Mazmur 34 - Eipomek

“Allah arye teleb kibuka melinulula ati ara, Allah ati, kanye deibuka, el siuk erenamne,” nyabuka, mot sebuk yupu

¹ Ayupu nirya ara, Daud birye, mot sena deice arye nyabuk. Ara, minop talak Israel ninye talibuka ulamuk ninye deiyoknye, Abimelek birye, ‘Daud opnun,’ tenebuk talak, Daud birye ayupu nyabuk. Ara, Daud talye motona talilamle nang, kanye pia moubuka tenena kumce, talye kanye bobuka unyak touk, kanye walwal asa una atonun kibuka winilamukba, Raja Abimelek birye, Daud ati, ‘Motona talinanye ulula ati, elda daunamle’ tenen, dobuka dopkwetebuk.

² Raja Daud birye, nyabuk. “Se, na ni Allah Yahweh, asum-asum nirya, na ni Allah ati, ‘Anda pia telebe,’ nyabuka, mot senirye, an si atibuk, pia erenamkine. Tonda, tuba-tuba Allah el si ati, si donirye, mot senamne ning ara, pia kum bataknamne.

³ Na kanye talima pum tam nirya arye, na ni Allah Yahweh ati, ‘Elda pia telebuk winilule. El winilul ning atonun ning, yuk nang arye ton, pia kum wininyake. Elda tonoknye ulule,’ nyabuka, el si pia erenamne. Winipniba, ikin pil arukunyakba, imun kanye bobuka unyak ninye kekebikirye, sik babye, pin-pin kanye bobuka, unamake.”

⁴ Ati ara, anggun nirya, na dam yanganamlume. Yamunba nun nirya arye, “Allah el mikip weik arye winilul ning nirya ara, pia telebuk winilule,” nyabuka, Allah el siuk erenamabe. Aubirye, Allah el si erebibirye, neika si erenamabe. Winibuka ulamepya ani, ninye weika arye, tonap tabakuka kekebikirye, ‘E, diba Allah elda pia mambulnye ulule,’ tenebuka unamake.

⁵ Nara, ‘Na ni Allah Yahweh arye, pia melinamnil’ tenen, Allah ati morolamse bukni, elce na morolamse ning nirya, kekebuka areamnuke. Na ikin ning weik ulamnukba, imun kanye bobuka, winilamse ning nirya ara, elce lopdeipnuke. Winipnukba, na ilil ulamnuk ning nirya ara, akunum kum kipdeipnukba, teleb kanye bobuka ulamse.

⁶ Tonda, kanye imun deice daunyak ninye nirya ara, ‘Allah arye melipnamsilarya’ tenen, sik kanye nirya, el deiceuk deibikirye, elti, diba tenenyak ninye ara, pin-pin asa arye, kanye deibuka unamake ati ara, sik urasin ara, telebuk unamle. Tonda, sik aninye nirya arye, aminyan talak ilil upliba, alye pia kum dakaldanamake.

⁷ “Na ni Allah Yahweh, na melipnilyame,” nyabuka morolamsiba, Allah kekelamnukce, na morolamse touk, ubuka lyelamnuke. Nara, amu tam ununye bukni, ikin ning weik winilamse ning nirya ara, elce lopdeipnukba, na ikin uamnuk ning nirya, kum daneipnukba, teleb kanye bobuka unune.

⁸ Sikda Allah elti, ‘Weik Mambulnye ulula ati ara, eluk talibuka unamabe’ tenen, Allah ati, ilil tenebikirye, el siuk erenyak ninye ara, Allah Yahweh, el im deice pil donanye malaikat, sik dam ulule. Aninye dam kalikilirye, sik weik imun winipmalye ning nirya ati, melibuka lyelolule.

⁹ Dan ninye do nirya, Allah Yahweh, el winilye ning nirya, moubuka dipdemunce, anggun babye kel bikinamlume. Allah Yahweh arye, winilye ning nirya ara, pia telebuk winilule. Ati, yata ninye do nirya sikce, ‘Se, Allah el dem arye kalikuka melinamsil’ tenen, Allah el amu tamuk unyak ninye nirya ara, Allah arye meliliba, sik telebuk wininamake.

¹⁰ Ati ara, Allah arye wipdeiamsuk ninye nirya arye, el atibuk, ‘Se, nun ni Allah Yahweh, weik mambulnye ulule. Elda pia telebe’ tenen, el amu tam unamabe. Ara, talye ati kum nyapne. Allah Yahweh ati, ilil upliba, ‘Elda weik mambulnye winilula ati ara, el amu tamuk unamabe’ tenen, unyak ninye nirya ara, sik kam una ati, patalul ning nirya arelule. Sik kam una ati patalul ning nirya, kum kum danamle.

¹¹ Aning atonun, bai tam ulamle weik kuse atonun ning, weik yu ning, el si ara, singa kuse, el din ning ton kum uplirye, din kum diplyopura, mikip kum ulule. Bukni, nun ni koproba Allah Yahweh ati, si erebuka ukirye, ‘El dem aniryuk lyenamsil’ tenen, el amu tamuk unyak ninye nirya ara, teleb ning ati, kum patalule. Sik kam una ati, teleb ning nirya arepliba, kanye imun ton kum ulule. Aning nirya ara, sik dam pia aunamle.

