Mazmur 56 - Eipomek

‘Ikin weik usulul talak ara, Allah ati, tuba diba tenenamabe,’ nyabuk yupu

¹ Raja Daud birye, aMazmur mot yupu sekuk. Sekukce, Allah yupu mot nyana deiyoknye biti arebukce, “Amot ara, yuk mot, el si ‘Yalma maka ara, weik yo, el si Tarbatin, deice bukmal’ nyalamak mot lelim atonun ubuka nyanamlume,” nyabuk. Sik Pilistin yin talin nang arye, Kat mutuku noutam ara, Daud tomobik talak ara, Daud birye, amot sekuk.

² Atalak ara, Daud birye nyabuk yupu ara, ani. “Se, na ni koproba Allah, ‘Bico tenepnutumce, melipnutum’ tenen, moropkine.” Deiyok ara, ninye yata wiribuka do, nati, yaninikirye, ikin ning na nong deice deilininyake. Beren tam talak arye dipdongobuka, kiting noutam ap, beren tam ap anoutam nirya ara, yaninikirye, ikin ning na deice deilininyake.

³ Diba na nio, asum-asum nirya ara, na mal olan nang arye, yaninikirye, ikin ning dobuka, na deice deilininyake. Ninye yupa weik tonun, ‘Anye bira opnuyap’ tenen, warikininyaka ati, anda, aning-aning nirya talibuka, deice tam umince, Pia Mikip Weiknye ulyama ati, an adiparyuk melibuka lyepnamnilam’ tenen, moropkine.

⁴ Ilil weik unilye talak ara, narye anti, ‘Elce lyepnamnil’ tenen, diba tenepkinirye, na talima, an deiceuk deilikunune.

⁵ Se na ni Allah, ance nyasilyam yupu ati, ‘Ayupu ara, pia telebe,’ nyanune. Tonda, an Allah atibuk, diba tenepnirye, na talima, an deiceuk deilikunune. Allah ati, diba tenenuna ati, talye tukwak nang arye, yata ning winipniting do? Kume, ikin kum kipdeipniting,’ tenepne.

⁶ Na mal olan nang arye, beren tam talak arye dipdongobuka, sin tam talak nirya ara, ‘Anye malye kipdeipnamabe’ tenen, na wininye ning ap, na nyanun yupu ap ara, yaninauk winininyake. Sikce nati, ‘Anye biti, kanye imun ning arenamabeʼ tenen, tuba-tuba teneninyake.

⁷ Duknubikirye, sik ap, yuk nang ap arye nati, ‘Ikin ning dobuka, el deice deilinamab’ tenen, yupu talinyake. Tonda, na banunak nirya ara, ‘Yata wiriptu do? Dan sukum binamal do?’ tenen, moubuka dinikirye, warikininyake. Winininyaka ara, talye ati kuma. Deiyok ara, sikce, ‘Anye opnuyap’ tenebikirye, patalula ati, pia tenenauk unyake.

⁸ Ati ara, na ni Allah, sikce nati, yu upliba, ikin ning, na nong deice deilininyaka ara, ance anang ati wenebuka opnalame na nio! Atonun, an yu weik deice arye, anti diba kum tenekinyak nang, yuk-yuk nang nirya ara, ‘Wenepmince, mikip aryuk amu tamuk deilinalam’ tenen, moropkine na nio.

⁹ Ance eilinilyama ati, na ikin unilye ning nirya, ancuk nukmince, tuba tenilyama ati, na ikin upniliba, na mapmanto kum unye talak nirya ara, ancuk na ikin unulul ning nukmince, tenenauk unilyame. Tonda na ni Allah, na ikin upniliba, engepnirye, na asing maka saknilyopura, ance na asing maka dopropmince, mitik mek makau, el si botol noutam dikilongonilyame. Diba, ance, ‘Anye ikin unmokba, el asing maka sakmok ning nirya ara, ‘Tuba tenepnamne’ tenen, an buku noutam aryuk, sekenimince, tuba bikilyame.

¹⁰ Tonok ning ara, pia dipkoprob akunum bikamse. Ara, na ni Allah arye, nati, ‘Anye pia melinuna deice arye, teleb kilinamne,’ tuba tenelula ara, na akunum bikamse. Ati, dan talak do nirya, narye, ‘Allah melipnilyame,’ nyabuka, moronun talak nirya ara, Allah el adiparyuk, yanuka melinulule.

¹¹ Allah arye nyalul yupu nirya ara, narye, ‘Ayupu ara pia telebe,’ nyabuka, elti, si pia erenune. Atonun, na ni Allah Yahweh arye, ‘Winipnamne,’ nyalul yupu nirya ara, ‘Aning ara, pia telebe,’ nyanune.

¹² Allah ati, diba tenepnirye, na kanye talima nirya, el deiceuk deilinune. Nara, Allah ati, diba tenenuna ati, talye tukwak nang arye, yata malye ning winipniting do? Kume tenepne.

¹³ Se, na ni Allah, narye, ‘Anti wininamkine. An ti, teleb aren ning arenamkine,’ nyabuka nyalin yupu deice arye nyalamse ning nirya ara, dipkoprob winipnamnarya! Tonda, narye anti, “Naio anda pia telebe nyapkine,’ nyabuka, an si erenamkine.

¹⁴ Deiyok ara, ani. Ara, na akunum dipmanto unmasa ati, ancuk na dam yalumce, melibuka lyepdopnulume. Tonda, na mal olan nang arye, nati, malye kibuka, opmanto unmanik bukni, ance melibuka lyepropnuluma ati, ‘Anda pia telebe,” nyapkine. Na ni Allah, ance lyepropnuluma deiyok ara, ani. Ara, ‘Anye bira, na Allah dam unamle. Na dam ulamlya ani, na dirina weik arepnyopura, elce, ‘E, diksukum wini bisik ara, ani,’ teneplyopura, abisikuk dobolbanamle’ tenen, akunum lyepnulumce, teleb kipdeipnulume. Raja Daud birye, aMazmur mot yupu sekuk.