Mazmur 68 - Eipomek

“Allah ati, ‘Nun lik’ tenen, unyak nang nirya ara, Allah arye obuka, sirya dakalule,” nyana ati, mot nyabuk yupu

¹ Ara, Mazmur yupu mot, raja Daud birye sekuk. Ara, ‘Allah yupu mot nyana deiyoknye arepnamak’ tenen, amot sekuka arebuk.

² Allah ati, ‘Nun like,’ tenenyak nang nirya ara, ilil uplyeura, dana-dana nirya bikbik abuka bindopnamak’ tenen, Allah ati moronyabe. Diba, Allah ati, ‘Nun like, el yupu kum kekenamabe,’ tenenyak nang nirya ara, ‘Allah ati, ilil uplyeura, bikbik abuka bindobikceba, elce sikti, dobolbinamle’ tenen, moropkiabe na nio!

³ Winipmanto ara, ninye arye, uku sekikceba, tulum welelye bukni, kumanya yanuka puplirye, atulum nirya ara, bopdakuka bindopliba, minopce kum kipnin balamle touk, Allah anti, ‘Nun like,’ tenekinyak nang nirya babye, ‘Ance anang ati, minopce kum kipdeipnalam’ tenen, moropkiyabe. Sik pia malye un ning talibuka, malye-malye weik wininyak nang nirya ara, Allah dam yakceura, elce sikti, weneplirye, minopce kum kipdeipnamle’ tenen, moropkiyabe na nio.

⁴ Bukni, Allah arye, “Aning wininamalume. Aning ara, pia kum wininamlume,” nyapdeiamsuk yupu, moubuka talibikirye, ‘Diksukumuk wininyak nang ara, kanye deipnamak’ tenen, moropkiyabe na nio. Tonda, sik telebuk wininyak nang kanye deibikirye, Allah el dam ara, kanye deibuka pin-pin asa unamak’ tenen, moropkiyabe na nio! Diba, ‘Sik anang ara, kanye deibikirye, telebuk unamak’ tenen, moropkiyabe.

⁵ Anggun Israel yala nang nirya ara, Allah ati, “Anda pia teleb ulyame,” nyabuka, mot deice arye, el siuk erenamlume. Ara, im deice arye, dua deice bukuka banmalanye, nun ni Allah ati, kanye lon mot nyamunyak arye, el siuk erenamlume! Nun ni koproba Allah, el si ara, Yahweh ulule. Ati, Allah Yahweh el dam yamunyopura, kanye deibuka unamlume.

⁶ Sik nin yapu ap, sik ni yapu ap nirya, akunum diamik mapu, kwaknamne mapu nirya ara, Allah arye, ‘Amapu ara, na mapu koproba unyake. Nara, sik ni koproba unune,’ tenelule. Tonda, sik youak kilapu ati, Allah arye, ‘Sik ti, pia melibuka kalikinamne,’ tenelule. Allah elda pia teleb lekak, im deice tuba aulule.

⁷ Sik babye yuk ukirye, ikin kanye bonyak nang ara, Allah elce, anang dobuka, yuk nang sik mapu silip noutamuk deiplyeba, anang ap neika pia aunamake. Tonda, sik wenen aik pum tam, tuba unyak nang ati, Allah anang ati, bico tenepnirye, anang lobuka bobilyeba, sik anang arye, el aminyan tamuk dobolyakirye, kanye deibuka mot nyanyake. Bukni, Allah ati, ‘Nun like,’ tenebikirye, elce nyalul yupu, pia kum kekenyak nang ara, Allah arye anang, sik wenena ati, pia ikin ning dobuka, sik deice delilule. Winipmanto ara, mek pia kumak, keting buppu pia weik ulye mutuku noutamuk unamake.

⁸ Se, nun ni Allah, ance nun Israel nang ati, ‘Na tenen nang unamak’ tenen, wipdeiamsulum nang ara, ‘Anang melinamneʼ tenen, pia tukwak mutuku noutam bobinamlum talak ara, ance min menekuka balamlumba, nunda, an balye tamuk dobolyangalamupu.

⁹ Anda amutuku noutam balamuk talak ara, tukwak mutuku nirya, luluklamukba, im deice arye, weik mok ton celamuk. Winibuka deiyok ara ani. Ara, weik mikip Allah, Sinai mutuku deice yanuka, mambul yupu nyapdeiamsulum Allah ulyama ati, ance tukwak mutuku noutam yanulum talak ara, mutuku nirya lulukamuk. Diba, Israel yala nang nirya ati, melibuka kaliksilyam Allah, ance tukwak mutuku yalumba, mutuku nirya luluklamuk.

