Mazmur 66 - Eipomek

‘Allah arye Israel yala nang ati, pia teleb kilisulule’ tenen, mot nyabuka sekuk

¹ Allah el si erena ati, Mazmur yupu mot sekuk. Ara, mot nyana deiyoknye arepnamika ati sekuk. Anyabuk yupu ara, ani. Se, anggun tukwak mutuku noutam ululum nang nirya ara, Allah ati kanye deibuka, weik yupu deice arye, mot nyanamlume!

² Ara, ‘Allah ap, el si ap, el mikip arye pil dolul ning nirya ara, pia telebuk ulule,’ nyabuka, el si erebuka, kanye kil-kil mot nyanamlume. Nyanamluma deice arye, ‘Allah bira, pia mikip ap, pia teleb ap ulule!’ nyabuka, pia teleb yupu deice arye, mot nyanamlume.

³ Tonda, anggunce Allah ati, ‘Allah ance, pia ninye dopman kum pil dopminyopura, nun tukwak mutuku noutam unyap nang nirya arye, kanye lopsiliba, kil-kil asa unyabe,’ nyabuka, mot nyanamlume. Tonda anda, Pia Mikip Weiknye ulyama ati, anti, ‘Nun lik,’ tenekinyak nang nirya ara, ‘Se, Allah arye, nun malye wininyap ning ati, wenebuka opsilyak’ tenen, ilil weik upliba, banyake.

⁴ Diba, sirya talak ara, tukwak mutuku unyak nang, mutuku sirya, im sirya nirya ara, anti, ilil weik upliba, an dam ara, kutam tuku deice dipdongobikirye, sik kisok kanulongonamake. Winibikirye, ‘Se, diba Allah ara, pia mikip weik ululnye,’ nyabuka, an si erebikirye, an si erena ati, mot nyanamake. Diba, mot nyana ati, lelim nyalamle ning bobikirye, “Se, Allah ap, el si ap ara, pia telebuk ululnye,” nyabuka, an si erebikirye, mot nyanamake.

⁵ Ati ara, anggun tukwak mutuku ululum nang nirya yanuka, Allah arye, el akunum pil dolamuk ning ati, eipmunce, kel biknamlume! Allah arye, tukwak mutuku unyak nang kan-kan arye, ninye kum winipmanto pil dolamlye talak ara, ninye nirya arye, ‘Se,’ tenen, kanye lopliba, ilil pia weik ulule.

⁶ Winipmanto ara, ani. Ara, minop talak ara, weik laut mekwen deiamukba, awamuk bukni, Allah elcuk, amekwen dana-dana bokukce, alaut mekwen nirya, der sekdobukba, cepdobuk. Akunum cepdobukopura, nun apu yapu nirya arye, talye mangkau asa, laut deiamukak, koubuka otam biyik. Ton talak ara, weik mek balamuk bukni, Allah arye amek cepdobukba, tuku mikukura, nun apu yapu, Israel nang arye, atuku deice yanibikce, amek koubuka, otam mutuku biyikce, otam mutuku noutam balamik. Ati, atalak ara, nun apu yapu nirya arye, ‘Se, wini talak ara, Allah ap, nun ap, neika unamabe’ tenen, pia teleb kanye bobuka ulamik.

⁷ Diba, nun si erenyap Allah ara, el pia mikip weik ulya deice arye, aning-aning nirya pia talinamle. Allah el asing arye, sik yuk-yuk mutuku unyak nang yuk-yuk nang nirya ara, ‘Yata ning wininamak do? Tonda, ‘Malye ubikcak’ tenen, pia moubuka dilirye, kalikilule. Ati, yata yala nang do nirya, mandipna kanye bobikirye, sikce, ‘Kume Allah ara, daupmalye. Elda nun lik’ tenen, anggun bidamnye birye, anggun nong ati, talima kum erelanamlume!

⁸ Se, anggun yuk mutuku ulamlum nang, yuk-yuk nang nirya ara, anggun babye nun Israel nang arye, si erenyap Allah ati, ‘Anda pia telebe,’ nyabuka, el siuk erenamlume. El siuk erebibirye, Nun ni Allah, anda pia telebe,” nyabuka, mot nyabipyopura, tukwak mutuku, im sirya, mutuku sirya nirya unyak nang arye, kekenamake.

⁹ Nun mal olan nang arye, opsitingba, nunda, akunum dipmatibye nang unyap bukni, Allah elcuk nunti, kaliklamsuka deice arye, tuba kamuk unyabe. Tonda, elce nunti, pia batakna kumce, tuba kalikisulula ati, nun dam ara, pia ikin weik ning ton, kum yangasulule.

¹⁰ Deiyok ara, Allah ance nun nirya ati, ‘Sik kanye ara, dipkoprob diksukumuk unyak do, kum do?’ tenen, moubuka disilirye, pirisulule. Diba, nun ni Allah, ancuk nun nirya ati, ‘Malye unamak do, teleb unamak do?’ tenen, disilyamce, pirisilyame.

