Mazmur 50 - Eipomek

‘Allah Yahweh arye, tukwak nang nirya ati, yupu bokuka, wenepnamsile,’ nyabuk yupu

¹ Ninye si Asaf birye, aMazmur mot yupu sekuk. Asaf birye sekuk yupu ara, ani. Aning-aning nirya deice tam erebuka, Pia Weik Mikipnye, Allah, el si Yahweh, elce tukwak mutuku sirya, im sirya nirya unyak nang ati, “Na damuk yalulume,” nyabuka, yukulule. Ara, keting panalyangan tam arye dipdongobuka, otam keting kumulban tam unyak nang nirya babye, ninye tukwak nang nirya ati, “Na dam yalulume,” nyabuka, yukulule.

² Tukwak mutuku noutam ara, weik asik domikak, urasin mitik teleb ulul bukni, urasin pia teleb ululak ara, Sion mutuku noutam arye, Allah el lek dirina ara, lakak aryuk yangalule.

³ Nun ni Allah ara, talye tunim abuka, kum ulirye, talye panabuka yangalule. Elce yalye talak nirya ara, weik uku buk dilule. Tonda, el yalye talak ara, weik mikip kum ap, mok cena ap, weik dua ap, yalyebuk, elda aminyan tam yangalule.

⁴ Allah arye im deice ap, tukwak mutuku nirya ap yukuplirye, “Narye, ‘Naʼ tenen wiamse nang nirya ara, ‘Teleb wininyak do, kum do?’ tenen, dipdenirye, wenen yupu ara, bokuka nyapdeipnamsin ati, ‘Na dam yalulume,’ nyabuka, yukulule.

⁵ Tonda, Allah arye nyalule. “Narye, ‘Aning ara, wininamlume, aning ara, pia kum wininamlume,’ nyapdeiamse yupu, moubuka talibikirye, diba tenebuka, diksukumuk unyak nang nirya ara, na dam yanamake.” Anang nirya arye, na arena ati, kam ning obuka, uku noutam dongalamik. Winilamik deiyok ara, ‘Allah ap, nun ap, teleb kibuka neika unamap’ tenen, “Elce nyasulul yupu uk, moubuka talipnamabe,” nyabuka, nyalin yupu deice arye, nyabik.

⁶ Im noutam ap, im deice ap, ulye ning nirya arye, Allah ati laka nyanyake. Ara, “Allah elcuk ninye tukwak nang nirya ati, ‘Teleb wininyak nang ara, ani. Malye wininyak nang ara, ani,’ nyabuka, yupu bokuka, delin deiyoknye bira, el tonoka,” nyabuka, laka nyanyake.

⁷ Tonda, Allah elcuk nyalule. “Sik Israel yala nang nirya ara, narye nyapnamsin yupu ara, moubuka kekepnululume. Narye, ‘Sik Israel yala nang ara, ‘Naʼ tenen nang unyak’ tenen, ayala nang nirya wipdeiamsise. Nara, anggun ni koproba Allah unune. Ati, anggunce na siuk erenululume. Ati ara, anggunce malye-malye weik winilulum ning ara, narye lakak aryuk laka nyapsinirye, anggunti wenepnamsine.

⁸ Ura, anggunce na arena ati, kam ning obuka, uku dongolamlum ning ap, na dam boyanuka delilulum ning ap, nirya ara, narye tuba elinune. Anya arenululum ning nirya ati, kum wenepnamsine.

⁹ Nara aning-aning nirya kwepdeipsisinye biti, aning nirya ara, naryuk akunum talipse. Aning nirya ara, na ninguk ulule. Ati ara, sik yala nang ap, sik tam nang ap arye, sapi basam do, kambing basam do, aning dobuka, yan arepdemunye babye, aning kum dopropnamne. Aning nirya ati, kanye pia kum delinamsine.

¹⁰ Aning kum dopropnamne deiyok ara, lakak aryuk, laka nyapnusine. Aning deiyok ara, ani. Yata ning do nirya, bai noutam kam ulye ning, yala-yala nirya ara, na ninguk akunum ulule. Aning atonun, ninye arye weinyak sapi basam nirya babye, na ninguk ulule. Mutuku kon yupa pia weik, kum nukmanto, amutuku deice sapi basam pia weik aupmatu babye, aning nirya ara, na ninguk ulule.

¹¹ Tonda, im deice lakuka balamle maka yala nirya ara, na ninguk ulula ati, amaka yala-yala nirya ara, na akunum bikamse. Aning atouk, bai tam ulye kam ning yala nirya ap, ninye arye weinyak ning nirya babye, aning yala nirya ara, na ninguk akunum ulule.

¹² Nara, din kum patanulul bukni, din patapnutua babye, anggun tukwak nang nirya ati, kum laka nyabuka moropsitinye. Deiyok ara, yata ning do, yala nirya ara, na ninguk akunum ulule. Ara, tukwak mutuku sirya, im sirya nirya ap, tukwak mutuku noutam ulye ning yala nirya ap, na ninguk akunum ulule. Aning-aning nirya ara, pia kum patanulule.

¹³ Anggunda moubuka tenepdelulume! Nara Allah ununa ati, narye sapi basam tup ap, kambing basam ining ap, pia kum dinune. Kume, aning-aning nirya ara, pia kum patanulule.

