Mazmur 52 - Eipomek

“Allah arye, sik talye yupu dem nyanyak nang ati, wenepnamle,” nyabuk yupu

¹ Raja Daud birye, ‘Israel nang nirya ati, peterepnamne’ tenen, Allah yupu mot sekuk. Winibukopura, Allah yupu mot nyana deiyoknye, arepnamika ati, aMazmur yupu sekuk.

² Edom mutukunye, el si Doeg birye, Raja Saul dam yayukce, “Naio, Daud bira, Ahimelekh el aik dam akunum yanmalce, dunubuka unmale,” nyabuk talak ara, Daud birye, aMazmur yupu sekuk.

³ Daud birye, ayupu nyabuk. “Se, anda mikip weik ulyamnye, anda yata ati maknya kintinip damince, yupu weik arye nyalilyam do?” Yata deiyok ati, diksukum ululnye biti, ‘Anye opnuyap,’ nyabuka warikinmalum do? Daud bira, Allah arye, ‘Aning ara, wininamlume, aning ara, pia kum wininamlume,’ nyapdeipsuk yupu, moubuka talilirye, pil moubuka dolule.

⁴ Bukni, ance, ‘Anye oplopnuyap’ tenen, yuk nang malye winin ninguk, yupu talinmalame. Ato yupu nyalulum talak ara, an sitang ara, pia ya parang atonunuk ulule. Tonda, anda pia malye winin ning ati, talye yupu nyapmince, ‘Anye opnuyabe,’ nyabuka, ninye ona ati, yupu talilyame.

⁵ Anda, malye weik winin ning ati, ‘Ara teleb uka,’ tenelyam bukni, teleb winin ning ati, ‘Na like,’ tenelyame. Aning atouk, anda, tilila yupu talye nyaltakna ati, ‘Aning ara, telebe’ tenen, kanye delilyam bukni, dipkoprob yupu nyan ning ara, ‘Na like,’ tenen, malye kanye bolyame.

⁶ Ninye arye, malye-malye yupu nyanyaka deice arye, yuk nang ati, ikin kilinyak bukni, ance, ‘Aning ara, teleb uka’ tenen, kanye delilyame. Se, dipkoprob ance nyalyam yupu nirya ara, talye-talye yupu uk nyalyame.

⁷ Bukni, nun ni Allah arye, anti, malye kipdeipkilirye, wenebuka opkilyeura, tamubuka kam bukmince, teleb kum unamlame. Tonda, yuk nang arye anti, ‘Elda telebnye ulamuk,’ kum nyanamkiake. Allah arye anti, mikip arye talipkilirye, an unamlamak arye bobinuka, bai tam deiplopnamkile! Diba, tukwak mutuku noutam bukni, kam tuba unyak nang kan-kan arye, tomobuka bobikilirye, deiplopnamkile. Ara Allah arye, an akunum opkilyeura, sik akunum diamik nang unyak sukumuk, an babye bobinuka, deiplopnamkile.

⁸ Allah arye anti, wenebuka opkilyeura, sik diksukum unyak nang arye eipkikirye, ‘Se’ tenen, mambul kanye bobuka, ilil pia weik unamle. Tonda, anda, malye winina deiyoknye biti, eipkikirye, akutubuka nalinamkiake.

⁹ Ara, anggun nirya arye, anye dilulume! Elce tenelule, ‘Kume, ‘Yatanye birye, melibuka lyepnamnil’ tenen, nara Allah dam binuka, kum unamne. “Allah daupmalye,” nyalamuk. Bukni, anye birye, ‘Kume, nara akunum pia bona talinanye ununa ati, aning-aning nirya, weik tonun talinun bona arye, melibuka lyepropnamnile,’ tenelamukce, nyalamuk.

¹⁰ Anye birye, malye weik winilamuk bukni, na ara, pia yuk unune. El aulula atonun, pia kum unune. Winipmanto ara, zaitun yo duk moulamle yo ara, tuba teleb uplirye, el yo bok ara, imbikuk ulamle touk, na ton unune. Ara, Allah el si eren aik pum tam ara, zaitun yo koubikiba, imbik pia teleb kibuka tiklamle atonun, unune. Ara, talye ati kume. Deiyok ara, narye, Allah ati, pia diba tenenune. Kume, Allah arye nunti, ‘Winibuka teleb kipdeipnamsine,’ nyabuka, nyalin yupu deice nyapdeipsuk ning ara, batakna kumce, Allah arye, bico tenepsilirye, pia teleb kilinamsile’ tenen, na kanye talima, Allah deiceuk delinune. El tibuk diba tenenune.

¹¹ Ati, na ni koproba Allah, anti, ‘Elda pia teleb,’ nyabuka, batakna kumce, pia an siuk erenamkine. Ara, talye ati kum bukni, ance aning-aning nirya, pia mambul pil dolyam ning ati, ‘Anda pia teleb uka,’ nyabuka, an si pia erenamkine! Tonda, Allah arye, ‘Anang ati, bico tenepnirye, pia melinamsine’ tenen, wipdeiamsuk nang, sik kekenak binuka, narye Allah an si pia erenamkine. Tonda, ance winilyam ning ara, laka nyabuka peterenamne. Ara, “An ap, ance winilyam ning nirya ara, pia teleb ulula ati, an siuk erenamkine,” nyapne.