Mazmur 42 - Eipomek

‘Allah ati dib tenenamap’ tenen, nyabuk yupu

¹ Daud mot deice arye, sik Korah yala nang ati nyabuk.

² Winipmanto ara, rusa basam mek patapliba, kang-kang abuka, mek din dam balamle touk, na ni koproba Allah anti, ‘Se,’ tenenune.

³ ‘Na ni Allah, anda kam deiyoknye uminya ati ara, anti weik arye, ‘Se,’ tenenune. Yata sum na an un dam yatinirye, eipkitinye do? tenenune.

⁴ Tonda, na ikin unilye talak ara, ninye yuk dib tenena kum nang arye nyaninyake. An ni koproba Allah ara, dan ukulul do?’ nyabuka asipnikiba, keting noutam ap, lukunyan ap nirya, ‘Se’ tenen, mambul kirikna deiceuk unune.

⁵ Na ikin unilye talak ara, engena deice arye tuba tenenune. Se, na ni Allah, na ap, ninye weik ap, an si eren aik dam bana ati, narye deiyok koubuka, ninye dobuka balamse. An si eren aik dam balamupu talak ara, na ap, aninye nirya ap, pin-pin kanye bobuka, mot deice arye anti, ‘Telebe,’ nyabuka, balamupu. Wini talak ara, ikin weik unulul bukni, minop talak ulamse ning ara, tuba tenenune.

⁶ Narye, na bidamang ati, tenelanune. Yata deiyok ati, na teniltonauk unun do? Tonda, yata deiyok ati, kanye talima engenauk unun do? Ati ara, nara Allah, Ninye Lyelina Deiyoknye ati, diba tenepnirye, moronamne. Moropneba, lyepnilyopura, narye na ni koproba Allah, el siuk pia erenam narya. Ati ara, Allah atibuk, dib tenenauk unamne.

⁷ ‘Na kanye talima uk dipnilyakʼ tenen ati, ance minop talak melilamnulum ning ara, ila tuba, pia tonap tenenamne. Yordan mek puak bukuk mutuku, Hermon mutuku arye dipdongobuka, Misar mutuku dam, amutuku deice nirya ara, pia teleb kibuka meliamnulum ning ara, tuba tenenamne. Na ni Allah ance nati, lyepromnulum ning ati, tuba tenepnirye, tuba tamubuka, tonap kanye deipnamne.

⁸ Winipmanto ara, mek lum sakuka, ninye deice siknilongolamle touk, tonda weik laut mekwen deipwelebuka lontik-lontik aplirye, ninye siknilongolamle touk, na kanye imun unilye ning ara, atouk unulule.

⁹ Ikin weik unulul bukni, keting duk-duk noutamak nirya ara, na ni Allah ance, bico tenebuka melinilyame. Wininiminye ning ati ara, lukunyan noutamak ara, Allah an si erena ati mot nyakunune. Na ni Allah, anda na Kam Una Deiyoknye uminya ati, kanye lon mot nyapnirye, Allah antibuk morokunune.

¹⁰ Ikin weik unulula ati, narye na ni Allah ati, nyanune. Anda weik keil bulamle atonunye melinilyame. Engena deice arye, ‘Se, na ni Allah, yata deiyok ati, lubakipmanilam do?’ nyabuka morokunune. Yata deiyok ati, ance bataknulumba, na mal olan nang arye ikin ning, na deice delininyak do? ‘Sikce opmanto uninyaka ati ara, pia imun kanye bobuka, tuba engena deiceuk unamne do?’ tenen, morokunune.

¹¹ Ara, talye ati kum nyapne. Na mal olan nang arye, “An ni Allah ara, dan ulul do?” nyabuka, nalininyaka ati ara, na yok ara, pun deipliba, ikin weik ulamle touk unulule.

¹² Aning ati, kanye talima uk diniliba, ‘Yata deiyok ati winininyak do?’ tenen, teniltonune. Bukni, narye na bidamang ati, utenelanune. ‘Yata deiyok ati, na teniltona uk unamne do?’ Tonda, ‘Yata deiyok ati, kanye talima pum tam engenauk unamne do?’ teniltonune. Ati ara, nara Allah, Ninye Lyelina Deiyoknye ati, dib tenepnirye, moronamne. Moropneba lyepnilyopura, narye na ni koproba Allah, el siuk pia erenamne. Ati ara, Allah antibuk, diba tenenauk unamne. Daud birye nyabuk.