap ning nirya ap ara, paplirye moulamlya ani, nong pia telebuk upra balyopura, amutuku noutamak unamak ninye nirya babye, telebuk unamake. Tonda, elce ninye deiyok talibuka unamle ning nirya, telebuk upra banmalyopura, ‘Elce talinamle ninye nirya babye, pia telebuk unamak’ tenen, moropkine.

⁴ Tonda, sik amutuku unyakce, ikin weik ning ululba, pia ikin kanye bobuka, unyak ninye nirya ati, ance melipminba, elce ninye deiyok talibuka, Raja unamla ati ara, sik aninye ati, melibuka teleb winilinamle. Malye wininyak nang arye, an mapu ati, ‘Opnuyabe,’ tenebuka yanganamak talak ara, elce sik mal olan nang ati, olbisinamle. Tonda, bona utotoa talina kum ninye arye, delinyak mapu nirya ara, elce melinamle. Winiplirye, talye bona utotoa talina kum ninye ati, sik nong deice ikin ning delinyak ninye nirya ati, elce obuka, sirya daklirye, nirya daknamle. ‘Wininamle’ tenen, moropkine.

⁵ Na ni Allah, ance nun ninye deiyoknye Raja ati, melipminye deice arye, amutuku ninye pia talinamle. Ara, elcuk amutuku ara, taleamlya ani, dotalak yata keting eibina oubina kinamle talak nirya ara, aRaja aryuk, ninye deiyoknye kibuka talinamle. Winilirye, adeipdanin banamak ninye nirya babye, elcuk talinamle.

⁶ Elcuk aninye talinamle talak ara, winipmanto, wa wibuka kouamicak, mok ceplirye, adeice sakliba, koun ning teleb kibuka palamle ning atonun, Allah ance elti, melipminya deice arye, elce talinamle ninye nirya ara, telebuk unamake. Tonda, mok weika arye ceplirye, koun ning bok deice saklibuk, koun ning paplirye, urasin teleb kilamle touk, ance melipminya deice arye, ‘Nun Raja arye, talinamne ninye nirya ara, telebuk unamak’ tenen, moropkine.

⁷ Na ni Allah, ance elti, melipminya deice arye, elce talinamle ninye arye, diksukum teleb winin ninguk, pia ati upra banamake. Tonda, nun mutuku noutamak pil donamap ning nirya ara, ‘Awala-awala nirya mapbabiba, pia telebuk upra balamlya ani, sirya dakna talak babye, tuba telebuk unamsil’ tenen, moropkine.

⁸ Na ni Allah, ance nun ninye deiyoknye ati, melipminya deice arye, elda ninye deiyoknye Raja kibuka, talinamle talak arye, talinamle mutuku ara, keting yangan tam arye, dipdongobuka, keting wekelban tam nirya ap, talipliba, lo weik unamle. Ara atam, weik laut mekwen dam arye dipdongobuka, otam laut mekwen tam nirya ara, elce talinamle. Winipliba, anoutamak nirya ara, pia weik mutuku unamle. Aning atonun, keting yangan tam biyuk weik mek, el si Efrat mek dam arye, dipdongobuka, keting wekelban tam nirya ara, mutuku-mutuku nirya, ‘Ance melipminba, elcuk amutuku nirya talinamle’ tenen, moropkine.

⁹ Tonda, mek mitik tonun ulul mutuku, pata mutuku noutamak, daunyak ninye ayala-ayala nirya ara, tonokakuk kum unyakce, amutuku unmana batakuka, omutuku unmana kinyakce, banauk unyake. Awininyak ninye ara, nun ninye deiyoknye Raja dam yakirye, el si erena ati, yanuka gutam tuku dipdongobuka, kanupdongobuka, si erenamake. Aning atonun, el mal olan nang babye, el dam yakirye, el si erena ati, yanuka gutam tuku dipdongobuka, kanulongonamake. Aning atonun, aninye nirya arye yanuka, el si erebuka, el yan amu tamuk unamake.

¹⁰ Winibuka, elce amutuku nirya talinamle talak noutamak ara, keting wekelban tam, mutuku si Tarsis mutuku noutamak, ninye deiyok talibuka unyak ninye ap, laut mekwen noutamak bukni, mekwen deibuka, sekdongobuk mutuku unyak ninye nirya, el dam yakirye, elda ninye deiyoknye Raja unamla ati, sik talibuka unyak teleb ning nirya dobuka, el dam yanuka arelyanganamake. Tonda, keting yangan tam, Arab mutuku ap, Etiopia mutuku ap, ninye deiyok kibuka, Raja talilamik nang nirya arye, nun mutuku talipnamsil Raja atibuk, si erekirye, teleb ning bobuka, el dam arelyanganamake.

¹¹ Tonda, mutuku yuk-yuk nirya bukni, mutuku-mutuku nirya talibuka, ninye deiyok kibuka taleamika, Raja nang nirya arye, el atibuk kinamake. Winibuka unyakce, sik anang nirya ara, el amu tam unamake. Sik nirya arye, el piluk donamake.

¹² Atalak ara, ninye arye, ‘Aninye ara, mambul kume,’ tenebuka batakikirye, pia imun kanye pil arukunyakbuk, ikin kanye bobikirye, mitang asa kibuka, unyak ninye nirya ara, elce lyepropnamle. Tonda, amu tam unyakce, bona utotoa talina kum ninye arye, ‘Nun weik mambul usulula ati, yatanye birye melibuka lyepsutu do?’ tenen, elinamak bukni, sik melipmanto nang ton kum eibicopura, nun Raja biti, morolyanganamake. El ti, “Melipsilyame,” nyabuka, moronamak ninye nirya ati, elce teleb kibuka meliplirye, lyelonamle.

