Mazmur 31 - Eipomek

Raja Daud birye, Allah ati, pia weik tonun, diba tenelamuka ati, Allah ati morobuk yupu

¹ Raja Daud birye, ‘Allah yupu mot nyana deiyoknye arepnamika ati, amot nyan yupu sekuk.

² Se, na ni koproba Allah Yahweh, anda, ‘Ikin ning na dam yanilyak’ tenen, ‘Ancuk nati, melibuka kalikinamnilam’ tenen, morokunune. Tonda, ‘Yu nang arye do, yuk ikin ning arye do, ikin upnilya babye, melipnamnilamba, alye kum daknamne’ tenen, morokunune na nio. Alye kum daknamne bukni, anda diksukum ulyam ning ap, ance nyapdeiamsulum yupu ap deice arye, na ikin unilye noutam arye, ‘An Allah arye melibuka lyepnamnilam’ tenen, moropkine na nio.

³ Ati na ni Allah, ‘Narye anti, pia morokinye ning nirya ara, moubuka kekepnilyam’ tenen, moropkine. Ara, ‘Naio an kekepnimince, na ikin unulul noutam arye, lobuka lyepnamnilam’ tenen, moropkine. Tonda, winipmanto ning ara, weik mutuku kon bukamlya dong tam, keil deiya dam duknuptinyeba, ‘Teleb kipdeipnamnilamʼ tenen, moropkine. Na nio ‘Ance talipnimince, kalikinamnilamʼ tenen, moropkine. Tonda, ninye arye, ‘Nun on nang arye, yanuka opsikcak’ tenen, weik keil aik poka dobikirye, anoutam ulamak touk, ‘An dam tuba uptinyopura, ancuk nati, melibuka kalikinamnilam’ tenen, moropkine na nio.

⁴ Dipkoprob, ancuk pia melibuka kalikinilyama ati, winipmanto ning ara, anda weik mutuku dup bulamle keil ap, weik keil arye deibuka, domikce asik ap, atonun unilyame. Ati narye, moropkine. ‘Naio, ance nati, “Aning ara, wininamlame, abisikuk binulyame. Teleb winin ning ara, ani,” nyabuka, ‘Peterenimince, melinamnilam’ tenen, moropkine. ‘Winipminyopura, yuk nang nirya eibikirye, an siuk erenamkiak’ tenen, moropkine.

⁵ Tonda, yu nang arye nati, ‘Anye bira, opnuyap’ tenen, ninye onak akunum kintibikce, ninye on ning, el si jaring, dungnubuka deibika noutam arye, ‘Ance lobuka lyepnamnilam’ tenen, moropkine na nio! Aning ara, talye ati, kum morokunune. Kume, ‘Na on nang arye, opnikcak’ tenen, an damuk yanuka unune. Tonda, anda, na Lyena Deiyoknye unilyama ati, antibuk morokunune na nio.

⁶ Na ni Allah Yahweh, anda batakna kumce, pia tuba-tuba melinilyama ati, ance na ikin ulamse talak nirya ara, ance akunum melibuka lyepnulume. Ati ara, na kam una ap, na nong nirya ara, an taruk deiceuk, dobuka deipkine.

⁷ Na ni Allaho, an kele, yuk nang arye, ‘Nun ni koproba ani,’ tenebikirye, isa si erena ati, talye ning memebuka deibikirye, aning ati si erenyake. Aning wininyak ning nirya ara, narye, ‘Na pia lik,’ tenenune. Ara, talye isa ati, talibuka kum wininun bukni, nara an Allah Yahweh atibuk, pia dib tenekinirye, an deiceuk, na kanye talima nirya ara, delikunune.

⁸ Allah anda narye pia, “Bico tenekinirye, narye anti, winibuka pia teleb kipdeipnamkine,” nyalin yupu deice arye, nyapdeiamkise ning nirya ara, ‘Batakna kumce, pia melinamkine,’ nyanilyama ati, kanye deipnirye, telebuk wininamne. Ara, na ona ati yu nang arye, warebuka dininyak nang ati, ance akunum eibuka, nati akunum melinimince, lyelonilyama ati, pia kanye deipkine na nio.

⁹ Tonda, ance nati, ‘Dauaplye, anye el on nang arye, daopnamak,’ tenen, kum bataknulumba, sik taruk arye talibuka, kum onininyaka ati, ‘Telebe,’ nyapkine na nio. Bataka kum winipnulumce, na ikin unulul noutam ara, akunum lobuka lyelonilyama ati, ninye opmanto mutuku noutam, pia kum unune. Talya teleb asa unune.

