Mazmur 36 - Eipomek

Ninye arye, malye winin ning ap, Allah arye pia teleb kililul ning ati, Daud birye nyabuk yupu

¹ Raja Daud birye, aMazmur mot yupu sekuk. Ara, Allah yupu mot nyana deiyoknye arenamika ati, sekuk. Daud bira, Allah Yahweh el amu tam ulamukce, pil dolamuk.

² Allah arye, ‘Aning ara, wininamlume, aning ara, pia kum wininamlume,’ nyapdeiamsuk yupu ara, sik malye winin ninguk, talibuka wininyak nang arye, ayupu nirya yaniplobuka, sik talima noutam ara, malye un ninguk patalyeba, talibuka wininyake. Wininyaka ati, sikda, ‘Allah arye, nun malye winin ning ati, yu uplyeba, uasulule’ tenen, pia ilil kum unyake. ‘Allah ara, daupye,’ tenebuka, elti, batakanyake.

³ Wininyaka deiyok ara, sik bidamnye ati, ‘Nunda pia teleb nanguk unyabe,’ tenelanyake. Tonda, sikda, ‘Kume, nunce malye-malye winin ning, pia weik arye wininyap ning ara, yatanye birye biksuturye, wenepsiting do? Ton kum disinyakeʼ tenen, talye luparabuka, malye-malyeuk wininyake.

⁴ Sikce tilila yupu nyanyaka deice arye, yuk nang ati, ikin ning delinyake. Wininyaka deice arye, yuk nang ara, ikin kanye bobuka engenyake. Sik malye winin ninguk, talibuka wininyak nang arye, diksukum winin ning ap, weik bikuka wininyak ning ap nirya ara, akunum batakike.

⁵ Sikce, ‘Wini talak mapnuyap’ tenen, amsuna deice mabikce talak ara, sikce, ‘E, yata ning malye winiptibye do?’ tenen, pia teninauk unyake. Wininyaka ati, sikce akunum mania kanye bobuka ukirye, banyak bisik ara, malye bisikuk ebuka bakirye unyake. Tonda, Allah arye, ‘Aning ara, wininamlume, aning ara, pia kum wininamlume,’ nyapdeiamsuk yupu nirya ara, sikce tuba batakanyake. Bukni, malye winin ning ara, pia kum batakanyake.

⁶ Bukni, na bikse. Na ni Allah Yahweh, ance nunti, ‘Anggun kaliknamsine,’ nyabuka, nyalin yupu deice arye nyapsulum ning nirya ara, dipkoprob pia wininamsilyame. Tonda, ance nunti, weik tonun bico tenepsimince, pia batakna kumce, tuba-tuba melisilyame. Ance, ‘Winipnamne,’ nyapsilam atonun, kibuka ulyame. Winipmanto ara, im deice dua ara, pia im deice tam pia weik aulamle touk, ance tuba melisilyam ning babye, pia weik aulule.

⁷ Tonda, weik mutuku lokmanto kum deice arye, pia abulamle touk, ance diksukum winin ninguk winilyam ning ara, min kum winipmanto. Malye winina pia kumce, telebuk winilulum ning ara, pia wininamlume. Winipmanto ara, weik laut mekwen kaurwe kum nukman ulamle touk, ance, ‘Winipnamne, winipnamne,’ tenepmince, winilyam ning nirya ara, ninye arye kum biktibye. Diba, nun ni Allah Yahweh, yata ning do nirya ara, bai tam talye kam ulye ning babye, tukwak nang nirya babye, ancuk melibuka lyelyame.

⁸ Na ni Allaho, ance nunti, weik tonun bico tenesimince, “Winibuka teleb kipdeipnamsine,” nyabuka, nyalin yupu deice arye nyapsiminye ning ara, pia batakna kum aryuk, tuba-tuba melisilyame. Narye, ‘Se, aning ara, pia telebe,’ tenenune. Winipmanto ara, kil ayam arye, el mapu nirya, el pol amu tam deiplirye, irilamle atonun kibuka, ninye nirya arye, an dam yanuka ukcopura, ance pia melibuka kalikinamsilame.

⁹ Na nio, an uminyak arye, sik din aning-aning nirya ara, ancuk, an dam unyak nang ati, pia weik arye melibuka arenamsilyame. Winipmanto ara, ninye arye, pia teleb balamle mek noutam arye, ‘Mek dipnuyap’ tenen, mek kwebuka dibikirye, kanye delilamak touk, ance teleb ning nirya melibuka aresiminya deice arye, nun kanye deibuka unamabe.

¹⁰ Deiyok ara, nun kam una ap, isin ap nirya ara, an Allah aryuk aresilyama deice arye, teleb unyabe. Aning atonun, ance weik kel bikina deiyok ning ap, tonda, aulye ning nirya ati, ‘E, deiyok ning ara, ani,’ tenen, moubuka bikinyap ning, deiyok ning babye, ancuk aresilyame. Winipmanto ara, ance dirina deiyok ning aresiminya deice arye, pia teleb kibuka elinyabe.

¹¹ Nun ni koproba Allaho, nunce anti, diba tenebuka bikinyap ning ara, ‘Ance nunti, weik tonun bico tenesilyamce, “Winibuka teleb kipdeipnamsine,” nyabuka, nyalin yupu deice arye, nyapsulum ning ara, ‘Pia batakna kum aryuk, tuba-tuba melinamsilamʼ tenen, moropkine na nio. Tonda, ‘Malye winina kumce, sik kanye talima noutam diksukumuk wininyak nang ati, melibuka lyelonauk winilnamsilam’ tenen, moropkiabe!

¹² Aning atonun, ‘Sik mania kanye bobuka, wininyak nang arye, maknya kintinilamak nang arye, nati opnikirye, amu tam kipdeipnicak’ tenen, ‘Ance kalikuka melipniminyeba, telebuk unamne’ tenen, moropkine. Tonda, ‘Sik malye ninguk, talibuka wininyak nang arye, nati opnikirye, duknubuka yukak donoknikcak’ tenen, ance, ‘Melibuka kalikinamnilam’ tenen, moropkine na nio.

¹³ Anggun nirya dipdelulume! Sik malye winin ninguk, talibuka wininyak nang ara, Allah arye akunum opmalba, akunum tuku deice sakmakce, sik urasin ara, tuku deiceuk mapmake! Allah arye amalye nang, akunum obuka sice buklopmala ati, tuba tonap, tamubuka, kam pia kum buknamake.