Mazmur 71 - Eipomek

Wisi akunum danamuknye birye, ‘Allah ance tuba melipnilyame!’ nyabuka, morobuk yupu

¹ Se, na ni koproba Allah Yahweh, antibuk diba tenekununa ati, ‘Na ikin upnilyak’ tenen, an dam yanuka unune. Ati, ance melibuka kalikniminyeba, ‘Na mal olan nang arye yanuka, kum opniceura, na alye kum dakdanamne’ tenen, moropkine na nio.

² Allah anda pia diksukumuk ulyama deice arye, ‘Na ti melibuka lyepnimince, teleb kipdeipnamnilam’ tenen, moropkine na nio. Tonda, narye anti moropkinye talak nirya ara, ‘Moubuka kekepnimince, yanuka melipnamnilam’ tenen, moropkine.

³ Winipmanto ning ara, ‘Na mal olan nang arye, yanuka opnikcak’ tenen, weik mutuku deice tam, keil dam binuka duknubuka, lelipdanirye, teleb kilamle touk, ‘Ancuk nati, melibuka kalikinamnilyam’ tenen, moropkine. Ara, ‘Na ikin unulul talak nirya ara, an damuk bibik abuka yanirye, telebuk unamne’ tenen, moropkine. Allah ance nati, “Anye tuba-tuba melibuka lyepropnamne,” nyabuka, akunum tenepnulumce, kalikinilyame. Deiyok ara ani. Winipmanto ara, ‘Ikin ning na dam yanilyak’ tenen, weik mutuku bukamlye keil do, ninye arye domikce keil aik do, aning damuk binuka duknupyeba, telebuk unamne. Aning atonun, an damuk unirye, ikin ning na dam kum yanganamle, winiplyeba, nara pia telebuk unune.

⁴ ‘Pia malye-malye wininyak nang arye, nati opnikcak’ tenen, Na ni Allah, ancuk nati, melibuka lyepropnamnilam’ tenen, moropkine. Aning ara, ance nyasilyam yupu nirya ara, yaniltaknauk wininyak ati, ance anang ati, wenebuka opnalame. ‘Anang arye, na dam yanuka opnikcak’ tenen, ‘Ance melibuka kaliknimince, lyepropniminyeura, sik pia malye wininyak nang arye, nati kum yanuka opnamniak’ tenen, moropkine.

⁵ Allah antibuk morokununa deiyok ara, ani. Narye, ‘Aning-aning nirya talibuka Pia Mikip Weik ulya Deiyoknye Allah ara, ancuk nati lyepropnamnilam,’ tenen, antibuk diba tenekunune. Diba na ni Allah Yahweh, nara mitik mi ulamse talak arye, dipdongobuka, na kam unye talak nirya ara, antibuk diba tenekunune. Yuknye biti, ton pia diba kum tenenune.

⁶ Na nin birye deipnuk talak arye, dipdongobuka, na kam tuba unun talak nirya ara, ‘Allah aryuk nati, melibuka lyelonamnil’ tenen, antibuk diba tenekunune. Diba, an mikip deice arye, na ni koproba arye, deipnukba, ancuk nati, pia kalikinilyame. Tonda, an pia teleb ulyam ning ap, mikip weik ulamuk ning ap ati, antibuk, an si pia erenamkine. Aning ati ara, na kam unamne talak nirya ara, antibuk, “Anda pia teleb ulyame,” nyabuka, an siuk erenamkine!

⁷ Na nio, na kam ulamse talak nirya arye, ikin kanye bobuka, ulamse talak nirya ara, ancuk melilamnulumba, nara bikilina atonunye winilamseba, yuk nang arye, aning elilamika deice arye bikamik. Ara sikce, ‘E, dipkoprob Allah arye, anye bira, pia melibuka kalikilula ati, nun babye Allah ati, diba teneptibye’ tenen, akunum biklamik. Sikce aning bikamika deiyok ara, ani. Ara, na ikin ulamse talak nirya ara, an mikip deice arye, pia melibuka lyelolamnuluma arye, an dam, telebuk unune.

⁸ Aning ati ara, asum-asum nirya ara, antibuk, “Anda pia telebuk ulyame,” nyabuka, an siuk erekunune.

