Mazmur 60 - Eipomek

Allah arye, ikin ning weik areamsukba, ikin kanye bobuka unyaba ati, ‘Melibuka lyepnamsil’ tenen, Allah ati, morobuk yupu

¹ Raja Daud birye, Mazmur yupu mot sekuk. Daud birye nyabuk. “Ara, Allah yupu mot nyana deiyoknye arena ati, sekuk. Tonda amot ara, yuk Allah yupu mot, el si ara, Urasin Teleb Keit Lelamle Ning el si ara, Bunga Bakung, amot lelilim nyalamle touk, asekeipmasin mot babye atonun nyanamlume,” nyabuk. Amazmur yupu ara, Israel nang peterena ati, Daud birye sekuk.

² Tonda, yuk-yuk nang, sik Mesopotamia mutuku Aram nang ap, tonda sik Zoba mutuku nang ap arye, ‘Israel nang opnuyap’ tenen, mal olyangalamik talak ara, Daud birye ayupu sekuk. Tonda, Daud el yin talin nang, sik deiyoknye, el si Yoab birye, Edom tam nang, yupa weik dua belas ribu (12.000) nang ati obuk talak arye, aMazmur yupu sekuk. Yoab birye anang obukak ara, lu weik mutuku, el si, ‘Asing Palin Lu’ nyalamik mutuku noutam arye obuk. Daud birye nyabuk yupu ara, ani.

³ Se, na ni Allah, ance nun Israel nang ati, ‘Kum melipnamne,’ teneplumce, akunum biksulumce, bataksuluma ati, nunce min talak domupu weik keil asik nirya ara, ance lo arepsulumba, nun mal olan nang arye, akeil asik nirya akunum ulubuka dakik. Nun ni Allah, nun malye winin ati, yu upkukba, uapsiminyak arye, imun kanye bon ning arepsutum bukni, wini talak ara, ‘Ance nunti, tamubuka teleb kipdeipsutum’ tenen, moropkiyabe.

⁴ Se, nun ni Allah, ance lo arepsulumba, nun mal olan nang arye yanuka onmasiceba, ilil pia weik usulule. Winipmanto ara, pia weik mutuku lokmanto ulye talak ara, mutuku kon nirya daraplirye, tokna pakuka saklyeba, ninye nirya ilil weik uplyeba, imun kanye bolamak touk, unmabe. Ati nun ni Allah, ‘Ance nyaptumba, mutuku lulukna nirya, tunim aptu ura, aning ara, pia telebe. Tonda, nun mutuku kon nirya lokukce, tokna pakukabukce, tukwak mutuku nirya opnin balamuk ning nirya ara, ‘Ance tamubuka teleb kipdeipsutume,’ tenen moropkiyabe na nio. Na ni Allaho, ‘Ance tonap tamubuka teleb kipdeipsutuba, nunda min talak teleb ulamupu touk, tonap winiptibye’ tenen, moropkiyabe, nun ni Allah.

⁵ Winipmanto ara, ninye arye, kanye wangalamak anggur mek weik arye dibikceura, sik kanye wangabikceba, kum tenenipmanto ulamak touk unmabe. Ara, ance nunti, an tenen nang unyap bukni, weik ikin ning weik areamsuluma deice arye, nun imun kanye bobuka unmabe. Nun kisok yung kum kipsukba, teleb kibuka upmanto kumce, nun kanye ara, tenipmanto kum unmabe.

⁶ Bukni, ance, ‘Aning ara, wininamlume, aning ara, pia kum wininamlume,’ nyapdeiamsulum yupu uk talibuka, diksukumuk unyak nang ati, ance, ‘Sik diksukumuk unyak nang ara, na dam yanuka unamak’ tenen, laka kin ning, el si ara spanduk, atonun deice arye, akunum sekuka deipsuluma ati, an damuk bikbik abuka yanamabe. Alaka kin ning, el si ara spanduk, deice sekuka deipsulum ning ara, eibibirye, ‘Nun mal olan nang arye, opsikcak’ tenen, minopce an damuk tamubuka yanamabe.

