Mazmur 70 - Eipomek

‘Na mal olan nang arye opnikcakʼ tenen, ‘Allah arye lyepnutu’ tenen, morobuk yupu

¹ Raja Daud birye, aMazmur mot sekukce, Allah yupu mot nyana deiyoknye biti, arebuk. Ara, ‘Allah si erebuka kina ati, kam ning obuka, elti, arepsi ning, tuba teninamne’ tenen ati, amot sekuk. Daud birye nyabuka, sekuk yupu ara, ani.

² Se, na ni Allaho, ‘Ance lyepnutum’ tenen, moropkine na nio. Na ni Allah Yahweho, sik asa kum bukni, minopce yanuka melipnilyame.

³ Na on nang arye, ‘Anye opnuyabe,’ teneninyak nang ara, ‘An Allah arye, sikti, kanye tenintona deiyok ning ap, alye dakalana deiyok ning ap, areptumba, ikin unamak’ tenen, moropkine. Diba, ‘Anye optipyiba, ikin weik uptu,’ tenen, eninyak nang ara, tamubuka bikikirye, alye weik dakdanamak’ tenen, an Allah ati moropkine.

⁴ Tonda, anang arye nati, ‘Moubuka ikin upmale,’ nyabuka, nalininyak nang ara, ‘Anye opnuyabe’ tenen, warikininyak bukni, ance sik tenenyak ning dobukapmince, tamubuka sik deice deipmin buk, alye weik dakalanamak’ tenen, moropkine na nio.

⁵ Bukni, yata nang do nirya, sikce, ‘Se, Allah dam uptibye,’ tenen, weik tonun pataplyeba, anti diba tenenyak nang ara, an Allah ati, kanye deibikirye, an dam uptingce, kil-kil asa arye unamak’ tenen, moropkine na nie. Atonun, yata nang do nirya, ‘Allah elcuk nun lyesulul,’ tenen, anti kanye delinyak nang nirya arye, “Nun ni Allah ara, pia mikip weik ap, teleb ap, ulule,” nyabuka, ‘Pia ayupu nyanamak’ tenen, moropkine.

⁶ Bukni, na ni Allah, nara pia amu tamnye ununa ati, aning-aning nirya talibuka unune. Nara talye bona utotoa kumnye unune. Ati, na ni Allaho! ‘Na dam minopce yamince, melipnamnilam’ tenen, moropkine. Yuknye birye kum bukni, ancuk na melina ap, na lyena ati deiyoknye bira, an tonok unilyame. Ati ara, na ni Allah Yahweh, ‘Ance na melina ati, sik asa yanamne’ tenena kume. Minopce yanuka, melibuka lyepnutume na nio. Raja Daud birye aMazmur mot sekuk.