⁹ Wini talak ara, na akunum wisi dase ati, ‘Atalak ara, ance lubakibuka kum bataknamnilam’ tenen, moropkine na nio. Ara, na akunum wisi daseba, na mikip ara, mitik aryuk akunum unmana bukni, ‘Wini talak ara, ance dipdebuka, kum bataknamnilam’ tenen, moropkine na nio.

¹⁰ Deiyok ara, nati, ‘Anye bira, nun lik,’ tenekinyak nang ara, “El ti malye kipdeipnamabe,” nyabuka, nati malye yupu nyanikirye yupu talinyake. Tonda, sik anang aryuk, ‘Kume, anye adiparyuk optibye’ tenen, bulubikceura, warikininyake. Sikce nati, “Anye optibye,” nyabuka, yupu talininyake.

¹¹ Na mal olan nang arye, “Kume, anye bira, Allah arye akunum bikuka batakuka ati, elda talye optibye,” nyaninyake. Tonda, sikce, “Kume yata nang arye yanuka, anye melibuka lyepnamak do? Kum ati, nuncuk elti, dobolbinuka tomobibirye, talye oplopnamabe,” nyaninyake.

¹² Aning ati ara, ‘Se na nio, Allah anda bataknimince, karen akuk kum unamlum’ tenen, moropkine. Aning kum bukni, ‘Ayu nang arye opnikcak ati, anda minopce, na dam yan melibuka kalikinamnilam’ tenen, moropkine na nio!

¹³ Tonda, deiyok kum upmalibuk, nati, “El malye kibuka ati, opnuyabe,” nyabuka, minin yupu nyaninyak nang nirya ara, ‘Ance anang ati malye kipdeipminyeura, alye dakdanuka unamak’ tenen, moropkine. Tonda, ‘Ance sik yu nang nirya ati, wenebuka opmince, sirya daknalam’ tenen, moropkine na nio. Tonda, aning atonun, yata nang do nirya, sikce nati, ‘Anye malye kibibyak arye, opnamabe,’ tenenyak nang nirya ara, ance wenebuka opminyeura, alye dakdakceba, yuk nang nirya eibikirye, anang ati, yep-yep abikirye, anang deice malye yupu weik nyanamak’ tenen, moropkine.

¹⁴ Na mal olan nang ara, alye weik dakdanamak bukni, narye Allah anti, ‘Allah elcuk nati, melibuka lyelonamnil,’ tenen, tuba-tuba diba tenenamkine. Tonda, Allah anti, “Anda pia telebuk ulyame,” nyabuka, tuba-tuba tabakuka an siuk erenamkine, na nio!

¹⁵ Tonda, narye, ‘Yuk nang kekenamak’ tenen, an Allah arye, pia teleb kibuka, diksukumuk winilyam ning nirya ara, laka nyanauk unamne. Ara, ance, “Aning ara, wininamlume. Aning ara, pia kum wininamlume,” nyapdeiamsuk yupu nyasilye touk, teleb diksukum winin ninguk winilulum ning ati, laka nyanamne. Tonda, asum-asum nirya ara, “Allah arye pia melibuka lyesulul,” nyabuka, yuk nang sik kekena ati, laka nyanauk unamne. Aning tuba nyanamne deiyok ara, ani. Ance nunti, melibuka lyesilyam ning ara, nukmanto kum ulula ati, aning nirya kum biktinye ati, tonok talak deice arye, kum laka nyaptinye. Tonda, tuba-tuba laka nyanauk unamne!

¹⁶ Ati, Allah Yahweh, anda aning-aning nirya talimince, Pia Mikip Weik Deiyoknye ulyama ati, ance pia dekmanto wiamikce, pil domikceura, laka nyanauk unamne. Ance pia teleb diksukumuk ulyam ning nirya, laka nyanamne deice arye, an si tonok pia erenamkine. Yuknye birye, ulye ning ati, kum laka nyanamne. Ancuk winilyam ninguk nyapnirye, an siuk erenamkine.

