Mazmur 35 - Eipomek

‘Nun olyangasinyak nang arye opsikcak’ tenen, Raja Daud birye, Allah ati, “Melibuka lyepsilyame!” nyabuka, morobuk yupu

¹ Raja Daud birye, Mazmur yupu mot sekuk. Daud birye nyabuk yupu ara, ani. Se na ni koproba Allah, ance na olyanganinyak nang arye, mal olyanganinyaka ati, ‘Ance sik anang ati, tamubuka optume’ tenen, moropkine. Yu nang arye nati, ‘Anye opnuyap,’ teneninyak nang ara, ‘An Allah arye anang ati, wenebuka opnamlam’ tenen, moropkine na nio.

² Winipmanto ara, sik yin talin nang arye, ‘Mal olalbinuyap,’ tenebikce talak ara, sik nong lelin ning, el si ara perisai, weik ning ap, mitikto ning ap, kintinibikirye, yuk mutuku nang ati, olbalamak touk, ‘An Allah arye, kintinipmince, na mal olan nang optume’ tenen, moropkine. Diba, an Allah arye, minop tikukapmince, na lyena ati, yanuka melipnamnilame!

³ Winipmanto ara, sik yin talin nang arye, ‘Yuk nang olbinuyap,’ tenebikce talak ara, sik ninye on ning, el si ara tombak ap, mitik kapak ap doprobikirye, olbalamak touk, ‘An Allah arye, kintinipmince, na mal olan nang ara, adiparyuk olbinamlam’ tenen, moropkine. Na ni Allah, ance nati, “Nara, an lyena deiyoknye ukunune,” nyapnamnilam’ tenen, moropkine.

⁴ Na nio, sik yu nang arye, ‘Anye opnamabe’ tenen, warikininyak nang nirya ara, ‘Ance anang wenebuka opminyopura, alye dakdaceura, yuk nang nirya arye anang ati, “Sikda dipkoprob malye nang unyake,” nyabuka, tonap kum si erenamake. Utenena ati, moropkine. Tonda, na ni Allah, na mal olan nang ati, ‘Ance sik yupu sekminba, sik kanye pia walwal kanye bobuka unamak’ tenen, moropkine na nio. Ara, sik yu nang arye, ‘Anye malye kipdeipnamabe,’ teneninyak nang ati nyapne. ‘Aning ara, kanye walwal kanye bon ninguk arepnalam’ tenen, moropkine.

⁵ Winipmanto ara, mikip kumanya arye, yanuka dopliba, talye tuku sung-sunga dobuka bobalamle touk, Allah ance amalye nang ati, yakdonokminba, sikda dana-dana tam nirya bindopnamake. ‘Winiptumʼ tenen, aning ton moropkine na nio. Sik anang bikbik abuka, bindopnamak talak ara, ‘An Yahweh arye, an amu tam pil dolul malaikat ton arepminba, anye birye, amalye nang dobolbanamle’ tenen, moropkine.

⁶ Tonda, Yahweh, an amu tam pil dolul malaikat arepminba, anye birye, amalye nang dobolbanamle talak ara, ‘Sik anang bikbik abuka, banamak bisik ara, alap weik ap, kuna weik ap uptuba, sik weik tonun ikin kanye bobuka unamak’ tenen, moropkine na nio.

⁷ Aning deiyok ara ani. Ara, deiyok kum ubuk bukni, sik amalye nang arye, nati, ‘Anye bira tomobibirye, opnamap’ tenen, ninye tomon ning, el si ara jaring, kintibikce, na balamse bisikak, dungnubuka deibika atia. Atonun, deiyok kum ubuka babye, sik amalye nang arye, nati, ‘Tuku pum tam palibibiba, anye bira, tuku pum tam sakuka opnamle’ tenen, na balamse bisik nirya ara, ‘Anye opnamap’ tenen, tuku pum tam lukunyak.