¹¹ Allah ancuk, nun malye winilamupu ati, ikin ning weik arelamsulume. Winipmanto ara, ninye arye, ‘Mekwen pum tam ara, ikan tamopnuyap’ tenen, weik aling atonun ning, el si ara jaring, dobuka, mekwen pum dongolamak touk, ance akunum winipsulume. Tonda, nun malye winilamupu ning wenena ati, ancuk ikin weik ning dobuka, nun nong deice deiamsulumba, ikin dem ulamupu.

¹² Tonda, ‘Na mapu koproba, Israel nang biknamak’ tenen, lo areplumba, nun mal olan nang arye yanuka, obuka sirya dakmanto kiamsikba, imun kanye bobuka ulamupu. Yu nang arye, ikin weik ning delilamsik ning winipmanto ara, weik uku dilamna noutam una ap, weik mekwen karu noutam ulamne atonun, ikin kibuka ulamupu. Ance winibuka pia wenelamsulum bukni, wini talak ara, ance nun dobuka, teleb sukum ikin kum upmanto tam, akunum deipsulume!

¹³ Ati ara, wini talak ara, kam ning opnarye, aning dobuka, an si eren aik dam yanyopura, an si erebuka kina ap, arena ap ati, aning nirya dobuka, uku noutam dongopnamne! Tonda, minop talak narye anti, ‘Naio, an pil dona ati, aning ara, winibuka-winibuka wininamne,’ nyapdeiamuk yupu deice nyapdeipkise ning nirya ara, wini talak ara, dipkoprob aninguk wininamne!

¹⁴ Nara ikin weik ning, na dam yangalamnukba, imun kanye bobuka, ulamse talak ara, ‘Allah arye lyepnutu’ tenen, ‘Lyepniminyopura, winibuka-winibuka, an balye tam kipnirye, an teleb piluk donamkine,’ nyabuka, moropkise ning nirya ara, dipkoprob donamne! Tonda, imun kanye bobuka, ulamse talak ara, na si bambol deice arye, ‘Se, na nio, ance lyepnutumba, winibuka-winibuka winipnamne,’ nyabuka, nyamse ning nirya ara, dipkoprob aninguk talibuka wininamne!

¹⁵ Ara, an si eren aik dam yanirye, an si erena ati, kam ulye ning bukni, el nong weik wamlye ning opnirye, an arena ati, uku dongopnamne! Ara, weik yim sapi basam ap, weik yim kambing basam ap, yuk kambing basam ap, dobuka, opnyopura, an si erena ap, an arena ap ati, boyanirye, mesba deice deibuka, uku dongopniba, uku arye diplyopura, tulum ara, an dam weleyanamle.

¹⁶ Yata mutuku nang do nirya, Allah ati ilil tenelulumce, ulamlum nang nirya ara, anggun babye, na amot nyanmanye dam yamunce, kekenamlume. “Allah arye, na melina ati, mambul pil melibuka dolamnuk ning ara, ani,” nyabuka nuknirye, laka nyanamne. Ati, anggun nirya ara, na dam yamunce, kekepnululume!

¹⁷ Ikin ning, na dam pia weik ulamnuk talak ara, ‘Allah elcuk melibuka lyepnutu’ tenen, weik yupu deice arye, el tibuk morolamse. Narye nyalamse yupu deice arye, Allah ati, si erebuka, el si ati erelamsirye, “Anda pia telebe,” nyabuka, mot nyana deice arye nyalamse.

¹⁸ Bukni, wini talak nirya ara, na talima noutam, ‘Malye un ning tuba wininamne. ‘Aning nirya ara, kum bataknamne,’ tenyamtinye toura, aning-aning nirya talilulnye, Mikip Pia Weik Deiyoknye Allah arye, na moropse yupu kum kekepnutue.

¹⁹ Bukni, aning nirya ara, pia kum winilamsa ati, narye moryamse ning nirya ara, Allah arye akunum kekelamuke. Diba, narye morolamse yupu nirya ara, Allah elce akunum kekelamnukce, na morolamse touk, elce melibuka lyelomnuke.

²⁰ Ati ara, nun tukwak mutuku noutam unyap nang nirya ara, Allah el tibuk, ‘Se na nio, anda pia telebuk ulyame,’ nyabuka, el siuk erenamabe. Deiyok ara, narye, Allah ati, ‘Melibuka lyepnutu’ tenen, morolamse yupu nirya ara, Allah arye akunum kekelamnukce, lyepnuka ati, elti, ‘Anda pia telebuk ulyame,’ nyabuka, mot nyanamne. Tonda, Allah arye nati, ‘Weik tonun bico tenepnilirye, pia teleb kilinamkine,’ nyapdeiamuk yupu nirya ara, pia kum batakanune. Winibuka winilamnuka ati, ‘Allah anda pia telebe,’ nyabuka, el siuk erenamne.