Mazmur 51 - Eipomek

Daud birye, “Na ni Allah, na malye winipse ning ati ara, namin kipnimince, kum kibuka deipnamnilyame’ tenen, moropkine,” nyabuka morobuk yupu

¹ Raja Daud birye, mot nyana deiyoknye, Kor ati, mot nyabuk.

² Raja Daud birye, ninye el si ara Uria, domuk kil, el si Batsyeba ubula dobukba, Allah el yupu laka nyalamuknye, nabi Natan birye, Daud biti, “Ance Uria domuk kil dopluma deice arye, pia malye weik winiplume,” nyabuka wenebukba, Daud birye, ‘Na malye winipse’ tenen, amot deice nyabuk.

³ Daud birye nyabuk. Diba na ni Allah, na malye winipse ning ton ati, adiparyuk wenebuka oplopnutum bukni, anda pia batakna kum diparyuk, bico tenesiminye uminya ati ara, ance nati, bico tenenimince, na malye winipse ning ara, ‘Lyebuka kilipnamnilyame’ tenen, moropkine. Ance nun tukwak ninye nirya ati, pia weik arye, bico tenesiminya deice arye, ‘Na malye winipse ning ara, namin kipnimince, kum kibuka deipnamnilyame’ tenen, moropkine.

⁴ Winipmanto ning ara, ninye arye nininga uamlye baju, mek likikiba, pia teleb ulamle touk, na ni Allah, ance na malye winipse ning ton nirya ati, kilipnimince, kum kipdeipnamnilyame. Tonda, na kanye talima pum tam, malye tenepse ning ara, ance anirya kilipra wipdonoknimince, telebuk kipdeipnamnilame.

⁵ Na nyapmakin yupu ara, talye ati kum nyapne. Na malye winipse ning ara, narye akunum kel kipmana ati, laka arye, lak nyapkine. Tonda, na malye wininun ning ara, pia tuba tenenauk ununa anya arye, mambul kanye bonune.

⁶ Na ni Allah, na malye winipse ning nirya ara, an dam malye winipsirye, antibuk yanipkise. Ance, ‘Aning ara, winina meme,’ nyapdeiamsulum bukni, amalye teneminye ninguk, narye talye luba kibuka winipse. Ati ara, ance nati, “Pia malye winiplume,” nyabuka, wenepnimince, opnutuma babye, anda pia diksukumuk ulyame. Na dipkoprob malye winipsa ati, narye yata yupu tamubuka nyapkitinye do? Kume, ance, “Aning ara, malye ning, aning ara teleb ning,” nyabuka, yupu lipsisikuka bokolina deiyoknye ulyame. Anda pia diksukumnye uminya ati, wenebuka opnetuma babye, anda dipkoprob ulyame, nyapkine.

⁷ Dipkoprop, na nin mun pum tam bomnuk talak arye, na talima pum tam uamnuk malye ning ara, pia awamnuke. Aning tuba palyamnuk touk, na nin birye, na deipnuk talak arye dipdongobuka anoutamak nirya babye, malye ning tuba talibuka unune. Nara, kanye talima malinye ununa atia.

⁸ Bukni, na ni Allah, ance nati teneniminya ara, ‘Tuba malyeuk kilya babye, nong bol deiceuk, teleb winin ning tenena kume. Bukni, ‘Ninye kanye talima pum tam arye, pia diksukum winin ninguk tenebuka patapliba, pia telebuk unamle,’ tenenilyame. Utenemince, ‘Weik kel bikna deiyok ninguk wininamle,’ teneniminye touk, aninguk na kanye talima pum tam arepniminba, moubuka kel biknirye, telebuk unamne.

⁹ Tonda na malye wininun ning nirya ara, Allah ance hisop yo taruk, mitik ning dobuka, lyebuka kilipniminyeba, pia diksukumuk unamne. Winipniminyopura, na nong ara, pia malye unilye ning nirya ara, teleb kipdeipnamnilame. Winipmanto ara, pia kurun ning, el si kapas kurulamle touk, na malye wininun ning nirya kum kibuka deipniminyeba, na pia telebuk unamnile.

¹⁰ Winibuka, ance teleb kibuka deipniminyopura, ila tuba tonap, kanye deibuka unamne. Tonda, na malye winipsa ati, ance kel biknulumce, ‘Elda malye winibuknye,’ tenebuka wenepnulumce, pia weik ikin ning arepnuluma deice arye, imun kanye bobuka unun bukni, ‘Ance aikin ning dobuka lyepnulumce, kum kipdeipnulumba, ila tuba tonap teleb unamne’ tenen, moropkine.

¹¹ Na ni Allah ance, ‘Na malye wininun ning nirya ati, pia tenenauk kum unamnilame’ tenen, moropkine. Tonda, na malye winipse ning ara, ance aninguk, pia kum tenenamnilyame. ‘Na malye wininye ning nirya ara, ancuk kilipnimince, kilipnamnilyame’ tenen, moropkine.