¹⁰ Atalak ara, mek patalamsukba, an mikip deice arye arelamsulumak, mok weik celamuk. Winibuka meliamsulama deice arye, ance talisimince, pia ati dopropnamsilam nang ara, mitang nang ulamupu bukni, an kanye arye, teleb kipdeiamsulume.

¹¹ Tonda, winipmanto ara, ance weilyam domba basam ara, nun Israel yala nang, teleb kipdeipsiminyeba, amutuku noutam ara, ‘Nun pia unamap mutuku ara, anyeʼ tenen, akunum ebuka talebupu. Aninguk kum bukni, tonda, Allah ance aning-aning yala-yala nirya, talilyama noutam arye, nun bona talena kum ati, talye kankan nang ulamupu buk, aning nirya patanauk ulamsuk bukni, aning nirya weik areamsulume.

¹² Allah Yahweh anda, aning-aning nirya talibuka, weik mikip deiyoknye ulyama ati, ancuk, meliamsulumba, nun mal olan nang, akunum obuka, sirya dakupu talak nirya ara, ance ayupu laka nyapdeiamlumba, nun tam nang nirya kekelamik. Allah ance, “Israel nang ara, anggun mal olan nang nirya, akunum obuka sirya daknamake,” nyaplumba, ninye weik arye kekebikce, ayupu bobuka laka nyalbalamikba, ninye weik kekelamik.

¹³ Ance nyaplumba, ninye arye kekebuka laka nyalamik yupu ara, ani. “Anggun kekeplulume! Israel nang arye, yuk-yuk mutuku talibuka, deiyok-deiyok kiamik nang ara, akunum obuka batakikce, sirya dakik. Sik yuk mutuku yin talin nang ara, akunum obuka, sirya dakika ati, sik amutuku nang arye, talilamik ning alubuka doprobikce, tamubuka amutuku boyanuka arepsikura, nun mutuku urasin teleb kilapu arye, sik aik pum bisik ara, yuk-yuk ning nirya, bokuka arelanyake.

¹⁴ Tonda, Israel nang arye, yuk mutuku nang olbinamik talak ara, sik kilapu arye, sik mutuku noutamuk domba basam weilamik kilapu babye, nun yin nang arye, tamubuka boyanamik bona ton, bokuka areamikba, akilapu ara, sikce dekna weik ning ton dopromik. Sik akilapu dopromik ning kan-kan ara, yalma urasin atonun kibuka, patung puturubuka diamik ning bukni, el nong deice ara, dekna weik ning, el si perak ton, taplak deiamik ning ton dopromik. Ayalma urasin atonun, patung memamik ning ara, el pol deice ara, dekna weik ning, el si ara emas dobuka, amaka pol deice taplak deibik. Emas ara, pia teleb, dirina weik uamuk ning likdeibikura, pia teleb kibuk.

¹⁵ Allah bira, mikip weik ulinye birye, sik yuk-yuk mutuku talibuka, winilamik ninye deiyok nang ati, oplobukura, sikda bai sakuka, dana-dana tam nirya bikbik abuka bindobik. Winipmanto ning ara, weik mutuku kon el si Zalmon mutuku kon deice, es mek, el si ara salju, sakuka, tukwak nirya siknilongolamle touk, sik yuk-yuk mutuku yin talin nang nirya ara, bikbik abuka bindobik talak ara, aning atonun ubik.

¹⁶ Weik pera mutuku el si ara, Basan mutuku, amutuku noutam ara, weik mutuku kon pia teleb, weik mutuku aulule.

¹⁷ Anggun weik mutuku kon deice ululum nang ara, yata deiyok ati, Sion mutuku eiplumce, ‘Se, yata ati, Allah arye nun mutuku kum weibuk do?’ teneplumce, malye kanye boplum do? Ara, sikda, Allah el si Yahweh arye, ‘Sion mutuku noutam ara, amutuku akunum kanye deipmana ati, nara amutuku noutam pia-pia aunamne,’ tenebukce, akunum wibuka ati, nun like,’ teneplum do?

¹⁸ Allah el pia mikip weik ulula ati, winipmanto ara, ninye olyangana ati, kuda basam arye libuka, tuku deice balamle ning, el si ara kereta perang, yupa pia weik ribuan aulula ati, nunce kum nuktibye. Akereta perang ap, Allah ap, Sinai mutuku arye batakuka, Yerusalem mutuku noutam bukni, el pia teleb lek unamle aik dam ara, akunum yanmale. Allah bira aning-aning nirya talibuka, mikip weik ulya deiyoknye ulule.

