Mazmur 6 - Eipomek

Imun kanye bobuka un talak ati, Allah morobuk yupu

¹ Daud birye aMazmur yupu mot sekeibuk ning ara, ‘Allah yupu mot nyana deiyoknye arepnamakʼ tenen ati, sekukce, ‘Gitar atonun ning, el si ara kecapi, el tapu ara, delapan wamlye ning arye, amot nyanamlume,’ nyabuk.

² Se, na ni Allah Yahweh, ‘Anda yu weik tuba ukulul talak ara, na malye winin ning ati, kum wenepnamnilam’ tenen, moropkine na nio. Ara, ‘Yu weik upkilye talak ara, ayu deice arye kum wenepnamnilam’ tenen, moropkine na nio.

³ Na nio, ikin kanye bobuka ununa ati, nara pia mitang unmanila ati, na nio weik tonun bicoe tenepnutumce, melipnutum’ tenen, moropkine. Se na ni Allah Yahweh, na pia weik nakina talipmanilce, na nong nirya mitang upmanilba, balbalung apnilce, ilil weik upnila ati, ‘Ancuk kwetepnutumce, mikip kipdeipnutum’ tenen, moropkine.

⁴ Tonda, na talima daksakmanilba, imun kanye bobuka unmana ati, ilil weik unulule. Se, na ni Allah Yahweh, ance akunum bataknulumba, ikin weik ununa ara, yata talak ton aning atouk pia unamne do?

⁵ Na ni Allah Yahweh, tamubuka eipnimince, lyepdopnamnilame. Lyepropniminyopura, yuk nang nirya arye, ‘E, Allah arye, nyalin yupu deice nyapdeipsuk ning ara, anyapdeibuk touk, dipkoprob tuba-tuba pia teleb kipdeipnamle,’ tenebikirye bikinamake.

⁶ “Wini talak lyepnilyame,” nyabuka moropmakina deiyok ara, ani. Nun tukwak nang akunum dibipyopura, aminyan talak tonap nunce anti, pia kum tenenamkiaba ati, nyapne. Diba, ninye akunum diamik nang, tuku pum tam weiamikiba, unyakak ara, yupu nyana kumce, pia tunim abuka unyaka ati, an si tonap kum erepkitinge.

⁷ Wini talak ara, narye, “Se, yata uptinye do?” nyabuka, malye nyanmana deice arye, mitang unulule. Wininirye, na lik unulule. Lukunyan noutam nirya ara, pia engeniba, na asi maka saknilyopura, na amsuna deice saklirye, moul ulirye tulule. Diba, na pia engenuna deice arye, na asing maka sakniliba, na manun amsuna deice ara, pia moul ulirye tulule.

⁸ Tonda, na pia engenauk ununa deice arye, na asing malye uniliba teleb kibuka kum eiptinye. Tonda, nati, ‘Nun lik,’ tenebikirye, na mal olan nang pia weik unyaka ati, anang elinuna deice arye, na asing ara, pia malye unulule.

⁹ Se, anggun malye un ninguk talibuka, pia malyeuk winilulum nang ara, na dam arye batakuka, pia pera sukum bindopnamlume. Na ni Allah Yahweh arye, na engebuka malye nyanun ning ara, akunum kekepmanilce, lyepropnamanila ati, “Anggunda bindoplulume!” nyapsine.

¹⁰ Narye, “Se, na ni Allah, ance melibuka lyepdopnilyame!” nyabuka moronun yupu ara, Yahweh arye akunum kekenulule. Tonda, narye Allah ati moronun ning nirya ara, Yahweh arye akunum kekeplirye, melipnamnile.

¹¹ Allah arye melipnilyopura, ‘Anye bira, nun lik’ teneninyak nang nirya ara, lukdakirye ilil weik upliba, alye dakdanamake. Sikda, tonok talak aryuk, minop batakikirye, tamubuka yuk mutuku bikbik abuka bindopnamaka ati, sik nirya ara, alye weik dakdanamake.