Mazmur 44 - Eipomek

Israel yala nang nirya ara, ikin weik ulamikba, Mazmur yupu sekuknye birye, ‘Allah arye, nun Israel yala nang nirya ati, melibuka lyepnamsile’ tenen, morobuk yupu

¹ Israel yala nang peterena ati, Korah yalanye tonoknye, aMazmur yupu mot sekuk. Sekuk ning ara, Allah yupu mot nyana deiyoknye biti arebuk. Anye birye nyabuk yupu ara, ani.

² Se, nun ni Allah bira, nun amul koproba deice arye, akunum kekelamupu. Ara, nun apu yapu arye, nyalamsikak, kekelamupu. Ayupu nyalamika deiyok ara, ani. Sikce, “Kume, minop talak ara, nun ni Allah arye, mambul pil weik arye dolamsukak, teleb ulamupu,” nyapsike.

³ Ara, nunti areamsulum mutuku noutam ara, an Allah ati, kum bikamik nang ulamikce, amutuku nirya talilamik bukni, yuk-yuk yala nang nirya ara, Allah an taruk koproba aryuk, anang yakuka dopkwetalamukba, sik nirya balolamik. Bukni, nun Israel yala nang nirya ara, nun apu yapu arye dobuka, amutuku noutam arye, mikip kipdomunce, asukum diamlume. ‘'Amutuku noutam ara, Allah ance, nun apu yapu teleb kibuka, asukum deiamlum bukni, sik yuk-yuk yala nang nirya ara, sik nong deice, weik imun ning delilamukba, sikda, ‘Se’ tenen, amutuku batakuka bindobik. Winilamlum bukni, nun Israel yala nang nirya ara, lobukapsulumce, lyepropsulume.

⁴ Aning ara, talye ati kum nyapne. Deiyok ara, Allah el mikip deice arye, amutuku-amutuku nirya obukabikce, alubuka doprobik. Winilamik bukni, sik taruk mikip aryuk, amutuku nirya, kum dopromik. Aning atonun, nun apu yapu, sik mikip ap, sik taruk ap arye, amutuku nirya ulamik nang ara, min obuka, sirya daklamikce, amutuku nirya kum alubuka dopropmik. Aning dem kum bukni, Allah an koproba taruk mikip deice arye, nun apu yapu meliamlum mutuku nirya, alubuka dolamik. Tonda, an babye, nun apu yapu dam ulamlumce, sikti, kanye delilaluluma deice arye, Israel nang meliamlum mutuku nirya dopromik. Winipmanto ara, an dirina weik, sik deice deiamlumce, sikti, pia teleb kililamlume. Ara talye ati kume. An Allah arye, nun apu yapu ati, kanye delilyama deice arye, sik meliamlumba, amutuku dopromik.

⁵ Se, na ni Allah, ancuk talinilyama ati, na ninye deiyoknye, Raja atonun ulyame. Allah, ancuk, “Yuk-yuk mutuku nang nirya ati, Israel nang sik dam binuka obikirye, sik mutuku nirya dobuka talipnamake,” nyabuka, nyalin yupu arye nyadeipsulum touk, unyabe. Aning nirya ara, ancuka!

⁶ Winipmanto ara, yim sapi basam arye, el kisok deice, taca belamle ning, el si ara tanduk arye, yuk yim sapi basam ati, oplyeba, tuku deice poulamle touk kibuka, deipsulume. Ara, an mikip deice arye, nun mal olan nang nirya obupuba, amutuku batakuka, yukak bindobik. Aning atonun, Allah an mikip si deice arye, nun mal olan nang ara, obibirye, yaniptapnamabe. Winibuka sikti, obuka, sirya dakdanamabe.

⁷ Aning nyapmana ara, talye ati kume. Deiyok ara, ani. Ara, ‘Na taruk ap, na yin ap ati, aning deice aryuk lyepropnamnile. Naryuk lyepdatinye,’ tenen, diba pia kum tenenune. Aning atonun, ‘Na ninye on parang ya arye, yu nang opnirye, lyepdanamne,’ pia kum tenenune.

⁸ Aning nirya kum bukni, na kele, “Allah ancuk, nun mal olan nang ara, akunum obuka, malye kilyama ati, akunum lyepropsulume. Diba, nunti, ‘Anang ara, nun pia lik,’ tenesinyak nang ati ara, an Allah aryuk, kanye walwalamak ning arepminyeura, anang sik kanye sirika bona kumce, ilil uplyeba, nun dam ara batakuka, dana-dana tamuk, bikbik abuka banyake.