¹⁷ Se na ni Allah, na mitik mi tuba ulamse talak arye, dipdongobuka wini talak nirya ara, ance, ‘Winipnamlyame,’ nyabuka, peteranauk winilamnulumba, bikamse. Tonda, yuk nang kekena ati, wini talak babye, ance pia teleb kibuka pil dominye ning ara, tuba laka nyanune.

¹⁸ Ati ara, na ni Allaho, na akunum wisi danirye, kul potong akunum tiknilya babye, ance nati, dipdebuka kum bataknamnilam’ tenen, moropkine. Tuba melinauk wininamnilyame na nio. Ara, na kam tuba unamne talak nirya ara, an weik mikip deice, pil dolyam ning ara, ‘Yuk nang arye aminyan talak deipnamak mapu babye, kekenamak’ tenen, tuba laka nyanauk wininamne!

¹⁹ Se nun ni Allah, an pia teleb diksukumuk winilyam ning ap, an weik mikip deice pil dolyam ning nirya ap ara, nun tukwak nang arye kum nuktibye. Tukwak mutuku arye deice tam dipdongobuka, im deice weik karen ak upnilyeba, anoutam lo ara, ninye arye kiklipdebuka, laka kum nyaptibye toura, an weik mikip arye, pil dolamlum ning ap, diksukumuk winilyam ning ap ara, kum nukuka laka nyaptibye. Allah anda, pia mambul weik, mikip pil akunum dolyama ati, yatanye ton, an winilyam atonun winilul do? Kume, an winilyam touk nye ton, pia kum ulule.

²⁰ Na kel bikna ati, ance ikin ning ap, imun kanye bona ati ap, pia weik arye areamnulumba, mitang ulamnukba, kum winipmanto ulamse. Bukni, wini talak ara, ance nati, kanye tamubuka teleb kipdeipnimince, mikip kipdeipnamnilame. Dipkoprop akunum dipmanto ulamsebuk, wini talak ara na kele, ance nati, ila ton ap, teleb kipdeipnamnilame.

²¹ Na talima kwa dipneminyeba, ila ton ap teleb kipdeipminyeura, yuk nang arye, aning eibikceura, sikce nati weik tonun ton, si erenamniake.

²² Tonda, mot nyana ati, lelim nyalamle ning, takubarye (10) tapu ulul ning, el si ara gambus dopropnirye, mot nyanye ning ara, anti, “Anda pia telebe,” nyabuka, kanye deilin mot nyana deice nyanamne. Deiyok ara, ance nati, batakna pia kumce, tuba-tuba melibuka kalinilyama atia. Ance nati, ‘Winipnamkine,’ nyabuka, nyalin yupu deice nyanilyam touk, aninguk tuba wininilyama ati, an siuk erekinirye, mot nyanamne na nio. Tonda, mot nyana ati, lelim nyalamle ning, tapu takubarye (10) arye uamuk ning, el si ara kecapi dobuka, aning deice arye, mot nyanirye, “Anda pia telebe,” nyanamne. Se, nun Israel nang arye, si erekinyap Allah, anda pia telebuk ulyame. An talima noutam ara, malye winin ning tonok babye, kum ulule.

²³ Nara pin-pin kanye bopnirye, na sitang deice arye, “Anda pia teleb ulyame,” nyabuka, mot nyapnirye, an si erenamkine. Ance lyepropnulumba, na kum dipsa ati, na kanye talima noutam nirya arye, antibuk, mot nyanirye, “Anda pia telebuk winilyame,” nyabuka, an siuk erenamkine.

²⁴ Tonda, asum-asum nirya ara, beren tam talak arye dipdongobuka, sintam noutam nirya ara, na nyanamne yupu deice arye, “Se, na ni Allah, ance pia diksukum winilyama deice arye, nati pia melinilyame,” nyabuka, sik yuk nang kekena ati, laka nyanauk nyanamne. Deiyok ara, ani. Ara, sik yu nang arye nati, ‘Anye opnuyabe,’ tenelamnik nang ara, Allah ance wenebuka opminyeura, yuk nang arye, aning eibikirye, na mal olan nang ati, ‘Se, anggunda dipkoprob malye winiluluma ati, anggunda nun like, nyabikiba, nati opnik nang nirya ara, sik ayupu nyabikiba kekebikirye, alye pia weik dakdanamake.