Mazmur 29 - Eipomek

Raja Daud birye, Mazmur yupu sekuk. Winipmanto ara, mikip weik kumanya ap, liman ap, bebeya lakana ap, pia mikip weik ulamle touk, Allah Yahweh el mikip ara, atonun ulule.

¹ Anggun im deice ululum malaikat nirya ap, yala yuk-yuk kam un ning ap ara, sikce Allah Yahweh ati, el si erebuka, ‘Se anda pia teleb ulyame. Anda, Pia Mikip Weiknye ulyame,’ nyabuka, si erenamlume.

² Aning nirya arye, Allah Yahweh ati, “Se, an ap, an si ap ara, pia teleb ulule. Anda, malye un ning ara, tonok babye ton, kum ukulula ati, Pia Teleb Leknye ulyama ati, nunce an siuk pia erekinyabe,” nyanamlume.

³ Allah Yahweh arye, nyalul yupu ara, weik laut mekwen deibuka, deice tam arye nyalule. Allah bira, mambul weik una ap, pia teleb una ap ululnye birye, laut mekwen noutam, el yupu weik tonun nyaplyopura, bebeya lakana ap, weik liman lelim ap, nyalamle touk, nyapliba kekenyake.

⁴ Allah Yahweh, el yupu mikip arye nyaplyopura, tukwak mutuku ninye, mutuku sirya, im sirya nirya unyak nang kekebikirye, ‘Se, Allah ara, pia mambul weiknye ulule. El urasin pia telebe,’ nyabikirye, elti, si erenamake.

⁵ Allah Yahweh arye, weik yupu nyaplyopura, cang weik yo pabuka tiklamle touk, tikilule. Ara, Libanon mutuku noutam tiklamuk kat yo, el si ara cemara yo tobuka, tukwak saklirye, bongolule.

⁶ Allah el yupu weik tonun nyaplyopura, Libanon mutuku nirya ara, Siryon mutuku tam ap, topnamle. Winipmanto ara, mitik sapi basam mi, bikbik abuka balirye, isin uplirye welepmana ani, koulukmana ani, kilamle touk, tukwak mutuku nirya babye, loknamle.

⁷ Allah Yahweh, el yupu ara, pia minopce nyalule. Winipmanto ara, bebeya talye karin arye, laklamle touk ulule. Tonda, weik uku buk dilamlirye, dirina weik ulamle touk, Allah el yupu babye, minopce nyapliba, mutuku sirya, im sirya nirya, daunyak nang arye kekenyake.

⁸ Allah Yahweh arye, el yupu weik tonun nyaplyopura, pia pera kata mutuku babye loknamle. Allah Yahweh, el yupu nyaplyopura, Kades mutuku ninye pia kum unyakak babye, loknamle.

⁹ Allah Yahweh arye, el yupu pia mikip arye nyaplyopura, bai mutuku yo kan-kan noutam, weik tonun tiklamuk yo nirya ara, weik kumanya arye yanuka, pu nyabuka, ayo nirya ara, lokukaplirye, pumalikliba, ayo bok nirya, adiparyuk daksaklirye, kum danin balule. Winiplyopura, Allah Yahweh el si eren aik pum noutam unyak nang arye, ‘Se, Allah ara, pia telebuk ulule,’ nyanamake.

¹⁰ Allah Yahweh bira, aning-aning nirya ap, weik laut mekwen ap, aning nirya deice tam bukuka ulirye, weik ninye deiyoknye ulule. Ninye deiyok kibuka, Raja ulirye, el bun ning, el si ara tahkta, adeice buklirye, aning-aning nirya, pia talinamle.

¹¹ Ati ara, ‘Allah Yahweh arye, ‘Naʼ tenen nang unamakʼ tenen, wipdeiamsuk nang ara, ‘Mikip weik arepnamsil’ tenen, moronyabe. Tonda, ‘Allah Yahweh arye, el ‘Naʼ tenen nang ati, ‘Pia teleb kipdeipsiliba, kanye deibuka, telebuk unamap’ tenen, moronyabe.