⁹ Diba, yuk mikip ululnye biti, pia kum bukni, Allah an tonok, “Nun ni Allah elcuk lyelosulule,” nyabuka, an siuk pia erekinyabe. Ati na ni Allaho, nun Israel yala nang arye, an ap, an si ap ati, “Anda pia telebe,” nyabuka, an siuk pia erenamkiabe.

¹⁰ Bukni, nun ni Allah, wini talak ara, akunum bataksulumce, bikisilyame ning ara, dan do? Allah ance bikuka, batakamsuluma ati, wini talak ara, nun Israel nang yin talin nang arye, ‘Yuk malye nang olbinamap,’ tenebikirye, olbanyak talak ara, an ap neika kum balulume.

¹¹ Akunum dipdebuka, batakasiminya deice arye, nun mal olan nang arye, olyangasice talak ara, ilil weik upsilyeba, nunda amutuku batakuka, bai sakuka, bibik abuka banyabe. Ilil upsilya ati, balonauk ubibyeura, nun mal olan nang arye, nunce talilamupu ning nirya ara, talye parapkabuka, ubula dolonyake.

¹² Se, nun ni Allah, ance malye kilisilyama ati, sik yuk pera mutuku nang arye, talye parapkabuka osinyake. Winipmanto ara, domba basam weina deiyok nang arye, ‘Adomba basam obuka dipnuyap’ tenen, sik domba basam wibuka, domba basam ona deiyok nang dam bobalamak touk, ance akunum winibuka tenesimince, bataksiminyeba, yu nang yakirye, talye parapkabuka osinyake. Tonda, ance nun wenena ati, akunum duknubuka dopdeipsulumba, sik yuk-yuk mutuku unyak nang arye, nunti tomopsikirye, sik mutuku bobinuka deipsikiba, sik mutuku noutam, binuka unyabe.

¹³ Nun ni Allaho, winipmanto ning ara, ninye arye dekna weik bona aupmalye bukni, ‘Aning ara, nun lik,’ tenebikirye, yuk nang ati, “Dekna ning mitik tonun arepnulumce, aning talye parapkabuka dopdoptume,” nyabuka, abona batakikirye, deklamaka atonun, akunum winipsulume. Sik yuk mutuku nang arye, dekna weik ning kum areamkik bukni, ance nunti, adiparyuk batakamlumba, sikce opsikce, talye bobinamsike.

¹⁴ Sikce winipsika ati, nun dana-dana tam unyak nang nirya eipsikirye, nalibuka akutubuka, malye yupu weik nyasinyake. Diba, nun dana-dana tam unyak nang arye, ‘Israel yala nang ara, dauplye,’ nyabuka, nunti, akutubuka nalisinyake.

¹⁵ Tonda nun ni Allah, ance bataksulumba, yuk mutuku yu nang oplopsika ati, sik yuk-yuk pera mutuku nang, anti kum bikamik nang babye, “Se, sik Israel nang ara, weik imun kanye bon ning dopropmik touk, ‘Nun babye atonun upsilyak’ tenen, ilil usulule,” nyanyake. Ara, anda Allah ati, kum bikamikce, an si kum erenyak nang babye, nun Israel yala nang ati tenepsikirye, ‘Se, Allah arye anang ati, weik arye wenepnusil’ tenen, ilil usulule.

¹⁶ Ati ara, asum-asum nirya ara, beren tam talak arye dipdongobuka, keting noutam nirya ara, alye weik dakalanyake. Ara, yuk yala nang arye, nunti, malye-malyeuk nyasinyakba, kekenune. Sikce, malye nyasika ati, nara alye weik dakalanune. Winirye na urasin ara, sik dam ati duknulongonune

¹⁷ Ara, talye ati kum bukni, sik malye yupu nyanyak nang ap, sik malye-malye nyasiknyak nang ap arye, malye weik nyabikcopura, kekepnirye, alye dakalanune. Tonda, nun mal olan nang arye, nun dam mal olyangasikce talak do? Tonda, ‘Israel nang arye, malye kipdeipsika ati, kwang daknuyap,’ tenenyak nang arye, nun dam yace talak do? Nara alye weik dakdanirye, ikin kanye uk bobuka unune.

¹⁸ Bukni, nun ni Allah, ance ikin ning nirya ara, nun deice akunum yanamsukba, imun kanye bobuka unyabe. Bukni, nunce nun ni Allah anti, kum lubakinyabe. Anti tuba kintinikinyabe. Tonda, an Allah arye nunti, “Aning ara, wininamlume, aning ara, pia kum wininamlume. Tonda, winibuka teleb upmunyeura, narye teleb kilinamsina,” nyabuka, nyalin yupu deice nyapdeiamsulum yupu nirya ara, nun Israel nang ara, aning nirya kum lubakinyabe.

