Mazmur 3 - Eipomek

Imun kanye bobuka unyap talak ara, nun ni Allah ati, diba tenebibirye, ‘Elcuk lyepdopnamsilʼ tenen, “Nun kanye talima nirya, el deiceuk deibibirye, mot nyanamabe,” nyabuk yupu

¹ Raja Daud elce deibuknye, Absalom birye, ‘Na ni koproba opnamneʼ tenebuk talak ara, Daud ilil ubuk ati, bikbik abuka bindobuk talak arye, aMazmur yupu sekuk. Daud birye nyabuk yupu ara, ani.

² Se, diba na ni Allah Yahweh, yu nang arye, ‘Anye Daud bira batakibirye, elti, opnamabe,’ tenen, kintinibuka, mal pibuka doboninyak nang ara, yupa pia weik unyake. Diba ninye yupa weik arye, ‘Raja Daud bira, nun lik ati, tuba kum talinamsile,’ tenebikirye, olyanganinyake.

³ Sik anang yupa weik arye, nati nyaninyake. “Nun kele, dipkoprob an ni Allah bira, anti pia kum melibuka lyepropnamkile. An mal olan nang arye yanuka opnamkiake,” nyabuka nyaninyake.

⁴ Sikce nyaninyak bukni, na ni Allah na kele. An Yahweh ara, ‘Yu nang arye, Daud obicakʼ tenen, nati pia melibuka kalikinilyame. Winipmanto ara, yin talin nang arye, ‘Yuk nang arye, mal pibuka dobikirye, opnicakʼ tenen, sikce sik nong lelina ati, talinyak nang, el si ara perisai, dobuka kalikilanyak atonun, ance na nong dana-dana tam nirya, warikdongobuka lelipnimince, kalikuka melinamnilame. Anda Allah Yahweh arye, na kisok erepnimince, mikip arepniminya deice arye, nara na mal olan nang ati, obuka sirya dakanune. Tonda ancuk, na talima kwadibuka meliniminyeura, kanye deibuka, urdem unune.

⁵ Na weik yupu nyanuna deice arye, “Na ni Allah Yahweh kekenilirye, elcuk na dam yanuka melibuka lyepnilyame!” nyabuka ngalukunune. Nyabuka ngaluknyopura, Allah el pia teleb lek mutuku dup deice arye yalirye, kekebuka melinulule.

⁶ Pia dikdik sepnun tenenun talak ara, ‘Mapnunʼ tenenʼ amsuna deice malbanune. Allah arye melibuka kalikinulul ati, na akunum mapmanya ani, aminyan talak, ila tamubuka buknyopura, talye kanye bobuka, telebuk unune. Deiyok ara, Allah Yahweh arye, pia melibuka kalikinululce, mikip kiliniliba, ila tamubuka, tonap teleb unun ati nyapne.

⁷ ‘Aning ati ara, na mal olan nang arye, nati, ‘Optibyeʼ tenen, na dam yanganyak ninye ara, yupa pia weik kum nukmanto sepuluh ribu (10.000) nang ton unmatinga babye, anang ati ara, ilil kum unamnile. Sik anang ara, ‘Anye Daud opnuyabe,’ tenebikirye, na dam dana-dana tam nirya, yanuka kalikmanikirye, wariknica babye, nara ilil kum unulule.

⁸ Se, “Na ni Allah Yahweh, anti morokunune. Ara, anda adiparyuk bukmince, na dam minop yatumce, melibuka lyepnutume!” nyabuka moropkine. Na dam yaminyeura, na ikin unilye noutam arye, melibuka lyepropnilyame na nio. Ara, talye ati kum nyapne. Nati, ‘Anye nun song ati ara, elti, oplopnuyabe,’ teneninyak nang nirya ara, an Allah arye, sik katum deice bokuka opnulyame! Sik yu weik unyak nang ara, ance obuka sirya daknulyame! Winipmanto ara, sik katum deice bobuka opminyopura, sik si nirya kuruksaknamle!

⁹ Diba, nun mal olan nang arye yanuka, onmasice talak ara, Allah Yahweh elcuk melibuka lyesulule! Yuk nang arye, kume. Ati ara, na ni Allah, ance ‘Na tenen ninye unamakʼ tenepsulum Israel ninye ati, ‘Pia teleb kilinamsilamʼ tenen, moropkiyabe na nio!