¹³ Deiyok ara, elda ninye deiyoknye Raja kibuka, talinamlanye birye, sik ur talye kankan ninye ap, bona ning pia kum talinyak ninye ap ati, bico ululba, sik imun kanye bobuka, unyak ninye ati, elce melibuka lyelonamle. Aning atonun, yu nang arye, ‘Sik ur talye bona utotoa talina kum ninye ap, mikip kum ninye ap, daoplopnamabe,’ tenenyakba, imun kanye bobuka, daunyak ninye nirya babye, elce lyelonamle.

¹⁴ Yuk nang arye, sik talye kankan ninye ati, ikin ning sik nong deice deibikirye, “Adiparyuk, pil talye dopsululume,” nyabuka, yu yupu deice arye, arukunyakbuk, imun kanye bobuka, unyak ninye nirya ara, el ninye deiyok kibuka, unamlenye birye, amutuku nirya talinamle talak ara, sik aninye nirya ati, lyeproplirye, kanam asa kilinamle. Winipliba, sik unamaka ara, telebuk unamake. Talye kankan ninye nirya ati, weik arye bico tenelula ati, nyapne.

¹⁵ Elda, nun ninye deiyoknye kina ati, yanamlanye bira, pia kamuk unamle. Winipliba, arin ning ati, bobuka yanganamak nang arye nyanamake. “Nun deiyoknye, anda teleb uka. Pia kam unamlame. Ati ara, Arab mutuku si ara, Syeba mutuku arye, pia dekna weik kat ning, el si emas, boyanganamkiabe,” nyabuka, arelyanganamake. Tonda, ninye nirya arye, ‘Allah arye anye biti, pia melilamliba, telebuk unamle’ tenen, elti, tuba-tuba moronamake. Asum-asum nirya ara, el si erena ati, teleb yupu uk nyanamake.

¹⁶ Tonda, aninye deiyoknye birye, amutuku talinamle talak noutamak ara, Allah arye melilamliba, amutuku noutamak nirya ara, gandum wa pia weik panamle. Tonda, amutuku kon deice, wa wibuka koulamak gandum nirya ara, nong pia weik akunum uplyopura, kumanya yalirye pupliba, gandum bok nirya kamupliba dakalsakanamle. Tonda, sik amutuku noutamak nirya ara, sukun tuku uk unamle. Ara, Libanon mutuku, teleb sukun tuku ulamlaba, duk moulamle yo, ayala-ayala nirya, duk weik moulamle touk, nun mutuku babye atonun unamle. Amutuku noutamak unamak ninye nirya babye, yupa pia weika arye deibuka, tabakdabakibuk, aninye yupa ara, talye bai mutuku palamle mutmuta atonun, kibuka unamake. Winibuka unamak talak, sikce wa wibuka kounamak ning nirya ara, teleb kibuka papliba, libuka dinamake. Aning nirya, ‘Winibuka unamle’ tenen, Allah ati moronamabe.

¹⁷ Sik amutuku unamak ninye nirya arye, ayana talipnamsilanye, ninye deiyoknye Raja ati, si erebikiba, pia aunamle. Tonda, ayanamlanye, el si tuba auplyeba, el tibuk, “Nun deiyoknye ani,” nyabuka, elti, si pia erenamake. Keting sinarya aupnamle talak nirya ara, el tibuk kinamake. Aninye deiyoknye, pia teleb unamla deice arye, mutuku-mutuku nirya unyak ninye, ayala-ayala nirya ara, telebuk ulilulba, weika arye tabakikirye, teleb wininamake. Elce, tukwak mutuku noutamak unyak ninye nirya ati, teleb kililirye, melilamliba, tukwak mutuku ninye nirya arye, “Diba, elda pia telebnye ulule,” nyabuka, elti, si pia erenamake.

¹⁸ Ati, na Raja Solomo arye, na ni Allah Yahweh anti, telebe nyabuka, an si erekunune. Atonun, sik Israel ninye nirya arye, an siuk erenamkiyake. Ara, “Israel ninye ati, pia melibuka kalikisulul Allah, el si Yahweh, elcuk, weik mambul pil, pia ninye winipmanto kum piluk dolule. Yuknye ton, el mambul pil dolul touk, kum doptue,” nyapne.

¹⁹ Na ni Allah Yahweh, anda pia telebnye uminya ati ara, an si ara, weik mambul siuk ulule. Ati, ninye im sirya, mutuku sirya nirya arye, an siuk pia erenamkiyake. Winipkikiba, an si ara, pia aunamle. Tonda, ance im sirya, mutuku sirya nirya, talipminba, tukwak mutuku unyak ninye nirya arye, an siuk erekinyakba, ‘Allah an mikip weik ap, ance pia mambul pil dolulum ning ap, an pia telebuk winilyam ning ap aryuk, tukwak mutuku nirya langdipnamle’ tenen, moronyabe. ‘Aning ara, pia dipkoprob nong upnamle’ tenen, Amin nyapne. Akunuma.

²⁰ Ninye deiyok kibuka taleamuknye, Isai el mi Daud, amot yupu sekuka deice arye, Allah ati morobukce, sirya dakuk.