Mazmur 65 - Eipomek

Allah ati si erebirye, ‘Telebe,’ nyanamap yupu

¹ Mot nyana ati, deiyok kinanye, Daud elce mot nyabuk.

² Nun nirya arye, “Nun ni Allah antibuk, nun deiyoknye pia teleb ulyame,” nyabuka, Sion mutuku noutamak arye, an siuk pia erenamkiyabe. Tonda, nunce anti, “Nun ni koproba Allah, el siuk erebibirye, el yupu kekebuka unamabe. El amu tam ubirye, el piluk donamabe,” nyabuka, nyalin yupu deice arye nyabupu touk, dipkoprob aninguk, talibuka wininamabe.

³ Ara, talye ati kume. Allah ancuk, ninye tukwak ninye arye, moronyap yupu nirya ara, kekebuka melisilyame. Ati ara, tukwak mutuku noutamak unyak ninye nirya arye, anti, ‘Allah elcuk lyesilirye, pia melinamsile’ tenen, nun ni koproba Allah, an dam anyuk yanganamabe.

⁴ Nun malye ulamupu ning nirya ara, pia weik ulamsuk buk, nun imun kanye bobuka ulamuburye, ‘Se, yata wiriptibye do? Yatanye birye, melibuka lyepsutu do?’ tenelamupu bukni, Allah ance nun malye winilamupu ning nirya, namin kibuka lyesilyame.

⁵ Ati ara, Allah ance, ‘Na si eren aik dam yanganamak’ tenen, wipdeipsulum ninye nirya ara, pia weik arye, kanye deibuka unamake. ‘Na dam yakirye, na siuk erebuka unamak’ tenen, akunum welisilyam ninye nirya, nun an dam yabirye, aning-aning nirya, kintinip deipsulum ninguk, talibuka ubirye, weik kanye deibuka unamabe. Ara, Allah an si eren aik, an uminyak, pia teleb sukum yanuka unamabe. Ati nun nirya arye, pin-pin kanye bobuka unamabe.

⁶ Allah ance pia kum batakasilyame. Nunce, ‘Nun ni koproba Allah melinamsil’ tenen, moronyap yupu nirya ara, ance kekebuka melisilyame. Ance nunti, ‘Dauplye’ tenen, pia kum batakasilyame. Anda, dipkoprob nun Lyena Deiyoknye ulyame. Tonda, Allah ancuk ninye arye kum winipmanto pil domince, nunti lyesilyame. Tonda, yata ninye do nirya, dan aunyak ninye babye, pia pera mutuku noutamak daunyak ninye nirya babye, ‘Allah elcuk melibuka, lyebuka dolyanamsile,’ tenekinyake. Ara, mutuku sirya, im sirya, daunyak ninye babye, weik laut mekwen deice, kapal laut deice bukuka balamak ninye nirya babye, aninguk tenekinyake.

⁷ Allah, anda mikip weik deice arye, im sirya, mutuku sirya nirya ap, mutuku kon ap, kwepdeiplumba bukuk. Ara, ‘El mikip weik talibuka, ulula deice arye, weik mutuku nirya kwepdeibukba, bukuk’ tenen, ninye arye, ani tenebuka eibikirye, kel biknamake.

⁸ Ancuk weik laut mekwen longteng-longteng alamle ning ap, mek langdibuka weik arye welelamle ning ap ara, an mikip deice arye, amekwen mikip kum kililyame. Aning atonun, tonda yata mutuku unyak ninye do nirya, Allah ancuk, ninye mutuku-mutuku nirya daunyakce, ‘Olanauk uptibye,’ tenenyak bukni, ance aninye nirya, mikip kum kipdeipminyeba, tunim abuka unyake.

⁹ Winibuka ance weik mambul pil dopminyeba, mutuku-mutuku daunyak ninye nirya arye, Allah antibuk ilil ululba, an siuk erenyakce, winilikinyake. Ara, ance sik dam ninye kum winipmanto ning winiminyeba, sik aninye nirya eibikirye, ‘Se,’ tenen, antibuk si erebuka winilikinyake. Tonda, mutuku-mutuku daunyak ninye nirya, ance weik mambul pil dopminyeba, eibikirye, Allah antibuk si erekinyake. Ara, keting yangalye tam ap, keting wekelbalye tam ap, mutuku-mutuku nirya, danoutam unyak ninye nirya arye, anti, ‘Se’ tenen, an kina ati, weik yupu nyabuka, an si erekinyake.

¹⁰ Allah ancuk, tuku nirya ara, moubuka kalikimince, ‘Mikroplyak’ tenen, mok arepminba ceplirye, tuku namin upliba, ninye arye, wa wibuka koulamak ning, aning-aning nirya palule. Winibuka paplirye, din ning ayala-ayala nirya, nong pia weik ulule. Tonda, mek balya babye, Allah ance arepminba, mek weika arye balirye olule. Allah ance arisiminye mek nirya ara, pia dipkoprob kum cepropnamle. Ance mek teleb kibuka arisiminyeba, ninye arye, wa wibuka koulamak ning, ayala-ayala nirya ara, teleb kibuka palule. Aning nirya babye, Allah ancuk, “Wininamle,” nyalisiminye touk ulule.

¹¹ ‘Ninye arye, wa wiamikce tuku mikroplyak’ tenen, Allah ance namin kililyame. Tonda, tuku bum miklamle ning nirya ara, namin kina ati, mok arepminba, mok cebuka mek dikilyame. Tonda ninye arye, tuku deice wa wibuka, din yala ning, ayala-ayala nirya dokikiba, dokolul ning ati ara, yating arepminba, teleb kibuka palule. ‘Ninye arye koulamak ning nirya, teleb kibuka papnamle’ tenen, mok arepminba, teleb kibuka weik arye papliba, ninye weika arye linyake.

¹² Aning ara, Allah an kanye teleb deice arye, ‘Aketing tamun, aketing tamun nirya, ninye arye wa wibuka koubikirye, libuka dinamak’ tenen, kintinisilyame. Mutuku-mutuku nirya unyak ninye ati, Allah ancuk dilyamce, aning-aning nirya, tabakuka arelyame. Ancuk melisiminba, kat tuku ululak babye, ninye arye wa wibuka koulamak ning, aning-aning nirya, teleb kibuka palule.

¹³ Tonda, Allah ancuk pia pata mutuku bukni, domba basam ap, tonda, kambing basam ap nirya ati, mutmuta kabu pia weika arye arepminba, kanye deibuka dinyake. Winisiminya deice arye, amutuku kon nirya ara, telebuk ululba, ninye arye kanye deibuka, weik yupu arye, anti, “Telebe,” nyabuka, si erekinyake.

¹⁴ Mutmuta batu palamle mutuku nirya ara, domba basam ap, kambing basam ap arye, pia weika arye unyake. Tonda, weik mutuku lu noutamak nirya ara, yakong atonun ning, el si ara gandum, pia weik ulule. Aulula ati, aning nirya arye, weik arye kanye dibuka, mot senyake. Raja Daud mot sena deice arye nyabuk.