¹⁹ Nun ni Allah, ance weik mutuku deice weleplum talak ara, ninye arye, yuk nang tomobuka, tapu koupdongobik nang weik, an Allah arye, anang dobuka, Yerusalem mutuku boyalume. Tonda, ninye arye anti, kanye deibikce, teleb karin ning weik tonun boyanuka, an si erebuka dona ati arepkik. Ton ning ara, min arye an Allah ati, ‘Allah ara, nun likeʼ tenen, an yupu yanilamik nang babye, atalak arye, an si erebuka dona ati, teleb karin ning dobuka, arepkik. Wini talak ara, an Allah Yahweh arye, Yerusalem mutuku noutam unamlume.

²⁰ Nun nirya arye, nun ni Allah Yahweh aning-aning nirya talibuka, weik mikip ulya deiyoknye ulule. Tonda, nun mal olan nang arye, ‘Opsikcak’ tenen, Allah arye nun nirya ati, lobuka lyelosulule. Ati na ning ara, Allah Yahweh ati, “Naio anda pia telebuk ulyame,” nyabuka, el si uk erenamabe. Tonda, Allah arye asum-asum nirya, nun ikin usulul ning ati, eibuka, melisulule.

²¹ Nun mal olan nang arye, ‘Israel nang opnuyap’ tenen, olyangasikce talak nirya ara, nun ni Allah aryuk, lyelosulule. Nun mal olan nang arye, talye lukparabuk obuka sirya daksiting bukni, nun ni Allah aning-aning nirya talilirye, mikip weik ulya deiyoknye ulula ati, elcuk lyepsilyeba, kum dibinyabe.

²² Ati nun kele. Allah arye, elti, ‘Nun like,’ tenenyak nang nirya ara, sik kisok deice teikuka oplyeba, dibikceura, sirya daknamle. Diba, sik malye un ning tuba talikirye, malye-malye tuba wininyak nang nirya ara, Allah arye anang obuka, sirya daknamle!

²³ Se, Allah ara, aning-aning nirya talilirye, mikip weik ulya deiyoknye ulula ati, elce nyabuk. Nati, ‘Nun like,’ tenelamnik nang, akunum opse nang ara, sik nong dobuka, Basan mutuku arye tamubuka, Yerusalem mutuku boyanamne. Tonda, yuk nang ton opseba dibikce, weik laut mekwen pum tam, akunum weklamik nang ara, sik nong ton dobuka, Yerusalem mutuku tamubuka boyanamne.

²⁴ Winipnamna deiyok ara, sik Yerusalem mutuku nang ara, narye yuk mutuku nang akunum opse nang, sik ining yanipnamlume. Oplopse nang, sik ining yanipmumyeura, anggunce weilulum kam, sik sitang arye, anang sik ining ton mutubuka dinamake.

²⁵ Se, nun ni Allah, an ap, an neika yanganmak nang ap, dam akunum yanmalumak, eipmabe. Ara, nun ninye deiyoknye Allah, ance nun nirya talisilyame. An ap, an melibuka yanganmak nang ap ara, an si eren aik dam, akunum yanmalume.

²⁶ Allah an ap yanganmak nang ara, ani. Minop menekuka yanamak nang ara, sik Allah yupu mot nyana kel nang yanamake. Sirya ara, mot nyana ati, kitar atonun ning, el si ara kecapi dobuka, aik dam outam kecapi deice arye, mot nyan nang ton yanmake. Anang dam bukni, ayanganmak nang noutam ara, kilapu ton, ninye kum domikce, urdem ulamik kilapu arye, lelim nyalamle ning, el si ara, rebana bobuka, sik taruk arye, opnin yanganmake.

²⁷ Nun Israel nang nirya ara, ninye yupa weik bulubuka yabirye, nun ni Allah ati, “Anda pia telebuk ulyame,” nyabuka, el si erebuka, kinamabe. Si erebibirye, nun apu Yakub birye deibukba, deipdanin yangalamlum Israel nang ara, anggun babye, Israel yala nang koproba ululuma ati, anggunce, nun ni Yahweh ati, “Anda pia telebuk ulyame,” nyabuka, el si erenamlume.

