Mazmur 45 - Eipomek

Ninye deiyoknye, el kil dona ati, tonoknye birye, aMazmur mot yupu sekuk

¹ Mot nyana deiyoknye arepnamuka ati, sekuk. “Amot ara, yuk mot ton, el si Bunga Bakung mot lelim nyalamle touk nyanamlume,” nyabuka sekuk. Amot ara, sik Korah yala nang arye, deibiknye birye sekuk. Ara peterena ap, bico tenelana ap ati, sekuk.

² Na talima noutam ara, pia teleb yupu nyan ning upmanila ati, amot seknune. Amot ara, nun mutuku noutam ara, ninye deiyoknye, nun Raja si erebuka kina ati, amot sekuka arepnamne. Na si bambol deice arye, nyapnun yupu ara, kel weik yupu seknanye birye seklamle touk, nyapnune.

³ Na si bambol deice arye, nyapnun yupu ara, kel weik yupu sekenanye birye seklamle touk, nyapnune. Ance kekena teleb yupu nyasilyam ning ara, nyapsiminyeba, ninye kekebikirye, kanye deibuka unyabe. Teleb yupu nyasilyame. Ati ara, Allah arye anti, teleb kipdeipkiliba, pia telebuk unalame.

⁴ Anda pia mikip weiknye ulyama ati, ance winilyam ning ara, ninye nirya kekebikirye, ‘Se, elda pia mikip weiknye ulule,’ tenekinyake. Ati, an ninye on parang dobuka, an keil deice lipdongobuka lapkwetepmince, kintinipnalame! Ara, anda urasin pia teleb una ap, mikip una ap, mambul nin winina ap ulyama ati, ninye nirya arye anti, ‘Se, elda pia telebe,’ nyabuka, si erebuka kinyake.

⁵ Ati, an pia teleb ulalam touk, an mal olan nang dam, olbinalyame! Aning nirya ara, dipkoprob obuka sirya daknalame! Tonda, nun ni Allah arye, ‘Aning wininamlume,’ nyasilye touk winibuka, diksukum winin nang ap, maknya kintinina kumce, talima namin arye un nang ap, ninye dipkoprob winilamak touk, teleb ubuka yupu lipsisikuka bokolinyak nang ap ara, ‘Aning nirya kum winipsilyak’ tenen, malye nang dam olbinamlume! Tonda, an sirik tam, mikip weik taruk arye, mambul weik pil dopminyopura, ninye nirya eibikirye, ‘Se, elce winilul ning nirya ara, pia mambule,’ nyanamakʼ tenen, an mikip deice arye, mambul pil donalame!

⁶ Na ni Rajao, ance dopnalam mal ara, pia yu ulula ati, nun mal olan nang ati, sik talima pum tam oplyopura, adiparyuk dipnamake. Ance, yuk mutuku nang yala nirya, sik dam binuka opminyopura, sikda adiparyuk, tuku deice sakuka, an yan dam dipnamake.

⁷ Se an ni Allah, an weik tonun, aning-aning nirya talibuka, nun ninye deiyoknye ulyam ning ara, pia aunalame. Aning ara, pia kum, kum datue. Ance ninye deiyoknye kina ati, emas kama dopmince, nun ninye tukwak nang ati, yupu lipsisikuka bokeipsimince, ‘Wininamlume,’ nyabuka, yupu nyasilyam ning ara, pia telebuk ulule. Ninye yupu lipsisikuka bokolina ati, ance, ‘Na kwit’ tenen, tenebuka arye, kum nyasilyame. Pia dipkoprob yupu uk nyapsimince, yupu lipsisikuka bokolisilyame.

⁸ Tonda, Allah arye, ‘Aning ara, wininamlume, aning ara, pia kum wininamlume,’ nyapdeiamsuk yupu ara, ance kanye delilyame. Tonda, malye winin ning nirya ara, ance, ‘Na pia lik,’ tenebuka nyasilyame. Ati ara, na ni Rajao, ance pia dipkoprob uk winilyama ati, nun ni Allah arye, ‘Anye bira, Israel yala nang talipnamle’ tenebukce, anti akunum wipdeipkukba, nun ninye deiyoknye usilyame! Nun ni Allah arye, anti wipdeipkuk talak ara, ‘Amutuku pia talipnamle’ tenen, ‘Sah’ kina ati, minyak zaitun mek kwebuka, an kisok deice dikeipkike. Ura, yuk ninye deiyok nang ton, daulamik bukni, anda, sik deice tam erepdeikukba, sikda, an amu tam unyake.