¹⁰ Se, na ni Allah Yahweho, wini talak ara, ikin pia weik unilya deice arye, imun weik kanye bobuka unmana ati, anda, ‘Weik tonun bico tenepnimince, melibuka lyepnamnilam’ tenen, moropkine na nio. Na ikin unulul ning nirya ara, pia engenauk ununa ati, na asing ap, na nong ap, na kanye talima nirya ara, pia mitang diamuk upnile.

¹¹ Aning ara, talye ati kum nyapne. Deiyok ara, ikin weik uniliba, imun kanye bobuka ununa ati, na kam unye talak nirya, engenauk unune. Tonda, asum-asum nirya ap, aketing tamun, aketing tamun noutam nirya ara, narye ‘Se, yata winiptinye do?’ nyabuka ngalukunauk unune. Tonda, asum-asum nirya ap, aketing tamun, aketing tamun noutam nirya ara, narye, ‘Se, yata winiptinye do?’ tenen, malye nyabuka unune. Na nong ap, na nong noutam unilye yok nirya ara, pia mitanguk unulula ati, winipmanto ara, na yok babye, pia kum danin banulule.

¹² Ati, na on nang nirya, eipnikirye, ‘Moubuka, ikin ulule,’ nyabuka nalibuka, malye nyaninyake. Aning atonun, na aik dam unyak nang eipnikirye, ilil weik upliba, sikce, ‘Se, anye akunum nong bol, pia malyeuk ulule. Nun ton winipsilyak’ tenen, ‘El dam ton pia kum binamabe,’ tenenyake. Tonda, na kayapu nang arye, nati akunum eibuka, kel bikamnik nang nirya, eipnikirye, ‘Se, anye bira, pia weik uk dilamukba, elda akunum nong bol malye weik ulule,’ nyaninyake. Ati, yata nang do nirya, nun asik noutam bisik banmakirye, eipnikcopura, ‘Se, aning ara, nun deice dakdongopsilyak’ tenen, adiparyuk leibuka balonyake.

¹³ Wininuna ati, yata nang do nirya, amutuku unyak nang arye, nati, tuba tonap kum teneninyake. Nati, akunum luba kipnike. Ara, ninye nirya arye, nati, ‘Se, anye bira, akunum dipmanto ubuka ati, daupmalye, el dadipnamle’ teneninyake. Winipmanto ara, mitik mek makau, kira tuku arye, kintinibuka deipmapya ani, aminyan talak aning coplyopura, bai tam donokipyeba, tamubuka dona kumce, luba kilamap touk, uptue,’ teneninyake.

¹⁴ Se, na on nang arye, ‘Anye opnamabe!’ nyabuka, yupu mur-mur abuka sisikinyakce, malye yupu nyakce nang ara, na ton kekenune. Ati, na dana-dana tam nirya ara, na ilil kilininyak ning nirya ara, pia weik aulule. Ara, na on nang arye, ‘Anye opnuyabe,’ nyabikirye, sikce, ‘Yata wiriptibya deice arye, anye optibye do?’ tenen, dungnubuka, yupu talinyake.

¹⁵ Sikda, wininyak bukni, narye si erenun Allah ara, an ulyame. Ati, na ni Allah Yahweh, antibuk, diba tenepnirye, na kanye nirya ara, an deiceuk delikunune.

¹⁶ Ati, na kam tuba unamne talak nirya ara, ance akunum tenepnimince, ‘Winibuka-winibuka unamle talak ara, el dipnamle,’ akunum tenyamnuluma ati, na kam un ning ara, an taruk deiceuk deipkine. An tibuk diba tenekunune. Na nio, ikin ning dobuka, na nong deice delininyak nang ap, nati, ‘Anye opnuyabe,’ teneninyak nang ap ara, ‘Ancuk sik dam arye, nati lyepdopnamnilam’ tenen, moropkine na nio.

¹⁷ Ati na nio anda, ‘Weik tonun bico tenepnutumce, an amu tam pil donanye, nati, kanye deipnutumce, lyepnutum’ tenen, moropkine. Ance, nati, ‘Bico tenyamnulumce, tuba-tuba melinamkine,’ nyabuka, ‘Nyalin yupu deice arye, nyapdeipnulum ning nirya ara, anyapnulum touk winibuka, lyepdopnutum’ tenen, moropkine.

