Mazmur 33 - Eipomek

Mot sena deice arye, “Israel ninye talibuka ulyam Allah ara, pia telebe,” nyabuk yupu

¹ Se, anggun malye ning nirya bataklumce, diksukumuk winilulum ninye nirya ara, nun ni koproba Allah Yahweh ati, kanye deipmunce, mot nyabuka, Allah el si erenamlulume. Teleb kibuka wininyak ninye arye, Allah ati, “Anda pia telebe,” nyabuka, mot senyaka ara, pia telebe.

² Allah Yahweh, el si erena ati, mot senamlum talak ara, mot selamak ning el si ara, kecapi deice arye, mot nyanamlulume. Aning atonun, mot selamak ning bilkong, el si ara gambus, tapu tagu barye, tapu sepuluh uplye ning dobuka, Allah ati, “Telebe,” nyabuka, aning deice mot nyamunce, el si erenamlulume.

³ Tonda kanye lon mot, winiryuk mot aning-aning nirya wibukapmunce, Allah ati si erenamlulume. Mot selamak ning, el si ara kecapi dobuka, weik kel deice arye, teleb kibuka mot nyanamlulume.

⁴ Allah el yupu deice arye nyasilye yupu nirya ara, dipkoproba uk ulule. Elce nunti, “Wininamsine,” nyabuka nyalisilye touk, aning nirya, pil dobuka, telebuk winisulula ati ara, elce nyasilye yupu nirya ati ara, diba pia tenenyabe. Allah elce wibuka deiamsuk ninye ara, pia kum batakasulul bukni, elce nyasilye touk, pil dobuka usulule.

⁵ Malye winina pia kum diparyuk, teleb winin ning nirya ara, Allah arye kanye delilule. Tonda, ninye yu kanye bolana kumce, ninye yupu lipsisikuka bokolina ati, ninye winilamice touk, pia diksukumuk bokuka lipsisikna ara, Allah arye kanye delilule. Tukwak mutuku-mutuku nirya ara, Allah arye nunti bico tenebuka, weika arye melisulul ning ara, pia langdibuka ulule. Allah arye bico tenesilirye, melisulul ning ara, pia kum batakalule. Pia ati bico tenesilirye, teleb winilisulule.

⁶ Allah Yahweh arye, el kanye aniryuk, yupu nyapdeibukba, adiparyuk, im deice ap, im noutamak ulul ning nirya ap, kwepdeibuk. Im noutamak ulul ning nirya ara, keting ap, wala ap, kurya ap nirya ara, Allah Yahweh arye, ‘Kwepdeipnune,’ tenebukce, yupu nyapdeibukba, adiparyuk, laka ubuk.

⁷ Tonda, Allah arye, weik pala laut mekwen nirya bulubukabukce, tonokak deibuk. Atonun, laut mekwen nirya bulubukabukce, ‘Amek ara, asukumuk unamle’ tenen, weik laut mekwen delinak, yuk kwepdeibukba, amek ara, yukak kum bitue. Asukumuk ulule.

⁸ Aning ati ara, ninye mutuku-mutuku nirya, Allah ati ilil unamsile. Tonda, nun ni koproba Allah atibuk, “Se, elda weik mambulnye winilule,” nyabuka, nun tukwak mutuku unyap ninye nirya arye, el tibuk si erenamabe.

⁹ Ara, talye ati kume. Deiyok ara, Allah elce, “Aning-aning nirya, wini talak winipnule,” nyabukba, adiparyuk, aning-aning nirya anyapmok touk, kikliman kibuk. Aning atonun, elce ayupu nyabuk talak aryuk, aning-aning nirya, lakak kibukce, pia darabuka winilule. El yupu nyabuka, deice aniryuk, aning ayala-ayala nirya, kwepdeibukba, lakak kibuk.

¹⁰ Ninye im sirya, mutuku sirya nirya arye, ‘Nun mikip aniryuk wininamabe,’ tenenyak ning nirya ara, Allah arye kum kibuka delilule. Dan mutuku ninye do nirya, ninye tukwak ninye ayala-ayala nirya arye, ‘Winiptibye,’ tenenyak ning nirya, Allah arye kum kibuka delilule.

¹¹ Bukni, Allah Yahweh arye, ‘Wininamne,’ tenelye ning nirya ara, dipkoprob winilirye, pia ati wininamle. Atonun, Allah el kanye talima pum tam tenelye ning nirya ara, dipkoprob tenelye touk winilulba, aning ara, kum kum danamle. Elce dolul ning ara, pia aunamla ati ara, ninye arye mapu deibikceba, dadeipdanin banamak ninye nirya babye, Allah arye pil dolul ning elinamake.

