Mazmur 67 - Eipomek

Allah arye, aning-aning nirya tabakuka arisilya ati, el si erena mot sekeibik yupu

¹ Mot weina deiyoknye Daud birye, bilkong len ning, el si kecapi, talibuka, Allah ati si erelamukce, mot selamuk.

² Nun malye unyap ning nirya ati, Allah adiparyuk wenebuka opsutu bukni, ‘Allah aniryuk nunti, bico tenesilirye, aning-aning nirya tabakuka, arenamsil’ tenen, moronyabe. Ati ara, ‘Nun ni koproba Allah arye, nunti, teleb tenebuka, weika arye melinamsil’ tenen, moronyabe. Allah arye, teleb tenepsilyopura, nun teleb kanye bon ning nirya, Allah aryuk nunti aresulule.

³ Na ni Allah ance, “Aning wininamlulume. Aning ara, kum wininamlulume,” nyabuka, nyapdeiamsulum yupu ap, ance mambul pil dolulum ning nirya ap, ‘Mutuku-mutuku nirya, daunyak ninye kel biknamake’ tenen, moronyabe. Tonda, an mikip arye, damutuku-damutuku, im sirya, mutuku sirya nirya unyak ninye ati, tuba lyesilyame. ‘Winibuka uminyeba, ninye nirya arye, eibuka kel bikikirye, an si pia erenamkiyake’ tenen, moronyabe.

⁴ Winibuka an mikip arye lyepsiminyeba, im sirya, mutuku sirya nirya unyak ninye eibuka, kel bikikirye, Allah anti, “Nun ni Allah, pia teleb ulule,” nyabuka, ‘An siuk erenamkiyake’ tenen, moronyabe. Diba, im sirya, mutuku sirya, daunyak ninye nirya arye, antibuk, “Nun ni Allah, pia telebuk ulule,” nyabuka, an si erenamkiyake.

⁵ Mutuku im sirya, mutuku sirya nirya, daunyak ninye nirya arye, anti, “Telebe,” nyabuka, an si erenyakce, antibuk weik kanye deibuka, mot nyanyakce, si erenamkiyake. Ara, urdem ati kume. Allah ance, im sirya, mutuku sirya unyak ninye nirya ati, diksukum ubuka umince, ninye yupu lipsisikisilyame. Tonda, nun ni Allah, anda im sirya, mutuku sirya nirya unyak ninye, sikce talibuka unyak ning nirya, moubuka elisimince, ‘Wininamake,’ tenesiminye touk, teleb kilisilyame. Aning nirya ara, nun ni koproba Allah ance, ‘Wininamake,’ tenesiminye touk, unyabe. Ati ara, im sirya, mutuku sirya nirya, daunyak ninye arye, antibuk, pia kanye delinyakce, kanye deibuka, mot nyanyakce, si erenamkiake.

⁶ Mutuku im sirya, mutuku sirya nirya, unyak ninye nirya arye, eibuka kel bikikirye, antibuk, pia si erenamkiyake. Winibuka sikce, “Se, nun ni Allah, pia teleb ulule,” nyabuka, ‘An tibuk si erenamkiyake’ tenen, moronyabe. Diba, im sirya, mutuku sirya nirya, unyak ninye arye, antibuk, “Nun ni Allah, elda pia telebuk ululnye,” nyabuka, an siuk erenamkiyake.

⁷ Diba, mutuku im sirya, mutuku sirya nirya, unyak ninye nirya arye, antibuk, “Telebe,” nyabuka, an si erenyakce, kanye deibuka, mot nyanyakce, si erenamkiyake. Winibuka ubicopura, nun ni koproba Allah arye, kanye delisilirye, tuba melisilyeba, ninye koulamak ning ayala-ayala nirya, pia teleb kibuka panamle. Ninye arye, wa wibuka koulamikce ning nirya, teleb kibuka panamla ara, urdem ati kume. Deiyok ara, nun ni koproba Allah arye, nunti, bico tenesimince, aning-aning nirya tabakuka arisilyamba, aning nirya, weika arye linyabe.

⁸ Nun ni Allah arye, nunti, ‘Bico tenesilirye, teleb kibuka melisilya deice arye, aning-aning nirya, tabakuka arenamsil’ tenen, moronyabe. Winibuka aning-aning nirya, weika arye arisilya ara, im sirya, mutuku sirya, daunyak ninye ara, ance pil dominya ning ati, eibuka kel bikikirye, antibuk si erenamake. Tonda, im sirya, mutuku sirya, daunyak ninye nirya arye, nun ni koproba Allah ati, ilil tenebuka, unamake. Raja Daud birye nyabuka, mot sena deice arye morobuk.