Mazmur 69 - Eipomek

‘Ikin ning doprobibye talak, Allah arye lyepdopnamsil’ tenen, Allah morobuk yupu

¹ Mot weibuka nyana deiyoknye, Daud birye, kita teleb arye mouplirye, lalamlenye el si Bunga Bakung, amot nyalamik ning deice arye, Kor biti nyabuk.

² Na ni Allah, narye anti moropkine. Ara, na pia ikin weik unulule. Winipmanto ara, weik mekwen noutamak weksiba, na ngang dam welebuka deibukce, dipmanto upse. Ati, na ni Allah, ‘Ance lyepropnilyam’ tenen, moropkine.

³ Tonda, na weik bental mutuku noutamak dongolbinila ati, na yanibuka tikmantoak ton, pia kum upmanile. Tonda, weik karu mekwen deiamlye mutuku noutamak, weknye talak ara, mek onmalya mikip arye, welebuka mekwen kum-kuma noutamak, bobuka dongolbanulule.

⁴ Wininilye talak ara, narye, “Na ni Allah, ance na yanuka melipnilyame,” nyabuka, moronmakinibuk, na din korokna, pia sekuka mitang unulule. Tonda, ‘Na ni Allah, dan talak arye, na yanuka melipnamanil do?’ tenen, atalak ara, dipra unmanibuk, na asing uk pia weik dinulule.

⁵ Na deiyok ton kum bukni, nati, ‘Optibye’ tenen, yu teneninyak nang ara, yupa ara, pia weik unyake. Winipmanto ara, na kisok deice potong papnuk ning atonun unyake. ‘Deiyok ara, aning,’ tenena kum aniryuk, sikda mikip weik nang unyaka ati ara, nati, ‘Anye obuka, kum daneiptibye,’ teneninyak ninye nirya, pia kum nukmanto unyake. Tonda, sik ning ton, narye ubula dolona kum bukni, “Tamubuka arepsilyame,” nyaninyake. Nyapnikiba, na ninguk, talye dobuka, sik anang ati, talye arenune.

⁶ Aning ara, na ni Allah an kele. Na malye wininun ning nirya ara, an dam ton, pia kum duknunune. Tonda, na malye wininun ning nirya ara, na ni Allah, ance dinauk unilyame. Ati, kum duknupkitinye.

⁷ Na ni Allah Yahweh, yuk ninye anti, diba tenenyak nang, ‘Na malye winipse ning ton ati, sik alye dakdacak’ tenen, moropkine. Ara, sikce Allah antibuk, ‘Melinamsilarya,’ tenebuka, unyak ninye nirya ara, na malye wininun ning ati, ‘Alye dakdacak’ tenen, moropkine. Tonda, anda na ni Allah ulyame. Anda, aning-aning nirya, deice tam talibuka umince, mikip Weik Erenanye ulyame. Tonda, im deice yin talin malaikat nirya, sik weik deiyoknye ulyame. Allah anda nun Israel ninye ati, pia kalikuka melilamsulumnye ati, morokunune.

⁸ Na ni Allah, an si erenye ning ati, sik malye nang arye nati, yep-yep abuka, malye nyaninyake. Tonda, antibuk tenebuka unyeba, malye nang arye nati, nalininyakba, alye pia weik dakalanune.

⁹ Nara ikin weik uniliba, na urasin ara, tamupnuka ati ara, na du yapu ap, na kwit capu ap nirya, aunyak bukni, ‘Nun kwit Daud aunmale,’ kum teneninyake. Adeice, yuk mutuku arye tikilyangan nang atonun, kibuka unune. Tonda sikce nati, ‘Bai tamnye ulul do?’ teneninyake.

¹⁰ Uteneninyak bukni, narye Allah an si eren aik ati, ‘Weik mambule,’ tenenuna ati ara, pia mambul kanye bobuka unune. Yuk nang arye, Allah anti, malye yupu nyabuka nalikinyake. Winibuka, na ni koproba Allah, anti nalikinyaka touk, sik aninye nirya arye, na babye nalibuka, wana ap nalibuka, akutuna ap, nyaninyake.

¹¹ Nara, Allah antibuk, din dina kum deice arye, engenauk unirye, an si erenauk unune. Bukni, wininye talak ara, sik malye wininyak ninye nirya arye, “Anye bira, yata ning ati ulul do?” nyabuka, akutupnikirye talak, doninyake.

¹² Tonda, aning atonun, malye winin ning nirya ati, narye malye kanye bopna arye, an morona ati, malye baju, nong ongopnirye, an si erenmaniba, sik amalye winin ning atibuk, talibuka wininyak nang arye, “Yata ning ati unmal do?” nyabuka, talak doninyake.

¹³ Sik weik kota kibuka asik domikce, bublan wekelbana ati, potokeiamik bisik bublan dam bunyak nang arye nati, yap-yap abuka nalininyake. Tonda, sik ninye kanye wangalamak mek din nang nirya arye, sik mot nyana deice arye, nati malye nyabuka nalininyake.

