Mazmur 4 - Eipomek

“Lukunyan talak arye, Allah ati moronamlulume,” nyabuk yupu

¹ Allah el si erena ati, mot nyan nang arenamaka ati, sekuk. Amot nyalamuk talak ara, kitar urasin atonun ning, el si ara kecapi, talipnarye mot senamlume nyalamuk. Raja Daud birye amot yupu sekuk.

² Na ni Allah narye anti, ‘Naio, melipnilyame,’ nyabuka, morokinye talak nirya ara, ‘Ance yupu nyapnamnilyameʼ tenen, morokunune. Allah ancuk nati, ‘Anye bira, malye winin ning kum talibuka ulule,’ nyabuka melinilyame. Dan talak do nirya ara, ikin unilye talak nirya ara, ancuk melipnimince, lo ton arenilyame. Ati na nio, ‘Ance bico tenepnimince, an kanye aryuk, na morokinye yupu, kekebuka melinamnilamʼ tenen, moropkine.

³ Se anggun mikip pia weik ululum nango, dan talak tonap na ni Allah ati, yep-yep abuka nalinamlum do? Winipmunyeura, yuk nang arye ton, kekebikirye, malye yupu nyakiba, alye weik unululule. Anggun ninye deiyok nang ululum nang ara, ouku weik arye ton, nong kum upnamle yupu nyakiba, ance kanye deibuka kekenamlum do? Tonda, ouku weikto arye, tilila yupu kekepmunce, dobonmanulum do?

⁴ Winiplum bukni, anggun luba kina meme. Allah Yahweh arye, el yupu ara, pia moubuka kekebikirye, aninguk talibuka diksukumuk wininyak ninye ati, ‘Na kanye delin nang unamakʼ tenen, akunum wibuka deipseue. Aning ati ara, narye nun ni Allah Yahweh ati, “Naio, melipnilyame,” nyabuka, moronye talak nirya ara, elce kekenulule.

⁵ Ati anggun yuk ninye nirya ara, na nyapnusin yupu moubuka kekepnululume! Ilil ubuka, sirim talina meme. Anggunda yu upsilye talak ara, malye kanye bobuka, unamlum bukni, malye winin ning ara, kum talibuka wininamlume. Malye kanye bobuka umunye talak ara, anggun amsuna koprop mapmunce, anggun mining talima pum tamuk, tenenauk unamlume. Winipmunce, yupu ton nyana kumce, urdem unamlume. Yupu ton talena meme!

⁶ Tonda, anggunce anggun ni Allah elti, teleb arin ning ara, elce, “Winibuka-winibuka kam ulamle ning obuka, arenamnulume,” nyapdeipsuk touk, aninguk kintinibuka deipmunce, el si erenamlum ati, arenamlume! Winipmunyeura, Allah el si Yahweh ati, ‘Diba,’ tenebuka anggun kanye talima nirya ara, el deice dem delinamlume.

⁷ Wini talak ara, ninye weik arye nyanyake. “Se Allah arye, tonap pia teleb kipdeipsutuba, telebuk utibye do?” nyabuka, malye kanye bobuka moronyake. Se, nun ni Yahweh, ance moubuka eipsutumce, ‘Nun ti ila tamubuka, teleb kipdeipsutumba, nunda telebuk unamabeʼ tenen, morokinyabe.

⁸ Ancuk meliniminya deice arye, nara pin-pin kanye bonirye, kanye deibuka unune. Talya daunyak nang arye, wa wina lin li noutam arye, lin nin gandum do, anggur mek din ning do, aning-aning weik arye, libicopura, pia kanye deibuka unyake. Bunki, sikda mitik tonun dem, narye anti weika arye, kanye deibuka unune.

⁹ Aning ati ara, nara lukunyan talak nirya ara, ikin kanye bobuka, una kum bukni, talye kanye bopnirye, lukunyan talak teleb ubuka manune. Ara, Allah ancuk, pia melibuka kalikinilyama ati, ikin ning na dam kum yanmanto ati, nara kanye teniltona ap, tonda ilil una ap, kum bukni, talye kanye deibuka telebuk unune.