¹⁹ Tonda, nun kanye talima noutam ara, anti tenebibirye, nun amyok kanudongobuka, yuk tam kum banyabe. An tonok ati, diba tuba tenekinyabe. Tonda, an Allah arye, “Aning wininamlume, aning ara, pia kum wininamlume. Teleb diksukum winina ara ani, malye winin ning ara, ani,” nyapdeiamsulum yupu ara, nunce kum batakanyabe. An bisik ara batakuka, yuk talye bisik parapkabuka, kum banyabe.

²⁰ Nunce, anda Allah ati, kum batakupu bukni, ance lo areamsulumba, nun mal olan nang arye, akunum yanuka olyangasikceba, imun kanye bobuka unyabe. Nun mal olan nang ara, bai kam yu ulamle atonun unyake. Ance lo areplumba, nun mal olan nang arye, nun yala nang weika arye olamsike. Ati, winipmanto ara, ance weik unyak ning dobuka, nun deice akunum deipsulamak, nunda pia kum winipmanto unyabe.

²¹ Bukni, nun kanye tenenmaba ara, ani. Nun si erenyap Allah, elti, akunum batakuburye, el si luba kiptibyeura, Allah arye aning biktu do? Kum do? Tonda, nunce Allah batakuka, yuk talye ning ati, isa si erelamtibye toura, Allah arye, aning biktu do? Kum do?

²² Kume, Allah ara, dipkoprob aning-aning nirya dilirye, bikilule. Tukwak nang, sik kanye noutam tenen ning do, sik talima noutam do, tenen ning arye, pia moubuka duknunyak ning babye, el akunum bikilula ati, nunce malye upmatibye ning nirya babye, dipkoprob bikilule.

²³ Kume na nio, nun Israel nang arye, antibuk tuba diba tenekinyaba ati, sik yuk-yuk mutuku nang arye, nunti, ‘Anang olbinamabe’ tenen, tuba tenesikirye, nun dam mal olyangasikirye, nun tam nang, weik tonun osinyake. Se, nun ni Allah, ance akunum bataksuluma ati, sik yuk karin mutuku nang arye, talye parapkabuka yanuka osinyake. Winipmanto ara, domba basam weina deiyok nang arye, ‘Adomba basam obuka dipnuyap’ tenen, sik domba basam ara, opmanto ning ati wibuka, domba ona deiyok nang dam bobalamak touk, ance akunum winibuka tenesimince, bataksiminyeba, yu nang arye, talye parapkabuka osinyake.

²⁴ Aning ati ara, ‘Nun ni Allah, an bikmince, minopce nun dam yana melibuka lyepropnamsilam’ tenen, moropkiyabe. Na nio, anda nunti, ‘Pia kum batakanamsilam’ tenen, moropkiyabe. “Ati na nio, minopce nun dam yana melibuka lyepropsilyame!” moropkiyape.

²⁵ Tonda, yata deiyok ati, ance, ‘Anang kum melipnamne’ tenen, biksiminyak arye, nun ikin usilya ning nirya ara, tonap kum elisilyam do? Yuk mutuku nang arye, bopsikirye, ikin pil disinyak ning ap, ikin ning arepsikceba, imun kanye bobuka, unyap ning ap, yata deiyok ati, aning bikuka kum tenesilyam do?

²⁶ Aning nyapmana ara, talye ati kum bukni, deiyok ara, ani. Ara, nun Israel nang nirya ara, ikin weik usulula ati, mitang upsuka ati, tuku deice sakuburye, kum bukmanto unmabe. Nunda pia kum bukmanto, akunum unmaba ati, tuku butbuta deiceuk, mabuka tuba asukumuk unmaba ati, pia kum bukmanto unmabe.

²⁷ Aning ati ara, ‘Nun ni Allah, anda minopce bukminyakarye, nun dam yanuka, melibuka lyepnamsilam’ tenen, moropkiyabe. Nun weik ikin asa unmaba ati, ancuk yanuka, nunti dekuka lopdeipsilirye, lyepnamsilame. ‘Lyepropsimince, tamubuka teleb kipdeipnamsilam’ tenen, moropkiyabe. Aning nirya ara, talye ati kum bukni, deiyok ara, ani. Ara, minop talak arye, nun Israel yala nang ati, ance, nyaplume. “Anggun Israel yala nang ati ara, weik arye bico tenepsinirye, pia teleb kilinamsine,” nyabuka, nyalin yupu deice nyapdeiamsuluma ati, nun ap, yuk mutuku nang nirya ap ara, ‘Aning lubakina kumce, bita tenebibirye, tamubuka bikinamapʼ tenen, moropkiyabe, nun ni Allah.