¹⁴ Bukni, na ni Allah Yahweh, anti moropkine. Ara, Allah ance tenebuka, ‘Arup ara, melipnamne,’ tenepniminyopura, ‘Melibuka lyepropnalama,’ tenena ati, na ni anti moropkine. Tonda, na ni Allah, ance weik arye bico tenepnimince, melinamnilame. Ara, ance ‘Atalak melipnune,’ tenepniminye talak ara, pia kum bataknamnilame. Dipkoprop, asum-asum nirya lyelonamnilame.

¹⁵ Ati ara, na weik bental mekwen noutamak dongolbinamnil talak ara, na yanibuka tikmantoak, ton kum upnamle ati, ance lyepnamnilyame. Tonda, weik karu mekwen deiamlya noutamak weknye talak ara, ‘Mek oplya mikip arye weleplirye, na dobuka weik mekwen deibuka, num-num noutamak dongolbinilyak’ tenen, “Lyepropnilyame,” nyabuka moropkine. Nati, yu weik upliba, mal pininyak nang arye, ‘Opnuyabe’, tenepnice talak ara, Allah ance na kum bataknamnilyame. ‘Adiparyuk lyelonamnilame’ tenen, na ni koproba Allah ati moropkine.

¹⁶ Winipmanto ara, ‘Mok ceplirye, mek deibuka obukaplirye, siknibuka bobalamle touk, na babye atonun, winibuka opnilyak’ tenen, moropkine. Na batakniminyeba, weik mek oplya mikip weleplirye, na bobuka, weik laut mekwen deibuka, kum-kuma noutamak dongopniliba, ‘Amekwen amu dadipnyak’ tenen, moropkine. Tonda, ‘Ninye yuk nang arye, weik karu tuku pum tam palibuka, na dopkwetepnikirye, na deice tuku arye siknipnicak’ tenen, na ni koproba Allah anti moropkine.

¹⁷ Na ni Allah Yahweh, ance weik bico teneniminya deice arye, amoropne ning nirya, kekebuka melipnilyame. Anda pia telebuk umince, ninye ati weik arye kanye talima pum tam kanye deibuka bico tenebuka, melilyamnye uminya ati, ‘Na babye lyepnamnilam’ tenen, moropkine.

¹⁸ Aning ati ara, imun kanye ning na dam akunum yanmanila ati, Allah ance eibuka, luba kum kipnamnilame. Atalak aniryuk eibuka, na dam yamince eibuka, lyepropnamnilame. Ara, Allah ancuk, ‘Ninye ati ara, talima se,’ tenebuka, weik bico ukukulnye ati, moropkine.

¹⁹ Malye winin ninguk talibuka unyak nang, na mal olan nang arye, opnikcak ati ara, an adiparyuk yamince, na yanuka lyepronilyame.

²⁰ Allah ance nati, kel kinilyame. Ara, na mal olan nang nirya arye nati, ‘Anye obuka, kum kipdeipnamabe,’ tenenikirye, nati yep-yep abuka, talak doninyak ninye nirya ara, ance akunum kel kilyame.

²¹ “Elda malye ululnye,” nyaninyaka deice arye, nara, ‘Yata ning ton winipsa ati, nyaninyak do?’ tenen, teniltonirye, na kanye talima pum tam ara, uk pia weik dinulule. Winipniliba, ‘Na ti bico tenen, na kanye talima melin nang arye melipnitinge’ tenen, enun bukni, pia ton kum eipse. Ati, na kanye talima melina nang ton kum ukirye, “Na ap neika ubuka, kum melininyaka atia,” nyabuka morobuk.

²² Tonda, na din ning patapniliba, din ning ap, mek ap, areninyak ning nirya ara, na dipna ati, yu weik ning likdongobuka areninyake. Aning atonun, din mek pataniliba, ‘Mek diptinye,’ tenepnye talak ara, yuk nang arye, luma mek kwebuka areninyake.

²³ Nati, ‘Anye bira, nun like,’ teneninyak nang, sik din ning delinyak ning ara, pia teleb-teleb ninguk, kintinibuka delinyake. Wininyak bukni, narye Allah ati moropnyopura, sik ateleb din kintinilinyak ning ara, sik bidamang atenenyaka deice arye, kanye imun un ning, sik dam yangalule. Aninye ara, ‘Nun akunum telebuk unyabe’ tenen, pia kanye delilanyak bukni, sik adin ning kintinilinyaka deice arye, sik bidamang nonguk, wena tapu wepmakcak, kapang mana mangkau kanye bobuka, balibuk youlamle touk, malye winililanyake.

²⁴ Na ni Allah, anti moropkin ning ara, sik malye wininyak nang ara, ‘Sik asing kun ning arepminba, teleb asa arye, kum elinamak’ tenen, moropkine. Tonda, sik amalye wininyak nang ara, Allah ance ikin ning, sik nong deice deipminba, ikin arye kum binmanto ubikirye, ‘Amnya kanupdongonuka banamake’ tenen, moropkine.

²⁵ Na ni Allah, an yu teneminye ning ara, aninye sik nong deice deipminba, weika arye, weik uku dilamle touk, unamle.