⁸ Ati, sikce kum tenipting ning, ‘An Allah arye, ikin weik ning kintinip deipminba, ayu nang dam, minop yatuba, imun kanye bobuka unamak’ tenen, moropkine na nio. Atonun, sikce na ona ati, ‘Ninye tomobuka, on ning, wena el si jerat, nyabuka kintinibikce, dungnubuka deibik ning ara, sik dem yuptueʼ tenen, moropkine na ni Allah. Sik mangkau kanye bobuka, abisik banamak talak ara, ‘Aninye youna ati, webuka kintinibik ning ara, sik bidamang aning pum tam sakuka, yupdating’ tenen, moropkine na ni Allah.

⁹ Allah ance melipnutumba, ayu nang arye, mangkau kanye bobuka, yupdating toura, nara kanye deipnirye, an Allah Yahweh ati, “Anda pia teleb ulyame,” nyabuka, kanye deipkinirye, kil-kil unamnile. Ara, an Allah Yahweh arye nati, melibuka lyelonilyama ati, pia kanye deibuka, telebuk wininamnarya!

¹⁰ Kanye deipnopura, na ni Allah, anda Yahweh ati, nyanamkine. Ara, “Se, Yahweh, anda pia teleb winilyama ati, yatanye birye ton, an winilyama atonun winiptu do? Kume kum winiptinge,” nyabuka, an si erenamkine. Mikip weik unyak yu nang arye, pia mitang unyak nang ati, akunum tomobikcopura, sik talye bona uto-toa talina kum nang arye, pia kum lyepdatinge. Bukni, dipkoprob an Allah Yahweh arye, sik mitang nang ara, lobuka lyelolyame. Atonun ton, sik bona nirya kum talikirye, pia mitang asa unyak nang ara, yu nang arye anang ati, obikirye, yanibikcopura, an Allah Yahweh aryuk, ayu nang opmince, sik talye bona uto-toa talina kum nang ati, lobuka lyelolyame.

¹¹ Tonda, nati ara, pia yu nang arye, ‘Anye biti malye kipdeibibirye, opnamabe,’ tenepnikirye, nati minin yupu nyaninyake. Ara, deiyok kum upmalibuk, sikce nati, “Elce malye winibuk ning ara ani, ani,” nyabuka, talye yupu aryuk nyaninyak bukni, dipkoprob ara, aning nirya ara, narye pia kum winilamsa ati, aning ara, na pia walwale.

¹² Na ning ara, teleb winin ninguk, wininun bukni, sikce nati ara, tamubuka malye winin ninguk wininyakce, ikin ning na nong deice deilininyake. Winipnikcopura, na talima nirya ara, ikin unilirye, talima dakalsakanauk uniliba, winipmanto kum unune.

¹³ Sikce nati, malyeuk winilininyak bukni, sik nakina dilamle talak ara, narye sik melina ati ara, teleb kilin ninguk wininune. Sik kanye imun weik nakina dilamukba, narye, ongolamse teleb baju ara, kwiribukapsirye, din ning nirya batakuka, din dina kumce, malye kanye bobuka, ikin weik upnukba ulamse. Tonda, sik nakina dilamuk talak ara, narye sikti, Allah morolamse bukni, elce na moryamse touk kum arepnukopura, ‘Se’ tenen, malye kanye bopsirye, na kisok ara, na taram deice deibuka engepse.

¹⁴ Ara, na kwit koproba do, na weit yapu koproba ap, na du yapu koproba do, akunum dipmatingba, narye malye kanye boptinirye, weik tonun engenauk upnamtinye touk, sik anang ati tenipsirye, bico upnukba, engepse. Atonun, na nin koproba diptuba, pia malye kanye bobuka, kisok kanupdongobuka banmatinirye, engebuka ngaluktinye touk, sik anang kanye imun nakina dilamuk talak ara, anang ati tenipsirye, pia bico upnukba, engenauk unmase.