⁷ Ati, se nun ni Allah, ‘An mikip weik, sirik taruk deice arye, melibuka lyepsutumba, nunce nun mal olan nang ati, obuka malye kiptibirye, kum kipdeiptibye’ tenen, moropkiyabe na nio. Deiyok ara, ‘Ance bico tenesiminye nang ara, tamubuka tonap mikip arepsutuma deice arye, nun mal olan nang ati, obuka sirya daktibye’ tenen, moropkiyabe na nio.

⁸ Se, nun ni Allah, nun mal olan nang obuka sirya dakana ati, ance ayupu akunum nyapdeipsulume. Ara, an si eren aik noutam bukni, Pia Teleb Lek aik, antia talak ati unmalumak arye, an Allah arye, akunum nyapsulum yupu ara, ani. Na kanye deipnirye, Sikhem mutuku nirya, obuka sirya daknirye, malye kipnamne. Aning atonun, weik mutuku lu, el si Sukot mutuku babye, obuka dopropnirye, ‘El cang ap, pala ap, yata barye do?’ tenen, kiklilena ati, meter kiklipnirye, amutuku nirya ara, kiklibuka dipdenirye, nuknamne.

⁹ Dipkoprop ning ara, yata mutuku do nirya, dana-dana mutuku nirya ara, obuka dopropnyeura, amutuku nirya na tenen ati, pia talenamne. ‘'Amutuku tam nirya ara, obuka dopropnamne ati, domon yupu deice arye nyapnusine. Ara, Efraim mutuku nirya ara, winipmanto kat topi, el si Baja atonun ulule. Yehuda mutuku nirya ara, winipmanto na ninye deiyok nang arye, talinyak kama atonun ulule. Tonda, Gilead mutuku ap, Manasye mutuku ap, na akunum talipse.

¹⁰ Tonda, weik pala mutuku, Moab mutuku nirya ara, na yan mek liknak atonun ulule. Tonda, laka kina ati, na yan kinikna kwiripnirye, Edom mutuku noutamuk dopkwetepnamne. Winipyeura, ninye nirya arye, ‘E, Edom mutuku nirya ara, Allah arye, akunum talilule’ tenen, bikinamake. Aning atonun, Pilistea mutuku noutam tiknirye, weik yupu deice arye, ‘Amutuku nirya ara, na ninguk ulule,’ nyanamne. Ninye nirya arye, aning kekebikceura, ‘E, Pilistea mutuku nirya babye, Allah arye akunum talilule’ tenen, bikinamake. Allah arye nyabuk.

¹¹ Nyabukba, Israel nang sik ninye deiyoknye Raja arye nyabuk. “Bukni na nio, na mal olan nang ati, yatanye birye, nyaptuba, mikip weik nang aik dam bobinamnil do? Aning atonun, ‘Na mal olan nang olbinun’ tenen, yatanye birye, leibuka bituba, weik pala mutuku, el si Edom tam noutam bobinamnil do?

¹² Asipdenmakina deiyok ara, diba nun ni Allah, ance nun malye winin ning ati, akunum dip debuka bataksuluma ati, nuncuk yata wiriptibye do? Tonda, wini talak ara, ‘Nun ona ati, yin talin nang arye mal opdanuyabʼ tenen, banyap talak babye, an ap neika kum banyabe. Nun yuk olbanyabe.

¹³ Nun kele. Talye tukwak nang ati, ‘Melipsilyame!’ nyabuka moroptibyeba, yanuka melipsitinga babye, aning ara, talyeuk upnamle. Tukwak nang arye, kum melipsitinge. Ati na nio, nun mal olan nang olyangana ati ara’ ‘Ancuk melipsutumba, nun mal olan nang obuka sirya daktibye’ tenen, moropkiyabe na nio.

¹⁴ Bukni, nun kele. Nun ni Allah arye, yanuka melipsutua deice arye, nun mal olan nang nirya ati, obuka sirya daktibye. Deiyok ara, nun ni Allah, elcuk, nun mal olan nang nirya obuka yaniplirye, sice buklopnamle.