Mazmur 49 - Eipomek

‘Bona talinyap ning arye, nun melibuka lyepsutue. Aning aupmalyeura, ikin ning nun dam kum yasutu’ tenen, sik kanye, aning deice deibice nang ara, bicoe. Sikda, urdemuk unamake,” nyabuk yupu

¹ Sik Korah yala nang arye, deiamiknye birye, aMazmur mot yupu sekuk. Ara, Allah yupu mot nyana deiyoknye arena ati, sekuk.

² Anggun tukwak mutuku, im sirya, mutuku sirya nirya ululum ninye, yuk-yuk nang nirya ara, anyapnusin yupu moubuka kekepnamlume! Diba, tukwak mutuku nang nirya ara, moubuka kekeplulume!

³ Ara, ninye deiyok nang babye, talye amu tamuk unyak nang babye, kekepnululume! Tonda, anggun bona talin nang, ululum nang babye, anggun talye bona uto-toa talina kum nang babye, moubuka kekepnululume!

⁴ Narye nyapnusin yupu ara, kel weik bikina deice arye nyapnusine. Ara, na kanye pum noutam arye, moubuka tenipse ning ara, nyapsiniba, kekepmunyopura, anggun babye, kel weik nang unamlume.

⁵ Nara, kel weik nang arye nyanyak yupu ara, moubuka kekenune. Ayupu ara, ikin kanye boptibirye, nong noutamak ara, kum kekeptibye bukni, kitar atonun ning, el si ara kecapi, lelim deice arye mot nyapsinirye, laka nyapsinyopura, kel weik yupu, nong moubuka biknamlume.

⁶ Yu nang arye, nati, ‘Anye bira nun lik,’ teneninyak nang arye, malye upnikirye, na nong deice ikin deipnikce talak ara, yata deiyok ati, sikti, ilil upnamnil do? Kume, ilil kum upnamnile.

⁷ Bona ap, yo bok ap, weik tonun talinyak nang arye, sik kanye talima ara, abona deice delinyake. Tonda, sik bona talin nang unyaka ati, ‘Nunda pia telebe,’ tenelakirye, maknya kintininyake. Bukni, aning atonun wininyak nang ara, na ilil kum unamnile.

⁸ Dipkoprob nyapsine, yata nang do nirya, sikce anggun kan-kan, tonoknye biti, el kam una deiyok ning ara, yo bok deice arye dobuka, kum dektinge. Bona babye, yo bok babye, bona talin ning babye, ninye arye aning nirya dobuka, Allah ati areptinga babye, sik kam una deiyok ning ara, yo bok arye kum dektinge. Aning ara, kum winipmanto.

⁹ Aning-aning nirya areptinga babye, ninye kam una deiyok ning ara, kum winipmanto ninge. Ninye, sik kam una deiyok ning ara, kum winipmanto ning ulule.

¹⁰ Sikce, ‘Nunda kam pia unamabe’ tenen, bona pia weik tonun areptinga babye, sik kam una deiyok ning ara, kum dektinge. Aminyan talak ara, dipkoprob dipnamakca! Sikce, ‘Kume, nunda kum dipnamaba ati, aminyan talak, yuk nang arye dibipyeura, yuk nang arye, tuku kum dongopnamsiake,’ tenebikirye, talye yupu nyanyak bukni, ara kum winipmanto ning tenenyake.

¹¹ Anggun nirya moubuka tenipdelulume, yata nang do nirya, kel weik bikamik nang nirya babye, dibinyake. Sik walwal nang babye, aning-aning nirya ati, moubuka kum tenenyak nang babye, dibikiba, kum danalule. Ninye tukwak nang nirya ara, akunum dibikcopura, sik talilamice bona nirya ara, yuk nang arye dolonyake.

¹² Tukwak nang nirya ara, akunum dibikiba, tuku dongobikcopura, asukumuk pia daunamake. Dibikce talak arye dipdongobuka, aminyan doupnamle talak nirya ara, sik tuku dongamikca ara, asukumuk pia daunamake. Yata nang do nirya, bona weik talin nang do, minop talak ara, yo bok arye tuku weik tonun dekuka talilamikce, amutuku deice, sik si sekuka, deiamik nang babye, aminyan talak dipnamakca!

