Mazmur 7 - Eipomek

“Nai Allah, na winilamse touk, yupu diksukum kibuka, bokeipmince, ‘Na mal olan nang ati, wenepnalam’ tenen, moropkine,” nyabuk yupu

¹ Daud birye kitar ona atonun ning, el si ara kecapi dobuka, Allah Yahweh ati, amot nyabuka engebukce, el mal olananye bira, Benyamin yalanye el si Kush biti, nyabuk.

² “Se na ni Allah Yahweh, ikin unilye talak ara, an damuk yanuka dungnubuka unune. Ati, yu nang arye, ‘Anye opnuyap’ tenen, nati dobolyanganinyak nang ara, ance kalekuka talipnimince, lyepdopnamnilame na nio.

³ Kumopura, na mal olan nang arye, na obuka kum daneipnamniake. Winipmanto ara, pia yu weik pus, el si singa kus, elce yuk kam un ning si tobuka oplirye, sik nong nirya sekuka dilamle touk, na mal olan nang arye, nati winipnamniake. Yuk nang arye, nati, kum lyepnitinga ati, na mal olan nang arye, na nong dobuka, mikip arye libuka bobinamniake.

⁴ Se, na ni Allah Yahweh, narye malye akunum winipnyopura, ance ikin weik ning, na nong deice deipnutumce, wenepnamnilame. Na dip kum winipse bukni, winipmanto ara, na taruk arye, pia malye un ning, dipkoprob akunum winyamtinye toura, nati wenepnamnutume.

⁵ Atonun, na ni Allah, an minop tikuka kintinipmince, nati melibuka kalikinamnilyame. Ance, ‘Aning ara, wininamlume, aning ara, pia kum winipnamlume,’ nyapdeipsulum yupu deice arye, na ikin unilye ning ati, yupu lipsisikuka bokeipnamnilame. Atonun, na kwit koproba arye, teleb kipdeipnuk bukni, narye tamubuka elti, malye wamtinyetopura, nati wenepnamnilame. Tonda, deiyok kum wamtu buk, na mal olan nang, sik talilamik ning, narye akunum alubuka dolamtinye toura, nati wenepnamnilame.

⁶ Ara, narye yuk nang ati, dipkoprob malye ning akunum wamtinye toura, Allah ance lo areptumba, na ona ati yu nang arye, dobolyanitingce, na yanuka tomopnitinge. Yu nang arye tomopnitingce, opnitingopura, na nong ara, tuku deice deiplopnitingce, yan yaniptinge. Diba, na malye wamtinye toura, yu nang arye, opnikirye, na nong ara, tuku sung-sunga deice noutam lakauk deiplopnitinge. Bukni, narye yuk nang ati, malye kum winipse.

⁷ Ati ara, se na ni Allah Yahweh, an yu upkiliba, tikmince kintinipnulyame! Na mal olan nang ara, yu weik ubukba, nati, ‘Anye bira nun pia lik,’ teneninyakce, olyanamniake. Ati na ni Allah, anda minop tikuka kintinipmince, nati melibuka kalikinamnilyame. Ance, ‘Aning ara, wininamlume, aning ara, pia kum winipnamlume,’ nyapdeipsulum yupu deice arye, na ikin unilye ning ati, yupu lipsisikuka bokeipnamnilame.

⁸ Allah ance yupu lipsisikuka bokeipnamnilama ati, yuk-yuk mutuku nang arye, asukum yanuka bulubikirye, an dam dana-dana tam bulubuka antanap dongobikirye, dinamake. Ati, anda ninye deiyoknye ulyamce, ninye yupu lipsisikuka bokolina ati, deice tam erebuka bulyamak, el si ara tahkta deice bukmince, ‘Ninye nirya ati, yupu lipsisikuka bokeipnamsilam’ tenen, moropkine na nio.

⁹ Allah Yahweh, elcuk, nun tukwak unyap nang yala-yala nirya ap, mutuku noutam unyak nang nirya ati, yupu lipsisikuka bokolina deiyoknye ulule. Ati, na ni Allah Yahweh, ancuk kintinipmince, na dipkoprobuk ulamse ning nirya ati, moubuka tenipdemince, ance nati, yupu lipsisikuka bokeipnamnilame. Tonda, na kanye talima noutam tenina deice arye, tilila yupu tonok ning babye kum nyalamse. Na kanye talima ara, dipkoprob uk unulula deice arye, aning dipdemince, na winilamse touk ubuka, yupu lipsisikuka bokeipnamnilame.