²⁶ Winipminba, aninye sik aik dobuka, unyak mutuku nirya ara, oldemuk uplirye, bipla papnamle. Amutuku noutamak ara, aik ap, ninye ap, ton pia kum unamake.

²⁷ Na ni Allah, aning ara, talye ati kum nyapkine. Deiyok ara, an mapu dib tenebice nang ati, “Malye upmale,” nyabuka, nun nong deice ikin ning deipsikirye, nalibuka akutusinyak nang ara, sik wenena ati, ikin ning delilyame. Tonda, an mapu wenepminba, sik nong deice ikin ning ulul ning ati, amalye wininyak nang arye, akutubuka malye nyasinyaka ati, ‘Aninye ara, weik arye wenepnalam’ tenen, moropkine.

²⁸ Sik malye wininyak ning nirya ara, mangkau kibuka batakminba, sikda pia ati malye-malyeuk winipra bakiba, weik upra bana telebe. ‘Sik amalye wininyak nang ara, malye un ninguk, tonap tabakminba, pia atibuk, malye winipra banauk unamake’ tenen, moropkine. Sik aninye ati, ila tuba tamubuka lyepmince, teleb kibuka, kum delinamlyame. Yuk nang ara, lyepnalam bukni, sik ananguk ara, kum lyepnalame. Ati, narye na ni Allah, anti moropkine.

²⁹ Allah ance, aninye sik si ton, Kam Buku noutam kum sekelinalame. ‘Amalye ninye, sik si ara, kiliplopnamlame’ tenen, moropkine. Allah anti, diba tenebuka, diksukumuk wininyak ninye, sik si sekelilyam buku noutamak ara, amalye wininyak ninye, sik si ton kum sekelinalame.

³⁰ Sik amalye wininyak nang arye, na nong deice ikin weik ning delinica deice aryuk, diniliba imun kanye unulule. Ati ara, ‘Na ni Allah, ance lyepropnimince, erepdeipnamnilame’ tenen, moropkine.

³¹ Winibuka ereipneminyeba, na mot sena deice arye, an siuk erenamkine. Tonda, na mot senamne deice arye, anti, ‘Elda pia weiknye ulule,’ tenebuka, an siuk erebuka, weik arye telebe nyanamkine.

³² Aning winibuka winikinyopura, Allah ance, ‘Aning ara, pia dipkoprop, teleb ning arepmanile,’ tenenamnilame. Bukni, weik yim sapi basam obikirye, an arena ati, boyatinya babye, ‘Aning ara, mitik teleb uka,’ tenepnutume. Tonda, weik yim sapi, el yan kala sirya ning ap, el kisok deice yang belelamle ning ap, akepman yanuka arepkitinya babye, ‘Aning ara, mitik mambul uka,’ tenepnutume. Bukni, na kanye talima nirya arye, antibuk moubuka kenekinirye, mot nyana deice, an si erekinyopura, ‘Ara, pia telebe unmale,’ tenepnutume.

³³ Aning atonun, narye an si erenamkina deice arye, sik talye kankan daunyak ninye, aning eibikcopura, kanye deibuka, pin-pin asa arye unamake. Atonun, yata ninye do nirya, Allah an si erenyakce, ‘Elcuk lyelonamsile’ tenen, diba tenebuka, unyak ninye nirya ara, pia kamuk unamake.

³⁴ Ati ara, na ni Allah, anda sik bona utotoa talina kum nang, kanye lamapdongobuka arye, talima darapdongobuka amu tam unyak nang, morokinyakce, nyakinyak yupu nirya ara, kum batakalyame. Adiparyuk kekebuka melisilyame. Tonda, an mapu koproba wenena aik pum tam ulamikce nang arye, morokikcopura, ance kekebuka kum batakalyame. Aninye arye moropkice touk, kekebuka lyelolyame.

³⁵ Na ni Allah, antibuk, im deice ubuk ning ap, tukwak mutuku ubuk ning nirya ap, tonda weik laut mekwen amu tam ulul ning ap, tuku deice noutamak ulul ning ap nirya arye, ‘An tibuk, si erebuka kinamkiyak’ tenen, ‘Se,’ tenenune.

³⁶ Aning ara, talye ati kum nyapne. Nun ni koproba, Allah ance, Yerusalem mutuku nirya ara, lyebuka teleb kipdeipnamsilame. Tonda, Yehuda yala nang, sik unamak mutuku babye, lipsisikuka telebuk kwepdeipnalame. Winipminba, an mapu aning eibikirye, sik amutuku yakirye, sik mutuku koproba kibuka, yanuka talibuka unamake.

³⁷ Anti dib tenebuka, an amu tam unyak ninye, sikce deibikiba, dadeipdanin banamak ninye nirya babye, amutuku uk talibuka unamake. Tonda, Allah anti diba tenenyak ninye nirya arye, ‘Allah el si ara, weik mambule’ tenen, kanye deibuka, an siuk erekinyak ninye nirya ara, amutuku uk talibuka unamake. Daud birye nyabuk.