¹² Yata mutuku unyak ninye do nirya, ninye mutuku-mutuku nirya arye, “Nun ni Allah ara, Yahweh ulule. Elcuk talisiliba, nunda el amu tam unamabe,” nyabuka, unyak ninye nirya ara, Allah arye melilamliba, sikda kanye deibuka telebuk wininamake. Tonda, Allah arye, ‘Sikda ‘Naʼ tenen, ninye unamake’ tenen, wibuka delilul ninye ara, el mapu koproba unyaka ati ara, melipliba sikda telebuk wininamake.

¹³ Tukwak mutuku-mutuku nirya noutamak unyak ninye nirya ati, Allah Yahweh im deice ulirye disulule.

¹⁴ Tonda, Allah el im deice ululak arye, tukwak mutuku unyak ninye nirya ati, ‘Yata wininamak do?’ tenen, disulule.

¹⁵ Allah arye tukwak mutuku noutamak im mutuku-mutuku nirya unyak ninye, anggun kanye talima, elce kwepdeipsuka ati ara, nun tenenyap ning ap, wininyap ning nirya ap ara, akunum tenelirye, kel bikisulule. Ninye talima pum tam ulul ning, elcuk disulula anya arye, nun wininyap ning nirya eipsilirye, kel bikisulule. Nun kum duknuptibye.

¹⁶ Tonok mutuku ninye arye, ‘Omutuku unyak ninye ap, sik ninye deiyoknye Raja ap, olbinuyabe,’ tenebikirye, olbinmating buk, otam mutuku ninye deiyoknye birye, ‘Sik opnikcak’ tenen, el yin talin nang, yupa pia weik kintinip deiptua babye, kum lyepdatue. Aning atonun, el amu tam yin talinanye birye, ‘Nara, mikip weiknye anya arye, na mining mikip deice arye, yuk nang obuka lyepdatinye,’ teneptua babye, anye babye, el mining mikip aryuk, kum melibuka lyepdatue.

¹⁷ Tonda, kuda basam weik arye neplirye, el mikip weik uptua babye, anggunce, ‘Kume nun kuda basam balye deice bukibirye, nun mal olan nang ati, obuka sirya daktibye,’ tenena meme. Kuda basam mikip weik ning aupmatua babye, el mikip deice arye, nun kum lyepdatibye.

¹⁸ Nun mikip deice arye kum lyepdatibye bukni, dipkoproba Allah ati, ilil tenebikirye, ‘Elda weik mambule. El amu tamuk unamabe’ tenen, el tibuk talibuka unyak ninye ara, Allah Yahweh elce elilulce, melibuka lyelolule. Tonda, anggun aninye ara, ‘Allah Yahweh arye, kum bataknamsile. Elda, bico tenesilirye, pia melibuka lyelonamsil’ tenen, el tibuk kintinibuka dinauk unyak ninye ara, Allah arye, pia melibuka kalikilule.

¹⁹ Allah arye aninye ati, ‘Uk dina do, ninye olana do, ikin ning arye do, ‘Na, tenen ninye oplyak’ tenen, pia melibuka wininamle. Atonun, ‘Din ning kum upliba, din ning patana deice arye, dibikcak’ tenen, el ‘Naʼ tenen ninye ati, pia melibuka kalikilule.

²⁰ Ati ara, nun nirya arye, ‘Nun ni Allah Yahweh arye, melibuka lyelonamsil talak ara, dan talak arye yanuka lyepdopnamsil do?’ tenen, kintinibuka, dinauk unamabe. Winipmanto ara, ninye arye mal olalbalamak talak ara, ‘Yuk nang mal dobikiba, opsilyak’ tenen, kelapye dobuka lelipdakirye, olbalamaka atonun, nun ni koproba Allah arye, nunti melibuka lyesulule.

²¹ Diba Allah ap, nun ap, kanye talima dukdongobuka unyaba deice arye, pin-pin asa deiceuk unamabe. Ara, talye ati kume. Nun ni Allah, elda malye ning tonok ning babye, kum winilirye, el si ara, pia mambul weik winilule. ‘Elcuk melibuka lyelonamsil’ tenen, el tibuk, diba tenebibirye, el talibuka unyabe. “Allah elda dipkopropnye winilule,” nyabuka, el siuk erenamabe.

²² Nun ni Allah Yahweh, ‘Nun batakna kumce, pia bico tenesimince, teleb kibuka melinamsilam’ tenen, moropkiyabe. Ara, nunce anti, ‘Nun ni Allah, el dem arye melibuka lyelonamsil’ tenen, antibuk kintinibuka dinauk unamkiyabe. Winibuka tenebibirye, antibuk talibuka unamap talak nirya ara, ‘Ance melibuka, teleb ulinamsilam’ tenen, moropkiyabe, na nio.