Mazmur 59 - Eipomek

Daud birye, ‘Na mal olan nang arye opnikcak ati, Allah arye lyepnutu’ tenen, morobuk yupu

¹ Raja Daud birye, Mazmur mot yupu sekuke. “Ara, ‘Allah yupu mot nyana deiyoknye arepnamak’ tenen, arebuk. Amot ara, yuk mot el si, ‘Nun mal olan nang ati, obuka sirya daksicakʼ tenen, moron yupu,’ nyananyap mot ara, amot lelim atonun nyanamabe,” nyabuka sekuk. Tonda, ‘Israel nang nirya arye, aning kel biknamak’ tenen, Daud birye, aMazmur mot yupu sekuk. Amot sekuk talak ara, Israel nang talibuka, ninye deiyok kibuka ulamuknye, el si ara Saul, el yin talin nang ati, “Anggunda, na asik moubuka kalikinamnulume. Ara, Daud eipmunce, tomopnamlume,” nyabuk talak ara, Daud birye, amot sekuk. Daud birye sekukce nyabuk yupu ara, ani.

² Se, na ni Allah, an siuk erekununa ati, ‘Na on nang arye opnikcak’ tenen, ‘Ance lyepdopnamnilam’ tenen, moropkine. Winipmanto ara, ance ninye ton dobuka, weik mutuku kon deice deililamlum touk, ‘Anye opnuyap,’ teneninyak nang arye, opnikcak’ tenen, ‘Na ni koproba Allah ance, adiparyuk minop melibuka kaliknamnilam’ tenen, moropkine, na nio.

³ Tonda, sik kanye pia malye unyak nang arye, yuk nang ati, ikin weik delinyak nang ara, ‘Sikce opnikcak’ tenen, ‘Ance lopdeipnimince, lyepropnamnilam’ tenen, moropkine na nio. Ara, sikce, ‘Ninye ton optibye’ tenen, patapliba, ‘Na dam olyanganinyak nang arye opnicak’ tenen, “Ance melibuka lyepnilyame,” nyabuka, moropkine.

⁴ Wini talak babye, sik amalye unyak nang arye, ‘Anye opnuyap,’ tenebikirye, duknupmaca arye, ‘Dan sukum unmal do?’ tenen, eninyake. Diba, sik mikip weik unyak nang ara, yu weik upliba, yuk talye unyak nang ati, “Sik ap bulubibirye, anye olbinamabe,” nyabikca deice arye, yuk nang babye, ‘Anye opnuyab,’ tenenyake. Ati se, na ni Allah Yahweh, narye, malye winin ning tonok babye, ton kum winilamsa ati, deiyok pia kum upmalibuk, anang arye, ‘Anye opnuyab,’ tenenyake.

⁵ Diba, nara malye winin ning tonok babye, ton kum winilamse bukni, sik anang arye nati, ‘Anye opnamabe!” nyabuka, eninyake. Ati ara, na ni Allah, anda bukmince, na dam yanuka dinimince, nati melibuka, lyepdopnilyame na nio!

⁶ Se na ni Allah, na akunum kel bikamse. Nun Israel yala nang arye, an si atibuk pia erekinyabe. Tonda, anda, im deice yin talin malaikat nirya, sik deiyoknye ulyame. Atonun, na ni anda Allah Yahweh ulyame. Tonda nun ni Allah, anda, bukmince, sik Israel yala kum nang, yuk mutuku nang yala nirya ara, ‘Sik malye wininyak ning nirya ati, wenebuka opnalam’ tenen, moropkine. Ara, yuk yala nang wenepnalam talak ara, ance, ‘Se, sik anang ara bicoe, sik pia malye weik wininyak ning ara, talye mangkau kibuka, kum wenepnamne,’ tenena meme na nio. Deiyok ara, sik anang arye, ‘Yuk nang, sik nong deice imun weik un ning delinamabe,’ tenebikirye, yupu talinyake.

⁷ Na mutuku noutam ara, akunum ipnamalye talak ara, sik amalye unyak nang arye, tamubuka yanganyake. Yakcopura, bai tam yu kam arye, ‘Yata ning obuka dipnun’ tenen, weik yupu arye, yu nyalamle touk, amalye winin nang babye, Yerusalem mutuku dana-dana tam nirya ara, cang keil arye deibuka domik poka, deice tam yanibuka banmakirye, ‘Amutuku nang ara, yata wiribuka optibye do?’ tenenyake.

⁸ Na nio, ance kekepmince, moubuka dinamlame! Sik batakna kumce, weik yupu deice arye, malye nyabuka ngalukunyake. Winipmanto ara, ninye ona ati, parang, pia yu weik ulamle touk, sik anang arye nyakce yupu ara, pia mambul yupu, ninye ona ati yupu nyasinyake. Sikce malye yupu nyasinyaka deiyok ara, ‘Kume, yata deiyoknye kekepturye, nunti wenepsutu do? Ati aning ara, tonda kum winipnamle,’ tenenyaka ati, talye mangkau asa, pia yu yupu sisikinyake.

⁹ Malye yupu nyanyak bukni, nun ni koproba Allah Yahweh, anda sik anang ati akutulyame. Dipkoprop ning ara, yuk mutuku nang yala nang nirya ara, “Aning winipnamabe, aning winipnamabe,” nyabuka, mandipna kanye arye, malye yupu uk nyanyak bukni, an Allah arye, sik nirya ara, ‘Dauaplye’ tenen, akutulyame.