¹⁵ Sik ikin weik ulamik talak ara, narye sikti, engelamse bukni, nara ikin weik ulamse talak ara, ayu nang nirya bulubikce, kanye deibuka ulamik. Kanye deibikopura, sikce, “Neika bulubibirye, anye biti, olbinamabe,” nyabuka, yupu talilamikce, kintinibik. Ton ninye ona ati, yu nang ara, na pia kum bikamse bukni, sikce ikin ning weik dobuka, batakna kumce, na nong deice pia deililamnik. ‘Winilamnikce, pia tuba-tuba opnuyapʼ tenen, pirinauk winilamnik.

¹⁶ Sik anang ara, Allah ati, pia kum bikamikce nang arye, winilamak touk, Allah ati tenina kumce, nati pia nalibuka, malye yupu nyalamnik. Sik anang ara, nati, ‘Anye bira, nun pia lik,’ tenelamnika ati, pia malye yupu weik nyalamnik.

¹⁷ Se na ni Allah, anda aning-aning nirya talimince, mikip weik deiyoknye ulyama ati, yata talak arye, anang wininyak ning ati, talye ton diltaknauk unamlam do? Ati na nio, ayu nang arye, ikin weik ning, na nong deice deipnikirye, malye weik winilininyaka ati, ‘An Allah arye, na dam tamubuka yamince, lyepnamnilam’ tenen, moropkine. Winipmanto ara, bai tam ulamle yu weik pus, el si ara singa, ayu kus arye, na obuka dipnutu atonun, sik yu nang arye atonun, winininyaka ati, ancuk, na dam yanuka, lyepdopnilyame na nio!

¹⁸ Na ni Allah, ance nati, akunum lyepropniminyopura, nun Israel yala nang nirya, ‘Allah el siuk erenamabe’ tenen, bulubibirye, an si eren aik dam, neika binamap talak ara, narye anti, “Naio pia telebe nyapkine,” nyabuka, an siuk erenamkine. Diba, nun Israel nang nirya, ninye nukman kumto ubuka bulubibirye, an si erena ati, neika unamap talak ara, narye, “Allah anda, pia telebuk ulyame!” nyabuka, an si erenamkine.

¹⁹ Ati na ni Allah, deiyok kum upmalibuk, sik yu nang arye, nati, ‘Anye bira opnamabe,’ tenen, pirininyak nang ara, ‘Sikce opnikirye, akutubuka kanye deipnikcak’ tenen, ‘Ancuk, nati, lyepropnamnilam’ tenen, moropkine. Diba, na deiyok ton kum upmalibuk, sik yu nang arye nati, ‘Anye bira, nun lik ati, opnamabe,’ teneninyak ning nirya ara, ‘An Allah aryuk, sik yupu sekminba, sikce winipmanto kum unamak’ tenen, moropkine na nio.

²⁰ Ara, talye ati kum moropkine. Deiyok ara, sik ayu nang arye, “E, nun nirya ara, mal olana kumce, talye kanye deibuka, telebuk neika unamabe,” kum nyanyake. Aning pia kum bukni, sik ayu nang ara, minin yupu ap, talye yupu ap, tilila yupu ap, tenebikirye, amutuku noutam telebuk ubuka, talye tunim abuka wininyap nang ati, talye yupu dem nyasinyake.

²¹ Ayu nang arye nati, weik yupu deice arye, malye yupu weik tonun nyaninyake. Sik anang arye, nati, ‘E, el anye akunum malye winilamuk ning ara, nun akunum eililamupu,’ nyabuka, minin yupu arye nyaninyake.

²² Ati ara, aning-aning nirya ara, Allah Yahweh ance akunum eililyama ati, yupu nyana kumce, talye tunim abuka, kum wininamlyame na nio. Nara pia ikin weik unulula ara, an akunum bikilyama ati, ‘Anda pera sukum kum unalyame, bukni, na dam yamince, melibuka lyepnamnilam’ tenen, moropkine na nio.

²³ Ati, minop bukmince, na lyena ati, mining dam anyuk yamince, kalikinamnilyame na nio. Ara, talye ati kum bukni, anda na si erekunun Allah, anda aning-aning nirya talimince, Pia Mikip Weik Deiyoknye ulyama ati, na melibuka lyelona ati, minop yanulyame na nio.