¹⁸ Se, na ni Allah Yahweh! Narye anti, ‘Naio melibuka lyepnilyame!’ nyabuka, engepnirye, anti morokununa ati, ‘Na on nang arye, yanuka opnikcopura, alye dakdanyak’ tenen, moropkine na nio. Bukni, sik malye ninguk talibuka, malye-malye winin ning atibuk, weik tonun wininyak nang nirya ara, ‘Ance sikti, wenepminba, alye weik dakdanamak’ tenen, moropkine. Tonda, sik yu nang ati, weik tonun wenepminyopura, sikce, ‘Se, yata wiripmasil do?’ tenen, teninauk ubikirye, imun kanye bobuka, uku bisik binamak mutuku, el si Sheol bitinge’ tenen, moropkine.

¹⁹ Tonda, sik talye-talye yupu uk nyakce nang ara, sik wenena ati, yupu kum kipdeipminba, ‘Talye lup nang ulamak touk, upnamak’ tenen, moropkine na nio. Ara, sik anang arye, ‘Nunda dipkoprob uk kibuka, wininyap nang,’ nyabuka, erelakirye, nunti malye kisinyakce, malye yupu nyasinyak nang nirya ati, nyapkine. Pia maknya kintinikirye, kwalinyaka deice arye, nunti, nalisinyake.

²⁰ Bukni, nun ni Allah, anda weik tonun bico tenesilyam ning ara, nukman kumto ulule! Ara, anti, pia diba tenebuka, ‘Allah arye nyasilye yupu moubuka talibibirye, dipkoprob uk wininamabe,’ tenen, anti ilil tenenyak nang ati ara, ance, ‘Sik ti, aminyan talak arepnamne’ tenen, pia teleb ning akunum kintinibuka deilisilyame. Tonda, ikin uplye talak ara, sikce, ‘Kume, Allah damuk bipyeba, elcuk melibuka kalikinamsilʼ tenen, an dam tuba banauk unyak nang ati, pia teleb kipdeipnamsilame. Tonda, anti diba tenekinyak nang ara, ance sikti, lak arye teleb kilinamlam talak ara, yuk-yuk nang nirya eibikirye, biknamake.

²¹ Na nio, anti diba tenekinyak nang nirya ara, an dam dungnup deipsimince, ancuk dungnubuka kalikinamsilame. Ara, ‘Malye wininyak yu nang arye, ‘Naʼ tenen nang obikcak’ tenen, anti diba tenekinyak nang nirya ara, an damuk dobuka deipsiminba, telebuk wininamabe. Winibuka, an damuk deipsiminyopura, yu nang arye, malye yupu yanuka, kum nyapsitinge.

²² Se, na ni koproba Allah Yahweh ara, ‘Anda pia telebe,’ nyapkine! Ara, talye ati kum bukni, deiyok ara ani. Ara, ance nati, “Nyalin yupu deice arye, ‘Winibuka teleb kipdeipnamkine,’ nyabuka, nyapdeipkise ning nirya ara, dipkoprob pia, melibuka arenamkine. Tonda, pia kum bataknamsine,” nyabuka, nati nyapdeipnulum ning nirya ara, lak kibuka peterenilyama ati, ‘Telebe,’ nyakunune. Aning ara, nara weik asik dungnubuka ulamsiba, na on nang arye, ‘Anye opnuyap’ tenen, yanuka wareklamnik talak ara, an Allah arye, ayupu nyapdeipnulume.

²³ Atalak ara, na kanye ara, ilil weik upnuk talak ara, narye ayupu nyapse. Ara, “Se, nara Allah dam kum unune. Na on nang arye, pia yuk mutuku noutam bobinamnikba, asukumuk ununa ati, Allah arye eibuka, pia kum melipnutue,” nyabuka, malye nyabuka engepse. Bukni, narye Allah anti, moropkise ning nirya ara, ance akunum kekepnulume. Ara, narye anti, ‘Naio, ancuk na melipnilyame!’ nyabuka, moropkise yupu ara, ance akunum kekepnulumce, melipnulume.

²⁴ Ati ara, Allah arye nunti, ‘Pia ‘Naʼ tenen, nang ara, ani. ‘Anggun ti bico tenesunune,’ nyabuka, wibuka deipsulumba, nunce anti, dobolbakinyap nang nirya arye, Allah Yahweh ati, nun kanye talima, el deiceuk delinamabe. Allah Yahweh arye, ‘Aning ara, wininamlume. Aning ara, pia kum wininamlume,’ nyalisulul yupu, moubuka kekebikirye, aninguk talibuka wininyak nang nirya ara, Allah arye, pia kalekuka talisulule.