¹⁰ Se na nio, anda na mikip kelinilyamnye ulyama ati, ‘Yata talak arye melibuka lyepnamnil do?’ tenen, anti pia dinauk unamne. Deiyok ara, Allah an dam ara, yu nang arye kum opnitinga ati, weik keil aik atonun unulule.

¹¹ Allah arye, pia bico tenenulula deice arye, “Winibuka telebuk winilinamkine,” nyabuka, nyalin yupu deice nyapdeipnuluma ati, elcuk meibuka baliba, el balye tamuk dobolbanamne. Ati, na ni Allah arye, nati melinamnila deice arye, na on nang ara nirya, adiparyuk obuka, sung-sunga bukloplyopura, sik dibikiba, elce elinamle.

¹² Bukni, na ni Allah, na mal on nang nirya obuka, kum kipdeipminyopura, narye talinun ninye, sik Israel yala nang nirya ara, adiparyuk, aning lubuka kinyake. Ati na ni Allaho, an mikip weik deice arye, nun mal olan nang ara, amu tam kipdeipnalam’ tenen, moropkiabe. Yin talin nang arye, ‘Yin nang ara, sik mal arye opsikcak’ tenen, sik nong lelin ning, el si ara perisai, ongolamaka atonun, na ni Allah, anda nun Israel nang ati, melibuka kalikisilyame.

^13-14 Tonda, sik sitang ap, sik si bambol deice arye, pia malye yupu nyanyake. Winipmanto ara, ninye arye talye bai tam kam ulye ning, mangkau asa tomolamak touk, sikda maknya kintinikirye, kwalinyaka ati ara, ance sik anang nirya ati, wenebuka opnalame. Tonda, sikce yuk nang ati, ‘Dadipnyak’ tenen, ninye kir don ning ap, talye-talye yupu nyana ap, wininyaka ati ara, an yu weik upkiliba, anang ati, adiparyuk obuka, malye kipnalame na nio! Ara, sik amalye wininyak nang kan-kan arye, tonoknye babye batakna kumce, sik nirya ara, obuka sirya daknalyame. Winipminyopura, ninye tukwak nang, mutuku sirya, im sirya nirya, dana-dana mutuku yuk daunyakak babye, aning kekebikirye, biknamake. Ara, ninye tukwak nang nirya arye, ‘Se, dipkoprob Allah arye, sik Israel nang nirya talilirye, kalikilule’ tenen, Allah ati biknamake!

¹⁵ Nun mutuku noutam ara, akunum ipnamalye talak ara, sik amalye wininyak nang arye, tamubuka yanganyake. Yacopura, bai tam yu kam arye, ‘Talye kam ulye ning obuka dipnun’ tenen, weik yupu deice arye, yu nyalamle touk, amalye winin nang babye, Yerusalem mutuku dana-dana tam nirya, cang keil arye, deibuka domik poka deice tam banmakirye, ‘Amutuku ninye ara, yata wiribuka optibye do?’ tenenyake.

¹⁶ Sik amalye unyak nang arye, ‘Yata kwaning ton ubula doproptibirye, din diptibye,’ tenen, nun mutuku noutam dana-dana tam nirya epra banyake. Din ning eibikirye, dobuka dinyak bukni, pia kum bouplirye, tuba pataplyopura, yu yupu deice arye, mur-mur abikirye dinyake.

¹⁷ Malye unyak yu nang arye, winisinyak bukni, narye an pia mikip weik ulyamnye biti, mot deice arye nyanamne. Tonda, asum-asum nirya, akunum bereklyopura, an si erena ati, kanye kil-kil mot nyanamne. Ara, anda, weik tonun bico tenesimince, ance, ‘Winibuka pia telebuk kilinamsine,’ nyabuka, nyalin yupu deice arye, nyapdeiamsulum ning ara, aning tenebuka, mot deice arye nyanamne. Amot ara, talye ati kum nyanamne. Deiyok ara, an mikip weik deice arye akunum pia melibuka kaliklamnuluma ati, mot nyanamne. Winipmanto ara, ‘Nun mal olan nang arye opsikcak’ tenen, ninye arye weik keil arye, deibuka donyak keil aik atonun, akunum winilamnuluma ati, mot nyanamne. Tonda, ‘Yu nang arye opnikcak’ tenen, imun kanye bobuka, unmanye talak ara, duknuptiniba, yu nang arye, kum opnitinga atonun akunum winilyama ati, amot ara, nyanamne.

¹⁸ Se na ni Allah, anda na mikip kilinilyama deiyoknye unilyame. Ati ara, an siuk erepnirye, “Anda pia telebe,” nyabuka, kanye kil-kil mot nyanamkine. Deiyok ara, ani. Ara, winipmanto ara, ‘Nun mal olan nang arye opsikcak’ tenen, ninye arye, weik keil aik donyak aik atonun, akunum winilamnuluma ati, an si erena ati, mot nyana deice arye nyanamne. Ara, anti mot uk nyanamkine. Deiyok ara, anda weik tonun bico tenepnimince, ance, ‘Winibuka pia telebuk kilinamkine,’ nyabuka, nyalin yupu deice arye, akunum nyapdeiamnulum ning nirya ara, tuba-tuba winilyama ati, aning tenipnirye, mot nyana deice arye, ‘Telebe,’ nyanamkine. Raja Daud birye, aMazmur mot yupu sekuk.