Mazmur 57 - Eipomek

‘Allah arye melipnamnil’ tenen, morobuk yupu

¹ Raja Daud birye, aMazmur mot yupu ara, sekuk. Ara, Israel nang peterena ati, sekukce, Allah yupu mot nyana deiyoknye biti, arebuk. Amazmur mot yupu, el lelim ara, yuk mot el si ara, ‘Obuka sirya dakana kume,’ akunum nyanyaba atonun kibuka, nyanamabe. Daud birye aMazmur mot yupu sekuk talak ara, ara Raja Saul birye, ‘Daud opnamne’ tenen, eibuka dobolamukba, Daud birye, bikbik abuka weik keil deiya pum tam wekukce, dungnubuka unmok talak arye amot sekuk.

² Daud birye nyabuk ning ara, ani. ‘Se, na ni Allah, bico tenepnutumce, nati melibuka lyepnilyame!” Deiyok ara ani. Ara, ‘Allah arye melibuka kalikinamnil’ tenen, an damuk yanuka unune. Winipmanto ara, ayam maka kil arye, el mapu nirya deiplirye, el pol amu tam dongoplirye, irilamle touk, ‘Allah, an dam yanyopura, ance pia melibuka kaliknamnilam’ tenen, moropkine. ‘Yu nang arye, opnikcak’ tenen, Allah an damuk duknupnirye daunmanya ani, na mal on nang akunum bindobikcopura, mangkau unamne. Winipmanto ara, ‘Weik kum yalirye, donmalya ani, tunim alamle touk winiptinye,’ tenepne.

³ Narye nyakunune. Allah anda, aning-aning nirya talibuka, deice tam ulyamce, Pia Mikip Weiknye ulyama ati, narye anti, ‘Se, bico tenepnimince, melibuka lyepdopnilyame!’ nyabuka morokunune. Anda Allah arye nati, ‘Anye bira, winibuka melipnamne,’ tenenilyame. Melipniminba, ance aning ton, aning ton, winipnamne,’ teneniminye atonun ubuka, dipkoprob winipnilyame. Ance, ‘Winipnamne,’ teneminye ning nirya ara, aning atonun, dipkoprob winilyame.

⁴ Ati ara, Allah anda, im deice ulyamak arye, na melin ning dopkwetepnamnilame. Tonda, ance na melibuka lyepdopnamnilame. Yu nang arye, nati, ‘Anye opnuyap’ tenen, warikininyak nang nirya ara, an Allah arye, anang nirya wenepmince, obuka sirya daknalyame. Winipminyopura, sik nirya alye dakdanamake. Allah arye, ‘Winipnamne,’ tenesilirye, nyasilye touk, batakna kumce, aninguk dipkoprob winilule. Ati, na ni Allah arye, ‘Winibuka pia bico tenekununa ati, pia teleb kipdeipnamkine,’ nyalin yupu deice arye, nyapdeipnuk ning nirya ara, pia nati, dipkoprob melinamnile.

⁵ Pia yu nang arye, ‘Anye opnuyaba ati, dan mutuku ulul do?’ tenen, akunum eninyake. Winipmanto ara, bai tam kam ulamle ning, el si ara, yu weik singa kus arye, ‘Ninye obuka dipnun’ teneplye touk, sik yu nang arye, na ona ati ara, atonun kibuka unyake. Na ona ati, winipmanto ara, anang sik si tatce ara, ninye on mal ap, ninye on yo balang ap, atonun ulule. Tonda, ayu nang arye, sik si tang deice arye nyanyak yupu nirya ara, ninye on parang, el si weik tonun, yu weik ulamle touk unyake.

