Mazmur 53 - Eipomek

Allah arye sik pia malye wininyak nang ati, weik tonun wenebuka opnamla ati, ‘Sikda ilil pia weik tonun unamake,’ nyabuk yupu

¹ Raja Daud birye, ‘Israel nang kel biknamak’ tenen, aMazmur mot sekeibuk. Sekukopura, ‘Allah yupu mot nyana deiyoknye arenamak’ tenen, sekeibuk. Tonda, ‘Yuk Allah yupu mot, el si ara Mahalat, amot lelim nyalamle touk, anye mot babye, alelim deice arye nyanamak,’ tenebukce, Daud birye sekeibuk yupu ara, ani.

² Allah ati diba kum tenenyak nang ara, “Allah ara dipkoprob kum ulule,” nyanyake. Nyanyak bukni, ayupu nyakce nang ara, sik pia walwal nang arye nyanyake. Adeice, sikce wininyak ning yuk-yuk ning nirya ara, malye ninguk wininyake. Ara, Allah arye, anang ati, ‘Sikce pia malye weik wininyak ning ara, na pia like. Anang ara, sik kanye talima nirya ara, pia malyeuk ulula ati, sikce wininyak ning ara, pia winipman kum ning wininyake’ tenelule. Sik anang kan-kan ara, tonoknye babye, teleb kum ulule. Sik nirya ara, malyeuk unyake.

³ Allah el si Yahweh, im deice arye, ninye tukwak mutuku unyak nang ati, ‘Diksukumuk teleb kibuka unyak do, kum do?’ tenen, moubuka eililule. Tonda, Allah arye, ‘Na wininye ning ap, narye nyanun yupu nirya ara, moubuka bikikirye, kel weik bikinyak nang unyak do?’ tenen, disulule. Tonda, Nun ni koproba, Allah arye nyasulul yupu ara, aninguk talibuka wininamap’ tenen, nati eninyak do? Uteneplirye, nun tukwak nang ati, moubuka disulule.

⁴ Bukni, mutuku sirya, im sirya nirya, unyak nang nirya ara, pia moubuka, teleb ton kum unyake. Allah arye nyasulul yupu nirya ara, akunum yaniltanauk wininyakce, yuk talye ninguk talibuka dobolbanyake. Tukwak mutuku unyak nang nirya ara, sik talima noutam nirya, pia malye weik ulule. Ninye kum winipting ning bukni, talye lukparabuka, pia malye ning wininyake. Tonoknye babye, teleb pia kum wininyake. Ninye nirya ara, malye ninguk tenebuka, winiyake.

⁵ Ninye malye ninguk talibuka wininyak nang nirya ara, pia kum bikamika atonun, teleb winin ning ara, pia kum kel bikinyak do? Malye ninguk talibuka wininyak nang arye, din ning el si roti minop dibikirye, sirya dakalamak touk, na Allah ara, na mapu koproba, sik nirya ara, minop obuka, sirya dakanyake. Tonda, nara Allah, na si Yahweh ati, ‘Naio yata yupu nyapsiminba, aninguk talibuka wininamap do?’ tenen, nati pia kum morokinyabe.

⁶ Malye ninguk talibuka wininyak nang nirya ara, aminyan talak, pia weik tonun ilil weik unamake. Lyepliba, sik kan-kan uk unamle bukni, Allah ati diba kum tenenyak nang ara, ilil weik unamle. Ara, minop talak ara, mitik tonun ilil ulamik bukni, aminyan unamle talak ara, weik tonun pia ilil weik, kum tenepmanto ning unamle. Deiyok ara, Allah ati diba tenebuka diksukum kum unyak nang ati, Allah arye, anang nirya obuka, sice bukloplyopura, sik nong pum tam, yok nirya dobuka, yuk-yuk mutuku dana-dana tam dopkwetepnamle. Allah arye, amalye wininyak nang wenebuka oplyopura, alye weik tonun daknamake. Ara, talye ati kum bukni, Allah arye amalye wininyak nang nirya, obuka bataknamle. Elce sikti, ‘Na dam ton, pia kum yanuka unamake,’ akunum tenebuk atia.

⁷ Se, nun patasulul ning ara, ‘Allah arye, Sion mutuku noutam arye yanuka, melibuka lyepdopsutopura, pia kanye deilinamabe,’ tenenyabe. Ati, nun Israel yala nang nirya arye, ‘Se, Allah arye, minop yanuka lyepropsutue’ tenen, pia moronyabe. Wini talak ara, nun Israel yala nang nirya ara, ikinuk unyap bukni, Allah Yahweh arye, tuba tamubuka, nun ning nirya, teleb kipdeipsilyopura, nun Israel yala nang nirya ara, pia kanye bobuka unamabe. Atalak ara, nun apu koproba, Yakub birye deiamukba, dadeipdanin, yangalamupu nang nirya arye, kanye pia bobuka, telebuk unamabe. Ara, nun Israel yala nang nirya ara, kanye bobuka, pia telebuk unamaba ati, nyapne.