¹² Se na mapu, na dam yamunce, narye nyapsinye yupu, moubuka kekepnululume. Nunce, ‘Se, nun ni Allah Yahweh, elda weik mambulnye ulule ati, elda pia teleb’ tenen, ‘El amu tamuk unamap,’ tenenyap ning nirya ara, narye peterenamsine. Peterepsinyopura, anggunce Allah Yahweh, el siuk erebuka, si erenamlulume.

¹³ Dan ninye do nirya, anggun kan-kan noutamak arye, ‘Nunda lo tuba upsiliba, kam unamap talak nirya, teleb kanye deibuka unamabe. Tonda, nun kam unamap talak ara, weik lo arepsutuba, keting tamun weika arye, tonap kam uptibye,’ tenen, patasulul ninye nirya ara, narye nyapnusin yupu, moubuka kekenamlume. Anggunce teleb wininamlum ning ara, ani.

¹⁴ Anggun sitang deice arye, ‘Malye yupu tabipyak’ tenen, pia moubuka kalikelanamlulume. Tonda, anggun sitang deice arye, tilila yupu ap, tenepce arye nyana yupu ap, pia kum nyanamlulume.

¹⁵ Tonda, yata malye winin ning do nirya, ‘Malye kum winiptibye’ tenen, malye winin ning nirya ara, batakmunce, diksukum winin ninguk, talibuka wininamlulume. Winipmunce anggun ap, anggun kayapu ap ati, olana ap, yupu si dalana ap, kum diparyuk, yuk ninye ap ansinibuka, kanye talima dukdongobuka, neika unamlulume. Anggunce, ‘Se, yuk ninye ap, ansinibuka teleb kibuka neika unamabe’ tenen, pia pi dobuka, diksukumuk wininamlulume.

¹⁶ Dan ninye do nirya, malye winin ning nirya ara, batakikirye, Allah ati diba tenebuka, diksukumuk wininyak ninye ati ara, Allah Yahweh arye, pia tuba kalikilule. Winilula ati ara, ikin ning, sik dam yaliba, “Nun ni Allah, nun kanye imun upmasila ati, melipsilyame,” nyabuka, morobikce talak ara, adiparyuk kekebuka melilule.

¹⁷ Bukni, malye ninguk talibuka wininyak ninye nirya ati ara, Allah el yu ara, sik nong deice deiplirye, sik wenena ati, ikin ning weik arelule. Winibuka winilul ning ara, talye ati kume. Allah arye tenelul ning ara, ‘Sik amalye wininyak ninye wenebuka oplyopura, sik anang dibikiba, yuk ninye mutuku-mutuku nirya arye, sik amalye winilamikce ninye ap, malye winilamikce ning ap nirya ara, adiparyuk luba kinamake’ tenen, amalye winin ninye ati wenelule.

¹⁸ Malye ning nirya batakuka, diksukumuk winikirye, Allah el amu tam unyak ninye ara, sikce, “Se, nun ni Allah Yahweh, melipsilyame,” nyabuka morobikce talak nirya ara, Allah kekeplirye, sik morobikce ning atonunuk, kibuka melilule. Sik ikin ning weik ulamlya noutamak, elce lyebuka doproplirye, sik ikin ulamlye ning nirya, kum kipdeipliba, teleb kanye bobuka unyake.

¹⁹ Ninye ikin ning dopdobikirye, kanye talima uk dipliba, imun kanye bobuka unyake. Wininyak talak ara, kanye lamapdongobuka unyak ninye arye, tenelamak ning kum winipmanto kibikirye, ‘Se’ tenen, malye kanye bolamak talak ap, pia engenauk ulamak talak ap, Allah Yahweh arye, ‘Sik talima pum tam melipnamle’ tenen, sik aninye dam, ulirye lyelolule.

²⁰ Dipkoprop, Allah ati diba tenebuka, diksukumuk wininyak ninye nirya babye, weik imun ning, sik dam ton, pia weika arye yaliba ngalukunyake. Bukni, aning nirya ara, Allah Yahweh elce kekebuka elilule. Eiplirye, sik aninye dam ulirye, lyelolule.

²¹ Allah arye, sik diksukumuk wininyak ninye ati, sik nong nirya ara, melibuka dilule. Tonda, ‘Sik yok babye, tonok ton kum copnamle’ tenen, Allah arye aninye ati, pia moubuka kalikilule.

²² Tonda yu kanye bobuka, pia malye winin ninguk talibuka, wininyak ninye ara, sikce amalye ninguk wininyaka deice arye, sik bidamnyeuk olanamake. Sik bidamnye, malye wininyaka deice arye dipnamake. Tonda, Allah ati dib tenebikirye, diksukumuk wininyak ninye ara, yuk nang arye sikti, wilibuka deibikirye, ‘Aninye nun like ati ara, olbinuyabe,’ tenebuka, unyak ninye nirya ara, Allah arye, sik aninye ati, wenebuka oplopnamlarya.

²³ Allah elti, dib tenebikirye, el amu tam ukirye, el pil melibuka donyak ninye ati ara, teleb kipdeiplirye, lyelonamle. Yata ninye do nirya, ‘Kume, nun ni koproba Allah Yahweh, el dem arye lyenamsil’ tenen, el amu tam unyak ninye nirya ara, Allah arye aninye ati, wenebuka kum opnamle. Wenena ning, sik dam ton, pia kum delinamle. Aninye ati, telebuk winilinamle.