Mazmur 30 - Eipomek

Pia weik uk dilamnukba, Allah arye lyepdopnuka ati, ‘Telebe nyan mot nyanamne,’ nyabuk yupu

¹ Raja Daud birye, Mazmur yupu mot nyana ati, sekuk. AMazmur mot sekuk ning ara, Allah el si erena ati, lek aik bublan kukuna ap, weik kwalya kwalina ap ati, asum arye sekuk.

² Se na ni Allah Yahweh, narye anti, ‘Anda pia teleb ulyame,’ nyabuka, an si ati erepnirye, anti pia si erebuka kinamkine. Deiyok ara ani. Ara, pia weik uk dinulul bukni, ance kwetepnulumce, lyepdopnulume. Tonda, na mitang ulamnuk talak ara, na on nang arye, ‘Anye obibyopura, kanye deipnamap’ tenen, yanuka piripnik bukni, Allah ance melipnuluma deice arye, sikce kum opnike.

³ Se, na si erenun Allah, na ni koproba Yahweh, na ikin unulul talak nirya ara, ‘Naio, ance melibuka kwetepnilyame,’ nyabuka, engebuka moronune. Ikin ulamnuk talak nirya ara, moropse ning ara, amoropkise touk, ance na melibuka kwetepnulume.

⁴ Se, na ni Allah Yahweh, na akunum dipmanto ulamse bukni, ance kwetepnuluma ati, sik akunum diamikba, tuku lukamik nang dam kum bise. Kam tuba unune. Allah ance akunum kwetepnulumce, teleb kipdeipmanilama ati, wini talak kum dipnamne.

⁵ Amapo, Allah ati, batakna kumce, pia diba tenebuka, eluk tuba talilum nang nirya ara, nun ni koproba Allah Yahweh ati, kanye delin mot nyapmunyakarye, el siuk erenamlume. Tonda, nun ni Allah ara, malye un ning tonok babye kum ulirye, pia teleb, Leknye ulula ati ara, elti, ‘Telebe,’ nyabuka, si erebuka kinamlume.

⁶ Ton talak ara, Allah el yu upliba, wenesulul bukni, se mitik tonunuk, yu tenesulule. Bukni, elce bico tenesilirye, kanye delisulul ning ara, pia weik tonun tenesulule. Ara, nun kam unamap talak nirya ara, bico tenesilirye, pia telebuk kilisulule. Aning atonun, nun ikin usiliba, lukunyan noutam nirya engenyap bukni, mapmapya, beren tam talak ara, Allah arye melisilyeba, kanye deibibirye, weik yupu deice arye, ‘Telebe,’ nyanamabe!

⁷ Ura, nara, aning-aning teleb wamnuk talak noutam ara, narye, nyalamse. “Kume, yata ikin ning do nirya, na dam yanutua babye, imun kanye bobuka kum unamne. Talya kanye deibuka, telebuk unamne!” nyalamse.

⁸ Bukni, dipkoprob wamnuk ning ara, ani. Ara, anda Allah Yahweh arye, kanye deiamnulum talak arye, pia teleb kipdeipnulumba, na mikip weiknye ulamse. Winipmanto ara, weik mutuku bukamlirye, lokman kumto ulamle touk, ulamse. Bukni, winipmanto ara, ance nati, donga tamubuka, yukakuk dimince, nati tuba kum kalekuka melilamnulumba, ‘Se’ tenen, na talima daksaknukba, imun kanye bobuka ulamse.

⁹ Atalak noutam arye, narye anti, ‘Se, na ni Allaho, na melipnilyame,’ nyabuka, ngalukna deice arye, malye nyabuka moropkise. Ara, narye Allah ati, pia mikip weiknye ulula ati, elce aning-aning nirya talibuka, deice tam ulirye, elce teniplye touk winilula ati, narye elti, ‘Melibuka lyepnilyame,’ nyabuka moropse.

¹⁰ Se, na ni Allaho, uk arye do, yu nang arye opnikiba, na akunum dipnyopura, yata teleb ning ton winipnamne do? Na nio, yata ati, talye dadipnamne do? Ara, na dipniba, tuku lukuka weipnikcopura, na nong nirya tuku danamne ati, talye kel-kel an tuku arye anti, ‘Telebe,’ nyabuka, an si erepkutu do? Kume, aning pia kum winipmanto. Akunum dipnyopura, narye yuk nang kekena ati, ‘Nun ni Allah, batakna kumce, pia tuba-tuba melibuka lyelosulule,’ nyabuka, laka nyaptinye do? Kume, aning ara, pia kum winipmantoe.

¹¹ Ati ara, na ni Allah Yahweh, ‘Bico tenepnutumce, melibuka lyepnutum’ tenen, moropkine na nio. Anda Allah Yahweh arye, ‘Na Melinanye, tonda na Lyena Deiyoknye unilyama ati, pia moropkine na nio!

¹² Minop talak babye, wini talak babye, na ikin weik unulule. Tonda, na imun kanye bobuka unye talak nirya ara, ancuk, na engenun ning ara, kum kipdeipnimince, aning punubuka, kanye delin ninguk arepniminyeba, kanye kil-kil asa unune. Tonda, imun kanye bobuka engena ati, lak kin ning ara, na teleb baju kwilikuka bataksirye, malye baju, el si karum koni, ongopse ning ara, ance akunum dopropnulume. Na ikin weik wamnuk ning, akunum kum kipdeipnulumce, kanye delina ap, pin-pin kanye una ap, akunum arepnulumba, akunum aninguk, talibuka teleb unune.

¹³ Ati ara, wini talak na kanye pum tam arye, anda, na Allah ati, ‘Anda pia telebe,’ nyapkinirye, anti kanye deibuka, an si erenamkine. Dipkoprob, yupu nyana kumce, tuba kum wininamne. Anye kum bukni, tuba-tuba anti, an si erebuka kinamkine. Se, na ni Allah Yahweh, an si tuba erekunune, Anti diba tenenune. Ati ara, ancuk, ‘Pia telebuk kilinilyame,’ nyabuka, an si erekinirye, tuba-tuba, ‘Telebe,’ nyanamkine.