⁹ Tonda, ‘Anye bira, ninye deiyoknye Raja ulule,’ tenen, bikilina ati, cang baju, el si juba, arepkik ning ara, el si juba deice, ‘Nintong teleb nyanamle’ tenen, nintong teleb minyak ap, minyak gaharu ap, nintong nyana teleb yo, el si kayu manis yo ap dobuka, ninye deiyok nang ongon baju, el si ara juba, an ongolamlum ning deice likdeipkike. Ninye deiyoknye un aik ara, dengna weik ning, el si gading arye, domik aik pum tam, teleb sukum ara, kitar deice arye, mot ton nyakiba, ance kanye delilyame.

¹⁰ Tonda, anda mambul weiknye ulyama ati, yuk-yuk mutuku ninye deiyok nang arye, ‘Israel ninye unyak mutuku talilul ninye deiyoknye biti, nun kilmapu dobuka arebipyeba, el patalul ning ati melinamak’ tenen, sikce, anti areamkikba, kilapu ara, an dam weik unyake. Diba, ance domlum kil ara, an taruk sirik tam tikilule. El baju deice ara, pia dengna weik ning, el si emas, pia teleb ning, Ofir mutuku arye dobuka boyanamik emas ara, taplak deiamikba, ongolule.

¹¹ Ninye deiyoknye Raja arye, akunum domuk kil ara, narye amot nyan deice arye nyapnukin yupu ara, moubuka kekepnalame! An deipkuknye, an ni koproba ap, an mutuku koproba unyak nang ap ati, luba kipnalame. ‘Se, sik dam tamuptinirye, binuka uptinye’ tenen, tuba tenena pia meme.

¹² Diba, an tam nang ap, an mutuku ap ati, tuba-tuba kum tenipminyopura, nun mutuku weik ninye deiyoknye, Raja arye anti, ‘Se, elda pia urasin teleb kil ulule,’ teneplirye, pia kanye deilinamkulule. Tonda, nun mutuku ninye deiyoknye, Raja birye, elce anti, ‘Winipnalame, aning ara, pia kum winipnalame, ‘nyabuka, talipkilirye, an yupu lipsisikuka bokolina deiyoknye ukulule. Ati ara, ance el si erebuka kina ati, kutam tuku dipdongobuka, kanupdongopmince, si erebuka kinalame!

¹³ Se, nun deiyoknye Rajao! Tirus mutuku ninye ara, pia bona talin nang unyak bukni, aminyan talak ara, sik talima noutam nirya arye anti, ‘Kanye deipsuturye, melinamsil’ tenen, pia teleb ning boyanuka, an dam arelyanganamake.

¹⁴ Nun deiyoknye Raja birye, dopnamle kil ara, an arena ati, dengna weik ning, yuk-yuk ning nirya talibuka yanamle! Tonda, ninye deiyoknye, Raja birye dopnamle kil ara, el man aik pum tam buklirye, ‘Kintinipnun’ tenen, el cang baju, el si juba deice ara, dengna weik ning, el si emas arye, baju wina ati, kintinibuka deiamuk tapu arye, el baju deice ara, akunum wibuka deiamik.

¹⁵ Tonda, el cang baju ongopmala ara, yata barye do, warna weik ongopmalirye, ninye deiyoknye Raja dam yanamle. Raja dopnamle kil, el menekuka yanganmaliba, elti, melinamak wel kilapu nirya ara, el donga tam ton aminyan yanamake.

¹⁶ Ninye deiyoknye, el amu tam deiyok nang arye, akilapu nirya dobuka boyakirye, akilapu ap, anang ap nirya arye, kanye deibuka unmake. Raja melin nang arye, akilapu nirya, dobikirye mek mibuka yakiba, sik akilapu nirya balye tamuk yanamake. Sik nirya ara, ninye deiyoknye Raja, el teleb weik aik pum tam wekelyanamake.

¹⁷ Na ni Rajao, an apu yapu arye, Israel nang nirya talilamikce, nun ninye deiyok nang ulamik touk, ance deipminba, dadeipdanin banamak nang arye, an punubikirye, amutuku talibuka, Raja nang unamsiake. Ance deipminba, dadeipdanin banamak mapu wibuka erepdeipminba, sikce amutuku nirya talibikirye, ninye deiyok nang unamake!

¹⁸ Tonda, aMazmur yupu sekuka arepmakina deice arye, ance dukdongobuka, aminyan dounamak nang babye, an si ati, weik tonun bikikirye, tuba-tuba tenenauk unamake. Ati ara, tukwak mutuku, im sirya, mutuku sirya nirya, unamak nang nirya ara, anti tenebikirye, ‘Se, elda pia teleb ulamuknye,’ tenen, si erenamkiake.