¹⁰ Bukni, sik kanye pum tam pia malye unyak nang arye, malye winin ning yuk-yuk nirya ara, na nio, ‘Ancuk aning nirya kum kipdeipsutum’ tenen, moropkine na nio. Malye wininyak nang ati, wenebuka kum kipdeipnalam bukni, ance, ‘Winipnamlume,’ nyapdeipsulum touk, dipkoprob ninguk wininyak nang ara, mikip kipdeipsiminba, pia aunamabe. Ara, anda ninye tukwak nang nirya ati, sik kanye tenen ning ap, sik talima noutam ulye ning nirya ara, moubuka dipdemince, ‘Teleb unyak do, kum do?’ tenen, pirisilyamnye bira, Allah an tonoka. Na ni Allah, ance nyapdeipsulum yupu nyasilye touk, ance pia diksukumuk ulyame. Malye winin ning ara, tonok babye, pia kum ukulule.

¹¹ Na ni Allah, ancuk nati, melibuka kalikinilyame. Winipmanto ara, yin nang arye, ‘Nun mal olan nang arye, mal pibibyeba opsikcak’ tenen, sik nong lelin ning, el si perisai dobuka balamak touk, ance nati pia kalikinilyame. Allah ance, yata mutuku unyak nang do nirya, sik talima noutam, pia dipkoprob uk unyak nang ara, ancuk lyelosilyame.

¹² Allah bira, elce, ‘Aning ara wininamlume, aning ara pia kum wininamlume,’ nyapdeiamsuk touk, ‘Anang ara, teleb unyak do, malye unyak do?’ tenen, pia diksukum kibuka, yupu lipsisikuka bokolina deiyoknye ulule. Allah anda asum-asum nirya ara, malye unyak nang eipmince, talye kilina kumce, anang ati ance yu upkiliba, ‘Na lik,’ tenelyame.

¹³ Ati, yata nang do nirya, sik malye unyak ning nirya ara, batakikirye, Allah el dam tamubuka, ton kum yacopura, Allah arye anang ati yupu lipsisikuka bokeiplirye, wenebuka opnamle. Winipmanto ara, yin nang arye, yuk nang ona ati, sik ninye on parang, si kintinibikirye, olbalamak touk, Allah arye, sik malye wininyak nang ati, yu upliba, adiparyuk anang obuka, sirya daknamle. Allah arye ninye tukwak nang nirya ati, wenepnamla ati, winipmanto ning ara, el ninye ona ati mal duk ara, yin tapu deice akunum dinikmale.

¹⁴ Elce, el ninye on ning yuk-yuk nirya akunum kintinipmale. Tonda, el mal mouse ara, uku sekikiba, uku buk dilamle touk upmalce, akunum kintinipmale.

¹⁵ Bukni, dipkoprob sik talima noutam arye, pia malyeuk unyak nang ara, aning tenina kumce, sik talima noutam ara, pia malye winina deiyok ning akunum wekuka langdibukba, malyeuk wininyake. Winipmanto ara, kilapu arye, mi bomikca ani, ‘Mi deipnun’ tenen, mi deiya weik tonunuk dilamle touk, amalye winin nang ara, ‘Malye-malyeuk winipnuyap,’ tenen, akunum kintinibuka unyake. Winipmanto ara, kilapu mi bolamak touk, amalye winin nang ara, malye winina deiyok ning, sik talima noutam weklirye, langdilule. Winipmanto ton, kilapu arye, mi bomikca ani, aminyan talak mapu delilamak touk, amalye unyak nang arye, tilila yupu nyabuka wininyake.

¹⁶ Sik malye unyak nang arye, ‘Yuk nang tomobibirye, opnamap’ tenen, ninye balamak bisik noutam arye, tuku palipmakca pum tam sinilongonyake. Bukni, aminyan talak ara, sik bidamnye tuku palyamice pum bisik saknamake.

¹⁷ Ati, sik anang ara, ‘Winibipya deice arye, yuk nang ton optibye,’ tenenyak ning ara, sik nong deiceuk tamubuka yalirye, sik bidamnye nong deice opdanamake. Atonun, sikce yuk nang ati, ‘Anang ara, adiparyuk obibirye, sirya daknamabe,’ tenebikirye, kintininyak ning ara, aminyan talak ara, aninguk, tuba tamubuka, sik nong deice upnamle. Adeice arye dipnamake.

¹⁸ Bukni, na ni Allah Yahweh ara, pia diksukumuk ulirye, pia telebuk winilula ati, nara, na ni Allah ati, “Naio, anda pia telebuk ulyama ati, telebe nyapkine,” nyabuka, elti, pia si erenauk unamne. Allah Yahweh ara, aning-aning nirya talibuka, pia deice tam erebuka, pia mikip weik ulule. Ati, narye kanye lon mot nyapnirye, el si ati, pia erenamnarya!