Mazmur 46 - Eipomek

“Allah arye ninye ati, bicoe tenesilirye, melisulule,” nyabuk yupu

¹ Mot nyana ati deiyoknye bira, Daud deiyok kipnaba, sik Korah mutuku deipkirikdop nang nirya ara, Allah ati mot nyabuka, si erelamik.

² Nun ikin usilye talak nirya ara, nun ni Allah ance melisimince, mikip arisilyame. Allah ance lelilongosilyame. Allah anda ninye kanye imun upsilye ning babye melisilyamnye.

³ Ati ara, mutuku lulukna luluklirye, pia weik mutuku dup bukuka, nirya tobukaplirye, weik laut mekwen deice teiklye talak babye, nunda imun kanye bobuka, ilil kum upnamsile.

⁴ Tonda, weik laut mekwen, lelim weik taplirye, mutuku dibuka sikniplya babye, ilil kum upnamsile. Tonda, weik mutuku lulukna doplirye, mutuku dup nirya long-long aplya babye, ilil kum upnamsile. Akunuma nyana ati, Sela nyapne.

⁵ Bukni, Allah arye kintinip deibuk mutuku, el unak ara, pia teleb mek, amutuku noutamak pu dobuka biyuke. Winibukce, mek taruk bokukce, dana-dana biyuk mek nirya ara, amutuku unamak ninye eibikirye, kanye delinamake. Amutuku ara, malye ning ton kum ulirye, pia teleb mutuku ati ara, aning-aning deice tam, erepra ulula deiyoknye, Allah ara, amutuku ulule.

⁶ Allah mikip weiknye bira, amutuku noutamak pia aunamla ati, amutuku ara, pia kume kum danamle. Apia upnamle. Ara, beren tam talak babye, Allah arye, amutuku tuba melinamle.

⁷ Tukwak mutuku-mutuku nirya unyak ninye arye, mal olanmakirye, weik lelim nyapliba, ngaluklamak touk, winibuka ngalukunyake. Ton tam ninye arye, yuk tam ninye ati, obuka sirya dakikiba, kum danalule. Allah arye tenepsilye sum, akunum kiplyopura, el yupu weik arye nyapliba, tukwak mutuku nirya, atu atonun ubuka kum danamle.

⁸ Bukni, nun ni Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. Allah ara, Weik Erebuka Eitamnye ulirye, nun ap neika unyabe. Ara, Yakub birye deibukba, dadeipdanin, yangalamik ninye, pia kalikuka meliamuk touk, tuba melisulule. Ikin ning, nun dam yangasulul talak ara, Allah ance tuba lelilongosilyame. Akunuma nyana ati, Sela nyapne.

⁹ Ati ara, tukwak ninye nirya arye, Allah el si Yahweh mikip arye pil domuk ning ara, dilyalulume. Allah arye tenelye talak, akunum kiplyopura, tukwak mutuku nirya, kum daneipnamle.

¹⁰ Ninye yu deice arye, mal olalamaka ara, Allah arye, ‘Akunuma,’ teneplye talak ara, yupu sekelule. Tonda ninye sik olan yin ap, mal ap nirya lakuka, batakalule. Tonda ninye ona ati, ketelinyak yo tace nirya, kau kibuka celtakalule. Tonda, ‘Mal dobikiba, na nong deice yanuka biknilyak’ tenen, lelilongon ting aning babye, dobuka uku dongolule. Allah ara, Pia Mikip Weiknye ulula atia.

¹¹ Allah Yahweh arye, ninye tukwak ninye nirya ati nyasulule. Anggunce, ngalukuka malye yupu nyamunye ning nirya ara, tunim aplulume. Nara, Allah Yahweh ununa ati, na siuk kel kipnululume. Yata ninye do, mutuku-mutuku nirya, daunyak ninye nirya arye, na siuk kel biknumunce, na siuk erenamnulume. Tonda, mutuku-mutuku nirya ululum ninye arye, na siuk erebuka, si erenamnululume.

¹² Nun ni Allah Yahweh ara, aning-aning nirya talilirye, im deice yin talin malaikat nirya, sik weik deiyoknye ulule. Allah ara, Weik Erebuka Eitamnye ulirye, nun ap neika unyabe. Ara, Yakub birye deibukba, dadeipdanin, yangalamik ninye, pia kalikuka meliamuk touk, tuba melisulule. Ikin ning, nun dam yangasulul talak ara, Allah ance tuba lelilongosilyame. Akunuma nyana ati, Sela nyapne. Daud birye nyabuk.