Mazmur 41 - Eipomek

Raja Daud bira, ‘Allah arye kwetepnamnil’ tenen, morobuk yupu

¹ Raja Daud birye, Mazmur yupu mot sekuk. Ara, Allah yupu mot nyana deiyoknye arena ati sekuk.

² Aning-aning talina kumce, pia bona uto-toa talina kum nang ati, bico tenebikirye, melinyak nang ara, pia telebuk ukirye, kanye deibuka unamake. Talye bona uto-toa talina kum nang ati, bico tenebuka melinyak nang ara, sik babye ikin uplye talak ara, nun ni Allah Yahweh arye, anang ati melibuka lyepnamle!

³ Talye bona uto-toa talina kum nang ati, bico tenenyak nang ara, Allah Yahweh arye, sikti, moubuka kalikilula ati, amutuku noutam tuba kam unyake. Tonda, amutuku noutam, yuk-yuk daunyak nang yala-yala nirya ara, bona uto-toa talina kum nang ati, melinyak nang ebicopura, ‘E, sikda dipkoprob kanye delinyak nang unyake,’ nyabuka, si erenyake. Tonda, an Allah arye, bona uto-toa talina kum nang ati, melinyak ning ati, pia moubuka kalikilyama ati, sik anang ati, ‘Opnuyap,’ tenenyak nang arye, anang kum opmanto unyake.

⁴ Aning kum bukni, bona uto-toa talina kum nang ati, bico tenenyak nang ara, pia weik nakina taliplye talak ara, Allah Yahweh arye, anang moubuka meliplirye, sikti, mikip tuba arelule. Winiplyopura, sik nakina kwetepliba, sik tonap tamubuka teleb unamake.

⁵ Na Raja Daud bira, Allah anti, “Se, na ni Allah Yahweh, an kanye aryuk, bico tenepnutumce, teleb kipdeipnamnilame,” nyabuka moropkise. Tonda, “Dipkoprop, narye anti, malye winipse bukni, ‘Ance kwetepnimince, lyepnamnilam’ tenen, moropkine,” nyapse.

⁶ Na mal olan nang, sik talima pum arye, nati, ‘Anye nun pia like. Elda ikin weik uptue,’ tenebuka, malye yupu nyaninyake. Tonda, sikce nati, ‘E, anye bira, dan talak diptuba, yuk nang nirya arye, el si ton, pia kum kekenamake?’ teneninyake.

⁷ Tonda, nakina dinilye talak ara, sikce na uruna ati, na dam yanganyak bukni, ‘El kanye deipsutu’ tenen, kekena teleb yupu nyanyak bukni, ayupu nirya ara, dipkoprob talye yupu diamuk nyanyake. Sik kanye talima noutam ara, aning atonun, tek sisa kum tenenyake. Atalak nirya ara, sik kanye pum noutam arye, ‘Anye biti, yata ikin ning dobuka, el nong deice deiptibiba, imun kanye boptue,’ tenenauk unyake. Winibuka tenebikirye, sik yukak banyak talak ara, yuk nang kekena ati, amalye yupu nirya, laka nyalbanyake.

⁸ Yata nang do nirya, sikce nati, ‘Anye bira, nun pia like,’ teneninyak nang arye, nati, malye yupu nyabuka, mur-mur nyan yupu deice arye, nyaninyake. Sikce, ‘E, pia kanye imun weik ning, el dam yatuba, adiparyuk dadiptue,’ teneninyake.

⁹ Na mal olan nang arye, ‘E, anye bira, dipkoprob ikin weik ning, el deice akunum yanuka taleamuka ati, dipkoprob el dipnamlarya!’ teneninyake. ‘El nakina talipmaliba, amapmalyak uk unmalya ani, aminyan talak tamubuka bukdoplirye, telebuk uplirye, pia kum unamle,’ teneninyake.

¹⁰ Ato yupu tenibuka nyanululnye bira, talinye kume. Min talak ara, na ap, el ap, kanye deipdanamnumurye, ‘Elda na kwit koproba,’ tenen, diba tenepdanamnumu. Tonda, anye ap, na ap, kanye deipdanamnumurye, narye dalamse din ara, neika dilamnumu bukni, wini talak ara, elce nati, ‘Anye opnaman’ tenepnilirye, warekenulule.

¹¹ Bukni, na ni Allah Yahweh, anda weik tonun bico tenepnutumce, na nakina dinulul ning lopdeipnutumce, kwetepnutumopura, nakina lopnutu ura, nati, ‘Optibye,’ teneninyak nang arye, malye kipdeipnik ning ara, sik babye kwang daknamne.

¹² Se, na ni Allah, ance nati, kanye deipnimince, teleb kilinilyam ning ara, na kele. Ara, ance kalekuka melinilyama deice arye, nati, ‘Optibye,’ teneninyak nang arye, min kum opnikba, adeice arye bikdase.

¹³ Ara, narye ton, malye winina kumce, diksukumuk wininuna ati, wininuna deice arye, ance nati, melibuka kalikinilyame. Winilyama ati ara, na dobuka, an damuk deipniminba, an ap neika pia unamname.

¹⁴ Ati ara, nun nirya arye, Allah Yahweh ati, ‘Se, na nio, anda pia teleb ulyame. Nun Israel yala nang nirya ara, antibuk, an si pia erenamabe. Ati, atalak arye dipdongobuka, dounamsil talak nirya ara, an si atibuk, pia erenamabe. ‘Aning ara, dipkoprob wininamap’ tenen, “Amin, Amin” nyapkine na nio.