¹⁴ Aning ati ara, anggun nirya arye, na Allah arena ati, anggunce, “Se, nun ni Allah, anti pia telebe nyakinyabe!” nyabuka, na siuk erenamnululume. Kam ning opnarye, arenululum ning nirya ara, na patana kum ati, anggunce nati, ‘Telebe’ nyan ning ara, akunuma. Aninguk arenamnulume. Tonda, nara aning-aning nirya, deice tam erebuka, Pia Mikip Weik Deiyoknye unune. Anggunce nati, ‘Naio, an si erebuka nyana ati, winibuka-winibuka wininamabe,’ nyabuka, nyalin yupu deice arye, nyanululum ning nirya ara, dipkoprob winipnamlume. Anyapnulum yupu nirya ara, ‘Talye dauplye’ tenen, kum bataknamlume.

¹⁵ Tonda, na Allah arye nyapsine. “Ikin weik upsilye talak ara, anggunce nati, ‘Naio melibuka lyepropsilyame!’ nyabuka, moropnumunyeura, dipkoprob narye yanuka, lyepropnamsine. Akunum lyepsiminyeura, anggunce na si erebuka kina ati, “Nun ni Allah, pia teleb ulule,” nyabuka, yuk nang kekenak, lakak arye nyanamlume.

¹⁶ Bukni, Allah arye sik malye weik wininyak nang ati, nyalule. “Anggunda, pia malye winiluluma ati, yata deiyok ati, narye, ‘Aning ara, wininamlume, aning ara, pia kum wininamlume,’ nyapdeiamsise yupu, dobuka nyaptum do? Aning atonun, anggunce malye winin ninguk, talibuka winilulum nang arye, yata deiyok ati, narye, ‘Anggunce winibuka teleb winipmunyeba, narye pia teleb kilinamsine’ nyabuka, nyalin yupu deice arye, nyapdeiamsise yupu dobuka, anggun sitang deice nyaptum do? Kume, ayupu ara, anggunce kum nyapnulume!

¹⁷ Aning ara, talye ati kum nyapsine. Deiyok ara ani. Anggunce na nyasunun yupu nirya ati, ‘Ayupu ara, talye yupu ulula ati, dauplye’ tenen, yaniltamunce, ayupu dobuka, bataknauk winilulume. Tonda, anggun malye winipmunyeura, narye, ‘Aning ara, pia kum wininamlume,’ nyapsise ning ara, akunum winipmalum ati, wenepnamsine,” nyabuka, nyapnyopura, anggunce, ‘Aning ara, nun like,’ nyabuka bataklume.

¹⁸ Tonda, anggunce ubula don nang eipmunyeura, anggunce, ‘E, aning ara, nun kayapu koproba unyake,’ nyabuka, anggun ap neika ululume. Tonda, ton nang arye, sik akunum ninye domik kilapu batakikce nang ati, anggun malye ululum nang arye ‘E, malye, anang ara, nun ap, anang ap nun neika unamabe,’ nyalulume.

¹⁹ Tonda, anggunce, ‘Pia malye yupu nyanamabe,’ teneplum ning ara, adiparyuk talye lubakibuka, ayupu nyalulume. Diba, anggunce, ‘Nun sitang arye, malye yupu ap, talye yupu ap, nyanamaba ati, yuk nang arye, ‘Aning ara, meme,’ nyabuka, yupu kum seksitinge,’ tenepmunyopura, amalye yupu talye lubakibuka nyanauk ululume.

²⁰ Tonda, anggun du yapu nang koproba ap, anggun weit capu koproba ap ati, pia malye yupu nyabuka, sik deice nyalulume. Ara, anggun babye, anggun ni yapu arye deiamik mapu, anggun yala nang koproba ati, malye yupu nyalulumce, sik nong deice ara, ikin ning delilulume.

²¹ Anggunce amalye-malye winin ning ara, talye lubakibuka winilulum talak ara, narye sikti, wenen yupu tonap tabakuka kum nyapsise. Anggunce nati utenenululume. ‘Kume, Allah ara, nun winilamap atonun ning ap, nun tenenyap atonun ning tenelulnye ulula ati, kum wenepnamsile,’ tenenululume. Winibuka tenenululum bukni, wini talak ara, narye weik wenepnamsine. Tonda, anggunce malye weik winilulum ning ati, akunum lakak aryuk, laka nyapmasine.

²² Anggunce na Allah ati, ‘Elda bataknyabe. El ti kum tenenamabe’ tenen, pia lubakipnulum nang nirya ara, moubuka kekepnululume! Narye akunum nyapsise yupu ap, wini talak nyapsin yupu ap, moubuka kum kekepmunce, aninguk talibuka kum wininamlum nang nirya ara, wenebuka opsinirye, sice buklopnamsine! Winipyeura, yuknye tonok babye, anggun melina ati, yanuka kum lyepsitinge.

²³ Na Allah arye nyapsine. Yata nang do nirya, na Allah ati, “Naio, anda pia telebuk ulyame,” nyabuka, na si erebuka, kininyak nang ara, narye sikti, kanye deipnamne. Winipmanto ara, min arye na si erebuka, kina ati, kam ning obuka, uku dongobuka arelamnik touk, wini talak ara, narye nyapsine. Anggunce nati, “Telebe,” nyapnumunyeura, akunuma. Tonda, yata nang do nirya, teleb diksukum winina ati, narye, “Teleb winin ning ara, ani. Ati aninguk talibuka wininamlume,” nyabuka, akunum laka nyapsise ning, dipkoprob winibikce nang ara, na Allah arye, anggunti dipkoprob lyepropnamsine.