Mazmur 58 - Eipomek

‘Allah arye, sik malye unyak nang ati, weik tonun wenebuka opnamle’ tenen, morobuk yupu.

¹ Raja Daud birye, Israel nang peterena ati, aMazmur yupu mot sekukce, Allah yupu mot nyana deiyoknye biti arebuk. Arebukce, ‘Amazmur yupu mot ara, yuk mot, el si, ‘Winibuka opminyakarye, sirya daknalam’ nyalamle atonun, ayupu deice mot uk, el lelim atonun nyanamlume.

² Se, anggun weik nang ati asipdesine. Anggunce ninye yupu lipsisikuka bokolin talak ara, teleb kibuka, yupu sisikuka bokolilulum do, kum do? Tonda, ninye arye winilamikce ning ara, sik winilamak touk moubuka dipdemunce, yupu lipsisikuka bokolilulum do, kum do?

³ Kume, na kele. Anggunda, Allah arye nyasilye yupu ara, yanibukapmunce, anggun kanye talima noutam, malye tenelulum touk ubuka, yupu bokolimunce, malye winilulume. Anggunda, nun Israel nang unyap mutuku noutam nirya ara, ikin ning deipsumunce, malye kilisululume.

⁴ Anggun weik deiyok nang arye, malye-malye kibuka umunce, Allah arye nyasulul yupu yaninauk ululume. Ara, anggun nin yapu arye, deiamsik talak arye dipdongobuka, anggun kam ulamlum talak noutam nirya babye, malye winin ninguk winilamlume. Diba, anggun nin yapu arye, winiryuk deiamsik talak arye, tuba-tuba malye winin ninguk winilamlumce, tilila yupu nyalulume.

⁵ Ati ara, sik weik deiyok nang ara, ninye on kwatima atonun unyake. Ara, sik malye wininyak ning deice arye, yuk nang nirya ati, ikin ning delinyake. Winipmanto ara, ninye arye, ninye on kwatima dopropnirye, ‘Teleb kipdeipnyopura, akwatima namin kipliba tamubuka teleb kipnamle’ tenen, piripdetinga babye, winipmanto kum ulule. Aning atonun, sik malye wininyak ninye deiyok nang ara, yuk nang arye moroptinga babye, pia kum kekeptinge.

⁶ Diba, sikda pia malyeuk wininyaka ati, kel weik nang arye, ‘Winipnamlume, winipnamlume,’ nyaptinga babye, anang arye, pia kum kekeptinge. Diba, kel weik nang arye, yupu nyabikiba, kwatima ara, teleb kilinyak bukni, amalye winina deiyok ning, kel weik nang arye, ‘Winipnamlume,’ nyabuka, nyaptinga babye, pia kum kekeptinge.

⁷ Ati na ni Allah, ance sik wenena ati, opminyakarye, amu tamuk deiptumopura, tonap malye kum uptinge. Winipmanto ara, ‘Ance sik si duk lukminba, sik si nirya lukuka saktuʼ tenen ati, nyapne. Se, na ni Yahweho, winipmanto ara, yu weik pus, el si singa ara, mitik tonun winiryuk nepmalye ninguk, tomobuka, el si ara yang tiklamle ning, lukuka bataklamaka atonun ubuka, ‘Amalye una deiyok nang ati, ance wenebuka opminyopura, sikce tuba malye kum kipdeipnamsiak’ tenen, moropkine na nio.

⁸ Tonda, dou malamle talak nirya ara, mok cena kumce, mek nirya cebuka, silal selamlirye, kum danalamle touk, ‘Ance amalye winina deiyok nang ati, kum kipdeipnalam’ tenen, moropkine. Tonda, winipmanto ning ara, ninye balamikirye, moubuka yanilamikiba, silal selamlirye, kum danin balamle touk, ‘Sik malye winina deiyok nang ati, kum kipdeipnalam’ tenen, moropkine.

⁹ Tonda, sik anang ati winipmanto ara, ipye arye ninye dakmaliba, ining dipmalyak arye, ining saklamle touk unyak nang ara, ance, ‘Atonun nang ara, wenebuka opminyakarye, kum kipdeipnalamʼ tenen, moropkine. Tonda, kilapu arye mi bomikca ani, aminyan talak mapu min kum deiamice talak, amapu ara, mun pum tamuk dibikiba, talye deliltaklamak touk, ‘Ance, sik malye winina deiyok nang ara, sik malye winin ning ara, min kum winipting talak aryuk, wenebuka opminyakarye, kum kipdeipnalam’ tenen, moropkine na nio.

¹⁰ Tonda, winipmanto ara, mitik yun mek makau ara, weik uku dinmalya deice deibikiba, pia minopce buppu ulamle touk, ‘Ance amalye una deiyok nang ati, minopce obuka sice buklopnalam’ tenen, moropkine na nio. Tonda, weik uku arye, maning nirya minopce diplyeba, kum danalamle touk, ‘Ance amalye winina deiyok nang ati, minopce wenebuka opminyopura, kum danamak’ tenen, moropkine na nio.

¹¹ An Allah arye, malye wininyak nang wenepmince, kum kipdeipminyopura, dipkoprob ninguk, wininyak nang arye aning ebicopura, pia kanye deibuka unamake. Ara, anda Allah arye, ‘Aning wininamlume, aning ara, pia kum wininamlume,’ nyapdeipsulum yupu ara, aninguk talibuka, wininyak nang ati nyapne. Winipmanto ara, an Allah arye, sik malye wininyak nang ati, yupa pia weik tonun opminba, sik ining weik tonun, tuku deice sakturye, weik tonun uptopura, an yupu talibuka diksukumuk wininyak nang arye, aning yaniptingba, sik yan nirya ara, ining diamuk uptue.

¹² Ance sik malye winin nang wenepminyopura, yuk nang nirya, aning eibikirye, “E, wini talak ara, sik diksukumuk wininyak nang ara, dengna atonun ning akunum dopropmake,” nyanamake. Tonda, “Dipkoprob Allah arye, tukwak mutuku, im sirya, mutuku sirya nirya arye, malye winin ning kum kipdeiplirye, tonap teleb kipdeipnamle. Ara, malye nang arye, winilamak touk ubuka, elce sikti, wenebuka, dengna arelya deice arye, tonap aning nirya, teleb kilisulule,” nyanamake. Raja Daud birye, aMazmur mot yupu sekuk.