Mazmur 54 - Eipomek

Daud birye, Allah melipnutuba, yuk nang nirya arye, ‘E, dipkoprob Daud bira, malye kum winibuk,’ tenen, ‘Biknamak’ tenen, Allah ati morobuk.

¹ Amazmur ara, Allah yupu mot nyana deiyoknye arena ati, sekuk. Amazmur yupu mot nyanamak talak ara, bung-bung an, kitar atonun ning, el si kecapi arye, aMazmur yupu mot nyanamake. Daud birye, ‘Israel yala nang peterenamne’ tenen, aMazmur yupu mot sekuk.

² AMazmur sekuk talak ara, sik Zipite nang arye, Raja Saul dam binuka, laka nyabik. Sikce, Saul biti nyabik ning ara, ani. “Naio, ance enmalamnye bira, nun mutuku noutam yanuka, dungnubuka unmale,” nyabik.

³ Daud birye, Allah ati nyabuk ning ara, ani. ‘Se, na ni Allaho, an mikip deice arye, melibuka lyepnutum’ tenen, moropkine. Tonda, an weik tonun melipniminya deice arye, yuk nang eibikirye, ‘E, winira nun bikmabe. Dipkoprop Daud bira, malye ton kum ulamuk,’ tenen, akunum bikmabe. ‘Winibuka tenepnamak,’ tenen ati, moropkine na nio.

⁴ Ati, se na ni Allah, narye anti, ‘Melipnilyame,’ nyabuka, morokunun ning ara, ‘Kekepmince, melipnamnilam’ tenen, morokunune na nio. Ati, na si bambol arye yupu nyabuka, moropkinyopura, ‘Ance moubuka kekenamnilam’ tenen, moropkine na nio.

⁵ Deiyok ara, sik mandipna kanye weik bonyakce, maknya kintininyak nang arye, nati, ‘Anye opnuyabe,’ tenepnikirye, na dam yanuka wariknamniaka ati, nyabuka moropkine. Diba, yu weik upliba, pia mikip arye, ninye on nang arye, ‘Anye Daud bira, adiparyuk opnuyap’ tenen, enmaniake na nio. Sik ato nang ara, an Allah ati, pia bita kum bikikinyake. An Allah arye, ‘Wininamlume,’ nyasilyam yupu nirya ara, yaniltaknauk wininyaka ati, nyapne.

⁶ Bukni, na akunum bikamse. Allah ara, pia dipkoprob, na Melina Deiyoknye unulule. Diba, nun ni Allah Yahweh ara, dipkoprob melibuka lyelonula ati, tuba kam unamne.

⁷ Na on nang arye, pia malye winin ning weik tonun unyaka ati, Allah arye dipkoprob, sikti, oplirye, kwang daknamlarya! Diba na ni Allah, ance, ‘Winipnamne,’ nyabuka nyasilyam yupu nirya, dipkoprob winilyama ati, amalye winin nang nirya ati, opminyakarye, kum kipdeipnamlyame.

⁸ Ati ara, naryuk na kanye tenena deice aryuk, Allah ati, teleb ning arepnamne. Ara, na weinun domba ato ning ton, dobuka opnirye, an si erebuka kina ati, uku dongopnamne. Tonda na ni Allah Yahweh, an pia teleb si ara, “Allah el si ara, pia telebe,” nyabuka, anti si erenamkine. Allah Yahweh ati, narye pia ‘Telebe,’ nyapne.

⁹ Aning deiyok ara, ani. Ara, yata ikin ning do nirya ara, na dam yalyopura, Allah arye melibuka lopnilirye, tuba tonap teleb kilinulule. Tonda, na on nang arye, yanuka kum opnik ning ara, narye sikti, malye kibuka opseba, sikda, na amu tamuk unmeka ati, narye eipse.