Mazmur 40 - Eipomek

Allah ati, ‘Telebe,’ nyana ap, morona ap ati, nyabuk yupu

¹ Daud birye, mot nyana deiyoknye el si Kor biti, amot deice arye nyabuk.

² ‘Na ni Allah, el si Yahweh, ‘Na ikin unilye ning ati, melipnamnil ca’ tenen, moropsirye, dinauk ulamsebuk, na moropse yupu kekepnuke. Allah atibuk, ‘Melipnilyame,’ nyabuka moropsiba, kekepnukce, akunum melipnuke.

³ Nara, malye ning arye, bental wetepmana atonun pia ulamnuk bukni, Allah arye dobuka lyepnukce, lake deipnuke. Tonda, ikin weik ulamnuka ati ara, winipmanto ara, weik bental pum wekamsiba, Allah arye dobuka, mutuku yangan keil deice deipnuke. Melibuka lyepnukce, telebak deipnuka ati ara, winipmanto ara, wini talak ara, teleb kat tuku deice, dobuka deipnukba, teleb banune.

⁴ Winipnukopura, Allah arye na talima pum tam, winiryuk mot arebuka peterepnukba, amot deice arye, nun ni koproba Allah atibuk, “Anda pia telebe,” nyabuka, mot deice arye, el si erenune. Winipniba, ninye yuk nang nirya eibikirye, ‘Se,’ tenebikirye, ilil upliba, Allah el si Yahweh atibuk, diba tenebikirye, el siuk erenamake.

⁵ Yatanye do, kanye talima eren ap, tilila yupu nyana ap, kum ulirye, ‘Allah el si Yahweh, elcuk lyelonamnil’ tenen, Allah atibuk, diba tenebuka ululnye bira, Allah arye melilamliba, el winin ning nirya ara, telebuk wininamle. Pia kanye delinamle. Atonye bira, elce talima erena deice, kwalilamak ninye ati, ‘Melipnamniak’ tenen, kum morolule. Tonda, talye ning ap, isa si ap erenyak ninye, sik isa si erenyak touk, kum winilule. Tonda, aninye ap, neika kum ulirye, ‘Sikda teleb unyake’ tenen, kum morolul bukni, Allah Yahweh atibuk, diba tenebuka winilule.

⁶ Nun ni Allah Yahweh, ance ninye kum winipmanto ning ap, pia mambul pil ap, aning-aning nirya, akunum domlum ning ara, nunce eibuka, kum nukmanto unyabe. Tonda, ance nunti, ‘Aninye ati, winibuka melinamne,’ tenesimince, arenamsilam ning ara, nunce kum nukuka kel biktibye. Ance nunti, teleb kilinamsilam ning nirya ara, dipkoprob kum nuktinye. Ance nunti, meliamsulum ning ap, aminyan talak teleb kilinamsilam ning ap ara, pia weik winilula ati ara, nukdetinya babye, aning nirya ara, kum nukmanto unune.

⁷ Allah ance teneminye ning ara, ninye arye, ‘Se, nun malye winin ning, kum kibuka deipsuturye, lyepsutu’ tenen, kam ning obuka weika arye dobuka, uku dongolyanganamniake. ‘Aninguk na kanye delinune’ tenen, kum ulyame. Tonda, an si erena ati, ‘Teleb arin ning weika arye boyanganamniake’ tenen, kum patakulule. Ance nati, akunum laka nyalamnulumce, melipnuluma deice arye, moubuka kekepsirye, akunum bikse. Ara, ‘Sik malye winin ning kilina ati, kam ning obikirye, uku dongobuka, arelyanganamniake,’ kum tenelyame. Bukni, weik mambul ning ara, ance nunti, ‘Na yupu moubuka kekebikirye, na dobolyanamniake’ tenen, patakulule.

⁸ Narye aning akunum kel kipsa ati, wini talak ara, na yanmance, an dam aunmane. Ance nyapdeiamlumba, an yupu buku noutamak, nati akunum sekeipnik ning ara, nyapnukine.

⁹ Ara, na ni Allah ance, ‘Aning ara wininamlulume. Aning ara, kum wininamlulume,’ nyapdeiamsulum yupu nirya ara, na kanye talima pum tam akunum deipse. Ati ara, ance, ‘Wininamle,’ tenelamnulum touk, aninguk pataniliba, ‘Ayupu uk talibuka, diksukumuk wininamne,’ tenenune.

¹⁰ Na ni Allah Yahweh, an kele. Ance, ‘Diksukum winin ning ara ani,’ nyabuka laka nyapdeipnulum yupu nirya ara, tonok ning babye duknubuka, kum batakanune. Ninye nirya arye, an si eren ati, bulubuka wekenyak aik pum tam arye, ance nyasiminye yupu nirya, lakoprop kibuka laka nyanune. Ninye nirya wekenyak sukum laka nyanune. Tonok ning babye, kum batakanune.

