Mazmur 47 - Eipomek

“Allah ara ninye ap, aning-aning nirya ap, deiyoknye ulule,” nyabuk yupu

¹ Korah yala ninye arye, mot deice arye nyabik.

² Tukwak mutuku-mutuku nirya ululum ninye nirya ara, kanye deibuka, taruk bokmunce, Allah atibuk si erenamlulume.

³ Allah el si Yahweh ara, aning-aning nirya talibuka, deice tam ulirye, Weik Erenanye ulule. Allah arye, mutuku-mutuku nirya unyak ninye talibuka, ninye deiyoknye, Raja ulule. Allah ara, pia weik mambulnye ulule.

⁴ Allah arye nun Israel ninye ati, wipdeipsukce, weika arye meliamsuka deice arye, yuk yala ninye nirya ara, malye kibububa, nun amu tamuk unyake. Ara, nun ni Allah meliamsuka deice arye, yuk yala ninye nirya, nun amu tam deipsuke.

⁵ Allah arye, ‘Israel ninye, ‘Naʼ tenen, ninye unamak’ tenen, el mapu kipsukce, nun unamap mutuku babye, kintinip deipsuke. Nun apu koproba Yakub birye, deibukba, dadeipdanin yangalamik ninye nirya ara, Allah arye kintinip deipsuk mutuku, tuba talibuka unyabe. Amutuku noutamak ara, kanye deibuka unyabe. Akunuma tenena ati, Sela nyapne.

⁶ Nun ni Allah arye, pia weik mambul mutuku welebuk talak ara, nun ninye nirya arye, kanye deibuka, weik yupu deice arye, el si erebuka dinmapu. Nun ni koproba Allah, el si Yahweh ara, weik mambul mutuku welebuk talak ara, cang bilkong, el si terompet, dobuka pong-pong abuburye, el si erebuka dinmapu.

⁷ Ati ara, nun ni koproba Allah atibuk, kanye deibibirye, kanye lon mot nyanamabe. Ara, Allah ara nun ninye deiyoknye, Raja usilirye, talesulula ati, el tibuk, “Nai anda weik teleb ulyame,” nyabuka, el si erebibirye, kanye lon mot nyanamabe.

⁸ Ara, talye ati kume. Allah ara, mutuku-mutuku nirya unyak ninye, ayala-ayala nirya ara, sik pia ninye deiyoknye Raja ara, Allah el tonok ulule. Allah arye, mutuku-mutuku nirya unyap ninye talesulula ati ara, el tibuk, “Nai anda weik teleb ulyame,” nyabuka, kanye deibibirye, kanye lon mot nyanamabe. Pia el tibuk, kanye deibibirye, el si erenamabe.

⁹ Allah ara, im deice ulirye, ninye deiyoknye mambul bun ning, el si tahkta deice buklirye, ninye ayala-ayala nirya ati talilule. Pia telebak buklirye, mutuku-mutuku nirya unyak ninye nirya ara, talibuka usulule.

¹⁰ Ninye tukwak mutuku talibuka unyak deiyok nang nirya ara, tonok kanye bobuka, dukdongobikirye, bulubuka yanganyake. Nunda Allah arye wipdeipsukce, el mapu kipdeipsuk ninye ap, yuk ninye ayala-ayala nirya ap, neika unamabe. Nun apu koproba Abraham ati, pia kalikuka meliamuknye Allah atibuk, yuk yala ninye nirya ap, nun ap, neika kanye deibibirye, el siuk erenamabe. Ara, urdem ati kume. Dan mutuku do nirya, mutuku-mutuku unyak, pia weik deiyok nang nirya ara, nun ni koproba Allah, el dem arye, adeiyok nang nirya talilule. Weik Eren Deiyoknye, Rajanye bira, Allah el tonoka ati, yuk deiyok nang nirya ara, el amu tamuk unyake. Nun apu yapu nang si erepra yangalamik Allah ara, ninye deiyok nang mutuku-mutuku nirya ap, nun ap arye, el siuk erenyabe. Allah ara, weik eren deiyoknye ulula ati, yuk ning nirya ara, el amu tamuk ulule. Daud birye nyabuk.