²⁸ Allah an si erena ati yanganmap nang kan-kan ara, mitik yala nang, ton sik yala si ara, Benyamin yala nang minop menekuka yanganmake. Nun yupa pia weik yanganmap nang noutam ara, sik Yehuda yala nang ton, neika yanmake. Tonda, Zebulno yala nang ap, Naftali yala nang ap, sik deiyok-deiyok nang ap, neika yanmake.

²⁹ Se, nun ni Allah, bukmince, an weik mikip ukilya ara, yanuka benepsiminyeba, eipnamabe. Diba nun ni Allah, an min talak ara, an mikip arye melibuka lyepropsulum touk, tonap wini talak babye, an weik mikip deice melisilyame na nio!

³⁰ Nun ni Allah, an si eren aik ara, pia teleb ulula ati, yuk-yuk mutuku ninye deiyok-deiyok nang arye, pia teleb aren ning dobuka yakirye, Allah an si eren aik, Yerusalem mutuku noutam arelyanganamake.

³¹ Allah ance, sik pia yu weik nang ati, wenebuka opnamlyame. Winipmanto ara, sikda bai tam ulamle kam ning ara, weik mikip ning, cang maning noutam arye duknulamak atonun unyake. An Allah ati, ‘Nun lik’ tenenyak nang ara, yu weik unyake. Winipmanto ara, weik yim sapi basam arye, sapi basam mapu kan-kan noutam yakceura, mitik sapi basam ilil weik ulamak touk, ayu nang ara, mikip weik unyak ati, nun dam yakcopura, nun Israel yala nang ilil weik usulule. Ati, nun ni Allah, ance ayu nang wenepmince, pia amu tamuk deipminyeura, sikce alye dakdakirye, an si kina ati, dekna weik teleb aren ning, el si ara perak bobuka, anti arelyanganamake. Diba, nun ni Allah arye, ninye olana ati, kanye deibuka, weik arye kel bikna nang ara, ance wenepmince, yakuka donokminyeura, sik mutuku koproba batakuka, yuk-yuk mutuku uk bindopnamake.

³² Nun patapsil ning ara, ani. Ara, Allah ance, Mesir mutuku mikip weik nang ati, wenebuka opmince, amu tam kipminyeura, sikce an si kina ati, dekna weik kat ning, el si ara tembaga dobuka, an dam arelyanganamake. Tonda, Etiopia mutuku unyak nang ara, sik ton Allah an dam yakirye, ‘Allah arye biksuturye, kum wenebuka opnamsil’ tenen, sik taruk erebikirye, an Allah ati moronamkiake. Nunce, ‘Winipnamak’ tenen, moropkiyabe na nio!

³³ Anggun yuk-yuk mutuku sirya, im sirya nirya, talibuka ululum ninye deiyok nang nirya ara, buluplumce, Allah ati, “Anda pia telebuk ulyame!” nyabuka, el si erenamlume. Diba, aning-aning nirya talibuka, mikip weik ulya deiyoknye ulula ati, nun nirya arye, Allah ati, “Anda pia telebuk ulyame!” nyabuka, el si erenamabe.

³⁴ Allah arye minop talak, im noutam ulamle ning nirya, kitibuka deibukba, tuba aulule. Elce kwepdeiamuk ning ara, im noutamuk balule. Tonda, Allah Yahweh, el weik yupu arye nyaplyeba, im deice ulye ning, liman weik tonun lelim nyalamle touk nyalule.

³⁵ Nun nirya arye, ‘Yuk nang kekenamak’ tenen, “Allah ara, mikip weiknye ulule,” nyabuka, laka nyanamabe. Tonda, ‘Allah ara, el pia teleb ulye ning ap, el mikip ulye ning ap, ulula deice arye, nun Israel yala nang nirya talisulule. Tukwak arye dipdongobuka, im deice pia deice tam uplyeba, kum nukmanto ulamle touk, tonda, Allah el weik mikip ara, pia kum nukmanto ulule.

³⁶ Allah an pia teleb si eren aik dam arye yaminyeba eibipyeura, ‘Se, nun ni Allah ara, pia mikip weiknye ulule,’ tenebibirye, anti ilil pia weik upsilyeba, ‘Seʼ tenenyabe. Tonda, Allah ance, nun Israel yala nang ati, ‘Sikda, ‘Naʼ tenen nang unamak’ tenen, akunum wiamsuluma ati, ance mikip aresiminya deice arye, telebuk unyabe. Ati ara, nun Israel yala nang nirya arye, Allah ati, “Anda pia telebuk ulyame,” nyabuka, el siuk erenamabe.