¹¹ Allah ance nunti, diksukum ubuka telebuk winin ning ap, tonda ninye ati bico tenebuka, lyen yupu nyapdeiamsulum ning ap ara, ‘Narye kum nyanamne’ tenen, na kanye talima noutamakuk kum duknune. Yuk nang kekenmace arye, ayupu nirya lakoprop kibuka, laka nyanune. Ance, ‘Wininamne,’ nyapsulum yupu nirya ara, dipkoprob winilyame. Tonok ning babye, kum batakalyame. Apil nirya, sirya dakalyame. Tonda, ‘Ninye tukwak ninye weik lyepnamne’ tenen, kintinipsulum ning babye, ayupu ton kum batakanune. Ance bico tenesimince, pia dipkoprob yupu nyasiminye ning nirya ara, lakak aryuk, laka nyaniba, an si eren ati, bulubuka yangan ninye, yuk ninye weika arye kekenyake.

¹² Aning ati ara, na ni Allah Yahweh, na malye winin ning ati, adiparyuk talye wenebuka oplopnutum bukni, ‘Bico tenenimince, lyenamnilam’ tenen, moropkine. Tonda, an dipkoprob nyasiminye yupu ap, ance bico tenesimimnye ning ap deice arye, nati kalikiniminyeba, ‘Na dam, ikin ning kum yanganamnile’ tenen, moropkine. Anda mikip weiknye birye, melinamnilame. Nati, batakna meme.

¹³ Na nio, ‘Ance melibuka kalikinamnilyame,’ nyabuka moropmakin ning ara, talye ati kum nyapkine na nio. Weik ikin ning ap, malye winin ning ap, kanye imun ning aning-aning nirya ap, pia weik ulye noutamak unune. Tonda, narye malye wininye ning tuba tenenya deice arye, imun kanye bopne. Na malye wininye ning arye lelipniliba, ‘Teleb bisik ani’ tenen, moubuka, bita kel kum bikmanto unune. Winipmanto ara, na kisok potong kum nukmanto unilye touk, na malye winin ning, pia weik wininulul ati ara, na kanye talima pia ikin unulule. Na kanye talima noutamak, mikip kum unulule ati ara, kum winipmanto unune.

¹⁴ Aning ati ara, na ni Allah Yahweh, kanye deipnutumce, ‘Na ikin unilye ning noutamak arye, lyepnimince, teleb sukumuk deipnamnilyame’ tenen, moropkine. Na ni Allah Yahweh, ‘Ance minopce, na dam yanuka melinamnilam’ tenen, moropkine.

¹⁵ Winipniminyeba, ‘Anye opnuyap,’ tenenyak nang, na mal olan nang kel kibikirye, ilil ubuka bai sakikirye, yuk-yuk bindopnamake. Ance melipniminya deice arye, ‘Na mal olan nang nirya, alye dakdanamak’ tenen, moropkine. Yata nang do nirya, nati, ‘Anye el ap, el winilul ning nirya ap, malye kipnamle. Elce talilul ning nirya, malye uptuba, kum danamle,’ tenenyak ninye nirya, malye min kipdeiptiniba, ‘Alye dakdanuka bataknikirye, tamubuka bindopnamak’ tenen, moropkine, na ni Allah.

¹⁶ Na ikin ning dopropne talak ninye yuk nang arye, ‘Bita merekuka, ikin ning dopropmale,’ nyabuka, nalininyak nang ara, ‘Alye weik dakdanamak’ tenen, moropkine na ni Allah.

¹⁷ Bukni, yata ninye do nirya, Allah antibuk, tuba diba tenebuka unyak ninye nirya ara, ‘Ance teleb kibuka deipminba, sik nirya pin-pin kanye bobuka unamak’ tenen, moropkine. Tonda, ‘Allah el dem arye lyebuka dolyanamsile’ tenebuka wininyak ninye nirya ara, ‘Pin-pin kanye bobuka unamak’ tenen, moropkine. Tonda, aninye arye, ‘Ninye tukwak ninye mutuku-mutuku nirya unyak ninye nirya ati, nun ni Allah, el si Yahweh pia erenamake’ tenen, laka nyanamake. Sikce, “Allah Yahweh, aning-aning nirya, deice tam talibuka, Pia Mambul Weiknye ulule,” nyabuka, el siuk pia erenamake.

¹⁸ Nara, aning-aning nirya talibuka wininanye, pia kum wininune. Talye bona utotoa talina kumnye wininuna ati ara, aning-aning nirya ati, weik arye ‘Se,’ tenenune. Ati ara, ‘Na ni Allah, el si Yahweh arye, nati tenepnuturye, melipnutu’ tenen, moropkine. Na ni Allah, na ikin unulule noutamak arye, melibuka lyenilyama anya arye, ancuk minopce yanuka melipnilyame. ‘Yuk talak yanuka melipnamkinarya, kum tenenamnilyam’ tenen, moropkine. Atalak aryuk, yanuka melipnilyame, na nio. Daud birye nyabuk.