¹² Winipniminyopura, na ni Allah ancuk, na kanye talima pum tam malye wamnilye ning kum kipdeipnimince, talima winiryuk ning punubuka arepnamnilyame. Tonda, ance mikip arepniminba, na kanye tenen ning ap, na nong noutamak ap nirya ara, mikip kipniminba, amikip deice arye, ila tuba tonap, diksukum winin ning kum bataknamne. Pia anuk talibuka unirye, teleb kanye uk bobuka unamne.

¹³ Se, na ni Allah, na malye wininun ning wenena ati, na ni Allah an dam arye, dobukapnimince, kum donoknamnilyame. Tonda, an Dib Kanye, na nong noutamak arepnulumba, unulul ning ara, ‘Allah ance an Dib Kanye ila tuba tamubuka, kum dopropnamnilam’ tenen, moropkine.

¹⁴ Minop talak Allah ance nati, lyepromnulumba, na kanye deibuka winilamse touk, ‘Wini talak babye, ila tuba tonap, talima melipnimince, teleb kibuka deipnutumba, kanye deibuka unamne’ tenen, moropkine. Ance na pin-pin ning arepniminba, dopropnyopda, na kanye talima lamapdongobuka arye unirye, ‘Na ni Allah atibuk, talibuka unamne’ tenen, anti kum bataknamkine. Wininunce, an nyalinimin touk, dukdongobuka unamne.

¹⁵ Wininamne talak ara, Allah ance, “Winibuka unamlame, ateleb bisik banamlame,” nyabuka, nyaliniminye yupu nirya ara, narye ayupu dobuka, sik malye wininyak ninye ati peterepniba, kekebikirye, sik malye wininyak ning nirya, batakikcopura, tuba tamubuka an tamuk kilonamkiake.

¹⁶ Diba na ni Allah, narye pia malye winipsa ati, na mal olan nang arye, na kwit Uria obikba dibuka ati, el ining ara, na deice unulule. Anye obika deiyoknye bira, nauk unune. Ati, ance nati lyelonamnilame. Lyepdopniminyopura, ance diksukum kibuka unyak ning atibuk, narye an si erena ati, “Na lyelonulul Allah ara, diksukumuk ulule,” nyabuka, mot nyana deice arye, an siuk erenamkine.

¹⁷ Diba na ni Allah, anda na Weik Deiyoknye unilyama ati ara, ance na sitang ap, na nyanye yupu ap, nirya talinimince, teleb kipdeipnulumba, na yupu teleb unilya deice arye, yupu teleb kibuka nyanirye, an siuk erepnirye, mot nyabuka, si erenamkine.

¹⁸ Ninye arye an si erena ati, asum-asum nirya, kam ning obuka, anti arekinyak ning ara, kum patakulule. ‘Kam ning obuka, na dam boyanganamlulume,’ nyapnutumba, aning obuka boyakitinye bukni, aning kum nyapnuluma ati, kam ning ap, yuk teleb ning ap, kum boyanganamkine. Aning atonun, nun malye ning kilina ati, kam ning obuka, uku dongolyanganyap ning ara, kum patakulule. Ati na babye, kam ning obuka, an si erena ati, uku kum dongolyanamkine. Aning ara, Allah an kum patakulula ati ara, aning dobuka, arepkitinya babye, ance, ‘Aning ara, telebe’ tenen, kanye deibuka kum dolonalame.

¹⁹ Na ni Allah, dipkoprob an patakilye ning ara, ‘Ninye mutuku-mutuku nirya, sik malye winibikirye, se, nun malye wininyabe,’ tenebikirye, ‘Kanye talima amu tam kipdakirye, ikin kanye bonyak touk bobuka, na dam boyanganamniake’ tenen, patakulule. Bukni, ninye talima eren deice arye, kwalinyakce, an dam yanganyak ning ara, an kum patakulule. Bukni, yata ninye do nirya arye, ‘Na kanye talima pum tam, lyunulul ning nirya lyepnamnil’ tenen, an dam yanuka, laka nyabicopura, ance, ‘Elda malye ululnye’ tenen, kum bataknamnilame. Kanye talima nimalye dakeiyam kibuka ululnye biti, kanye deipmince, anye biti lyepmince, teleb kibuka delinamlyame.

²⁰ Diba na ni Allah, ance, ‘Sion mutuku ati weik kanye deipne’ tenen, pia teleb kibuka delinamsilyame. Winipminba, Yerusalem mutuku, cang weik keil antapdongobuka, domik poka ara, yuk mutuku ninye arye, uluplopmik bukni, ‘Ance melimseminba, ila tuba tamubuka, lipsisikuka donamap’ tenen, moropkine.

²¹ Yerusalem mutuku cang weik keil poka lipsisikuka dobipyopura, Allah an si erena ati, kam ning obuka, boyanganamkiabe. Ara, diksukum una ati, kam ning obuka, uku dongolyanganamap ning ara, ‘Pia telebe’ tenen, ance kanye deibuka dolonalame. Anyarilyanganamkiap ning nirya ara, obukabibirye, nong nirya sekibirye, uku dana ap, ura, nong kipman nirya ap bobuka, arelyanganamkiabe. Tonda, sapi basam yim ning obukabibirye, Allah an si erena ati, min arye keil yangabuka deiamikce, kintinip deiamik sukum boyabirye, uku danamabe.