Mazmur 48 - Eipomek

Allah el kanye delilul tukwak mutuku weik asik ara, Sion mutuku ati, nyabuk yupu

¹ Allah yupu mot nyana ati ara, sik Korah yala nang arye diamik mapu, sikcuk Allah yupu mot seklamik.

² Nun ni Allah Yahweh bira, aning-aning nirya talibuka, deice tam ulirye, Pia Mikip Weiknye ulul ati ara, nun nirya arye el tibuk, ‘Se, anda pia telebuk ulyame,’ nyabuka, el siuk pia erenamabe. Ara, Allah el kanye delilul weik asik noutam ara, Yerusalem mutuku noutam arye, el siuk erenamabe. Anyasik ara, Allah arye, ‘Na mutuku’ tenen, wipdeiamuk mutuku dup, wini talak babye, tuba abuke. Amutuku ara, pia teleb, Lekuk ulule.

³ Anyasik Yerusalem mutuku ara, mutuku kon deice dobuka deiamik ati, el urasin ara, pia teleb ulule. Tonda, anyasik ati, ninye mutuku-mutuku nirya noutam unyak nang arye, amutuku tenebikce talak ara, kanye deibuka unyake. Sion mutuku ara, Israel noutam ulul bukni, dabu tam (arah utara) ulule. Anyasik ara, nunti talisulule ninye deiyoknye, nun Raja Allah arye, amutuku talilule.

⁴ Yerusalem mutuku noutam ara, weik cang keil arye deibuka, aik ton dolamik. Tonda, Allah arye, ‘Anyasik nirya ap, amutuku weik cang keil aik ap ara, naryuk kalikinamne,’ minop talak arye, akunum dip tenebuka ati, aning nirya ara, peteresilyamba, bikinyabe.

⁵ Aning nirya ara, nunce akunum bikamupu. Ara, minop talak arye, yuk mutuku ninye deiyok nang arye, ‘Yerusalem mutuku obuka, kum kipdeibibirye, ulubuka bataknamap’ tenen, yangalamik. Raja-Raja nang nirya, neika bulubuka yangalamik.

⁶ Bukni, Yerusalem mutuku, weik asik dolamikak akunum eibikura, adiparyuk, sik nirya arye, ‘Se’ tenen, ngalukuka, ilil ubuk. Winibuka ilil weik unmokura, ‘Se, yata wiripnusil do?’ tenen, teniltonauk unmekce, amutuku batakuka, bai tam bikbik abuka bindobik.

⁷ Diba, sik anang nirya arye, ilil weik ubukba, sikce, ‘Se’ tenen, sik nong nirya, sirimuk talilamuk. Wininmikce, imun kanye bobika deice arye, kilapu arye mi deiya uk diplyeba, weik tonun engebuka, ngaluklamak touk unmekak, kekebukabikce, bikbik abuka bindobik.

⁸ Raja-Raja nang ap, sik yin talin nang arye, ‘Lyepdanamap’ tenen, bibik abuka, bindobik bukni, nun ni Allah, ance anang nirya ati, obuka sirya daklume. Winipmanto ning ara, ani. Ara, keting panalyangalamle tam arye, mikip weik kum yalirye, Tarsis mutuku, weik mek deice balamle ning, el si laut mekwen deice, mikip arye peiyang aplyeba, kapal nirya dakuka, sice bultakalamle touk, winiplume. Ara, sik yuk-yuk mutuku Raja nang ap, sik yin nang ap, obuka sirya dakupe.

⁹ Ati, minop talak yuk nang arye nunti, yupu deice arye, laka nyapdeiamsiba, kekelamupu touk, wini talak ara, nun asing arye, akunum eibuka bikabe. Ara, nun ni koproba Allah Yahweh, elce kanye delilul weik asik, Yerusalem mutuku noutam arye eibuka bikupu. Yahweh ara, im deice unyak yin talin malaikat nirya ara, sik deiyoknye ulula ati, aning-aning nirya talilirye, elda mikip weiknye ulule. Elda, nun Israel yala nang arye, si erenyap Allah atia. Allah arye, anyasik Yerusalem ara, ‘Pia aunamle’ tenen, amutuku akunum mikip kipdeibuka ati, pia aunamle.

¹⁰ Na ni Allaho, an si eren aik pum tam unmapu talak ara, anti pia moubuka teninmapu. Ara, an nyalin yupu deice arye, ‘Narye anggunti, pia teleb kilinamsine,’ nyapsulum ning ara, aning nirya, pia wininamsilama ati, teleb kilinamsilam ning ara, pia moubuka tenenyabe.

¹¹ Nun ni Allaho, ninye tukwak nang mutuku nirya ara, an si akunum bikamik touk, anti akunum bikamkik nang nirya arye, an siuk erenyakce, ‘Anda pia telebe,’ nyabuka, anti si erebuka kikinyake. Tonda, an sirik tam mikip weik taruk arye, aning-aning talibuka, pia diksukum kibuka ulyame. Ance talibuka ulyam ning nirya ara, malye una pia kum aryuk, pia teleb kibuka, pil dolyame.

¹² Ati ara, Sion mutuku unyak nang nirya ara, kanye deibuka unamake. Tonda, Yehuda noutam unyak nang nirya ara, kanye deibuka, ‘Telebe,’ nyanamake. Ara, talye ati kum bukni, deiyok ara ani. Sikce, an pia teleb kibuka ulyam ning nirya ati, moubuka tenepdekirye, ‘Se, Allah ara, elce, ‘Aning ara, wininamlume, aning ara, pia kum wininamlume,’ nyapdeiamsuk yupu atonun, ubuka ulule,’ tenebikirye, anti kanye delinamake.

¹³ Aning ati ara, anggun Israel yala nang nirya arye, Sion mutuku dana-dana nirya, eibuka binamlume! Yerusalem mutuku noutam domik cang keil aik nirya ara, ‘Yata wiribuka ulul do?’ tenen, nuknamlume.

¹⁴ Tonda, anyasik noutam donyaka dana-dana tam, antanap dongobuka, domik cang keil poka ara, dipdelulume. Tonda, sik Yerusalem mutuku nang arye, ‘Nun mal olan nang arye, yanuka opsikcak’ tenen, domik keil aik nirya ara, moubuka eipmunce, dilbinamlulume. Aning nirya winipnamluma deiyok ara, ani. Ara, anggun asukum ululum nang arye, aminyan talak unamak mapu, anggunce deiplumba, deipdanin banamak mapu ati, aning nirya, laka nyanamlume.

¹⁵ Anggunce nyanamlume. “Nun ni Allah arye, ‘Yu nang arye, ‘Naʼ tenen, nang olyacak’ tenen, nun ap, anyasik ati, pia kalikuka melisulule. Allah ara, el siuk, pia ati erenamabe. Tonda, elcuk nunti, pia kalekuka melinamsile. Tonda, elce nunti, “Teleb winin ning ara, ani. Abisikuk binamlume. Tonda, aning nirya wininamlume,” nyabuka, melipsilirye peterenamsile.”