⁶ Se, na ni Allah, an pia mikip weik ulyama ap, pia teleb ulyama ap ara, nukman kumto, im deice atonun ulula ati, ance aning nirya, lak kipdeipsiminba, ninye nirya arye, lukdakirye, ‘Se Allah ara, dipkoprob pia teleb ulule,’ tenebikirye, an si erenamake. ‘Ninye nirya arye, winipnamak’ tenen, moropkine na nio. Aning atonun, Allah an pia mikip weik ulyama ap, pia teleb ulyama ap ara, ‘Tukwak mutuku noutam unyak nang, mutuku sirya, im sirya nirya arye, biketingce, an siuk pia erenamkiak’ tenen, moropkine na nio.

⁷ Na on nang arye, ‘Anye tomobibirye, el nong deice, ikin ning deibibirye, opnamap’ tenen, warikininyake. Ayu nang arye, ikin ning pia weik, na deice delininyaka ati, na talimauk dinilirye, pia mitang dem unulule. Ninye on nang arye, ‘Bai tam kam ulye ning opnuyap’ tenen, tuku pum tam palibikirye, yo tace lubuka, atuku pum tam ikuka delilamak touk, sikce na ban bisik ara, ninye arye, tuku lukuka deibikce, yo tace lubuka atuku pum tam ikuka kintinip deibik. Winilamik bukni, sikce, ‘Yuknye opnuyap’ tenen, kintinip deiamik ning pum tam ara, sik damang akintinip deiamik ning pum tamuk, sakuka poulbiyikce, opdayik.

⁸ Se na ni Allah, na kanye talima ara, teniltona pia kum unun bukni, pia weik tonun, tuba diba tenekunune. Aning ara, pia kum batakanune. Diba na nio, na kanye talima noutam nirya ara, pia tunim abuka unune. ‘Se yata winiptinye do?’ tenen, pia kum teninune. Anti pia diba tenekunune. Ati ara, na kanye talima noutam ara, mot nyapnirye, an siuk pia erekunune.

⁹ Diba, na kanye talima noutam nirya ara, akunum kintinipnune. Na mot nyan talak lelim nyan ning, el si ara, bung-bung ana gambus ap, kecapi ap, kintinipnirye, mot nyanamne. Nara, mapmanya ani, berekliba, buknye talak ara, keting min kum yanaplye talak arye, na mot nyana ati kintinipnamnarya!

¹⁰ Deiyok ara, na weik deiyoknye Allah ati, yuk nang kekenak arye, ‘Telebe,’ nyabuka, Allah el si pia erenamne! Diba, sik dana-dana tam, yuk-yuk unyak mutuku noutam nirya ara, Allah anti, si erekinirye, ‘Allah ara, pia telebe,’ nyabuka, mot nyanamne.

¹¹ Ara, talye ati kuma. Deiyok ara, ani. Allah ance nunti, ‘Weik tonun bico tenepsinirye, pia teleb kipdeipnamsine,’ nyalin yupu deice arye nyapdeipsulum yupu nirya ara, dipkoprob wininamsilame. Tukwak mutuku arye, im deice tam nukman kumto ulye touk, ance weik tonun bico tenesimince, teleb ulisilyam ning babye, nukman kumto ulule. Aning atonun, tukwak mutuku deice tam, dua ululak nukman kumto ulye touk, anda batakna kumce, pia melibuka lyelosilyama ara, nukman kumto ulule. Ance, ‘Winipnamne,’ nyasilyam touk, aninguk dipkoprob winilyama ati nyapkine.

¹² Se, na ni Allah, an pia mikip weik ulyama ap, pia teleb ulyama ap ara, nukman kumto, im deice atonun ulula ati, ance aning nirya, lak kipdeipsiminba, ninye nirya arye, lukdakirye, ‘Se Allah ara, dipkoprob pia teleb ulule,’ tenebikirye, an si uk erenamake. ‘Ninye nirya arye, winipnamak’ tenen, moropkine na nio. Aning atonun, Allah an pia mikip weik ulyama ap, pia teleb ulyama ap ara, ‘Tukwak mutuku noutam unyak nang, mutuku sirya, im sirya nirya arye, bikikirye, an siuk pia erenamkiak’ tenen, moropkine na nio. Raja Daud birye, aMazmur mot yupu sekuk.