Mazmur 64 - Eipomek

Yu nang arye, ikin ning na nong deice delininyak ning ati, ‘Allah arye melibuka lyepnamnil’ tenen, morobuk yupu

¹ Amazmur mot yupu ara, Raja Daud birye sekuk. Ara, Allah yupu mot nyana deiyoknye arena ati, sekuka arebuk. Daud birye sekuk yupu ara, ani.

² Se, na ni Allaho, narye engebuka moropnukin yupu ara, kekepnilyame! ‘Na ona ati, yu nang arye yanuka, opnikcak’ tenen, ilil weik unmanila ati, ‘Ance melibuka kalikniminba, anang arye kum opnikcopura, kam pia unamne’ tenen, moropkine na nio.

³ Tonda, sik malye weik wininyak yu nang arye, ‘Anye opnuyap’ tenen, duknubikirye, mur-mur ana yupu deice arye, na ona ati, yupu talininyake. Ati, sikce nati, ‘Anye adiparyuk opnamaba ati, winipnamap’ tenen, yupu talibikirye, na ona ati kintininyak ning ati, ‘Ance, melibuka lyepnamnilam’ tenen, moropkine na nio.

⁴ Ninye arye, sik ninye on parang, ‘Yu weik upnul’ tenen, ketelamak touk, sik si tang deice arye nyanyakba, ninye talimauk weik dilule. Tonda, winipmanto ara, ninye olan talak arye, ‘Nun lik, tenenyak nang opnuyap’ tenen, sik mal lubuka kintililamak touk, ayu nang arye nati, pia malye yupu nyaninyake.

⁵ Yuk nang arye, malye winin ning kum winipmakirye, deiyok kum upmalibuk, sik yu nang arye, ‘Anang opnuyap’ tenebikirye, tilila talye minin yupu deice arye, mal dobikirye, onyake. Tonda, sik mal bonyak nang arye, ‘Yata winipnamsila do?’ tenena ap, ilil una ap, kumce, yuk nang ati, mal dobuka onyake.

⁶ Sikce, ‘Yuk teleb nang ati, winibuka-winibuka winibibirye, pia ikin ning, sik nong deice delinamabe,’ tenebikirye, ato tenen ning ara, pia kum batakanyake. Pia tenenauk unyake. Winibikcopura, ‘Anang opnuyap’ tenen, ninye on ning, kintinibuka delinyake. Winibikce talak ara, sikce, ‘Kume, yata nang arye ton, eipnamsiak do? Nun malye weik wininamap ning ara, yuk nang arye ton, pia kum eipnamsiaka ati, talye lukparabuka malye winipnamabe,’ tenenyake.

⁷ Yu nang arye, ‘Teleb nang ona ati, winibuka-winibuka winipnamabe,” tenenyake. Deiyok kum upmalibuk, ‘Ateleb nang opnuyabe’ tenen, pia moubuka teneibikirye, yupu talinyake. Yuk nang, sik kanye talima noutamuk, pia moubuka tenenyak ning ara, nun yuk nang arye, pia kum bikinyaba ati, sik tenenyak ning ara, yata wiribuka biktibye do? Kume, aning ara, kum biktibye.

⁸ Bukni, Allah elcuk, el kel ati, elce sik wenena ati, ikin ning sik nong deice deipnamlarya! Winipmanto ara, ton tam nang arye, kum bikmakce talak ara, ton tam nang arye, minopce mal dobikiba, anang obikcopura, talye karin arye, sik dila lak ulamle. Aning atonun, sik malye wininyak nang, kum bikmace talak aryuk, Allah arye sikti, wenebuka opnamle!

⁹ Deiyok ara, sik malye wininyak nang arye, pia malye yupu nyanyaka deice arye, Allah arye ayu nang ati, weneplirye, obuka sirya daknamle! Akunum oplyopura, yuk nang eibikirye, aning ati, kanye loplyopura, ‘Se, Allah arye, anang opmala ara, pia mambul weike,’ tenebikirye, ilil weik unamle.

¹⁰ Ati, Allah arye sik malye wininyak nang ati, akunum wenebuka oplyopura, yuk-yuk nang nirya, aning eibuka bikikcopura, ilil weik upnamle. Ilil weik uplyopura, sik nirya arye, ‘Se, Allah arye, amalye winin nang wenebuka opmala ara, winibuka-winibuka winipmala deice arye, sik yu nang akunum wenebuka opmal atia, nyabuka yuk mutuku nang ati, laka nyalbinamake. Tonda, Allah arye amalye wininyak nang opmalinye biti, pia moubuka tenebikirye, biknamake.

¹¹ Bukni, yata nang do nirya, Allah arye, ‘Aning wininamlume, aning ara, ‘Pia kum wininamlume,’ nyapdeiamsuk yupu, moubuka talibikirye, dipkoprob uk wininyak nang nirya ara, nun ni Allah Yahweh ati, ‘Se, elda pia telebe,’ tenen, pin-pin kanye bobuka unamake. Tonda, sikce, ‘Malye ning, nun dam yangasulula ati, Allah aryuk melibuka lyenamsil’ tenen, Allah el damuk binuka, pia aunamake. Tonda, nun kanye talima noutam pia telebuk wininyap nang nirya ara, dipkoprob uk ubirye, nun ni Allah ati, ‘Anda pia telebe,’ nyabuka, el siuk erenamabe.