²⁴ Allah ance nunti, “Aning wininamlume, aning ara, pia kum wininamlame,” nyapdeiamsulum yupu nyasilye touk, ance tuba-tuba diksukumuk winilyama ati, malye nang arye nati, minin yupu nyaninyak bukni, ance yanuka, nati yupu bokeipniminba, ninye nirya arye biknamniake. Ara, na malye kum winilamse ning ara, ance lak kipdeipniminba, sikce biknamake. Allah ance nati, tuba tamubuka teleb kipdeipnutumopura, sik yu nang arye nati, kum opnitinge. Tonda, sikce nati, kanye deibuka, kum akutupnitinge.

²⁵ Ayu nang arye, “E, akunuma, ‘Anye optibye,’ tenen, patapsuk touk, wini talak akunum winipmaba ara atia,” ‘Nyapdacak’ tenen, na ni Allah ance, sik yupu sekenalame. Winipminyopura, ayupu pia kum nyapdatinge. Atonun ton, ‘Sik yu nang arye, malye yupu nyapsicak’ tenen, Allah ance yupu sekmince, anang ati opnalame. Sikce nyasinyak yupu ara, ani. “E, anye akunum obuburye, sice buklobupe. Winipmanto ara, ninye arye din ning dobuka dibikiba, adin ning kum danalamle touk, nunce anye akunum kum kipdeibupe,” nyabuka, ‘Kanye deibuka nyapsicak’ tenen ati, na ni ancuk anang nirya obuka, sirya daknalame.

²⁶ Diba na ni Allah, yata nang do nirya, sikce nati, “El ikin weik unmala ara, nunce kanye deipmabe,” nyabuka, akutuninyak nang nirya ara, ‘Ance anang wenebuka opminyopura, sikda kanye teninauk ukirye, alye weik dakanamak’ tenen, moropkine na nio. Tonda na ni Allah, yata nang do nirya, sikce nati, “Anye obuka, nun amu tam kipdeiptibirye, nunuk ara, erepdabirye, amutuku nirya nuncuk talibuka, ninye deiyok nang unamabe,” nyabuka, nati, ‘Lik’ teneninyak nang nirya ara, ‘Ance anang wenebuka opminyopura, sikda alye weik dakikiba, yuk nang nirya eibikirye, anang ati, ‘Dauaplye, sikda pia malye nang uka,’ tenebikirye, ‘Anang ati, tonap si erebuka, kum kinamak’ tenen, moropkine na nio.

²⁷ Bukni, yata nang do nirya, sikda, ‘Allah arye Daud biti, akunum moubuka yupu bokeibukce, tuba tamubuka, akunum telebuk kipdeibukba, telebuk unamle,’ tenen, pataplyeba, nati, kanye deilininyak nang nirya ara, kil-kil kanye bobikirye, kanye deibuka yupu weik arye, “Aning ara, pia telebe,” nyanamake. Narye, ‘Winipting’ tenen ati, an Allah ati moropkine na nio. Tonda, nati kanye deilininyak nang nirya ara, tuba-tuba nyanamake. Ara, sikce, “Se, nun ni Allah, el si Yahweh ara, pia mikip weik ap, pia teleb ap ulule,” nyanamake. Tonda sikce, “Se, nun ni Allah ara, elti, diba tenebuka, el amu tam ulirye, el piluk talibuka ulye ninye deiyoknye Daud biti, Allah arye, el Daud ati, bico teneplirye, kanye deibuka melipliba, telebuk wininamle,” nyanamake.

²⁸ Aning nirya ara, nyabikcopura, na babye an siuk erenamkine. Ara, “Anda Allah, pia teleb ubuka diksukumuk winilyam ning nirya ap, pia telebuk winilyam ning nirya ara, pia teleb winilule,” nyabuka, tuba-tuba lak nyanauk unamne. Ati ara, an siuk erenamkinarya!