¹³ Ura, tukwak mutuku noutam unyak nang nirya ara, bona weik talibikirye, maknya kintinibuka, pia teleb kibuka winilamak nang babye, kam pia kum unamake. Sik babye dipnamake. Winipmanto ara, bai tam talye kam ulye ning, yuk-yuk ning nirya dibilamak touk, sik bona talin nang babye, aminyan talak atonun, dipnamake.

¹⁴ Atonun, ton nang arye, ‘Nunda pia teleb nang unyabe,’ tenipdakirye, walwal arye malye un ning talye lubukabikirye, wininyak nang babye, dibinauk unamake. Atonun, ton nang ara, ‘Nun babye nun teninyap ning nirya ara, pia kel weik bikina deice arya teninyabe. Nunda, pia telebe,’ tenelakirye, kanye deibuka kwalinyakce, nyanyak bukni, bai tam talye kam ulye ning, nirya dibilamak touk, sik babye atonun, aminyan dipnamake.

¹⁵ Winipmanto ara, ‘Talye domba basam dipnulʼ tenen, dibinakuk deibuka obikiba, adiparyuk dibilamak touk, tukwak mutuku unyakce, maknya kintinibuka, unyak nang nirya babye, dipkoprob dipnamake. Dibina deiyok ning ara, sik dobuka bobinamake. Winipmanto ara, domba basam weina deiyoknye birye, menekuka baliba, el domba basam ara, el balye tam balamak touk, sik bona talin nang babye, maknya kintinibuka kwalinyak nang babye, akunum dibikcopura, tuku dongopnamake. Tuku dongobikiba, sik nong tuku utam dawamlya ani, aminyan talak ara, sik nong ap, sik tup ap nirya ara, adiparyuk kum danin banamle! Winiplirye talye, tuku uk danamle. Akunum diamik nang unyakak ara, el si Sheol mutuku noutamuk daunamake.

¹⁶ Bukni, na kele, na nong dipnamne bukni, na ni Allah arye, na Pia Teleb Lek Dip Kanye, kam kipman dopropnamnila ati, sik akunum diamik nang unyakak ara, na ton kum binuka unamne. Deiyok ara, Allah arye, na kanye tenena kam kipman dopropnilirye, el damuk deipniliba, asukumuk unamne.

¹⁷ Ati ara, ninye tonok, bona eibuka doproplirye, bona weik uplinye ton eipmunce, anye biti, ‘Se,’ tenen ilil kum unamsile atonun, sik bona talin nang arye, pia teleb aik dobikca, ati, eipmunce, ‘Se’ tenen, ilil kum unamlume.

¹⁸ Deiyok ara ani. Sik bona weik bonyak nang babye, akunum dibikcopura, sik talilamikce bona ap, yo bok ap ara, kum dobuka bobinamake. Kume, sik akunum dipnamak talak ara, tuku dongobikiba, dabinuka unamakak ara, sikce talilamikce, dengna weik ning yuk-yuk ning nirya ara, dobuka kum bobinamake. Aning nirya ara, kum danamle!

¹⁹ Atonun, sik bona weik nang ara, sik kam tuba unyak talak arye, ‘E, nunda pia teleb kibuka unyabe. Nunda pia teleb nang uka,’ tenelanyak bukni, sik babye talye dadipnamakca! Diba, tukwak mutuku noutam, tuba kam unyak talak ara, yuk nang arye, sikti, “Se, anggunda, kel weik bikimunce, teleb pil dobuka bona pia weik tonun talimunya deice arye, pia teleb ululume,” nyabuka, sik anang ati, eibuka si erebikirye, teleb yupu nyanamak bukni,

²⁰ Sik bona talin nang babye, akunum dibikcopura, akunuma. Ayapu nirya diplamikba, kum danin balamik touk, sik babye dibikiba, kum danamake. Anang nirya, akunum dibikcopura, tuku dongobikiba, kuna noutam pia ukiba, yuk nang arye anang ati, tuba pia kum eipnamake.

²¹ Moubuka teniplulume! Tukwak mutuku unyak nang nirya ara, bona talin nang weik ubikca babye, kam pia kum unamake. Bona talin nang babye, yuk talye unyak nang babye, dibinauk upnamake. Winipmanto ara, bai tam talye kam ulye ning, dadibilamak touk, tukwak mutuku unyak nang nirya babye, atonun dipnamake. Tonok babye, pia kam ton kum unamake.